西班牙朝聖之路 (五十日長篇)

984 回覆
115 Like 3 Dislike
2019-02-08 21:54:53
https://drive.google.com/file/d/1gQ73IfPj8moiyIQZg3tjuInjCOzX9LCm/view
嗰晚買料返albergue煮, 食食下鐘響...
2019-02-08 21:57:57
哇頂,睇完之後記得返,我真係唔記得左個鐘,人腦真係選擇性失憶
2019-02-08 22:00:58
係啊, 人嘅記憶真係唔可靠, 好多時無提示就唔記得好多野, 最好都係有字有相有片
2019-02-09 13:01:50
今日全世界既目的地都一樣,就係行23km去Villafranca del Bierzo,佢係上山之前最後一個大鎮,所以今日行到山腳底下,然後聽日準備上山就係最好嘅選擇。

噚晚Josan話朝早唔駛等埋佢,只要我地走之前嗌醒佢就得喇,因為佢真係好訓得,如果冇人叫醒佢嘅話,就會訓到八點趕人走嗰陣佢先醒。

離開Ponferrada其實都幾開心,呢個城市其實幾核突,除左個城堡同埋一個好細嘅舊城區之外,呢個地方一啲特色都冇,只係得一啲新落成嘅住宅大廈,同我最鐘意嘅Astorga比真係差十萬九千七里。

日後,如果再提起呢個地方嘅話,我唯一記得嘅應該就係我、姐姐同 Josan三個人又喺呢度會合返。

Josan就話佢好彩冇留兩晚喺度,之前話呢個地方(好似)好值得黎嘅係聽佢呀媽講,媽咪講既野都信,真係乖仔黎既。


由房裡面望出去嘅日出好靚,而且今日終於見到久違嘅藍天白雲,感覺好唔真實。





接住落埋呢23km都係算係易行,距離短而且只係得小小上落,所以大家都唔急住要行到,可以嬉山玩水慢慢行。

Villafranca de Bierzo 亦都係一個大少少嘅鎮,有好多間平 albergue 可以揀,第一間full左都仲可以去第二間,Josan有個朋友早一日已經到左 Villafranca,佢就推薦左間庇護所俾我地,所以去到之後我地直接踩上門就得。

離開左 Ponferrada 之後沿路係一片接一片嘅農田,全部都係種葡萄黎釀酒,風景就好似返去 La Rioja 嗰時穿過無數個葡萄莊園咁。

偶然會遇到一兩個小鎮,都係有個小教堂,有幾間 bar咁上下,咁大家就會停低休息下。











我同姐姐行左5、6公里左右,Josan就已經好快追到上黎,所以之後我地三個就一齊行去目的地。

三個人行嗰時多左好多休息點,例如每次見到bar,Josan同姐姐都幾乎要入去飲返杯,而我見到有教堂嘅時候,就要佢地兩個等我行返個圈,加上大家有時又會停低影相,愈多人一齊行速度就愈慢。

往好嗰一方面諗,多啲人其實又真係冇咁悶,好多時傾住計不知不覺間又會行到下一個鎮。

沿路真係好多釀酒廠,我嘅兩個朋友向來無酒不歡,所以就隨便入左間睇下,順便一人飲左杯綠酒,跟酒仲送件 tapas俾你食,我諗應該係全個León Province 都有既文化。

啲酒係咪真係好飲啲我就唔知,其實最緊要都係揾個地方坐下唞下,同埋可以去廁所。

有唔少鬼佬鬼婆都停左係度飲酒,講真,如果得我自己一個人行,我都應該唔會黎呢啲地方,呢 23km係會慢慢咁一次過行到。











行到 Cacabelos就只係淨返 9km就去到Villafranca,Cacabelos係一條大村而且好有觀光feel,有唔少鋪頭都會買紀念品,更加見到一啲本地西班牙遊客。

我地係大路行緊既時候見到側邊有間屋望落好古色古香,大門開左一半,咁我推門入去就見到好多巨型酒桶,酒窖裡面好清涼,同室外氣溫至少差左十度。

嗰時老闆啱啱送走左啲客,咁就每人遞左杯酒俾我地,然後同 Josan吹左好耐水。

我同姐姐唔識西班牙文冇得撘嗲,所以就週圍影下相,順便睇下老闆本留言冊,寫中文嘅就見到上年有幾個台灣人黎過。咁我亦都寫返幾句,留返個Hong Kong喺上面。 就咁入去間屋出返黎已經係半個鐘之後,我地又要繼續開始行。









