西班牙朝聖之路 (五十日長篇)

阿爸同我講：你去行下朝聖之路啦，話唔定會有啲咩得着。

就係咁，我買好左五日後嘅機票，一條友出發去西班牙行山。

朝聖之路橫跨西班牙北部，終點係位於西面近大西洋嘅聖地牙哥，理論上由歐洲任何一個地方都可以作為朝聖之路嘅起點，但係最熱門嘅路線就係＂法國之路＂，由西法邊境出發，行大約三十幾日七百幾公里。我嘅目標只係要行完，行幾快，慳唔慳就冇點諗

好多人話行完朝聖之路可以改變人生，開竅兼睇透一切，我雖然唔係好覺自己有咩改變，但係有一點我肯定嘅就係呢條路真係與眾不同。

先up幾張相回憶下

法國之路嘅起點係Saint Jean Pied de Port (簡稱SJPP)，直到依家，我都唔太肯定佢個名嘅正確讀音。小鎮喺法國境內但係離西班牙邊境只有二十公里，所以大都數人都會坐飛機去巴黎或者馬德里，然後再轉火車或者巴士過去。但係身為廢青，我有時間冇錢，所以就選擇左一個曲折嘅方法過去：

首先，由香港飛德國最平，飛法蘭克福上海轉機單程千八蚊，所以德國無端端成為左我歐洲第一站。係法蘭克福訓左兩晚之後我撘左ryanair十歐飛機去Toulouse，離SJPP又近左啲。最後，用左半日坐左兩程火車終於去到呢次旅程嘅起點～～～



上海轉機十二粒鐘，俾我出去感受一下祖國點樣高速發展。呢次係我第一次一條友出黎玩，突然要我一個人係街頭散步都咪話唔孤單。上次去上海成班friend有講有笑，依家要我毒自面對外灘，唉，物是人非(其實係物非人非，上次開瓶器仲係上海最高 )

江邊有個大媽撘訕，又話要請我同佢班C9去飲茶，三唔識七而且我仲要番機場趕飛機緊係拒絕左佢，有一種警訊嘅感覺話我知我唔可以第一日出黎就瀨嘢。我仲要行朝聖之路！

之後去左佳家湯包，食左一籠當晚餐。同檯對面之後黎左個日本大叔，雞同鴨講之下知道佢好鍾意中國，仲要黎玩過好多次，而且依家學緊普通話？！之後證明佢啲普通話真係好普通，就連點罐啤酒都唔work，所以我用我一樣普通嘅中文幫下手。之後我發現坐係到收錢嘅老闆娘對我嘅目光都有所改變，變得友善左～～

樓主咩月份出發? 睇相, 估係 5~6月
camino上面有無遇到其他香港人?(之後會post就唔洗答我)
仲有無諗住再行? 我有諗過再行 camino de norte

好恐怖，點睇得出係五月架
冇遇過，但係知道行我前面有一個，後面有兩個，一直都遇唔到～
之後應該唔再行(至少短時間內唔會，點解之後講)，聽講norte真係好靚，好想去

有時間就去埋西維爾大教堂啦

留名 想辭職行

因為睇過好多篇, 再加上自己行過
7,8月好熱, 路上嘅人應該唔會著風褸
9,10,11月周圍都收割, 周圍都黃咁咁,
淨低就 4,5,6月可以估

Norte 有好多沿海嘅路, 有山又有海, 少D行馬路, 不過我睇其他post/遊記, 消費貴過camino france

之後由上海去SJPP就冇咩特別事發生，係hostel摺在三日，正如大部分去過法蘭克福嘅人所講，呢個城市真係有啲無聊。景點一個下晏就行曬，又冇咩同其他人交流，嗰一刻只係想快啲開始行朝聖之路。

同房有個馬來西亞人，已經黎到佢三十日歐遊嘅尾聲，有得用廣東話就緊係傾翻幾句(點知下一次講廣東話已經係兩個月後嘅事 ) 佢知道我第一次毒遊，就叫我唔駛驚架，咩都放膽去做啦，我諗我嗰陣睇落真係好無助





好快就去到Toulouse，訓左一晚就急急腳上左去Bayonne嘅火車，車上面加埋十個人都冇，沿路風景好靚，坐位好舒服，盛恵22歐，即係比起我Frankfurt 飛Toulouse 嘅機票貴左一倍。去到Bayonne 要等三個鐘先有車去SJPP，所以就俾時間我週圍行下啦。我本來就未去過法國同西班牙，雖然話Bayonne呢個城市融合左兩國嘅風格，但係我真係唔太識睇，總之，歐洲小鎮望落都好靚啦

