西班牙朝聖之路 (五十日長篇)

都係camino既時候最“無憂無慮”，雖然成日驚冇床位、行得好辛苦，其實依家諗返，嗰一切都只不過係甜蜜嘅苦惱。

去到間酒店，其實以我嘅性格都係放棄多，巴打都知道爆4係幾咁艱辛，不過唔知點解嗰一刻就係想行埋去。。。

係！5月頭出發，6月頭衝線！

係

巴打都係五月？係咪有住過Mansilla？前台大媽話前一日有個香港男仔住嗰度。

係咪食八爪魚果到？我無係果到住

唔係～～仲未出高原，Leon之前嗰個鎮。Mansilla de las Mulas

我住過呀，但我應該係晏你兩日

估唔到後有來人，我仲以為後面只係得兩個女仔，我9/6衝線，13/6去到 Finisterre，有冇重疊既日子

其實果時仲有一對香港情侶行緊，完全無重疊我係6月11去到Santiago,12搭車去左Finisterre,之後一日行去muxia

原來只係我咁啱完全撞唔到香港人

都唔係冇重疊既。。。14我返左 Santiago訓一晚，不過嗰度咁多人，都冇乜可能遇到

我14都係Santiago，可能見到你都只會覺得你係韓國人或者臺灣人，邊會諗到係香港人

真係好多台灣人、韓國人～就連日本人都冇乜

咁巴打應該都體會到，落雨落到人生失去希望，同埋每日都要床位大戰～ 有啲可惜，差左兩日就係兩日，camino成日都係咁樣

我第一日係SJPP行去Roncesvalles，已經雷電交加兼落冰雹，行到去Roncesvalles果人已經發冷係咁震，每日行快兩步既動力只係為左albergue 有足夠熱水沖涼，床位係過左sarria 先開始緊張，最後試過無位訓就開始用Booking.com 訂定第二日既住宿

SJPP，好懷念呀

估唔到差一兩日啲天氣差咁遠，連庇護所都冇咁full (或者係我每日都太遲達陣 )。過左Sarria真係好無奈，好多時都冇位，去到Santiago除左Seminario Menor之外，其他全部full曬。 而我就用卜傾book Seminario Menor

竟然有同時期行既巴打睇到個post，真係好“驚”喜。

講講下啲回憶返晒嚟，真係好想再去避下世

咁都有相認

係少數人好似你同首席鳩噏官咁好彩ja...個座死人庇利斯牛山成鬼日都大風又勁雨, 唔係咁 The Way 個仔點會死咗喺嗰度.

我個陣行左好危險個邊路...
到發現個左已經太遲落左好多級樓梯

我行個陣大霧到根本睇唔到有分叉路, 又無乜人, 個人濕Q哂, keep住凍到震, 相都無乜點影

19/8

今日要繼續上山，無得休息。

之後，大家幾個朝聖者圍內傾開沿路既住宿，我地得出一個結論，行原始之路要記住一句話：Don't fuck up with the schedule.

如果你唔跟住官方schedule去行，你每日住嘅地方、行嘅路程就會亂曬龍。

今日離開Grandas之後行5km有一間庇護所，然後就要再行20km去大鎮A Fonsagrada先有落腳地。 我只係得兩個選擇，5km或者25km，我要趕路根本冇可能行5km，所以我冇得唞，焗住要行25km。





今日一開波呢段路就已經有啲chur，頭14km要爬升600m，之後一直輕微上落行11km去Fonsagrada。





開頭嘅大上斜其實係之前大 deep V既一部分，由La Mesa 嘅1000m+，落到Salime Dam嘅 200m，再上返 O Acebo 嘅1100m+，成段路真係好黐線。

有巴打話，其實噚日可以行少啲，停喺水塘邊既酒店訓一晚。 如果真係咁做，今日就唔單止要行31km，而且一開波就要連續爬升900m左右。

呢個原因多多少少影響到我噚日嘅決定：如果我前一日就已經行到隻狗咁，第二日仲要行上去大帽山，我諗我唔會堅持到落去。。。

Priest house個神父好好人，間屋(社區中心？)分開兩開房，夾埋都有成十張床褥放喺地下。

我諗個神父已經習慣接待朝聖者，好多人行到Grandas都冇地方住，咁佢就做救世主打救左我地。

神父冇收錢，連donativo都唔係，免費收留我地一共8、9個人一晚，camino好人好事實在太多。 噚晚實在太攰，我冇換衫披住件風褸就訓左，六點半醒左衫都唔駛換，刷完牙就可以直接出發。



今朝我7點先開始行，訓左晚隻腳好返少少，雖然成個人都仲係好殘，不過都可以頂硬上。

以前我只係得個知趕路好辛苦，但係就冇試過嗰種感覺，依家親身體驗到～ 我只可以話，趕路會失去左好多嘢，我本來就唔係行咁遠嘅人，每個人都應該行返自己嘅節奏，我依家完全唔係做緊自己。