最後呢段路係有少少上落斜,但係風景就靚好多。

我最鍾意就係呢啲有起伏嘅山路,可能係感覺上更加似行山,而且平時香港啲山路都係瘋狂又上又落,所以呢啲路我覺得反而習慣啲。

有一段路因為實在太熱,我就飛甩左兩個朋友,好快咁上左山,不過之後平路落斜佢地又好快追返上黎。










Villafranca del Bierzo 係一個位於山谷入面既城鎮,四面環山,比之前既cacabelos感覺清幽得多。Josan朋友推薦既庇護所叫Ave Fenix,雖然同另一間庇護所一樣係公營municipal,但係大部份朝聖者都係住嗰一間,因為更新更大而且只係貴1歐。其實睇返個app既評分,Ave Fenix只係得3.5分,另一間就有4.5分,正常人都會住嗰間唔住 Ave Fenix啦。

Check in之後見到間房我地就明點解呢度得3.5分~~因為佢真係我見到數一數二咁殘舊嘅房,而且佢係用木地板,每行一步都有一種危樓嘅感覺。

我地三個人就開始鬧爆Josan個朋友,點會推薦我地黎住間鬼屋架,正常人都唔會鐘意呢啲地方啦。



(影相好似靚好多 )




不過唔知點解都有唔少人住 Ave Fénix,呢個要到之後我先明白。

我遇返 Tosantos 一齊食晚飯,個樣好似聖誕老人既德國伯伯,然後又有 Astorga之後先識嘅韓國大叔,佢每日都話腳痛行到好辛苦,但係每日都比我早達陣,因為佢就係嗰啲每朝五點就嘈醒我嘅人。 其他人仲有一對望落唔憂米嘅台灣母子,阿媽五十幾,個仔就快三十。

姐姐之前就遇過呢對母子,話個老母好似相親咁,見到佢朋友台大畢業又未結婚,對佢朋友就特別親切。相反,當個阿媽聽到姐姐又鍾意飲酒、又唔係咩名牌大學,對佢就冷淡好多。

我地坐係花園休息既時候,仲識到個新朋友~~Andrea係個意大利男仔,雖然比我大一歲但係就仲讀緊書。Andrea都係由 SJPP出發,不過就唔知點解今日先遇到佢,之後先知道要認住佢真係話都冇咁易,因為佢嘅雨罩係極度鮮艷嘅黃色(以佢嘅講法就係banana bag ),而且佢係極少數落雨時會擔遮既人,一路行山一路擔遮都咪話唔型。


之後我地三個同Andrea加埋四個人一齊去做觀光客,成個鎮有好多教堂,一條河將個鎮一分為二。

市政廳外面擺左好多單車架,Josan問下啲工作人員先知道原來聽日有三項鐵人比賽,而條比賽路線仲會同我地聽日要行嘅路重疊,又多左個餘興節目俾我地。行完教堂之後我地去左間 bar,飲緊野時候姐姐就教 Josan同 Andrea寫佢地既中文名。













庇護所提供晚餐,盛惠7歐,不過佢係以朝聖者聚餐嘅形式上菜,所以大家係坐長檯一齊食飯。

呢餐比我之前食過既朝聖者餐都豐富,而且佢地仲話所有菜都係庇護所後花園有機種植,心裡上覺得又好似真係好食啲。我地終於明白點解Josan個朋友會推薦呢間庇護所,最來係因為佢嘅伙食,食完之後化解曬之前我地嘅怨氣。



2019-02-09 17:32:03
我過咗Leon之後好似無遇過有晚餐嘅albergue
2019-02-09 20:37:39
咁巴打一定住親都係大型 municipal
2019-02-09 20:41:42
有乜住乜,無特別去搵。我用個垃圾app無albergue評分,而且outdate哂,執咗嘅albergue都仲顯示
2019-02-09 20:48:50
我行完法國之路之後都冇 app用,唔知點解嗰陣時淨係得法國之路免費,其他路線就要俾錢。 打後都係問下其他人邊間好,然後跟隊去~~
2019-02-09 21:05:36
我記得有個鬼佬介紹一個收費app畀我, 話有埋路上有咩景點值得睇埋
但我個時心諗, 我係黎洗滌心靈, 唔係黎旅遊
2019-02-09 22:36:45
睇到真的愛妳嗰度大大聲笑咗出黎
加油樓豬
2019-02-10 01:51:14
今日係camino上令人難忘嘅一日,有時真係唔應該逞強,如果真係唔得嘅話就唔好夾硬黎,叫做學到嘢。


