西班牙朝聖之路 (五十日長篇)

984 回覆
115 Like 3 Dislike
2019-02-20 18:40:23
好快行到Vila do Conde,時間先十二點,避開左晏晝最熱嗰段時間。







其實嗰度係一個大城市,不過舊城區唔喺市中心,反而位於一入城既邊邊位,所以好寧靜。 晏晝一點到五點Siesta嘅時候,全條街一樣係冇人,睇黎西班牙同葡萄牙對於午休嘅態度係一樣。

去到庇護所門口先知道三點先開門,咁呢三個鐘可以做乜,條街曬到喊,我去tourist information攞左張地圖但係完全冇動力去觀光。



最後,我去左公園食餅乾,食完之後攞左部Ipad出黎聽歌,攤左喺長檯上面瞌下。

訓左冇耐,突然有個肥婆婆行過黎嗌醒左我,係咁話Robando吓?唔會係唔俾訓公園掛~~~ 但係婆婆又完全唔識英文,淨係講Robando我點知佢噏乜,最後攞左部手機出黎孤高translate。

婆婆攞走左我部手機,入左餐廳叫人翻譯,(依家諗返其實都幾危險,咁樣俾左部手機人 ) 最後先知原來佢想提醒我,咁樣攞住Ipad訓街小心俾人偷嘢。

但係我之後上網查返,Robando明明係西班牙文,點解婆婆唔講葡萄牙話嘅~~~

俾婆婆整醒左之後冇曬睡意,去左Dia買意大利粉、罐頭同埋防曬,因為六月嘅葡萄牙已經變得又熱又曬,我由Finisterre起曬左好幾日,已經開始有人問我係咪菲律賓人, 再唔搽防曬就會變非洲黑人。

買完野已經可以去庇護所check in,床位7.5歐,負責check in既阿叔阿姨見到我本護照,若有所思咁話“hong kong is not china, right? 太好鳥,有前人解釋過就慳返我好多口水,佢係我個名側邊大大隻字寫左 Hong Kong。



第一次喺庇護所見到冷氣,不過冇得開。







庇護所得25張床,旺季7、8月嘅話日日都要床位大戰,但係6月算係淡季,全間嘢得十五個朝聖者左右。

放低背囊,雖然我已經估會唔會見到佢,但係伸個頭入去房望下嗰時,見到墨西哥大叔依然又驚又喜!

同房仲有今朝好酷、行得好快嘅白人男仔,佢叫 Peter係波蘭人,上年行過葡萄牙之路既 central route,今年就行coastal route。

Peter仔係人肉維基百科,熟讀古今中外所有書籍,對camino都好熟悉,佢話有一次同捷克朋友傾捷克歷史,傾傾下傾到一啲連佢朋友都冇聽過既野史。

墨西哥大叔就捉住Peter仔係咁問葡萄牙之路嘅嘢,問定之後幾日嘅路況,話一定係個天指派 Peter仔落黎幫佢。


同房仲有三個美國女仔,三個本身都唔識對方分開過黎,但係就三個都係由Ohio黎。 佢地好守規矩,由Porto市中心行左 33km過黎,但係行得好慢所以第一日就已經行左十粒鐘。

佢地又話中段熱得濟差啲中暑,咁墨西哥大叔就變返專家,建議佢地晏晝太熱嗰時可以入bar坐下,唞夠先再行 ,而且可以着襪之前喺啲腳趾搽花士令,減低腳趾之間嘅摩擦冇咁易生水泡。 不過,佢又話自己尋日喺 Porto買防曬俾個店員陰左,賣左隻貴嘢俾佢,一支70ml要40歐。



Vila do Conde舊城都幾靚,我同墨西哥大叔做下觀光客,因為呢度係大航海時代嘅造船重鎮,所以好多古蹟都係嗰個時代起。





有去過Segovia既巴絲可能會覺得呢個建築有啲熟悉,大家都係引水道,不過Segovia嗰個係羅馬人起,有兩千年歷史,Conde呢個就“只係”得兩百年歷史。

教堂裡面有人即場彈鋼琴,好好聽,反而法國之路行左咁多日都冇聽過。





晚飯去左庇護所隔離間餐廳食,5歐一個朝聖者餐,可以話係史上最平,冇前菜同酒,但係有湯、主菜、甜品同咖啡或茶。


隔離枱坐左英國黎既一家五口,墨西哥大叔今朝行嗰陣,一開始仲見到佢地,之後就消失左,嗰老豆就苦笑:we were so fast that nobody could see us... Peter仔就如常係度介紹呢樣嗰樣:葡萄牙有四大名城,Lisbon plays, Braga prays, Porto works and Coimbra studies。Braga係葡萄牙宗教中心,亦都係Central Route途經既城市,所以多人行Central route都唔係冇原因。


