西班牙朝聖之路 (五十日長篇)

984 回覆
115 Like 3 Dislike
2019-01-24 03:02:24
留名

自己計劃左好多年都未有機會去
2019-01-24 03:39:01
由於大叔走左,今日再冇人同我一齊出門口,今次姑毒鳥。

我打算先行23公里去Belorado睇下狀態點樣,如果感覺ok嘅話就繼續行多5公里去 Tosantos,
所以一句講晒,隨機應變。

Charlie朝早就 whatsapp我話想自己行先,姐姐就同平時一樣叫我出發先唔駛等佢(不停重覆講呢句我都講到悶),所以繼第一日SJPP毒自上路後,我又開始左毒行嘅一日,感覺有啲唔習慣。







而且我發現自己一個人行嘅時候速度慢左好多,大約一個小時只係行到四公里,完全無動力行快啲。

去Belorado嘅路上會經過五個小鎮,即係平均每三四公里就有一個休息點,其實對我黎講係一個好消息,
因為自己一個人行嘅時候就可以坐幾耐都得,唔駛驚人地想走而急急腳起身一齊行。










基本上我每個小鎮都坐低十五二十每鐘,而姐姐雖然遲過我出發,但係佢就行得快過我,去到第四個鎮就已經過左我,所以佢比我仲要快半個鐘到 Belorado。

今日影嘅相亦都比平日多少少,因為行緊無聊嘅時候無計傾 ,所以就只可以影多幾張相。













一點嘅時候姐姐話佢已經到左Belorado,而我嗰陣仲有2km先到,
所以我就話等埋我呀、好快黎到、我唔想一個人喺烈日當空下行去Tosantos呀!


最後我加速黎到Belorado嘅廣場同姐姐會合。

有人歡迎我入城










Belorado 呢度有好多庇護所,成條村亦都幾靚,算係一個規模大少少嘅城鎮。

不過,我嘅同伴就話今日行23km覺得太少,可以再行多5km去Tosantos,即係一共28km。(點解咁似噚日大叔)


嗰時我心諗你地一個二個行咁快做乜,Belorado咁靚唔住喺度,竟然去一個全村只係得兩間庇護所嘅地方訓一晚?
我好肯定如果只係得我自己,我每日應該只係會行廿公里。

不過當時,我思索左都有十秒左右,就決定跟隊一齊行去 Tosantos~
我諗有一半係因為我唔想一個人住Belorado,覺得仲未係時候單飛,另一半就係因為我都想同姐姐係camino上行多一陣。


因為要慳錢,所以繼續行之前我要去士多,買翻條餅乾當午餐食先可以行多一個鐘。

由士多出番黎就見到姐姐坐左係到同個鬼佬傾計,原來佢地之前幾日一路上都遇到 ,因為姐姐每行一兩個鐘就會入bar唞下,而個外國人都係一樣,所以佢地就一直係唔同嘅 bar撞到。

咁我見佢地應該仲有排傾,所以就坐低一齊social下啦。

姐姐:我成日都見到你,但係永遠都見唔到你係邊度行過黎。上一秒明明冇人係我後面,下一秒你就突然出現左~~


鬼佬:因為我鍾意即興行下啲小路,有時一直行大路好悶,所以行下側邊啲冇人行嘅地方囉。好似今日咁,我穿過左一片農田,中間有條河仔攔住左,所以我仲要除鞋先行到過去,都幾好玩呀!