由Villafranca del Bierzo上O Cebreiro要行30公里,而且要由500米爬升到1300米,係繼第一日翻過庇利牛斯山之後再要喺一日入面上咁多。

不過,最攞命嘅係一出發就有兩條路揀,一如既往,山路同車路任君選擇,不過,今次條山路就好甘,要先由500米爬升到900米,然後又落返去600米駁返條車路。

加上山路又要兜遠少少,所以呢一日總共要行32km,上1100米落300米,同第一嘅難度有得比。







噚日大家都已經表決左要行山路,我仲考慮要唔要六點鐘起身出發,因為每次行超過30km都係打大佬,愈早出發就可以避開晏晝最曬嗰段時間。

而且O Cebeiro只係得一間公營庇護所,只有104個床位,當全世界都行去嗰度住嘅話,真係爆左都唔出奇,所以愈早行到就唔駛驚去到冇地方訓。

不過姐姐同Josan就淡定有錢淨,叫我放心,話慢慢食埋早餐先出發都得。

今朝韓國大叔痴左線,鬧鐘校左四點半,五點鐘就執好嘢走人,佢執嘢嗰陣都幾嘈而且個頭燈勁光,我地成間房啲人都俾佢嘈醒曬。Andrea起身之後仲O曬嘴咁問我地,究竟係邊條友可以咁早起身閃人。


庇護所亦都提供早餐,盛惠3歐,同噚日晚餐一樣咁豐富,仲要係自助形式,佢有一味菜簡直係殺手鐧 - 煎蛋多士!

由於真係太好味,我一次過食左四塊,如果唔係因為唔好意思繼續攞,我諗我會食多幾件。

我嘅兩個朋友就覺得我傻左,冇人會一餐食四隻雞蛋,乜咁樣有問題咩?



食完早餐執好嘢,老闆又拉住Josan吹左陣水,走嘅時候仲同我地每個人深情擁抱。呢間庇護所雖然係舊左啲、污糟啲,但係遇到嘅人食到嘅嘢都一流。

最後擾攘左一輪,我地七點半之後先出到門口,比平時仲晏左。



去到村口就已經係山路同車路嘅分叉口,百分之99既朝聖者都行車路,貪佢近啲之餘亦都唔駛勁上勁落,所以個個人都好似去動物園睇動物咁望住我地兜上山。

有啲人仲以為自己行錯路,問我地邊條路先啱,咁我地就話呢條路要上山但係風景好靚架,點知啲人聽到上山之後諗都唔駛諗就行返落車路。


一開始上山嗰段路真係斜到想瀡返落山,姐姐行到直情崩潰,大家都行到索曬氣所以冇乜點傾計。

不過愈行愈高,風景就愈來愈靚,加上前前後後都冇其他人,感覺就更加似朝聖,全世界就好似淨返座山同我自己。

山上面可以望到好遠好遠,望返下面嘅車路就慶幸自己有上到黎,如果齋行下面睇唔到呢度嘅景色真係有啲可惜。(之後既 camino只係得一段路可以同今日嘅景色媲美,而嗰日嘅經歷一樣係非常難忘。 )









之後有個西班牙佬追左上黎,佢唔係啲咩陌生人,就係前幾日我hi佢然後俾佢無視左,勁串嗰個西班牙佬。

因為西班牙佬英文唔掂,所以佢亦都只係喺後面同 Josan傾計,繼續無視我嘅存在。不過山上嘅風景好靚,所以影響唔到我嘅心情~~

嗰日計埋我,全條路淨係見到四個人,之後問返意大利仔 Andrea,佢都行左呢度,但係因為遲過我地出發所以大家落左山先遇到。

落山雖然係爽,但係落完之後要上返先最痛苦,落到底之後姐姐話要入bar飲嘢,我地就坐左係度唞下,坐緊嗰時仲見到Andrea慢慢行過間bar。 今日大家都唔敢點啤酒飲,因為每次飲完啤酒再行都會覺得好攰好眼訓,所以都係飲返可樂同咖啡算。