今日我好開心可以行返 camino,唯一令我有啲唔盡興嘅係,我既camino只係淨返兩日,真係好冇癮。
2019-02-20 18:45:45
可能巴打最後行得好快呢,我個墨西哥大叔七日就行到 Santiago ,如果要趕路嘅話都冇話唔得~~~
2019-02-20 19:06:15
我都諗住係行coastal 行到去tui /vigo 之後行返內陸
2019-02-20 19:19:43
依家好似冇乜人會由 Caminha行去 Tui,沿住條河行應該好無聊,反而A Guarda之後嘅海岸線就好靚,而且Vigo比 Tui值得去好多。

最後時間太趕嘅話可以即日來回Finisterre ,或者索性skip左佢
2019-02-20 19:21:07
mark 低先
2019-02-21 00:46:31
呢幾日有D 冷靜番落黎
一入番黎個POST 又有衝動買機票
2019-02-21 15:00:37
Camino呼喚緊巴打,去吧!
2019-02-21 15:15:47
睇緊飛歐洲邊度最平
應該飛荷蘭玩幾日
見到最平單程 3000有找

過埋JETLAG再去行
行完法國 +世界盡頭 再去巴賽幾日睇教堂
預大概 50日

但係4月個天氣好麻煩
睇人講又溫差大 又落冰雨
好驚帶多/帶少左野去
2019-02-21 15:37:09
單程應該可以二千樓下?我記得飛德國同英國連稅都只不過係千七、千八蚊~~

50日夠曬啦,帶少可以買,帶多可以揼,沿路有好多好心人,冇需要擔心
2019-02-21 15:47:01
點搵到咁平
我經skyscanner成個歐洲都係2/3千
2019-02-21 16:04:20
只係淨返兩日,我開始諗,到底最後一日要行到去邊,以邊度作為我camino嘅終點。

噚日Peter仔話今日要行28km先有庇護所,海線嘅問題就係咁,因為庇護所唔多,所以行幾遠其實唔到你決定,係個天整定嘅。

朝早有人校左五點半鬧鐘,估唔到痴線佬邊度都有,葡萄牙之路嘅朝聖者一樣鬥早出發。 不過最痴線既係,鬧鐘響左十幾分鐘嗰條友都冇㩒熄佢,所以個鬧鐘成功嘈醒曬所有人,就係叫唔醒set alarm嗰個。


因為已經醒左,而且我都想快啲達陣,咁就唔駛晏晝陽光直射頭頂既時候,繼續行俾太陽蹂躪,所以我盡快執嘢食早餐。

我同墨西哥大叔講聲掰掰之後,七點之前就出發。今日只係行平路,但係28km都幾遠,至少要行到下晝1、2點。





出左庇護所即刻兜返出去海邊,其實官方路線係行內陸,不過正常人都會行海邊所以大家都冇理啲箭咀。

同噚日一樣無敵大海景,時間先七點,海濱長廊已經有唔少人喺度跑步同放狗。

一開始呢段路其實係市中心海旁,Vila do Condé 同Povoa de Varzim兩個城市係連埋一齊,沿住沙灘行去 Povoa de Varzim要行3km先到,然後又要行多2km先出到城。











今日開始見到多啲朝聖者(數埋都有十個既 ),因為Varzim嗰度有另一間公營庇護所,有唔少人噚晚應該喺嗰度訓,只係差3km所以今朝大家都算係一齊出發。

出左城之後照樣行棧道,又冇得用行山棍。

其實只不過係望左一日海,但係已經有啲厭,加上海風太勁吹到有啲頭痛。

噚晚Peter仔話佢會早啲出發,想去海灘玩下水吹下風,因為呢個先係行海線既重點。 行左陣我就見到佢坐左喺海灘,老人與海,望住個海望到入曬神,我冇去打擾佢直接就行走左。