行左一陣就見到日出，山入面嘅日出特別靚，好光好刺眼。





唔知道係咪我錯覺，今日條路感覺多左好多朝聖者 ，不過都係嗰句，全部都係陌生人，而且令人格格不入嘅係好似大家都互相認識，淨係得我一個孤兒仔。 我唔係好想再諗落去，下定決心要去 Santiago，就唔應該俾其他野左右到我既決定。

呢14km嘅上斜好漫長，行行下甚至變左做行馬路，我追住前面個鬼佬，以佢作為目標一路向前行。













由車路轉返入山路之後就係最後衝刺，上山頂呢段路好窄好斜，我愈行愈慢，

好彩嘅係大家都減曬速，帶頭有兩個人塞住左條隊，咁大家都好樂於慢慢行，所以就7、8個人一個接一個咁跟住上斜。

上山既路有一排風車，有啲似好耐之前嘅風車山，當風與星星交匯之地，不過依家我就得自己一條友行，冇左台灣大叔、姐姐。







幾經辛苦終於上到山頂，行到想死。

望返隊頭行得好慢嗰兩個人，竟然係第一日由Oviedo出發，路上遇到嘅嗰對美國夫婦。 雖然大家幾日冇見，難得我地都仲認到對方，好驚訝之餘大家打左個招呼。

翻過山頭黎到O Acebo，就正式進入Galicia，亦即係原始之路既最後一個省份，欸，其實就淨係得Asturias 同Galicia。

黎到Galicia就即刻見返呢度獨有既“里程碑”，166km，訓多五晚就可以行去到Santiago。



大家都去個石碑影相留念，我就係咁咦叫左美國夫婦幫我影張，其實真係好攰，就算好興奮都冇心情慶祝。



進入Galicia之後就只係淨返11km，由山頂已經可以望到十公里外既終點Fonsagrada。 嗰一刻我崩潰左，我甚至懷疑好遠望到既地方唔係Fonsagrada，而係另外一條村，因為望落實在係太遠。



由山頂行過去終點係慢慢落斜，中間起伏唔大，但係我又一次好絕望。

噚日我行左31km＋先進入撞牆期，今日先行左14km我已經撞曬牆，每一步都好辛苦。

而最慘就係我唔可以停低，週圍一張凳都冇，而且太陽好曬好熱。。。最怕嘅係，我一停低左，就冇動力行埋淨返落黎既路。

隻腳雖然冇生水泡，但係腳板底就出奇地痛，每行一步路都un住un住。 我唔可以再行山路，啲碎石仔一直喺度侵蝕緊我既意志，所以我行左落同山路並排嘅車路。



全程11km行車路，除左我一個人咁樣做，完全冇其他朝聖者會咁行。(踩單車嘅另計)

大家見到有個怪人一直行馬路一定好奇怪，其實我都唔想，只不過我冇得揀。 呢段路我又係一張相都冇影，只係想快啲捱到終點。呢度同噚日Grandas段路一樣風景好靚，可惜我行嘅時候一啲心情都冇。

我連電話都唔敢拎出嚟，因為怕被雷劈

隻腳雖然冇生水泡，但係腳板底就出奇地痛，每行一步路都un住un住。

生水泡前嘅徵兆

我個日又無行雷, 雖然有雨但唔算大, 但上山段路就好大風, 吹到個人郁

入Fonsagrada鎮既最後一段路係大上斜，去到庇護所啱啱好1點開門，可以直接check in。

雖然我行得好慢，平均1個鐘得4 km，但係全程冇停過，所以比大部份人早達陣。

去到庇護所只係得五、六個朝聖者，checkin 之後我正式沖返過涼，換左呢件着左兩日嘅衫。 我依家已經唔再考慮慳錢，因為真係好Q辛苦，所以又食左個朝聖者餐。











Fonsagrada呢個鎮比噚日既Grandas大，不過就冇咁靚，除左食嘢飲酒都唔知可以做乜。

大部分朝聖者都坐曬喺Bar入面飲酒，我毒自一人就無謂多飲，週圍行下就算。





行返去庇護所門口終於俾我見到跑山佬Andrea，而且仲有Paolo大叔！

呢隊意大利衝鋒小隊，用好恐怖嘅速度爆左45km。 Andrea話佢地朝早5點出發，今日個deep V完全冇難度 (佢冇咁講，不過我感覺到 )，行左10個鐘，下晝3點就黎到。



不過Paolo大叔純粹係陪 Andrea行， 聽日佢會喺Fonsagrada呢度訓多晚，因為佢想等埋Dani嗰班人一齊行。。。 冇諗到，今日竟然可以見返好幾個舊人，有少少感動。