由山路駁返去馬路之後條路即刻多返人,仲睇到噚日講過嘅三項鐵人,同camino重疊嘅部分係踩單車。





今日條路感覺特別多人,人塞人既現象又出現返,可能係因為Ponferrada之後又多左新人加入,可以預計到嘅係,愈近Santiago就只會愈來愈多朝聖者,我諗最後一百公里仲會迫過香港啲山路。

行馬路嗰時好無聊,我改一改Foncebadon 條老問題:如果今日間庇護所只係淨返兩個床位,而我地又有三個人,咁點算?姐姐又係好理所當然咁話,咁就緊係我訓呢度,淨返嘅你地兩個猜包剪揼啦。 然後Josan就俾姐姐帶壞左,變左自私精,講埋啲一樣嘅答案,點解一個二個都咁無義氣,又話咩野朋友互相信任。利申:其實我都講返一樣嘅答案。






之後行到一半左右,都仲未開始上山,好意外咁遇到菲律賓人Emilio,我係Astorga識左佢之後就冇再見過面,

今日呢個時間可以撞到佢其實都幾意外,因為佢亦都係嗰啲5、6點出門口嘅人,依家已經就快十二點而大家都只係行左廿公里左右,對Emilio黎講好似真係慢左啲。


原來佢今朝約左個英國老太太一齊行,本來就已經遲左出門口,加上英國婆婆又行得慢,就算佢地行車路我地行山路,竟然都俾我地追到上黎。

打個招呼之後,我地三個人就行先,因為時間已經唔早,仲有12km點都要行三粒鐘,所以要加快速度。

行到 La  Faba 嘅時候淨返唔到5km就行到O Cebeiro,團隊士氣有啲低落,

姐姐行到再一次崩潰,

Josan亦都冇乜傾計專心上斜,

反而得我感覺仲okay,可以keep住行唔太需要休息,所以就做左領隊帶頭叫大家行快啲。

La Faba之後又要勁上,最後呢段要由 800米左右爬升到1300米,加上大家已經行左超過27km,所以呢段上斜行到好似喪屍咁樣。

沿路係冇乜風景可以睇,一直上去都係綠色隧道,唯一好處就係可以遮下陰,未至於一路上斜都要暴曬。



由La Faba行去La Laguna de Castilla呢2.3km行左45分鐘,真係好慢,好似每行幾步就要唞下,

姐姐話去到 La Laguna de Castilla 嘅話要去 bar坐下先繼續行,叫我地唔想休息既話就唔駛等佢,直接行去O Cebreiro。

咁我覺得都唔差嗰十幾二十分鐘,而且最大問題係萬一我同Josan check左in,姐姐黎到之後間庇護所full左,咁姐姐點算呀。

所以我地又一人點左杯可樂,食完包薯片,先行埋最後2.5km嘅上斜。食完出門口嗰時,又撞到串串貢西班牙佬,佢行得勁快咁爬左我地頭,唔駛估都知佢一樣驚冇床位。


由La Laguna行去O Cebeiro 路上有一個重要既分界線,就係朝聖者即將會進入camino上最後一個省份 - Galicia!

由Castilla y León 行到 Galicia 嗰度會有塊石碑顯示兩個省既邊界,黎到呢度亦都意味着好快就會行到Santiago,又有一種唔捨得嘅感覺。

進入Galicia 之後亦都多左一樣野,就係標示方向既“理程碑”,呢個“理程碑”唔係話咩重要成就,而係佢每隔百幾米就會棟塊石碑喺路邊,石碑上面會寫住距離Santiago仲有幾遠。

呢啲“理程碑“係Galicia 獨有,俾朝聖者強烈地感受到愈黎愈接近終點嘅嗰種哀傷喜悅。我地亦都做下觀光客,喺塊牌面前影相留念。











2019-02-10 02:05:59
終於追曬
2019-02-10 02:14:41
歷盡千辛萬苦終於行到O Cebreiro!

