Grandas de Salime
行到6點我終於達陣，條村唔大我直接踩過去庇護所。
行緊去嘅時候我一直祈禱庇護所唔好full左，我唔想俾30、40歐訓酒店，身體上受到嘅苦已經夠，我唔想連荷包都大出血。
庇護所嘅花園有幾個朝聖者坐喺度，大家你眼望我眼不過冇人講嘢，我冇辨法由佢地既眼神睇得出～到底間albergue full左未。
然後我去到門口，終於攞到個女負責人，佢好唔好意思咁同我講～completo。
其實我都有心理準備間庇護所會full左，但係我真係想爆粗，
我行左接近50km嘅人冇地方訓，其他人先行得20、30km反而就一早霸佔住啲床，如果朝聖者之間係公平嘅，咁先到先得，係咪最公平決定邊個有床位邊個冇？
我好絕望咁同個女人話，我可唔可以訓地下，我照俾6歐俾我訓地下啦。
女負責人臉露難色話唔得，但係佢醒起啲野，佢唔係好識英文，所以就攞左我部電話孤高translate。
來龍去脈大約係：我可以跟一個意大利大叔走，大叔踩單車黎嘅，依家係庇護所沖緊涼。
晏啲大叔會去佢朋友屋企訓，咁我就可以跟埋過去，翻譯翻左做 priest house，估計佢朋友都係做教會相關既嘢。咁我就好似喺大海揾到條浮木，即刻話好，去到呢刻要我訓地下都完全冇問題。
女負責人話我可以俾2歐喺度沖個涼先，因為訓覺嗰度冇涼沖，所以我就等意大利大叔沖完我再去沖。
等緊嘅時候我醒起啲嘢，所以就問下個女人：今日有冇香港人住喺度？
佢攞左本薄出黎對，然後拎拎頭，我死心不息，問埋咁噚日呢有冇？但係睇過之後依然係冇。。。
Karen冇喺度住過，到底佢喺我前面定後面呢？如果我已經爬左佢頭，點解我一路上都冇見過佢呢？
沖完涼之後大叔帶我去priest house門口，佢話佢朋友10點先返，所以我地到時先返黎等開門。
行緊嘅時候遇到法國情侶，原來佢地由Berducedo 開始就一直跟住我尾行到 Grandas，遲我一個鐘先黎到。
法國情侶聽到庇護所full左都即刻崩潰，雖然我唔識法文，但係聽落都估到佢地話：乜間庇護所又X爆左！所以我地又多左兩個人一齊去 priest house，
再之後又遇到兩個大叔啱啱達陣，所以係一行6個無家可歸既人。 之後為左攝時間，我入左博物館搵地方坐。
其實我依家既打扮真係好奇怪，咩住個背囊，一隻手攞住兩碌行山木，另一隻手攞住一對鞋，然後着住拖鞋週圍走。
博物館好寧靜，我坐左喺石凳上面，隻腳痛到痴線。
其他朝聖者一個都未見過，我諗我真係拋離曬所有人。
博物館8點就閂門，所以我襯佢閂之前行左一圈，其實我真係冇乜心情行，
除左劫後重生既感覺之外，每行一步路都un住un住，屋入面仲要我上落樓梯，真係好癲。 博物館閂左之後我去左餐廳食飯，呢一餐pilgrim's menu係我心甘情願俾錢去食，我全日都冇食過正餐，只可以豪食一餐慰勞自己。
行緊去餐廳嗰陣又遇到人～係一個噚日喺Campiello 打個招呼既西班牙大叔，雖然佢慢我兩個鐘達陣，不過佢係唯一一個人同我一樣由Campiello 行到Grandas
，見到佢我真係O左嘴，只可以再講一次camino痴線佬實在太多。
大叔問我住邊我就話priest house，仲叫佢可以一齊黎住，但係佢英文太差好似唔係好明，所以最後大叔走左去訓酒店。
去到餐廳門口終於見到一個熟悉啲既人～意大利仔 Davide。
回憶下先，第二日行去Bodenaya 嗰時我路上識到佢，不過佢就行多12km去左Tieno，所以快我半日。 大家黎到Grandas見返面，不過都只係打過招呼算，冇心情多傾幾句，因為我地兩個都行到殘曬：
唔計兜路蕩失路，我行左47km。
Davide由Palo de Allande 經車路過黎，亦都行左37km，一日半嘅路。
嗰晚食飯我飲曬一大盤湯，食曬所有野，飲左半支酒，感覺依然有啲空虛。
我終於做到喇，姐姐衝線之後講左呢句，我覺得我依家都可以講呢句。
但係身邊全部都係陌生嘅朝聖者，呢一句我只可以自己同自己講。 挑戰自己、成功達到目標固然開心，不過同時我都覺得好孤單，一個人行完咁遠路，只可以自己同自己興祝。
一個人去朝聖，挑戰自己，我今日終於嘗試過鳥。
48k, 
, 明明隔離就係水塘, 但差D渴死
, 因為D人講到Grandas少位, 而呢日嘅上落山又大, 前面幾個鎮嘅人9成都會住低Grandas...太冒險了
個水塘其實幾靚，不過直到今日，我都唔係幾鍾意嗰個地方。
呢日係我人生行山行得最辛苦嘅一日，冇之一。
就算法國之路, 入咗Galicia都一樣要小心, 好多水龍頭已經斷咗水, 又係政府鼓勵消費造成.
其實都同primitivo嘅路段設計有關，即使我今日唔行呢5km，聽日都要行返，一樣痛苦。