呢個人叫Eric,荷蘭人,係名符其實神出鬼沒,
因為佢係自己開路行,
所以有時係田既呢邊穿出黎,有時又係田既另一邊穿過去,
總之就係行啲好有創意既路或者一啲風景唔錯既地方。

雖然Eric一路兜來兜去咁行路,但係佢手長腳長行路極快,所以一路過黎嘅速度同我地差唔多。

最搞笑嘅係,Eric去到 Bayonne 嗰日見班巴士啱啱走左,咁就忽發奇想,不如直接將Bayonne 當成起點行過去SJPP啦。


就咁佢就行三十幾公里去到一條村仔,然後發現嗰度原來冇住嘅地方,所以嗰晚又搭番的士去Bayonne 訓。
第二日訓醒之後,Eric又撘車去番噚日行到嘅地方,繼續行去 SJPP。

之後我睇番“the way"套電影,發現裡面有個荷蘭肥佬一樣係創意式走法,唔係好理啲箭咀,到底呢個係巧合,定係荷蘭人都係咁樣架。



Eric喺一個好有意思嘅人,
可惜原來今日已經係佢camino上嘅最後一日,聽日佢就會搭車去Burgos做一日遊客,然後再去Bilbao搭飛機番荷蘭。

兩個星期假絕對係唔夠時間行曬成條法國之路,但係住歐洲的話就可以分段慢慢行,下次Eric就會由Burgos接住行,因為飛過黎西班牙又快又平。

我都唔知到底算係Eric送姐姐,定係姐姐送Eric,總之三個人一齊行感覺上好快就行完五公里到Tosantos。
可能亦都係因為荷蘭佬本身行得快,所以就拉快左我地嘅進度。

而去到Tosantos就係道別嘅時候,因為今日Eric已經係七公里外嘅Villafranca訂左晚酒店,所以佢都可以慢慢行唔駛擔心冇地方訓。
我地係bar外面飲住啤酒,啤酒飲完嘅一刻亦都係分別既時候,我諗姐姐佢應該更唔捨得。



Tosantos 只係得两間庇護所,其中一間係Donativo,比利時人就坐左係嗰棟嘢出面畫畫。

一入門口個管理人就同我地講"this albergue is very basic, all pilgrims sleep on the floor" 聽到呢句,姐姐就一個NO否決左呢個地方。

另一間庇護所係私營收10歐,條件的確係好好多,佢既朝聖者餐仲有牛扒同兔肉揀,所以我地係無得揀既情況之下住左呢間。


係bar嗰度姐姐又揾到另一個廿七八歲嘅白人吹水,不過我就去左沖涼洗衫所以冇去撘嗲。

執好曬嘢之後我又去挑機,指住山上面嘅教堂問姐姐,好唔好行上去睇下呀?咁姐姐就緊係話"我是可以的" ,仲拉埋個白人一齊行上去。



傾落先知原來個白人叫Josan係西班牙人,住係巴塞隆拿,雖然大家今日都停係 Tosantos,但係佢就訓 Donativo嗰間。

我地好快就行到上去,個教堂係起左喺山洞入面,算係幾特别。






有幾個婆婆坐左係入面打掃,見到Josan可以講西班牙話,就一直拉住佢介紹間教堂嘅嘢俾佢聽 (不過Josan英文一般所以唔係太翻譯到俾我地聽),然後最後叫佢捐啲錢。

行落山既時候竟然見到Charlie同另一個女仔行上去,原來佢都係住donativo嗰間庇護所。

又係食到一半先影~~


嗰晚晚餐,我發現住我地呢間庇護所嘅朝聖者都上左年紀,睇黎年紀愈大就愈難接受訓地下,相反,年青人都會揀donativo嗰間(除左我)。
2019-01-24 03:40:20
lm
2019-01-24 03:41:01
好恐怖啊~係邊間albergue?
2019-01-24 03:46:18
巴打唔好放棄計劃呀!機會黎到咩起個背囊就出發!
2019-01-24 04:09:05
睇到巴打D相,好多albergue 都認得,睇嚟巴打都好慳錢喎,次次都住最平個隻
雖然我都係。
2019-01-24 11:04:32
唉,同我之前右手個d差唔多,但無你咁多,我得3啖定4啖,仲要痕嘅 ,又好怕被人見到,仲好驚會帶咗返屋企。

你之後點搞?
2019-01-24 11:24:48
唔洗諗太多,個時我睇咗一段時間blog, 越睇越想去,就買咗去程機票,無買回程,跟住過幾日同老闆辭職...
點知佢俾我放40日 no pay leave

