西班牙朝聖之路 (五十日長篇)

你啱, galicia省嘅石碑特別過人
講起石碑, 波蘭仔send過張相畀我

邊度黎

muxia

唔怪得, 上次無去到, 行行下淨係記得Finisterra, 完全唔記得咗Muxia

見到個橫切面嚇親
唔敢行

17/8

噚晚David問我地想幾點起身，咁佢就會預返時間煮咖啡，用咖啡嘅氣味叫醒所有人，而時間就由我地所有人協議出黎。

最後大家揀左兩個時間投票，六點半得到10票 ，七點半得到1票 ，德國仔堅持佢嗰一票都應該得到重視 ，所以大家就讓步，由六點半起身，改為六點三十五分起身，體現到朝聖者之間既民主。

有早餐嘅好處就係冇人好早就起身趕路，之前兩日大部分人都係六點半前出發，但係今日同樣時間，大家都仲喺張床度訓緊。

David已經將洗好嘅衫摺好曬放喺檯面，大家都出乎意料地悠閒，慢慢梳洗、食早餐、執袋。 可能係因為已經book左庇護所，而且今日既路程又唔遠，所以就冇話好心急咁想快啲去到終點。

噚日已經決定左行去 Campiello，由Bodenaya 行過去只不過係25km，大約5、6個鐘。加上今日段路冇乜上落斜(相比之下 )，chur左兩日之後終於可以唞下。









我諗大家都好唔捨得間庇護所，一個二個去到七點半都未出門口。

要知道傷心總是難免的～～庇護所只可以訓一晚，即使你賴死唔走，你今日識到嘅全部人聽日都會離開，離別係必然。

走嘅時候David俾左擁抱我，然後我又要一個人上路，不過我仲有一個星期嘅路，前面仍然有嘢值得期待～～～

啱啱過去嘅兩日喚醒返我兩個月前法國之路既經歷，行camino可以幫我充滿電、正能量爆燈，但係離開camino之後就好似一直漏電，愈來愈頹。 返黎行camino係開心，再有充電嘅感覺真係好滿足。







今日天氣都幾差，一出門口就毛毛細雨，行左冇耐就經過一條村仔，然後再行10km先去到大鎮Tineo。

行過村仔感覺就好似Silent Hill咁，大霧瀰漫，能見度應該唔到三十米，過馬路嗰時好驚有車突然衝出黎。

因為太潮濕而且落緊雨，沿路景色我隨便用手機鳩影就算，風景亦都一般，行平路雖然輕鬆，但係景色就無辦法同上山嗰陣相比。









呢種天氣其實似曾相識，對於落雨行山我一啲都唔陌生，反而有種莫名其妙嘅親切感。(好似有啲變態 ) 天陰陰都有佢嘅好處，天氣陰涼行山都舒服啲。

行到第三日，基本上大家都已經有固定隊友，Dani、Paolo同意大利仔Andrea永遠都係一馬當先，一開始偶然會撞到佢地，然後就要去到庇護所先遇返。

Francisco、德國妹同波蘭女警雖然一樣行得好快，但係就成日入 bar唞好耐。 有時佢地爬左我頭，不過之後，我又會喺佢地休息緊嗰時過返佢地，不斷重複追追趕趕既過程。所以雖然大家唔算好熟，但係就成日行行下撞到。

嗰幾對西班牙男女就永遠都係一pair pair行，大家都好識做，唔會走埋去做電燈膽。

當然亦都有唔少人係獨行俠～包括我～同以前相比，今次我更加適應毒行，可能係因為過去兩個月毒行耐左，習慣成自然。




落住雨冇風景睇。 諗返呢兩日我遇到既朝聖者，全部都係以 Santiago作為終點，所有人一心一意要完成呢條朝聖之路 ，沿路、庇護所裡面嘅人亦無私幫助每一個朝聖者 ，我可能被大家感染到，呢一刻我真係好想好想去 Santiago衝線。 如果我只係行到 Lugo，然後望住大家行去 Santiago，咁又有咩意思～ 所以我腦海出現左另一個計劃：

Plan A：原本計劃，23/8到 Lugo，巴士飛都已經買左，返馬德里訓1、2晚先飛走。

Plan B：如果要行去 Santiago，我可以25/8晏晝由Santiago 坐巴士返馬德里，然後第二朝飛。

我數一數手指，今日行到去Campiello，聽日係18/8，由Campiello去 Santiago 大約有230km，7日時間行230km，平均每日32km，其實都冇話唔得嘅。