由Bayonne開去SJPP嘅車一日只係得四班，以前”the way”電影入面係坐火車去，但係依家就得巴士

車上面幾乎全部都係朝聖者，望住佢地嘅背囊行山杖，就知道大家係幾咁有準備。事關我都係出發前先去迪卡龍買左個四百蚊背囊，然後換左對行山鞋，可以話係冇咩準備過 坐車嗰陣大部分人都已經開始social下，唔知係啱啱先識定係一早約好一齊行，不過按統計話，朝聖之路大部分朝聖者都好似係一個人上路。身為摺凳嘅我就上車訓到落車，睇左幾眼風景，兩個鐘就到左SJPP。









朝聖之路又叫聖雅各之路，全名Camino de Santiago，但係大家都係叫佢camino就算。雖然所有camino終點都係聖地牙哥，但係因為有唔同嘅路線，所以每條路都有佢自己嘅名，我行嘅法國之路(French Way/Camino Frances)只有第一日喺法國境內，之後三十幾日都係西班牙入面行，叫做法國之路主要係因為起點位於法國

用左四日，我終於黎到朝聖之路嘅起點！！！

第一件事就係去朝聖者office登記，攞本credential 朝聖者護照，咁就可以用平價入住沿路上嘅集中營庇護所。Office入面好多人，排隊排左成個鐘先輪到我，大部分都係歐美朝聖者，如果見到亞洲臉孔，十個有九個都係韓國人。攞完護照我就跟住地圖去搵住宿，點知官方嘅十歐庇護所已經住滿左，我就唯有行去睇下其他住宿啦。

貨比三家，最後住左一間廿歐包早晚餐，放低行李之後就訓著左等開飯，依家好後悔冇係SJPP週圍行下

好傷心，冇去到

Gogogo, 強推

廿歐嘅庇護所係有佢嘅價值，都未開始行朝聖之路，我就已經體驗到傳聞中嘅朝聖者聚餐。大家準時七點坐係長檯開飯，有沙律丶主菜丶麵包丶甜品同埋唔可以冇嘅酒，當時我就覺得啲菜式好普通，但係行完成條路食過咁多餐之後，我可以好肯定咁話呢餐係我食過所有朝聖聚餐入面最豐富嘅

大家都好多嘢傾，不過只限於一班西班牙人同另一班法國人，全晚都係法文同西班牙文滿天飛。同枱得另外兩個人講英文，一個有大肚腩嘅加拿大大叔，另一個一樣有肚腩嘅美國女仔。大叔以前就行過法國之路，今次黎Bayonne只係黎玩，所以就幫個女仔分析下第一日嘅路況，同埋有啲咩要注意(但係佢地坐得太遠，我唔係太聽到佢地傾咩 )。雖然未太融入到，不過係期待聽日出發嘅。

食到一半黎左個大叔check in，問where are you from? 佢話Taiwan

感覺上終於有個有啲親切感嘅人黎到，不過大叔坐得好遠，嗰晚打左個招呼大家就翻房訓，嚴格來講，佢可以算係我camino上第一個朋友。因為聽日係傳說中全條朝聖之路最難行嘅一日(傳聞好多時都係錯嘅)，所以大家好早就訓，準備一早就出發！

俾我有機會再行，我會4月或者11月行，5至10多人到喊

Norte夏天好似一樣要搶床位

5月都多人？
我個時9月中開始行，pamplona之後，淨係試過一個鎮仔full. 越後越少人，10月中去到santiago都大把位。
一般我行到2~3pm就停。

多人呀～提起一隻字都心酸：completo
我都係三點前停，只係試過幾次行到五六點

五點半起身，收拾好六點食早餐，六點三準時出發！台灣大叔以為要等齊人先開餐，結果我食完出去走廊發現佢仲等緊，我就叫佢入去飯廳食嘢，然後自己行先喇。因為我本來就唔係行得快，今日要行二十七公里，先上千二米再落四百米，應該至少行七個鐘。

一齊出發嘅有兩個西班牙大肥佬，其中一個仲要斷左隻手，一樣可以行全條法國之路，都真係幾勁。不過，千祈唔好以為佢地係老弱傷殘，佢兩個行平路嗰時速度奇快無比，之後幾日佢地每次都比我早達陣，我真係唔明。