不過如果有家庭負擔... 就麻煩d, 不過我都見有人係兩公婆一齊請假黎。
有一對30中定40頭嘅意大利人,兩公婆total得4weeks行,小朋友掉咗畀公公婆婆睇住。

個老婆就plan好哂點行點行,每日行幾多去邊。個老公就隨意啦,老婆話事。結果就個老婆出水泡,但都行得快過好多人,不過始終行下痛下,好多時頂唔順就停低。
我第三日見佢地,佢地見畀藥膏我搽。total一齊行咗一個幾星期。之後就唔見咗佢地lu, 最衰無問到佢地聯絡方法

有樣野都幾搞笑,個意大利女人第一次搽個隻藥膏,起房搽,勁大味,勁似殺蟲水味 ,跟住第二日我同台灣阿姨講做乜有人起房噴殺蟲水。個阿姨就話係囉,痴線架。直到之後畀藥膏我搽先知係藥膏嘅味
2019-01-24 11:47:39
一開始都係住最平食麵包,行到後面就頂唔順,愈住愈貴,愈食愈豪
2019-01-24 12:39:49
痕到訓唔到覺 後尾去藥房買藥膏 佢想是但比隻蚊咬既我搽 我同佢講左十幾句冇用架 搵第二隻黎 我嬲到比手手腳腳二百幾啖佢睇 佢先肯拎處方膚出黎 個隻搽咗二日就好 間albergue 係astorga 一入城最左邊 我hihi佢 佢話我後生叫我住頂樓 一入到去頂樓係木頭黎 你地有人要行見到木頭既房 唔好住
2019-01-24 13:08:00
但d蟲有無跟身?
之前睇blog又係有人中招,跟住下一間albergue嘅人見到唔想被佢住,廢事佢傳d蟲過黎
2019-01-24 13:09:19
有 第二日全洗 拎去暴曬 仲辛苦過行
2019-01-24 13:19:34
哇,嗰間albergue我仲幾鍾意添,原來頂樓係咁伏
2019-01-24 13:22:51

2019-01-24 13:38:37
我住咗前一個鎮 Santibanez de Valdeigesias, skip咗呢度, 但之後Triacastela 住個間就奶咗野...睇返, 原來我個時已經知有bed bug, 仲諗住博
2019-01-24 13:52:03
講緊慳,我唔知邊日開始,就無食過正經嘅lunch, 唔係前一晚食淨嘅野夾下三文治,就餅乾+朱古力。
2019-01-24 14:58:03
睇左一半留留個言,
由上年睇人出遊記已經好想行,一直都未的起到心肝去裸辭。 樓主係上網搵資料慢慢plan?
2019-01-24 15:57:26
明知山有虎,巴打都仲去住嗰間albergue

之後有個friend話,I'm always hungry on the camino,因為唔捨得去餐廳食飯
2019-01-24 16:04:41
我以前去 exchange 嗰陣聽過camino,之後睇個幾本書同幾篇遊記,但係出發嗰時已經唔得曬。

嗰陣覺得乜都唔知就會有驚喜,所以都冇諗住揾資料plan 定,睇左點去 SJPP就ok啦~

然後一路都係睇住個 app行,今日諗下聽日想行去邊,然後再隨機應變
2019-01-24 18:31:56
Camino好嘅係佢路線有指定,唔洗煩搵資料,隨心就好。
主要睇由邊到出發,點去出發點就OK。其他用錢都解決到。
不過down 定D Camino app好,有埋gps幫手,冇死
戴返個頭盔先,純粹經驗之談
2019-01-24 18:33:22
巴打聖年去唔去多次
2019-01-24 19:27:13
竟然
呢間啲設施我都好中意
記得個staff阿伯好撚串
2019-01-24 19:32:04
基本上你搵點去起點嘅交通就得
down個app就有晒路線同albergue資訊
使費預一日三四十歐就夠有突
2019-01-24 19:58:56
話說噚日同西班牙人Josan傾開今日應該行到邊度停,
佢就極力推薦Atapuerca,話嗰度有啲洞穴呀壁畫呀睇下,總之就係啲考古嘢。