雖然趕路真係好辛苦，但係唔趕嘅話就冇得去 Santiago，我好掙扎，唔知應唔應該趕路好。


Tineo呢個小鎮一樣幾靚，不過落住雨，睇落有啲灰灰暗暗。







超級市場好大，不過就喺條村嘅盡頭，要穿過成條村落到最底，買完嘢之後又要上返斜路搵返條 camino，好似淨係得我傻仔左去呢間超市。

唯一補償就係俾我參觀一下條村，不過天氣咁差其實冇乜好睇 ，而且條斜路斜到痴線，早知道 Campiello 有得買嘢食，我就唔駛喺Tineo買定先。

行返上條 camino 之後突然有啲肚痛，所以我坐左喺個水池隔離唞下。

坐左差唔多廿分鐘，只係見到十個人行過，全部人都熟口熟臉。

由Tineo去Campiello呢13km乜都冇，開始慢慢體會到primitivo荒蕪之處，行10km一間Bar都冇好平常 ，而且好多時候，啲庇護所會分隔十幾二十公里，所以訓邊度其實係冇乜選擇。

坐左陣個肚冇咁痛，繼續行就要上一少段山路，上山嗰時穿左入樹林裡面，我終於搵到兩碌樹枝當行山棍。

行山竹上手，成個人突然充滿力量，唔再行到死下死下，估唔到行到第三日我終於揾返我兩個老朋友。

因為我行得快左，而其他人上完山之後有啲頹，所以我追返唔少進度。Francisco 見到我呢幾日第一次咁龍精虎猛，以為我傻左，問 why the fuck you running？ 我話我終於執到兩支行山竹，突然間覺得腳步好輕快，落山嘅時候真係好似想跑咁樣。



行到最後5km轉返車路，我終於追到德國仔，咁我地就前後腳咁行，行左成個鐘都淨係得我地兩條友。

成段路都幾荒涼，可以好遠望到聽日要行嘅Hospitales，成座山脈全部都喺雲層入面，一睇就知道上左山嘅話就會勁大霧。 如果聽日天氣都係咁樣嘅話，可能就要放棄山路行返車路。







連續三日都係1點達陣，Campiello 其實唔太算係一條村，只係得幾間屋同兩間庇護所 ，我唔知道Dani book左邊間庇護所，隨便入左一間問下，先知道原來Dani同Francisco 都係book左同一間albergue。

入到房已經見到Dani、Andrea同Paolo啱啱沖完涼，但係肥大嘅芬蘭大叔竟然係第一個達陣。

噚日佢住唔到Bodenaya就繼續行，所以今日比我地早出發，佢一推開門見到自己係第一個朝聖者都好驚訝，因為呢件事從來都冇發生過。

然後大叔佢話今日落住雨行爛泥路好噁心，咁我咪話可以幫隻腳做 mud bath囉 ，點知大叔話都唔知嗰啲係泥定屎，好似做緊shit bath多啲。









1點行到 Campiello其實真係好無聊，呢度乜都冇，除左飲酒食飯訓覺都唔知可以做乜，但係樣樣都要錢(訓覺除外 )，所以我夾完三文治食之後，就一直攤喺張床度上網。