Peter嘅背影








接住落黎既路就冇乜特別,直至行左11km去到Agucadoura,棧道黎到呢度就完左,前面係高爾夫球場,所以冇得沿住海岸直穿過去。

由呢度開始個箭咀就指左我行內陸,成段路真係悶到pk,完全唔覺得自己行緊海線。 而且行既係車路,有時仲會有車由側邊駛過,揚起啲沙泥要我食塵。


俾個高爾夫球場擋住左,冇左海風嘅海線熱到抽筋,我愈行愈頹,最後頂唔順停左喺路邊有少少遮陰嘅地方,食左隻蕉飲左幾啖水。

正常我係唔會停喺車路邊唞,不過嗰時實在太熱,好似就快中暑咁。 Peter仔追到我,傾左幾句之後佢繼續行,因為我呢休息地點又真係差左啲,之後有個德國仔一樣行過左我冇停低。









我好想兜返去海邊行沙灘,但係沿途都冇路兜返出去,只可以繼續同太陽搏鬥。

我由SJPP出發嗰陣係五月頭,到依家就快六月尾,由西班牙北面一直黎到靠南嘅葡萄牙,天氣有好明顯嘅變化:之前朝早最凍嗰時試過2°C,到依家中午打後30°C以上。 行去Olveiroa嗰日都仲有落雨,到依家陽光普照、萬里無雲,冇雲遮下陰氣溫急升,曬到我生無可戀。

噚日我仲好開心可以行 camino,今日我就已經後悔黎行 camino,一路行一路問自己點解要攞苦黎辛。

我已經去左Santiago,行呢段路亦都唔夠時間俾我去多次 Santiago,我到底係度做緊啲咩。。。 做觀光客嘅話冇必要行28km,我真係唔知我為啲乜堅持。


行到去 Fao先有機會見返個海,嗰時已經行左21km,過橋之後行多2km就到大鎮Esposende。







入鎮之後見到美國Ohio三人組,佢地今朝勁早出發,可能係因為噚日行左十個鐘得到教訓,所以今日未到一點就已經行左一大半。 我揾左張長凳坐低食曬所有餅乾,然後要繼續行埋最後7km,真係好痛苦。
2019-02-21 16:35:41




Marinhas係一條好細既村仔,細到連村既中心點我都唔知係邊。 庇護所係由紅十字會管理,去到嗰時一點過啲,門口有兩個背囊放左喺樓梯上面排隊,所以我係第三個人達陣。

屋側邊既樹陰有兩個人喺度攤唞,訓喺度既係Peter仔,坐喺度嘅係個未見過嘅亞洲人女仔。(第一次見到亞洲人 )

庇護所又係3點先開門,我見時間咁多,所以就索性去Bar坐順便睇波。


點解要睇波?

因為睇既係C朗對摩洛哥,幾日之前喺Vigo睇完C朗對西班牙,人在葡萄牙所以就身體力行去支持下當地人。 場波講真有啲悶,不過最重要係葡萄牙贏左一比零。



中場休息嗰時有個阿伯係咁同我講Macau,繼噚日Robando之後再一次牛頭唔撘馬嘴 ,都唔知Macau係佢個名定係地方名,我只可以係咁指住自己話 Hong Kong。。。 最後又用孤高translate,好似勉勉強強搞清楚來龍去脈:

阿伯個名好似真係叫Macau,佢家族十九世紀嗰時係澳門總督,雖然數數手指都已經超過一百年前,但係伯伯仲係念念不忘。 所以一見到我係亞洲人,就講下啲家族史。

咁我又奇怪~~點解伯伯又會知道我係黎自澳門。。。隔離既香港呢?



場波完左返去庇護所,門口只係淨返我一個背囊,大家都check曬in。

庇護所donation 5歐,同噚日嗰間一樣好大但係唔多床位,得34張。 張床麻麻地但係其他設備就非常好,living room有電視同埋從來都冇見過嘅desktop,洗衣機免費,沖涼房有好多格而且有旅行裝洗頭水、沐浴露攞,仲要係法國嘢。








廚房有啲細,但係同 Galicia 乜野餐具都冇嘅比,呢度簡直係天堂。 我對呢間庇護所最深刻既地方就係佢分左上下兩層,訓覺係上面,沖涼係下面。 啱啱黎到既朝聖者好多都搵唔到沖涼房,咁我就要帶佢地睇樓走落去show間沖涼房俾佢地睇。

難得有desktop用所以就開機用下,不過我只係上fb同 youtube,好似同我用手機上網睇嘅嘢一樣。

我見墨西哥大叔咁耐都未到,就text佢問下佢行到邊,佢覆我話行左去Braga~~~

等等先~Braga唔係喺central route咩?