正式出發！太早一路上無咩人，我一度以為自己行錯路，沿路無咩景色因為起曬霧咩都睇唔到，但係天氣就非常適合行山。開始上山冇耐就過左兩個大肥佬(印象中唯一一次快過佢地)，行下行下兩個鐘左右就去到第一個庇護所，然後就GG了。眼前所見係一羣一羣嘅朝聖者，打聽一下發現原來噚日天氣太熱，好多人行左八公里就頂唔順，結果住左係半路呢間庇護所。當我行到呢到先朝早八點半，緊係唔會住係到，所以就繼續行。









就係上面呢間屋仔，我相信噚晚有成百人訓左係入面。

之後一路上都遇到唔少朝聖者，感覺上有啲似假日係香港行山，但係我都冇點停過同人傾計，有個韓國大媽以為我係韓國人一開口就係韓文(呢種事日後不斷發生 )，傾落先知佢係住濟州島，然後又話今日嘅景色就好似翻左屋企行山咁。

其實聽佢咁講，又覺得呢度真係有少少似漢拏山。

朝早嘅霧氣開始慢慢散開，開始見到周邊嘅風景，不過我已經行到好攰，無咩心情欣賞景色，只係想快啲行到終點，快啲放低個背嚢。

之前我從來都未試過負重行山，今日咩住十公斤嘢上山真係好唔慣，最後上升嗰兩百米真係全憑意志力完成。到頂嗰一刻我坐左係山頂，我已經身處西班牙境內，諗番起自己點解要黎西班牙，呢一刻我先至真正覺得自己係行緊朝聖之路。









當我以為落山好快就到，只可以話我實在太天真。

噚日office俾左張地圖我地，話落山有兩條路，一條係捷徑，好斜而且天氣惡劣嗰陣唔好行，另一條就兜路但係好行啲。作為一個自問有方向感嘅人，我望都冇望地圖就直衝落山，落到一半先知瀨嘢。原來我行緊捷徑，而呢條路真係斜到喊，仲要我上山嗰時已經上到腳仔弱，依家落山真係四肢乏力，坐左幾次落地下。



有朝聖者曾經係到遇難



就係呢條害人不淺嘅捷徑，feel到腳底好似要生水泡



最後一仆一碌咁碌咁去到Roncenvilla，亦都係大部分朝聖者第一晚留宿嘅地方。

呢間修道院係一間超級庇護所，有四五層高可以容納二百幾個住客。

入住之後第一時間係冲涼洗衫(呢個係大部分朝聖者嘅作息)，然後食左個麵包就訓左陣。

晚飯之前係修道院入面行來行去，但係真心無野做，大家都只係等開飯。開飯喇，不過味道就好一般，只係得一條燒過龍好細條嘅魚。食飯模式有啲似噚日嘅聚餐，但係呢個盛恵十歐，加埋早餐五歐，連住宿一共係廿七歐，仲貴過係法國嘅消費。









三四點嗰陣朝聖者陸續黎到，office門口大排長龍，門口個金髮男之後識左原來係比利時人



同枱食飯又遇翻今日山上面遇過嘅韓國大媽，山上面同佢分開之後佢同另一個日本老婆婆一齊行，問下佢接住落離幾日嘅行程係點，大媽就話佢打算要慢慢行，享受一下呢條路嘅風景丶人同食物(我諗佢應該真係行得幾慢，因為我呢日之後就冇再見過佢)。

一齊食飯嘅仲有德國夫婦丶黎跑山嘅瑞典女仔丶唔識英文嘅法國佬同埋日本婆婆，可能係因為大家都知道以後都未必有機會再見面(尤其係跑山嗰個)，所以大家都好樂意傾計。

食完飯有一個為朝聖者而設嘅彌撒，全程一個小時都係用西班牙文同法文，真係完全唔知發生緊咩。中段好似有提到嗰晚黎自唔同地方嘅朝聖者，但係聽落又唔覺佢有講香港，或者可能我miss左啦。細個嗰時係讀天主教小學，參加完呢場彌撒，小時候嘅回憶即刻翻曬黎，仲記得以前係幾唔鍾意宗教堂，依家竟然心甘情願黎行呢條天主教背景嘅朝聖之路(雖然吾係因為咩宗教原因)。

當晚大家都好乖咁十點鐘上床訓覺。第一日就咁完左。

由Bayonne開去SJPP嘅車一日只係得四班，以前”the way”電影入面係坐火車去，但係依家就得巴士

乜無火車? cut咗定係點?