今日係休息日，我仲猶豫緊聽日要唔要開始趕路，如果要趕路嘅話之後就冇得 hea住行，今日係唯一一日舒服行既日子。

Dani同德國仔係bar度飲嘢，我點左杯啤酒坐埋去，但係唔係好搭到嗲。







Dani係做IT既，德國仔想轉行但係又唔知IT行頭點樣，所以就問下意見。佢地講啲嘢我都聽唔明，所以就得個坐。

隔離仲有幾檯西班牙人同意大利人，佢地都係講西班牙話所以更加搭唔到嗲，始終primitivo 係少好多人講英文，要social既話未必係一個好選擇。

之後Dani 走左去西班牙人嗰檯，我同德國仔就傾下去旅行啲嘢。 我講返我行法國之路之後去左摩洛哥玩，好唔鍾意嗰度，週街都係騙子呃人，唔明點解會有啲咁既地方。

佢就話佢第一次離開德國就係去摩洛哥玩，已經係十年前既事，一開始都好唔習慣，去完摩洛哥之後仲以為去世界其他地方都會咁多騙子。

但係再之後去左南美一年、印度半年，慢慢去嘅地方、識嘅人多左，又發現其實呢個世界都仲有好多好人 ，唔可以被一少群害群之馬令你失去對人既信任。

然後德國仔醒起喺摩洛哥去沙漠睇星星，話嗰度係佢見過最靚嘅星空，然後先發現大家都係一樣去左Merzouga 沙漠。 諗起都覺得奇妙，佢十年前望到既夜空，我十年後去返同一個地方望住一樣嘅夜空，時間過左咁耐但係世界其實一直都冇變，只不過係人唔同左。

(唯一唔同嘅係，我去沙漠嗰時係滿月，乜星都睇唔到。 )

嗰晚全間庇護所廿幾個人都去左食 Pilgrims menu，我為左慳錢就繼續火腿夾麵包食。

成間房得返自己一個有少少孤單，就係呢個時候，我下定決心：

我想試下趕路，我想再去多次Santiago，上次葡萄牙之路無辦法去到終點，可能今次再黎行camino，就係預示我要行去Santiago。

聽日如果好天既話，我可以行捷徑經 Hospitales，一日行兩日既路～ 兩個月前帶住好多遺憾離開，依家有機會俾我去補償，我覺得我點都應該盡力搏一搏。


我 cancel 左我張 Lugo to Madrid既車飛，然後買左張 Santiago to Madrid (25/8, 14:00) 嘅車飛，而且今次買既係non-refundable，希望自己唔會再半途而廢。








大家食完飯返黎，Dani不斷同我道歉話冇拉我去食飯，事實上，係我自己想慳錢唔去食，但係佢就覺得自己冇照顧好其他人。

要趕路嘅話就好大機會要同呢批人分開，我其實真係好唔捨得，如果繼續呢個節奏唔趕路，我應該可以同 Dani、德國仔、俄妹幾個人行到Lugo。 但係第一日就講到明要行返一條自己話事嘅camino，所以慢慢行呢個諗法我又抹左去。



嗰晚我Line姐姐，話佢知我行緊原始之路，然後send左幾張相俾佢睇，佢第一句覆我“現在是炫耀嗎”。 之後講到前面一樣有個香港人行緊，姐姐就叫我加油追上去，我就話追就一定要追，不過係因為我要趕住去 Santiago ！

巴打由 Irun出發既話，已經行左兩、三星期北方之路，黎到原始之路一定完全冇問題

原來係David間albergue, 我仲搞錯咗話Dani.
做乜你成日都話要慳錢，但又去咁多個地方旅行
講起大霧，我行法國之路, Portomarin之後，勁大霧又收唔到電話訊號。心諗唔係入咗結界掛，silent hill? 仲要前後都無人

慳錢係為左去耐啲旅行 ，如果日日豪食一早就返左屋企。。。其實西班牙都好貴下

十月都咁潮濕 ，睇黎galicia真係一年四季都春天。

一年四季都落雨嘅地方，我見人地冬天去行葡萄牙之路，去到Galicia都係落雨

到左santiago 之後內容多左咁多
又多內心戲

我去到教堂都有放下心頭大石感覺
終於唔駛再行
真係好辛苦

講開落雨，我第一次去 Galicia係6月，嗰陣時真係日日落雨。 但係第二次8月去到，雖然時間唔長，但係就日日俾太陽曝曬。

終點對我黎講都好重要，雖然話過程比結果重要，但係冇終點又邊度有過程。 可能係因為咁，所以行完法國之路之後，對我有少少衝擊，對camino嘅睇法又有啲改變。

我好多時都有book
book 左安心啲

有近路行行路

True, 有次 D箭嘴叫你兜入村, 但有行過嘅人話直行唔洗兜入去, 可以慳3km, 地下又有塗黑咗嘅直行箭嘴, 緊係唔兜

峰迴路轉
竟然又去行返camino

可唔可以講下時間表，幾時去到邊
但唔好劇透 hahah

就快完，完之前up返過時間表

如果一開始劇透左就冇故講

但係兜路有風景睇(好似，如果唔係)，3km可能係Leon嗰兩條路

六點三十五分嗰度笑咗
feel到david嗰間真係好warm

18/8

今日要趕路。

因為改變計劃要去衝線，由Campiello去Lugo呢130km要用4日行完，由Lugo去 Santiago嗰最後100km就要分3日行到，其實真係趕到痴線。

為左下定決心要去到 Santiago，我決定今日就開始趕行程，一日入面行兩日嘅路。

正常情況大部分人都係由 Campiello 經Hospitales 行去Berducedo，一共行27km， 因為全日上落斜都唔少，途中又零補給，所以行到呢度係最正常嘅選擇。