大叔竟然由 coastal route行左去 central route,之前提過佢係極度隨心所欲,其實Vila do Conde 去Braga係無官方路線,所以佢無箭咀跟只可以開住導航睇地圖行過去,

camino就係咁隨意,冇人叫你一定要跟住黃色箭咀,最重要係行你鍾意行嘅路線,所以話,有路既地方都可以行。

我講俾Peter聽大叔唔行過黎鳥,佢就O嘴話:I'm so impressed by how he improvised. 我地呢啲守規矩嘅人,係唔明白墨西哥大叔點諗到要行過去 Braga。

晚飯煮左個意大利粉食,因為太無聊所以就厚住臉皮咁 yo下坐對面亞洲女仔。

個姐姐望落廿五、六歲,帶眼鏡勁斯文,原來又係韓國人,叫Yoonmi。今次已經係佢第三次行 camino,不過一直都冇行到去 Santiago ,第一次係行法國之路León 去 Sarria,第二次係行原始之路Oviedo 去 Lugo,每次都飛左最後100km。

今次行葡萄牙之路海線仲未決定要唔要行到Santiago,每次camino都隔左好幾年,你話算唔算camino上癮呢,我又覺得唔係好算。

我又問返老問題:你最鍾意邊條camino牙?Yoonmi就話原始之路,因為風景最靚而且冇乜人,海線雖然都係冇乜朝聖者,但係其實好多本地人,相比之下原始之路就寧靜好多,行緊嗰陣真係可以親親大自然。 而且庇護所唔多嘅情況下,每日都會見到同一批朝聖者,關係會密切好多。


跟住我地又講到行海線既時候,見到好多藍色箭咀指返轉頭,咁Yoonmi就解釋:原來有一條Caminhos de Fatima,由西班牙嘅Santiago行去葡萄牙嘅Fatima,沿路係跟住藍色箭咀行,啱啱好同Camino Portuguese行反方向。



Fatima亦係天主教重要嘅朝聖地點,朝聖對象係聖母,1917年有三個細路聲稱自己持續見到聖母顯靈,每個月同一個日子同一個鐘數同一個地點都會出現 ,之後仲同佢地講左三個秘密(three secrets of fatima),

最後一次顯靈嘅時候,有七萬人包括平民伯性電台記者聚集曬喺Fatima,大家都見到有個巨型火球從天而降,聖母真係出現左(算係掛 )~~

所以Fatima就成為崇拜聖母瑪利亞最重要嘅地方,而2017年嗰時正值聖母顯靈一百週年,所以反方向行Camino de Fatima嘅人,比行Camino Portuguese 嘅人仲要多。 (成件事其實好複雜,有興趣既巴絲可以上 wiki睇下~~ https://zh.m.wikipedia.org/zh-hk/花地瑪聖母)

Yoonmi姐姐行葡萄牙之路之前去左Lisbon探朋友,參觀埋Fatima,佢話佢葡萄牙最鍾意嘅地方就係Fatima,我睇過佢啲相,又好似真係幾靚。

Yoonmi靠唱歌揾食,19歲開始做伴唱,一唱就唱左十年。(原來佢已經廿九歲,所以我真係唔識睇女人年齡 ) 我覺得同佢真係幾啱傾,行左咁耐Camino,呢次係我第一次覺得好可惜,冇得同新識到嘅朋友繼續行落去。

如果有時間繼續行海線嘅話,我諗我地會做到好好朋友,但係呢個世界冇如果 聽日跟官方路線嘅話係行21km去Viana do Castelo,而我成晚都諗緊好唔好行多啲,為我camino最後一日畫上一個難忘嘅句號。
2019-02-21 16:41:43
我都係用 Skyscanner 睇,去返官網買都只不過係千九

2019-02-21 17:18:08
如果你行全程camino嘅話, 巴塞淨係睇一睇聖家堂就已經夠...因為教堂會睇到厭
2019-02-21 17:27:45
就係想睇佢
係巴塞應該都係最多留三日
2019-02-21 17:28:48
係喎
點解一路都睇唔到
2019-02-21 17:29:40
https://i.lihkg.com/540/https://na.cx/i/Sgk8crY.jpg/quote]
葡萄牙好似興一碟過, 唔似得西班牙咁分starter,main dish.