架車與其話火車, 更加似輕鐵, 得個一卡.

你第一日天氣真係唔錯, 我問過路上咁多人, 差唔多個個都話落雨, 我過個日被雨淋到濕哂, 又8號風球咁吹到個人郁咁大風, 凍到震住落山

第一日落到roncesvalles 無入到教堂 , BTW你個段時間都真係幾多人

好似火車維修緊定點，我對火車有情意結
之後嘅天氣先o嘴，我係中段個沙漠都落雨～～ 然後下下要爭牀位，好癲

床位大戰, 估唔到咁勁, 你繼續寫

留名等睇

好，多謝支持，再寫多日～～

諗翻呢日真係遇到好多人，有深交有萍水相逢，最令人開心嘅係朝聖之路先啱啱開始


呢間庇護所叫人起身嘅方式係幾特別，四五個大叔攞住結他樂器起勢咁唱，朝早六點聽到有人唱歌，真係成個人都醒曬。不過因為俾左5歐食早餐，所以要等到七點鐘開餐食完七點半先走人。

其實我比較鐘意八點幾出發，但係同房嘅人多數都係五點半六點就起身，要唔俾人嘈醒繼續訓落去係有難度嘅，而且好多庇護所八點打後就開始趕人，真係想訓多陣都唔得。

早餐嘅時候俾我遇番前日住同一間albergue 嘅台灣大叔(其實噚日都係住同一間，只不過人實在太多所以遇唔到)，問番佢噚日幾點到，發現其實大家都只不過係差一個鐘，而且佢仲遇到另外兩個台灣人一男一女，不過佢地今日就決定早啲出發去前面一個鎮先食早餐。

食完早餐就出發喇！



行得camino就遇左冇秘密，咩年齡職業都要同人分享，一開始真係有啲唔慣。

台灣大叔係退伍軍人，原來職業軍人去到四十歲就退休，所以佢已經退左休十幾年，有時間周圍去玩唔休米。不過呢次係佢第一次歐遊，之前都係去啲落後地區居多，其實依家我都覺得冇錯，應該襯後生去啲體力要求高嘅地方，再老啲就真係只可以去歐美日韓(我依家坐一晚夜巴都想死 )。

一路上同香港行山差唔多，都係人塞人，加上條路唔闊，人過人係唔可能發生嘅。
不過唔知點解，我同大叔行行下都可以行錯路，因為前面兩條友唔知點解行左叉路，我地兩個潛意識下跟住面嘅人行。行左成公里路先發現冇曬黃色箭頭，結果打開地圖至發現行錯路，然後死死地氣原路折返。翻去大路繼續塞人











行行下突然有個白人追左上黎吹水，呢個人好特別，行山嗰陣一手攞住單反，另一手攞住laptop，以佢解釋就係唔單止要鍛鍊腳部肌肉，手部鍛鍊亦都唔可以忽略，而雙手要平衡所以就一手單反一手電腦。至於點解要帶laptop呢？佢話要每日upload一張相上facebook俾呀媽睇等佢安心，雖然聽落唔太合理，但係佢嘅laptop 之後真係幫左我一個大忙，所以我就唔深究呢個問題。

差啲唔記介紹佢，佢叫Oliver，不過我同台灣朋友都係叫佢羅馬尼亞人，因為佢係我地路上唯一識得由羅馬尼亞黎嘅。











行到上山路段，大叔冇跟上黎咁我就自己行啦，前面有個望落似日本人嘅女人，打個招呼之後問下佢係邊到黎，原來又係台灣～～

呢位台灣姐姐講嘢好溫柔，傾下傾下至發現原來佢就係大叔噚日遇到嗰兩個台灣人嘅其中一個，今朝佢本身係同另一個大叔一齊行，點知大叔行得太快所以佢地就分開左。

姐姐又話行完法國之路去埋世界盡頭之後打算去葡萄牙玩，不過佢想用逆走葡萄牙之路嘅方式去波圖，就係呢一句話為我之後嘅行程埋下伏筆。



因為覺得幾啱傾，所以就放慢節奏一齊行，結果大叔都追到上黎。老實講，我嘅普通話真係非常有限，好彩佢地兩個都好有耐心聽我講嘢，二十公里路傾下講下好快就過左。

今日大部人會行20公里去Zubiri或者25公里去Larrasoana住，我地去到Zubiri嗰時先一點(其實一啲都唔早，大部分朝聖者過左中午就唔點行，所以一點打後人流會大幅降低)，而我地打算行多五公里去 Larrasona住，所以停低飲左杯咖啡就繼續行。