如果想行多少少，就好似Francisco 佢地咁，行多 4.5km去 La Mesa，一共31.5km。

不過我一早都講明左要趕路，La Mesa之後要行16km先去到下一條村，中途又係冇補給冇庇護所，想中途停低都唔得。 所以今日焗住一共要行47km，如果成功嘅話，我就好大機會可以行到Santiago。





如果大家仲記得我葡萄牙之路最後一日，挑機48km失敗(#675樓)，今日又有機會俾我再次挑戰，突破自己之餘仲可以補救上次嘅過失。

不過今日呢47km比上次嘅48km艱辛好很多， 一開始去到Borres就行山路由600m爬升到1200m，然後一直沿住山脊線上上落落，最後14km係一個超級deep V，由1000m急降到200m，再行返上去600m高嘅Grandas de Salime。





噚晚我冇攞個睡袋出黎，一早已經執好嘢，今朝起身洗個臉，拎起個背囊就行得。

為左行得輕鬆啲，我晚餐食曬我咩住嘅所有水果，亦都冇裝滿支水，盡量將個背囊控制喺10kg。

同我一樣咁早起身嘅人唔多，淨係得Francisco佢地幾個，因為佢地比一般人行遠少少，多4.5km，所以早啲出發都好合理。

出門口嗰時已經6點，我唔敢太早出發免得摸黑行路行行太耐， 依家大約要摸黑一個鐘左右，天光嗰時應該啱啱好開始上山，咁就唔驚行山路嘅時候睇唔到路而pk。

呢一個鐘絕對係與黑暗中對話，全條路一盞燈都冇，附近亦都冇任何村落、城市，個天好清完全冇雲。

呢段路係我唯一一次喺camino上見到滿天星星，週圍好黑但係星星好光亮，日出前嘅天氣好凍，我行得好快，喺星空下趕路有一種披星戴月既感覺。


我理解到點解有啲朝聖者鍾意黑媽媽出門口，呢度嘅星空比乜野摩洛哥沙漠靚太多，我唔駛抬起頭直望就已經睇到星星。

(大前提係，段路唔可以喺樹林入面、嗰日要係天清氣朗、唔可以係滿月。。。睇星真係可遇不可求。 )

不過週圍實在太黑，而我又係第一個人出發，所以一開波我就行車路，打算行到 3km之後既Borres先cut返上山。

車路都幾好行，唯一唔好就係有啲兜路，雖然可以行得快啲但係就行遠左。 去到Borres有條小路上山，但係我睇唔到啲箭咀同貝殼，唔肯定條路係咪駁返上去Hospitales條山路，所以就決定繼續行住車路先。

行到半路就已經睇到日出，7點半嘅時候行到去La Mortera，嗰陣個天已經光曬。





我行左出村就覺得唔對路～ 雖然依家係搵得返啲黃色箭咀，不過行緊既就唔係Hospitales上山段路，而係去緊Pola de Allande 既車路。

我記得指示話La Mortera係最後一站俾朝聖者決定，到底要行 Hospitales 定係Pola de Allande，所以我喺呢度miss左上 Hospitales 條山路既話就GG鳥，因為之後就再冇機會兜返上去。



我坐左係La Mortera路邊食早餐，順便睇下地圖，估唔到一開波就出師不利，兜路之餘仲要蕩失路， 都唔知道行多左幾多路。

不過，天光之後確定今日嘅天氣真係好好，非常適合行Hospitales，所以我仍然未放棄挑機～依家先行左個半鐘，點可以咁快就放棄。

穿過幾間屋仔之後兜返上山，終於搵返Hospitales條路，同時亦見返其他朝聖者。 哎喲，明明我係第一個出門口，而且都算行得幾快下，兜兩兜路後面啲人就竟然追到上黎。