[quote]廚房有啲細,但係同 Galicia 乜野餐具都冇嘅比,呢度簡直係天堂。

唔知邊年開始, Galicia政府為咗令旅客外出消費, 鼓勵(非強逼)所有住宿不提供煮食工具.

跟住我地又講到行海線既時候,見到好多藍色箭咀指返轉頭,咁Yoonmi就解釋:原來有一條Caminhos de Fatima,由西班牙嘅Santiago行去葡萄牙嘅Fatima,沿路係跟住藍色箭咀行,啱啱好同Camino Portuguese行反方向。

我之前去到Burgos 遇到個80歲嘅台灣阿伯, 佢信天主教嘅, 同我講咗好多關於教堂D公仔嘅故事.
佢個時同我講要去花地瑪...我心諗哇...點行啊....原來都係一條路線
2019-02-21 17:35:08
聖家堂唔好上塔, 想聽故事就買埋導賞, 或者入到去望下有無香港人嘅團, 痴埋去聽故仔聖家堂book定飛就唔洗點排隊, 你預約個段時間前去到就ok.
巴塞有幾座山可以睇哂成個巴塞. 好多遊客上山睇日落.
其他高第嘅館貴到hihi, 又勁多團, 完全無興趣入
2019-02-21 18:25:00
呢招真係幾成功,我去到Galicia好多餐都要出街食,根本就煮唔到飯,想搵隻匙食下yogurt都唔得。 要煮飯食慳錢嘅話,反而要去住私營庇護所。。。

我記得巴打係2017行?啱啱好係一百週年紀念,所以阿伯一定要行埋過去
2019-02-21 22:38:34
不停睇post睇咗6個鐘
依家睇到一半,想問問樓主啲問題再上返去繼續睇
一路睇一路有種衝動想去 但就唔知全程使費幾多
同埋應該買單程機票定來回機票,應該點買好
再加上英文唔太好對成個行程有冇太大影響?
有冇使費(機票+交通+食宿)價錢可以參考下
小弟應該比巴打細個,都係諗住毒遊
Thx巴打
2019-02-21 23:27:39
我記得有人問過, WIFI巴都有答過, 好似唔計機票, 唔計行完之後去玩, 洗咗7千幾HKD
2019-02-21 23:37:04
多謝巴打支持喔

駛費#593樓有張圖,37日由SJPP行到世界盡頭駛左7500港紙,好多人都可以更慳(露營、食法包 ),我就一般唔算最慳嗰啲。

機票我買單程去法蘭克福,千八蚊,夠時間既話買單程好,之後嘅路有彈性。 咁計既話,來回機票連去起點交通、保險、買裝備,你預一萬五左右。

英文唔好冇問題~好多人唔識英文西文都照行,而且大家都話camino is an intensive English course

一個人的朝聖路從來都唔獨毒
2019-02-21 23:37:57
你miss咗Astorga間Albergue都有desktop
我住Santiago有間都有desktop
2019-02-21 23:40:11
留名
2019-02-22 00:00:44
最近呢兩晚,我一直考慮緊今日要行去邊度。



官方路線建議行去 Viana do Castelo,21km,嗰度係個大鎮,由Viana返Porto坐火車亦都好方便。


想要行多啲既話,就要行多27km去 Caminha,總共48km,即係一日行左兩日要行嘅路。


我一直都好想行去 Caminha,因為本來打算逆行就係要坐船穿越西葡國界,如果今日行到去Caminha嘅話,就可以望到對岸嘅西班牙,感覺就好似完成返一開始定落黎既計劃。

而且我行左咁耐,好似一直都係懶懶閑,冇話點樣挑戰自己。 冇錯,雖然我係行到膊頭痛、膝頭哥痛,但係只不過係因為個背囊麻麻地、自己又用錯姿勢,我感覺自己其實係可以行遠好多。