去到公營庇護所放低背囊就去超級市場便利店行下，終於遇到大叔同姐姐口中嘅"大哥”，對我黎講其實算係伯伯，係一個六十幾歲嘅退休老師。佢係一個飛無腿，因為呢日之後就冇見過佢，快我至少六七日就去到聖地牙哥(利申我真係行得好慢)。因為伯伯話要煮飯，所以我地就去幫佢買材料等佢大顯身手。點知間鋪頭實在太細，最後只係買到一包意大利粉，一罐鷹嘴豆同一支紅酒。









依間庇護所係我住過咁多間數一數二咁差，張床難訓之餘竟然要收我8歐，冲凉冲冲下竟然變左凍水 ，洗衫個洗手台亦都只係得一個。之後提起呢度，姐姐都會叫佢做“鬼屋"，因為佢同大叔夜晚都聽到屋頂有老鼠行過。

庇護所嗰度仲識多左個台灣人汪汪，係一個中年女強人，姐姐係巴黎搭火車嗰陣就已經見到佢。不過汪汪覺得第一日路程太辛苦，所以就直接坐車去Roncesvalles以嗰度做起度，由Roncesvalles到 Larrasoana 呢段路我地一日行完但係佢分兩日行，結果大家又可以係呢到撞到。

講番餐晚飯，最後先發現原來大家都係等食飯，冇人想煮，最後隨隨便便整熟曬啲嘢就開餐，食完一樣好早就訓覺。

其實我覺得一開始呢幾日係其中一段最開心嘅時光，大家都唔會有咩芥蒂，可以無憂無慮咁傾計行路。由SJPP到Burgos呢二百幾公里就好似蜜月期，路上面一切都好新鮮美好。

留名支持

今日七點三左右先出發，呢個時間亦係我之後大致上開始行嘅時間。

幾點起身幾時出發其實好睇個人，因為我黎嘅時候係帶住″遊客”嘅心態行朝聖之路，我唔想好辛苦咁五點半起身六點開始行，所以就算醒左，都會繼續攤係張牀等到七點。可能係心態上嘅問題，所以我唔係太鍾意一早開始行山(一早嘅意思係天都未光 )，所以人地成日提到嘅與黑暗中對話、晨光第一線我都好少體驗到。 而啲韓國人就同我各走極端，其本上六點之後就會唔見曬人，然後一路上行超快，每日都係最早到庇護所嘅一批，然後當日剩低嘅九成時間都會留係廚房煮飯。

不過話韓國人行超快其實都唔係太準確，因為路上大部分人都行得快過我，尤其係啲白人，一上路就開盡turbo去下一間Bar，然後係嗰度嘆番杯啤酒或者咖啡，又會開turbo去下一個stop，所以每次見到歐美人我都要食塵。

今日由Larasoana行去Pamplona只係16km，所以用龜速行去十二點左右達陣就得，事關庇護所十二點先開門，太早去到都係得個等。

因為抱住戲山玩水嘅心態，所以我地三個(仲有噚日既台灣大叔同姐姐)每行三四公里就停一下，係其中一間bar我第一次食到Tortilla，一款我認為西班牙最好食嘅食物之一。直到我番到去馬德里機場準備離開西班牙，我都去左麥當勞點左個tortilla包，雖然只係好普通嘅雞蛋薯仔，但係整出黎既效果就出奇地好食。





就快去到Pamplona 嗰時又入左間bar，其實主要係因為姐姐嘅行法比較類似歐美人，每次見到bar/cafe都要停低坐下嘆番杯。所以，我地三條友朝早十點就啤一啤，一件我從來都唔會做既事。

講真，我係香港真係滴酒不沾，但係camino上人人都飲你就會覺得一齊飲無所謂啦(其實都算係一種群眾壓力)。尤其係由Navarre 進入La Roja之後，大家就開始搏老命飲，因為La Roja出產嘅紅酒係全西班牙最好，而本地出產嘅價錢平好多所以大家就不停飲，好似前世未見過酒咁。以至於離開La Roja去到Castilla y Leon之後，因為飲酒嘅習慣已經練成，所以大家依然係不停飲，最多有時候改飲啤酒。