咁佢吹到咁勁我就上網wiki下啦,睇到原來條村附近有個考古基地,嗰度出土左西歐暫時搵到到最早嘅人亞科遺蹟,
其實睇完介紹都唔係好明 ,但係佢2000既時候仲要入埋世界文化遺產好巴閉。

所以我地就係Josan嘅慫恿下,決定今日要行25km去 Atapuerca。


一出門口嗰時我係一個人行嘅,不過keep住遊山玩水mode所以行得奇慢無比,行左5km左右姐姐就已經追到上黎,咁大家就一齊行啦~







我係呢個荒廢左嘅修道院影相既時候,姐姐就追到黎


行到去Villafrance(即係噚日Eric嘅終點)食左件Tortilla當早餐,準備之後嘅大上坡。

今日姐姐會同我一齊行其實都唔係冇原因,以下係我嘅猜測:

如果大家仲記得,姐姐有個朋友會join佢行 Burgos到 Leon嗰段。
因為聽日我地就會行到Burgos,而佢既台灣friend就後日先飛到Bilbao然後轉車黎Burgos,咁大後日先可以開始行 camino。所以姐姐嘅日程係:
今日:Tosantos 去 Atapuerca
聽日:Atapuerca 去 Burgos
後日:Burgos住多日
大後日:同佢朋友開始由 Burgos行去 Leon


亦都係因為咁,姐姐後日就要係Burgos留多晚等朋友,呢一日嘅時間差亦都令我地好大機會要講掰掰。

既然就快要再見,所以我諗佢今日可能想一齊行一陣啦!





傾到行完法國之路去埋世界盡頭打算點,之前佢都講過要調轉行葡萄牙之路,又話上網睇過有人咁樣行,所以完全係可行嘅~


其實逆行最大嘅問題係心理壓力,Camino Portuguese 話曬都係第二熱門嘅朝聖路線,
由 Santiago 去 Porto一路上會遇到好多人都係行反方向,就算去到庇護所識到新朋友,都只係限於一夜情萍水相逢。
逆行要面對嘅孤獨同挑戰,我諗真係試過嘅人先知道。

咁點解姐姐又會想去咁樣行呢?
因為佢有個讀緊小學嘅仔(我一聽到佢有細路其實O左嘴),
今次個細路番緊學所以帶唔到佢黎行法國之路,所以姐姐想今次先去探下路,下年暑假帶埋仔仔一齊行葡萄牙之路。

講到佢個仔,就話佢地兩母子出發之前一齊睇左"the way”套電影,睇完之後細路仔就好驚咁話我唔要行朝聖之路呀我唔想死呀,
因為電影一開始個仔就死左,而佢老竇亦都翻山越嶺歷盡艱辛先去到Santiago,
所以佢亦都拉住姐姐隻手話媽咪唔好去呀好危險架。小朋友實在係太可愛。。。

上山路段唯一嘅休息站


傾住計好快就上完斜黎到San Juan de Ortega,雖然條村真係好細,但係幾乎所有朝聖者都坐曬係到唞大氣,事關上一條村已經係十二公里之前,大家行左兩三個鐘之後見到bar就即刻狗衝。

姐姐點左杯咖啡,而我又係齋坐食自己麵包。


村入面有間教堂 app話佢係一個建築上嘅奇蹟,每逢春分同秋分,由於角度嘅關係,一束光線就會由屋頂照落去Annunciation (中文係聖母領報?)嘅雕塑到,而春分咁啱又好接近3月25嘅聖母降孕節。
不過更加神奇嘅係個聖母雕像並唔係望住同佢講野嘅天使,而係望由上而下照落黎嘅光束,睇得出當年建築師既心思。