我同Francisco、德妹打左個招呼，話自己蕩失路，然後就自己行先，開始今日瘋狂趕路。







La Mortera 之後就一直不斷上山，但係上到半山腰風景就己經好靚，係靚到痴線， 我一直不斷驚嘆見到嘅風景，我一路行就開始明白點解個個人都咁推崇呢條路。

雖然一直上山而且有啲路都幾斜，但係朝早嘅天氣、溫度非常適合上斜，一邊行一邊望風景完全唔覺得攰 ，反而愈行愈有衝勁，想快啲行去高啲嘅地方，睇下週圍嘅風景會唔會更靚。











行緊既時候我真係好開心，估唔到camino都會有呢種景色，意外而來既驚喜永遠都係最令人感動。

Hospitales沿途冇補給，但係就令到呢20幾km完全處於深山野嶺之中，沿路我睇唔到任何車路、村莊，一啲人為活動都冇發現到。


而且我應該係第一個人上山，所以前面一直都見唔到其他朝聖者 ，向前望只係見到一山還有一山，向後回望景色就更誇張。。。 遠遠望到一大片雲海真係不得了，







加上不斷行不斷上山，望到既風景愈來愈遠、景色愈來愈廣闊，到依家只不過係行左三個鐘，我已經好肯定，今日嘅風景係我咁多日camino入面最靚嘅一日。

上到山頂 (我估係山頂掛，因為到頂之後一直沿住山脊上上落落 )，我停低坐左一陣，因為望到嘅風景已經令我忘記左自己要趕路。











如果可以一直坐喺度就好喇，我可以一直望住啲山坐成個上晝，完全唔會覺得悶。

今日呢段路，本來係應該慢慢行好好享受，但係我就要一日行曬兩日嘅路。。。


坐緊既時候見到有個人行得好快，由山腳跑緊上山，只不過係十幾分鐘，就已經由山腳底間荒廢Hospital上到黎我休息緊既地方。

跑山佬原來係意大利仔Andrea，佢手長腳長，背囊極細，全身跑步衫，一睇就知道呢段路對佢一啲難度都冇。

一見面我就不停話今日風景好靚，Andrea行慣意大利啲山，一定覺得我大驚小怪， 傾左一陣，我覺得山頂呢個位置比較適合一個人慢慢享受，所以就由得Andrea喺度坐下，自己一個行先。

呢段路之所以叫做Hospital Route，係因為以前沿路有4間服務朝聖者既Hosiptals，最後一間直至十九世紀嗰時依然運作緊。

時至今日，所有hospitals都已經變左做廢墟，有啲甚至連廢墟都講唔上，只係得幾塊爛石頭喺度。 所以呢段翻山越嶺嘅捷徑就叫 Hospitales，一邊行一邊經過啲廢墟，感覺上更加荒涼，成個地方好似冇乜生氣咁。















因為一直山過山，行緊嗰陣大風到人都吹得郁，我着住件風褸依然覺得件衫入風 ，我要用支行山竹撐住個地下先企得隱，如果唔係就係行唔到直線。

而且依家海拔都有1100～1200m，高啲嘅地方自然凍啲，所以就半行半跑想跑熱個身。

































十點半左右就已經去到Puerto del Palo，呢度係車路同山路嘅會合點，由呢度開始我就見返多啲朝聖者，成條路熱鬧返少少。

因為噚日天氣好差，估計有唔少朝聖者都行左去Pola del Allande 過夜，所以今日雖然天氣好好，但係已經冇得返轉頭行Hospitales，變左焗住要行車路上山。
(其實都唔算完全車路，只不過係沿住車路行綠色隧道。 )

車路上山斜好多，所以由車路行到上黎既朝聖者都臉青口唇白，個個人都行得好慢。 行行仲見到個女仔差錯腳，坐左喺地下，行到好沮喪。









再行一段大斜路落斜之後，行左15km終於見到第一條村Montefurado，不過條村好細得幾間屋仔。

呢度以前係pilgrim's hospital，但係依家連一間Bar都冇，就好似3.8km之後既Lago咁，話就話係一條村，其實又係乜都冇，想買支可樂都唔得。











跑山佬Andrea喺度追左上黎，佢問返我想行到邊，我就話Grandas de Salime，呢個地方名勁橋口 ，而且又遠到痴線，Andrea諗左陣先知道我講邊度。