呢度係山頂嘅第一站,之後會沿住山頂嘅山脊線行十幾公里先會開始落山。

其實成段路由Villafranca 開始上山,至到落山去到Sarria,算得上係法國之路嘅Hidden Gem,我認為佢同第一日庇利牛斯山嘅風景不相上下。

O Cebreiro條村位於山頂嘅東面,由西向東望出去視線完全冇遮擋,景色好開揚,而呢度亦都係唔少新加入朝聖者嘅起點。成條村好細但係幾靚,仲有個教堂葬左設計camino 黃色箭咀嘅嗰位神父,係一個幾值得訓一晚嘅村仔。


去到庇護所門口已經三點,仲有十幾個人係到排緊隊等check in,我已經見到美麗、Ellie同朝早四點半嘈醒人嘅韓國大叔,佢地都已經沖埋涼,坐曬係度social。

排緊隊嘅就有串串貢西班牙佬、路邊野戰法國佬,法國佬仲同我地 give me five,yeah!終於行到!

排緊隊嘅時候我就開始數人頭,法國佬話有好消息,我地三個啱啱好排到最後三個床位。 等左好耐終於排到我地三個,登記嗰個職員好遺憾咁講,庇護所只係淨返兩個床位,你地自己解決呢個問題。(其實,我好似睇到佢偷笑,笑鳩呢三個傻仔行得太慢 )

我腦海第一個諗法就係:diu佢呀媽,104個床位都 full(正確黎講,只係得102個人,因為仲有兩張床),成班on9日日鬥快爭床位,依家黎賽跑定黎朝聖呀。

然後再諗下,都唔知好笑定好嬲,今日講左成日嘅笑話:如果庇護所只係淨返兩個床位,而我地又有三個人,咁點算?竟然真係成為現實,而我地依家就要交出真正嘅答案。。。


Josan第一個講嘢,佢話佢繼續行,我同姐姐兩個訓呢度啦。

我一聽到就心諗,點可以咁冇義氣呀,要行就一齊行!

然後,姐姐第二個講嘢,好似就快想喊咁話佢想訓O Cebreiro~~ 我同Josan都知道今日不斷上斜行到佢真係好崩潰,而且亦都知道佢好內疚:

如果唔係姐姐拖慢左進度,我同Josan應該會早一至兩個鐘達陣,如果唔係佢話要係La Laguna 飲可樂,我地只要比嗰度其中一個人快少少到 O Cebreiro,依家都唔駛咁無助。

不過,如果要一直怪責落去,係可以無止境咁追究嘅,我可以怪 Villafranca 庇護所個老闆一直拉住Josan吹水,搞到我地遲左十幾分鐘出發,甚至係佢嗰個熱情擁抱,害我冇左五秒鐘。

如果係以前,我或者會怪姐姐又丟低我地,但係行左廿幾日camino,我又會覺得做人最重要就係唔好勉強,如果真係做唔到就唔好扮英雄。 我同 Josan要繼續行去下一條村,因為O Cebreiro淨返嘅住宿都係每人廿歐起跳。走之前,我地叫姐姐唔駛內疚。


就係咁,我地要同180度無敵景觀、靚靚村仔、姐姐。。。等等所有傷心事講掰掰。

因為要趕路,我同Josan都已經冇心情睇風景,索性唔跟箭咀行馬路。





其實呢一刻已經行左成32km,但係就連要行多幾多都唔知道,一定破硬我既最遠距離紀錄,

我部手機亦係第一次未行到庇護所就用到無曬電,臨死機之前姐姐Line我講對唔住揼低左我地兩個,我就亂up話如果姐姐你肯陪 Josan 繼續行嘅話,我就會訓喺 O Cebreiro喇。

O Cebreiro 下一條村係3.2km嘅 Linares,嗰度有間10歐一個床位嘅庇護所,但係成間嘢得22張床,未行到我已經心知不妙。

今日我學識左一隻新字~Completo,即係間albergue已經full左。去到Linares 間庇護所,一開門個人就話 completo,我地只可以繼續行落去。



我係路邊執左第二碌木,從嗰日開始我就一直用兩支棍行路,感覺真係舒服好多。

一邊行Josan就一邊鬧嗰個串串貢西班牙佬,話佢係Bad Guy,臨尾嗰時特登行快啲爬我地頭,如果唔係佢間庇護所就應該啱好淨返三張床。



咁我地兩個又要行多2.5km由Linares 去 Hospital de la Condesa,嗰度成條村得幾間屋,庇護所一樣勁細得廿張床,所以老闆話Completo 嘅時候我一啲都唔意外。