由於我唔係成日飲酒，雖然未至於一飲即醉，但係認真唔識分咩係好酒咩係難飲，總之飲落都係酒味。所以當佢地兩個酒鬼一路係到品評嗰時，我就只可以係側邊聽。



有時候路上經過嘅教堂同餐廳一樣有印仔可以印落本朝聖者護照度，姐姐同大叔都想收集印仔，但係又唔想印啲唔好睇嘅落去，所以之後幾日都係會等其中一個人吸左個印先，另一個人就可以睇下靚唔靚再決定要唔要個印。

而我就為左節省開支，只係會係住嘅地方吸印，一本護照都要成兩歐其實唔平，為左慳啲只可以就住就住咁印(真係冇出息)。但係白痴既事總係不停發生，今日我地攞左本護照出黎大家分享下，睇下啲印仔有冇啲唔一樣嘅。正當我同佢地解釋點解淨係到住既地方先吸印仔，“節省！因為要節省！”，呢個時候就發現悲劇：原來office 嗰度佢正反面都吸左一個印，多左一個無謂既印之餘亦都令到我之後啲印唔係太跟日期順序，有時候吸呢一面有時候吸另一面。而噚日住Roncesvalle個印因為太大，佢竟然一個印霸左兩個格，你話佢係咪好霸道。

現實都係事與願遺既，當你想慳住用嗰陣佢就要幫你浪費一下。到最後重複吸印丶一個印霸兩格嘅事仲發生左幾次，真係差啲要買多本護照。









話咁快就行到去Pamplona，出發前我只係對朝聖之路上面其中幾個城市有少少印象，Pamplona 就係其中一個。之前睇過海明威嘅《太陽照常升起》，裡面嘅故事就係以 Pamplona 作為背景，講下啲人個時嘅生活係幾咁頹喪，每日都係煙呀酒呀同女人。雖然睇完本書都唔係好明講咩，不過就成功令我對呢個城市抱有好大期望。

去到庇護所已經有好多人排緊隊，我地等左十分鐘左右就開始登記入住，雖然我冇咩點yo其他朝聖者，但係呢三日路上見到嘅人都差唔多所以都會打下招呼，而大部份人今晚都會住係呢度。點講都好，我心底裡都算係一個遊客，終點我一定會行到，但係如果有啲咩地方係因為朝聖而令我去唔到既話，我一定會後悔。





呢間庇護所一樣好大，比起噚日間鬼屋條件好好多，不過就更有集中營既感覺～～沖涼洗衫樣樣都要等，過左幾個鐘連上層都開始有人訓，我真係唔敢想像幾年後，再多啲人黎行朝聖之路，到時啲庇護所情況會點樣(點知原來我之後就已經體驗到)







汪汪冇幾耐都行到，原本佢打算十六公里分兩日行，但係經過我地一輪慫恿後都行到黎2

㩒錯制，打埋最後一句

所以我地四個就出左去行下啦，其實都冇話要行咩景點，我覺得成個城市都幾覩，算係值得係呢度訓一晚。朝聖之路上大部份大城市都幾有特色，尤其是係市中心舊城區嗰一片，但係佢地都有一個通病，就係由城市外圍一直行入市中心往往要行成個幾兩個鐘，然後第二日出城又要行另外個幾兩個鐘。呢段路永遠都係最無聊既，要一路行車路邊吸廢氣，而且時不時要過(有車嘅)馬路。

嗰日週圍行但係一個景點都冇入過，鬥牛場要飛而且唔平，我打算去馬德里嗰度直接睇鬥牛好過。而大叔同姐姐對博物館都冇咩興趣，所以又 skip左，最後隨便去左間餐廳食tapas。唔知點解，大叔突然之間開左黑洞mode不斷食，不停點 tapas算係請大家一齊食，然後大叔每點一個汪汪亦都會點一個算係回禮，結果兩三歐一件嘅tapas嗰日找數好似要成四五十歐。我同姐姐係側邊淨係幫手食









晚餐頹食 Burger King最平個餐，其實我都係比較鍾意西班牙菜多過快餐，但係要慳錢冇得揀。

雖然只係行左三日但係感覺已經行左好耐，每日只係需要行路唔需要煩其他野，如果人生係咁簡單你話幾好。

lm
點解你呀爸咁好既