下晝又係行到冇曬人,一來中午好熱冇乜人想繼續行,二來大家行左大半日之後都放慢左速度,所以人與人之間既距離就拉開左。

我覺得晏晝呢段路其實幾靚,雖然行馬路但係一路上都冇乜車,有小橋流水,行到最後仲有史前巨石陣睇。












呢個就係我講嘅巨石陣


Atapuerca 係一個好多朝聖者住嘅地方,上網睇呢條村嘅村民只係得唔夠二百個,所以我相信旺季嗰時住係到嘅朝聖者比當地居民仲要多。





去到庇護所發現Josan已經到左好耐,然後一直R其他人一齊去睇考古基地。

我同姐姐住到一間五人房,同房有個好多嘢講嘅英國老太太,同另外兩個韓妹。
韓妹話之前係San Juan de Ortega見到我同姐姐,仲以為我地兩個係日本人,又話 camino上好少遇到日本黎既。

不過講真,姐姐既外表穿著真係好日本,我第一次撞到佢都以為佢係日本人,而佢出去玩嘅時候亦都會遇到其他日本人一開口就同佢講一大堆日文,所以佢已經學識左“我唔係日本人"嘅日文點講。


本來姐姐就唔係好想去睇啲考古嘢,而且個導賞係全西班牙文,所以我地俾左5歐入場費依然係唔會知道發生乜事。

但係Josan好努力咁拉人一齊去,又拍曬心口咁話冇英文我可以做翻譯!
既然人地咁盛意拳拳,我地就唔好意思拒絕啦,我、姐姐、英國婆婆、印度工程師、蘇格蘭佬同其中一個韓妹就跟隊去睇考古發現喇。


2019-01-24 20:06:32
首先,有巴士載我地去遊客中心,然後有導遊帶住成班人換巴士去個考古坑道。



巴士上面韓妹坐隔離(其實係姐姐,大我幾歲),佢竟然用普通話自我介紹“我的...名字叫...房敬娥~”
吓?又會咁神奇既?
原來韓妹中學既時候係天津讀過四年書,雖然好多普通話都已經唔記得左,但係都仲勉強溝通到。

不過講真,佢英文就比佢普通話好好多,因為佢大學四年都喺美國讀。


成個導賞團太約一個小時,雖然呢度都算係世界遺產,但係我真心覺得有少少俾 Josan伏左。

我唔記得左Josan英文其實一般般,所以個導遊講十句佢先翻譯得一兩句,加上我地六個人圍住Josan其實係唔太聽到佢講乜。


另外有好多考古嘅工作依家都去左地底,但係嗰啲地方係唔開放俾公眾參觀嘅,所以有啲可惜。

行左三個坑,我唔係好知睇左啲咩,淨係覺得企左成個鐘好攰。





唯一可以安慰下自己嘅係,呢5歐既門票係包埋 Burgos嗰個考古博物館嘅入場費,咁我聽日都可以去行下。


晚餐本來諗住去高級餐廳食,你又點會估到呢啲山卡拉地方都會有米芝蓮推介餐廳吖,
不過再睇睇餐牌實在係食唔落,因為要成廿幾歐一個set,之後旅程仲有咁多日所以依家實在豪唔起。

咁大家一齊去左間Bar食飯,我點左一件Tortilla 又解決左一餐。

話說蘇格蘭佬已經係第二次行法國之路,咁點解要行第二次呢,因為第一次行嘅時候減肥失敗,所以要再接再厲行多次 (其實行路減肥呢個迷思係點黎架?)。

而韓國妹聽日行到Burgos就會搭巴士去Leon,因為已經買左回程機票,所以係唔夠時間行完全程。

印度工程師(美國藉)就啱啱退休,camino可以話係佢環遊世界既第一站,行到 Santiago之後佢會番去三藩市既屋企執一執行李,然後又即刻飛去危地馬拉做義工。

英國婆婆就話佢之前八日一直同另一個大肥佬行,雖然肥佬係個好人,但係實在行得太慢,而且負能量太多,所以婆婆今日好慶幸自己終於決定離開肥佬唔再同佢行。大家就係咁樣冇目的咁傾左一輪先番庇護所訓。

吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