之後，毒L除左去博物館我諗唔到仲可以做乜。









今日嘅博物館同噚日Grandas嗰個比真係好伏，入場費要2歐，貴啲不特止，而且細得好緊要。

博物館好矮只係得兩層，展品一樣係睇唔明，想搵個地方坐低都冇。 女職員要特登開燈俾我入去參觀，我諗嗰2歐就係用黎交電費，

所以估都估到，我係嗰度唯一嘅遊客。行左一陣實在太攰，好快就出返去，2歐冇左。



等超市開門嗰陣，我去左公園坐下，咁啱美國夫婦佢地兩個又坐左喺度，所以大家終於可以傾返幾句。

原來第一日離開Oviedo之後，佢地就一直head住我10km，但係去Hospitale 個日天氣唔好 ，所以就行左去Pola de Allande 經車路上山，之後就由Pola de Allande行37km去Grandas，一句講晒，依家仲見到嘅舊人全部都係痴線佬，個個都行勁遠。

其實我成日話佢地係美國夫婦，正確黎講應該係“美國藉”， 兩夫婦望落似墨西哥人，兩個都可以講流利西班牙話。老公英文極好，但係老婆就唔識英文，要佢另一半做中間人翻譯。

之後大家研究下聽日行去邊，其實只係得兩個選擇～

方案一：聽日行24km去O Cadavo，後日行30km去Lugo。

方案二：聽日行32km去Castroverde，後日行22km去Lugo。

呢個係一個先苦後甜定先甜後苦嘅問題，因為呢54km入面只係得兩間庇護所，根本就冇X得揀。

Lugo係大城市，所以大部份朝聖者都會狗衝嗰度間albergue， 美國老公就叫我先行去Castroverde，咁後日就可以早啲達陣。


其實我好唔想行3字頭，依家隻腳仲係痛到喊，根本就唔適合行咁長途。

然後大叔就話，我已經55歲，我老婆50歲，我地兩個都行到，你嘅年紀細我地一半有多，冇理由行唔到既～～～

又用激將發，一個二個都知我弱點，而我又次次都中招。

去到Lugo之後，美國夫婦佢地唔再趕路，Lugo到 Santiago最後呢段路分4日行，不過我就要繼續趕，用3日行到Santiago。 同一條camino，有千變萬化種行法，可以一齊行到終點嘅人又有幾多個。


醒起佢地一直都早我半日路程，所以就問下佢地有冇見過一個香港女仔啦。

大叔諗左半日，先記起三日前喺Tineo，見到個亞洲女仔訓隔離床， 不過佢話個女仔訓到好晏都仲未出門口，佢地兩個走左個女仔都仲未起身，唔知道係病左定係點。

除左嗰日喺庇護所見到嗰個亞洲人，之後就冇見過其他亞洲人樣，不過佢冇好肯定咁話係亞洲人，只係話個女仔look exotic，其實講得有啲曖昧。。。

點講都好，我都幾肯定呢個女仔就係Karen。 咁樣嘅話我可以推斷到Karen每日住邊，亦即係話佢行得好慢 ，每日十幾公里左右，我好可能一早就爬左佢頭。

嗰日離開David間albergue之後我就直奔 Tineo，話唔定我同佢就喺呢一日錯過左，而我仲一直以為佢喺前面。

要揾一個人原來一啲都唔簡單 ，即使primitivo每日最多只係得五、六十個朝聖者，不過遇唔上就係遇唔上，你話係無緣定係整定，我都唔知。

再諗深一層，茫茫人海，淨係香港都已經有七百萬人，可以遇上呢一位而唔係另一位，又真係幾神奇。 Camino只係人海嘅縮小版，離開camino之後，可以遇上嘅每一段緣份一樣係得來不易。

(Grandas之後，每逢Check in，我都會問下前台之前幾日有冇香港人住喺度，但係連續問左四日都食白果。

Lugo之後好快就會駁返去法國之路，到時候朝聖者嘅數目會上升好幾十倍，搵人就更加困難。

所以我亦都放棄左，Karen呢件事就此告一段落。 )

超市5點開門，我地去左買嘢食，然後就返左去庇護所。

我食完生果、餅乾就返上床訓覺，其實先8點鐘不過我已經覺得好攰。

訓對面上格床嘅係“熟人”， 就係噚日同我一樣由 Campiello 行到Grandas既西班牙大叔，佢個樣有啲似Ben Stiller，除此之外我淨係記得佢好痴線。



訓覺之前大叔指一指自己，同我講：Tomorrow, long day.

Long day? 咩料～

然後佢話：Lugo.

WTF？Are you chi xin？？？

Lugo距離Fonsagrada 54km，雖然落多過上，但係上落幅度依然好大，大叔打算一日爆50幾公里路，又一次一日行兩日既路。

當我以為自己7日由Oviedo 行到 Lugo已經好快，點知有人6日就得。 Ben Stiller西班牙大叔話佢聽朝4、5點左右就出門口，所以今晚好早就要訓，依家算係同我講掰掰。

雖然有啲gay，呢個係兩個黐線佬之間嘅道別～～～曾幾何時我都瘋癲過。 (雖然只係得一日)

唔好想，再去啦

Camino 真係太奇幻，好掛住