咁我就話我要趕路，所以今日要行47km，點知Andrea又係同我一樣，都係要24/8行到 Santiago。

不過佢只係行到Berducedo，今日條路坡幅太大所以佢覺得唔適合趕路，聽日先至行45km去 Fonsagrada。
(其實聽日行45km一樣勁多上落，有一個大deep V由1000m落到 200m，再上返1000m。 )

既然係咁我同Andrea都好大機會同一日衝線，當然，大前提係要我衝到先得。









之後我地就前後腳咁行左7km去Berducedo，去到嗰時Andrea已經坐喺長凳上面休息，嗰陣時1點鐘未到我已經行左27km+， 我覺得狀態唔錯可以繼續挑機。

由Berducedo 去Grandas de Salime 主要係落斜 (800m: down, 400m: up) ，行得快可能4粒鐘就行完 ，5點鐘達陣都可以接受。

Andrea攞左本 guidebook出黎睇，Grandas間庇護所得28張床，如果5點先達陣其實都幾危險 ，因為好多人都會由呢度或者Pola de Allande 行去 Grandas，嗰度算係大村所以唔少朝聖者都覺得值得訓一晚。 庇護所冇得 book定，我咁晏先去到，真係要自求多福。

唔知點解我嗰一刻既決心出乎意料地強，難聽啲講就係一意孤行，死都要行去Grandas，所以就同 Andrea掰掰，然後講好聽日 Fonsagrada見。

之後段路行4km去La Mesa，沿路都算平坦，行緊嗰時見返一對法國情侶 ，第一日住 Villapanada嗰晚佢地夜晚八點半先到庇護所，負責人大叔俾佢地訓梳化，但係佢地就決定繼續行。 都己經兩日冇見過，估唔到今日一趕路就遇返佢地。

去到La Mesa，嗰度有兩間庇護所，好多朝聖者已經check 左 in坐曬喺屋外面曬太陽，但係呢度唔係我既終點，我仲有16km要行。





喺呢度我犯左一個極大既錯誤：我冇喺呢度裝水，就咁帶住200ml水行最後呢段路。

16km其實都幾遠吓，只不過我已經行左31km+，所以成日覺得好快就會到，呢個係一個美麗嘅幻覺。

La Mesa之後就要直踩Grandas，我冇諗過我根本就唔夠水飲，而沿途亦都冇地方可以買水。

過左La Mesa我就冇遇過其他朝聖者，一直都係自己一個人行 ，唔係條路有其他人而我選擇毒行，而係因為成條路真係一條友都冇。
要去Grandas既人一早就已經達左陣，唔去嘅亦都唔會行到黎呢段路，所以淨返落黎既呢段路就要自己去面對。

上斜之後我突然之間覺得好辛苦，離開Berducedo 之後只不過行左7km，我已經冇左嗰種精力充沛嘅感覺，換黎嘅係“撞牆”嘅痛苦～

由山頂就可以望到山對面既Grandas，但係中間隔左一個好深嘅山谷。 我真係好絕望，當我望到個終點，但係同時亦見到行去終點既路係幾咁痴線，我真係好想放棄。。。




對面就係Grandas。。。


但係我要兜落去個水塘再上返去

但係之前都講到，行得呢段路就冇得棄game，要一直行到去Grandas。

離開La Mesa之後就冇中途休息點，我可以清楚望到一路落山嘅路，好斜好迂迴 ，落到底會行過一座堤霸穿過水塘，然後又要上返山去到半山腰嘅 Grandas de Salime。

由堤霸上去Grandas條村一開頭係沿住馬路行，我離遠就已經望到有啲好細嘅人影郁下郁下，四、五個朝聖者各自各咁上緊山，最後衝刺緊。

最絕望嘅係我雖然望到其他人，但係我地之間嘅距離至少差左8km，我點追都追唔到上去。

落山有兩條路，因為2017年山火塞住左條舊路，所以就開辟左一條要兜勁遠既新路。

其實2018年年頭舊路就已經清理好，不過啲指示牌就依然留喺度混淆視聽～～～





6:00am 0km

7:30am 6km

10:30am 21km

12:45pm 28km

2:00pm 33km
.......