嗰時我已經行左37km,唔知點解我覺得仲可以行落去,精神異常地高漲,可能係因為有Josan陪我一齊行,又或者我就係適合行呢啲又上又落嘅路。



行多2.5km有另一條村,但係嗰度係冇庇護所,所以要再行400米去到Alto do Poio先有訓嘅地方。

一推開庇護所門口就係餐廳,個火爐燒到好熱,同室外氣溫差好遠,呢度離O Cebreiro實在太遠所以我地終於搵到個落腳地,黎到一個渺無人煙既地方訓一晚。


放低背囊之後已經係五點半,破曬我 camino上嘅所有紀錄,當時有一種劫後重生嘅感覺,同時覺得自己(好似)好勁,由一開始平路行三十公里都驚死,到今日勁上勁落行四十公里,仲有咩路段我會怕!(做人最忌就係自大 )

沖完涼之後就走左去食飯,今日個朝聖者餐就算係20歐我都一樣會食,更何況只係9歐,即刻狗衝

Josan話Galicia 美食係西班牙幾出名,之後聽其他西班牙人一樣係咩講,

唔知係因為肚餓定因為死裡逃生,我覺得呢一餐飯真係勁好食,好食過我之前食過嘅咁多餐,經歷左咁 on9嘅一日,有張床食得飽我就已經好滿足。

camino神可能亦都見到我地咁落莫,所以送左唔止一份禮物俾我地,送左兩份!

食食下飯,竟然見到意大利仔Andrea推門入黎,Villafranca 兄弟幫!大家都一樣行得咁慢,去到O Cebreiro既經歷就唔駛重複講啦,基本上同我同 Josan一模一樣。

之後又有另一個人推門,竟然係菲律賓人 Emilio!佢個英國婆婆行到 La Faba就停左,佢繼續行嘅後果就同前面呢三條友既遭遇一樣。

見到佢地我真係好感動,我好少用肢體語言表達我嘅感受,但係今次我真係忍唔住分別俾左兩個擁抱佢地。我地四個人都正式進入左40k俱樂部!
















2019-02-10 02:15:36
多謝支持!!!寫左一半,今日第二十六日
2019-02-10 02:17:48
應該係同一個app,
呢個都係我死穴,唔知自己朝緊聖,定係旅遊緊
2019-02-10 02:52:26
我個日stay 左係la faba!
2019-02-10 02:56:27
個日stay 係 la faba
係個度唯一既餐廳食意粉, 店主播著beatles 既歌,飲咁酒聽著音樂,唔知點解就忽然間喊起上黎
下面係個陣寫既筆記...










19th day
Cacabelos to La Faba (31.9 km)

最後又是走了三十公里以上,這天本來打算停在上一個鎮,於數公里外,然而明天有最後一座高山得攀過,上下數百公里,趁著這天走到現在還不過十二時多,便決定多走一個鎮到La Faba,這裡可以足有數百米的上坡,趁著還有些許體力,今天多走幾公里,省下明天的困擾,稍稍減輕負擔。今天是走在路上第十九天了,原定二十八天的路程,已剩下不足十天,同樣剩下的路程已然不多,每天不足二十公里,要是這麼推算下去的話大抵會將旅程推早幾天完成。

最近甚至有想著早完成的時間怎麼好,在santiago 多留幾天?走路到fisterra 大抵不會,也許乘車去吧,我已經不想再走了,每一天我也這麼想著,多走一步都不願,但明天還是拚命的走上三十公里。經過了艱難的上坡路,到達La Fada,午後一時半,我是屬意待在O Cebreiro,可委實不想多走五公里了,到達的時可能已三時半,筋疲力盡。不是有非要趕路不可的理由,還是決定在這裡待下。

已經好久沒有在albergue 住了,上一次已是在Rabe de las Calzadas,在等背包的那天,很多天以前了。不過五歐,可是便宜極了,洗澡後洗過衣服,便到唯一的餐館午飯,意粉煮得美味,紅酒足有一大瓶。餐館忽爾播著beatle 的hey jude 跟imagine,my way,what a wonderful world。聽著聽著不知怎地禁不著流下淚來。於西班牙半山的小鎮,喝著紅酒吃著意粉聽著英文歌,不經覺就淚流不止,事情就是這麼的可笑,也是這樣的發生。也許是人在外地,也許是年歲漸長,越是容易感觸,於陌生的地方聽到熟悉的歌曲更是如此。只是想不到無端將我連接上的竟是beatle 的當紅歌曲。也忽然再感音樂的可貴,那將世界各地的人連結起來。