或者呢個係我固執嘅觀念:如果冇挑戰過自己既極限,就好似冇朝過聖咁。(依家太輕鬆? )

雖然決心唔係好大,但係我噚晚冇攞睡袋出黎,用庇護所張毯當被鋪,執好左背囊,校好四點鬧鐘,準備今日挑戰48km。


要記得之前我最多都只係行過40km,雖然今日嘅上落坡唔算好多,不過又未至於Meseta高原咁樣完全平路,所以唔駛估都知道會係硬仗一場。 朝早起身完全冇問題,四點鬧鐘響之前就已經醒左,食完早餐都只不過係四點過啲,準時開始挑機!

呢次係我第一次,亦都係最後一次早過六點鐘門口,睇左咁多篇 post既巴絲都應該知道,小弟最討厭就係一早起身夜行,所以一直都冇摸黑行路既經驗。

Marinhas出發嗰段路好暗,佢係一條村接一條村咁行,雖然有街燈,但係燈同燈之間嘅距離好遠 ,加上啲箭咀又細又放埋喺啲角落頭 ,我一出門口就已經蕩失路。

因為冇app睇路線,黑媽媽又睇唔到箭咀,成段路只可以靠創意一路向北,行得好慢好慢。

四、五點既時候又黑又凍,行過啲屋嗰陣仲會俾狗吠,有時真係俾佢嚇親。 不過最恐怖嘅係沿路都冇人(其實有人嘅話仲恐怖 ),又唔知自己行得啱唔啱,一開始呢兩個鐘絕對係camino上最不愉快經歷之一。

好多人都話夜行嗰時好寧靜,抬頭會望到滿天星星,但係我呢段路係穿過啲村屋,所以完全冇呢一種體驗。





直到六點鐘日出,呢個情況先有啲改善,開始認到路搵返啲箭咀,行返上去官方路線。 嗰時我只係行左七公里左右,即係每小時唔到4km,有行過山既都知道平路4km真係好慢。











太陽出黎之後有少少山路同上斜,好彩我唔駛摸黑行呢段路,唔係既話真係分分鐘碌落山。

已經一日半冇貼住個海行,如果可以沿住海岸行嘅話就可以解決到所有問題,可惜依家冇得揀,只可以繼續撐落去。

日出之後嘅風景其實唔錯,而且我行左咁多日,好似真係得今日完整見到成個日出過程。

不過,我由起身到依家已經行左3粒鐘,我淨係覺得好眼訓,一開始嘅雄心壯志已經慢慢減退。



過左Belinho嗰個教堂之後要上山,嗰時先七、八點,平時我先啱啱出門口,而今日我已經行左10km,但係一諗到仲有38km要行就想死。











落山之後去到Vila Nova de Anha,我入左間bar飲杯咖啡唞下,時間已經就快9點,仲有5km就行到大鎮Viana do Castelo。

心算一下,行左就快5個鐘先16km,以咁既速度要行多10個鐘先去到Caminha,即係下晝5點。

嗰一刻,我突然唔想再行落去,

唔想再捱,唔知點解要繼續行,

決定行到Viana do Castelo就算。

下定決心唔行之後,我就好似放下心頭大石咁~~~唔需要再趕路,唔需要再受身體上嘅折磨,由呢一刻我既 camino就完左,因為我已經完全冇左朝聖既心。

飲緊咖啡既時候,姐姐Line我,問我今日行到去邊,我話我今朝四點起左身,打算要行48km,但係依家已經放棄左,行21km算,所以睇得出我係一個極度容易半途而廢既人。

唉~~明明行 camino就係想講俾自己聽,唔可以咁容易放棄,點知黎到依家,好似反而助長左我呢種愛理不理既態度。



Viana do Castelo入城條路好經典,要行過一條大鐵橋先可以去到市中心,橋上面可以睇到Viana全境,山上面有坐好大嘅教堂,離遠望到就已經覺得好壯觀。

鐵橋好長全綠色,上下兩層同時俾車同火車行過,叫 Ponte Eiffel。

佢係Gustave Eiffel嘅作品,所以睇落同 Eiffel tower、Porto嘅Dom Luís I Bridge有異典同工之妙。條橋望落好舊,咁係因為佢已經有超過一百年歷史。

吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