仲有14km先到 Grandas，但係我愈行愈慢，落山條路好斜，我坐左幾次落地下，我好攰好口渴，但係週圍一個人都冇。


成段路風景其實好靚，但係好遺憾我一張相都冇影到 ，我甚至將部相機收左入背囊入面，就算風景幾靚我都已經冇心情去欣賞。

我好想棄game，好想放棄，但係行返轉頭去 La Mesa要行5km爬升至少500m，同我繼續向前行比較一樣咁辛苦。


我一直單曲循環夏川里美首歌“フルサト”，利申我係唔識日文，香港出發之前我喺電腦隨便執左100首歌落手機，結果呢幾個月聽來聽去都係呢幾首歌。

落山既時候啱啱loop到呢首歌，然後我突然好想聽住佢黎行，結果一聽就聽左兩三個鐘。

歌名叫“故鄉”，歌詞我就唔識喇，淨係覺得聽住佢好似會開心啲，因為我真係好辛苦好想放棄。 由今朝一直上山驚嘆連連，黎到呢一刻，我從來都未試過行得咁唔開心，今日既心情起伏同上落斜一樣，都係一個deep V。
https://youtu.be/4x8RDAfWVh8

落到半山腰要打橫行，兜個圈先可以落到去水霸。

由1000m+ 落到去 400m左右，溫度同高度成反比，加上依家已經係下晝3、4點，氣溫急升。

落到山谷裡面風細左好多，又熱又渴，我好需要飲水如果唔係就會中暑，但係我只係淨返一啖水30ml都唔知有冇。好後悔喺La Mesa冇入庇護所裝水，不過後悔又有乜用，好多野都係冇得返轉頭。




條村叫Grandas de Salime，最出名既就係距離條村6km既Salime Dam。

當年第二次世界大戰一完左，1948年西班牙政府就開始建造呢條霸，1954起好，主要係用黎水力發電，而佢亦都永遠地改變左由La Mesa去Grandas嘅路。(至少段路近左 )

當時佢係西班牙最大，歐洲第二大嘅水霸，高125米，長250米，算係primitivo嘅地標之一。

4:30pm 41km
.......

終於落到底，行到去Salime Dam，週圍安靜得有啲恐怖 ，一個人一架車都見唔到，我兩隻腳已經攰到開始腳震。

但係我唔可以停低，仲有6km以我依家嘅速度應該要6點先入到村，

我已經冇再諗庇護所會唔會full嘅問題，我只係想快啲行到終點，唔想再捱落去。





水霸對面有一堆荒廢左既屋、工廠，望落好似鬼屋非常核突，

之後先知道，原來嗰啲係興建水霸嗰陣俾工人住既地方，施工期間有100～300個工人死左 ，所以呢個壯觀既建築係用血肉堆疊出黎，怪唔知得行經呢度既時候有一種詭異既氣氛。







4:45pm 42km
.......

水霸之後再行1km竟然有間酒店，真係喜出望外，我即刻狗衝入裡面嗌左罐可樂。

可樂要1.8歐但係就算係4歐我都會飲 ，行左10km嚴重缺水之後，呢個地方同沙漠綠洲一模一樣，我裝滿左支水然後一口氣就飲左一大半。

飲緊可樂既時候，我見到張海報，原來呢間酒店一樣有床位，而且12歐一晚唔算特別貴，嗰一刻我突然好猶豫：

到底我應唔應該繼續行落去？

如果我繼續行去 Grandas，去到嗰度庇護所好大機會已經full左，而今晚訓呢度基本上就冇人會同我爭 ，水塘邊風景都唔錯，我已經行左咁遠破左自己嘅紀錄，我仲需要證明啲乜嘢。

但係嗰陣時，飲完杯可樂之後，我嘅意志又堅定返，決定要行埋最後5km。

行山最重要都係意志力，當你個背囊已經冇得再輕，雙手已經攞住一對行山竹，淨返既就只可以靠自己既決心。

我一開始就講好左要行去 Grandas，依家只係差 5km就行到，都已經行左11個鐘，冇理由最後一個鐘都堅持唔到。

我又諗返起葡萄牙海線嘅fail，今日唔會再俾同樣嘅事發生第二次！

埋單之後我重新出發，最後一段路係上山，但係我行得比啱啱嘅落山更有衝勁。

行行下仲見到呢三個鐘以來第一個朝聖者，佢好悠閒咁坐左喺山邊，吹住風望住風景，嗰時已經係5點半，我諗佢有 book到酒店掛。

啲風景真係好靚

兩條路真係好難揀
一條有人可以同我 9 UP ＋易行
另一條 風景靚 ＋有海景 但係難行D