未來的日址大概是能考慮跟隨大眾的時間表,慢慢的走,每天走二十多甚至十多公里。這樣走的話還有七天,應該還能早兩天到達santiago,大概能花一天到fisterra,我倒是想像著到達終點的感覺,終於不用清晨五時起床每天走上三十公里了,面對著方便無比的繁華都巿,大概我會相當不習慣那樣的生活吧。

午飯後往往獨兒坐在黃昏,在想事情寫文字,首次用電話寫上那麼多,別是到外地之時帶著電話便足夠了,其他的事情都用不著擔心,一切將都安好,事情都必水到渠成。bob dylan 的歌聲和口琴聲於店內響著,想著久不住在共用房間的我會否習慣,想著明早離去時打擾身邊的人,然而這都是小事,畢竟朝聖路上每個人都是過客。
2019-02-10 09:28:40
午飯後往往獨兒坐在黃昏,在想事情寫文字,首次用電話寫上那麼多,別是到外地之時帶著電話便足夠了,其他的事情都用不著擔心,一切將都安好,事情都必水到渠成。bob dylan 的歌聲和口琴聲於店內響著,想著久不住在共用房間的我會否習慣,想著明早離去時打擾身邊的人,然而這都是小事,畢竟朝聖路上每個人都是過客。


原來都有唔少人停係La Faba~~ 當時我一心要行到O Cebreiro,要去山頂過夜,咁就GG鳥 巴打堅日日過三
2019-02-10 10:03:15
我上山前停咗喺Travadelo, 你無床位可能都係你前一晚之後幾條村嘅人霸哂

我行呢段路個日, 好天到暈...曬到D人跪低, 好多行咗好短就停低哂
你一開頭諗住嘅O Cebreiro係呢度? 我發覺我好多相無mark地點 , 淨係寫咗...今日第一條村, 第2,3,4,...

跟住呢個銅像我估大部份人都有影佢...

我行個日萬里無雲...呢段路係可以望到好遠好遠

講起, 我記得個日見過幾pair 人係得個小背包....睇怕佢地寄咗去一下站, 太醒目了

樓主你住呢間?
2019-02-10 10:14:42
個日stay 係 la faba
係個度唯一既餐廳食意粉, 店主播著beatles 既歌,飲咁酒聽著音樂,唔知點解就忽然間喊起上黎
下面係個陣寫既筆記...

19th day
Cacabelos to La Faba (31.9 km)

Day19, 你total行多我14km
2019-02-10 10:27:45
我上山前停咗喺Travadelo, 你無床位可能都係你前一晚之後幾條村嘅人霸哂

原來係咁~我仲唸住全世界都住 Villafranca de Bierzo。 Travadelo 就係我山路落返黎嗰度,當時已經十點。。。

你一開頭諗住嘅O Cebreiro係呢度? 我發覺我好多相無mark地點 , 淨係寫咗...今日第一條村, 第2,3,4,...


就係呢條村!我嘅傷心地!


跟住呢個銅像我估大部份人都有影佢...

朝聖MJ我都有影,不過係好遠咁影過去,攰得濟冇行埋去

樓主你住呢間?


就係呢間,佢門口有隻勁大隻嘅狗,週圍執垃圾食。有一次隻狗追住我同Josan跑,Josan條友自己走左入間屋然後閂左門,淨返我同條狗係出面吹風。
2019-02-10 10:30:00
Day 19仲係Mansilla,Leon都未到
2019-02-10 10:34:45
Josan條友學埋姐姐d衰野,賣隊友Level MAX.
我記得呢間附近好似無乜其他野,連村都好似唔係? 不過夜晚出黎睇星星可能好正。
2019-02-10 10:36:56
我地喪嘅,所以周身傷,唔好參考。
2019-02-10 10:55:44
行完camino會習慣俾隊友出賣,個人經驗

嗰度乜都冇,但係食完飯已經好攰所以好早就訓。諗返我真係好少睇到星,因為成日落雨,啲雲擋住曬個星空。
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