西班牙朝聖之路 (五十日長篇)

公營同私營albergue 會唔會差好遠
我反而無乜點住公營同自由捐獻
驚會好差,私營都係貴幾十蚊

樓主由一開始怕孤獨
成日要同人一齊行
到後來去原始之路
覺得一個人反而比較好
呢個心態轉變好正

個陣我諗我有時行行下行到自己唔記得左自己其實行緊
一日十個鐘真係痴線

連登camino 之友
camino 真係有神祕既吸引力

咁講落，我都發現好似有咁樣嘅轉變，或者只係少少，不過真係有啲。 我唔知道係因為心態上嘅改變，抑或係我純粹習慣左。。。

去旅行既時候有人話我好冷漠，冷漠係指我有時候識左一個人好耐，但係我覺得心情唔好的話，就可以永遠都唔再同佢聯絡。 所以話～可能我原本就偏向孤獨，只係一開始仲未適應。

公營庇護所、donativo嘅感覺好溫暖，成班人一齊既嗰種氣氛係私營冇辦法取代，有唔少donativo嘅設備比私營albergue仲要好(尤其係Burgos、Bodenaya呢兩間 )。其實去到西班牙，就算住宿條件再差，始終都喺西歐。

利申我對住宿要求唔高，去旅行都係住hostel多～不過又未至於住乜都得，至少我唔鍾意couchsurfing。

今日晏啲衝線

24/8

最後一日！

再一次衝線！

由Arzúa去Santiago官方話係39km，不過噚晚住嘅庇護所唔喺市中心，所以今日大概要行40km，噚日Artur仲沾沾話自己間庇護所喺鎮既另一邊，變相今日一出發就比我同Davide行少一公里。

而今日亦係繼O Cebreiro 同Grandas之後，唯三行超過40km嘅日子。噚晚掙扎左一陣之後，都係決定繼續咩住個背囊，同10kg嘢一齊衝線。



因為路程遙遠，而我又想早啲行到Santiago，多啲時間喺終點hea下，所以唯一辦法就係早啲出發～其實都唔止早啲，係朝早5點出門口，摸黑行接近兩個鐘。

呢個時候我先發現行last 100km嘅好處，唔少人都同我一樣勁早出發，前前後後都有頭燈照住條路，而且沿路嘅黃色箭咀同貝殼極多，一啲蕩失路嘅機會都冇。

夜晚本來就冇風景睇，加上朝早又有少少涼意，大家都行得好快下，冇停過一直行左2、3個鐘。

直到8點之後，朝聖者開始愈來愈多，camino又慢慢變返噚日晏晝咁熱鬧。

我一樣繼續向前衝，全程同其他人零交流，只係想一直行落去，目標係2點前去到終點。


沿路有啲位有少少印象，有啲位就已經完全唔記得左，其實今次既路程同我上次好相似，由Arzúa 行到Monte do Gozo，一共34km。 每次最後衝刺都要咁 chur，上次仲行左11個鐘，所以今日我就唔打算作任何停頓～唔睇過程，只睇目標。

我仲記得上次同Josan入左間bar，坐左喺出面諗住等埋姐姐一齊行，點知姐姐聽唔到我嗌佢，就咁行過左。Bar老闆仲幫我杯咖啡拉左個花，雖然一啲都唔似我個樣。

今日我就咁行過左間bar冇入到去，今次camino冇左Josan，冇左咖啡，只係得我自己一個。

感覺就好似人生重來，你可以做同一樣嘅選擇，或者選擇做另一樣野，發生既事遇到既人就完全唔同。



我仲認得之後穿過既樹林，好多人都停喺度影相，成班單車友同我前後腳一齊行左十幾公里，可想而知佢地真係好慢。





今日天氣好好，陰天唔熱，冇左 Galicia獨有嘅雨水。

行左20km之後去到小鎮O Pedrouzo，我冇兜入去直接飛左個鎮，冇左兩個戰友一齊去食pizza，結果就係完全冇停過。

之後一段路就係行14km去喜悅之丘，呢段路令我印象好深刻，一路行一路落大雨，沿路見到既朝聖者少過十個。。。

不過今日嘅情況就完全唔同，雨冇左，週圍都係朝聖者，donativo嘅小食站出返黎，冇變嘅就只係得沿路嘅一草一木～

村落、教堂依然一樣，電視台喺度，仲有濺到Josan全身都係水嘅巴士。













一路行，回憶就一直湧現，就算我可以重行一次 camino，過去左嘅經歷就係過去左。

當時我覺得呢段路係法國之路最辛苦嘅一日，到依家諗返，淨低嘅大部份回憶都係美好嘅，反而好辛苦、好想死嘅感覺就已經忘記得七七八八。

今次衝線嘅渴望比上一次強烈，我好想快啲行到終點，好想快啲見到大教堂完成呢條camino。 可能係因為，喺primitivo我已經嘗試過一啲我上次冇做過嘅嘢，彌補左之前既遺憾，又或者我真係覺得好攰，覺得我呢次終於行夠，所以呢一刻衝線我已經唔會再覺得可惜同埋唔捨得。


Camino我一定會再行，但係幾時返黎我真係唔知道，正如我上一次離開camino嘅時候，又點會估到自己咁快就返黎呢度。

兩個月時間其實好短，短到我覺得呢段時間其實只不過係橫跨三個半月嘅朝聖之旅。行緊primitivo嗰陣，我好多時都同人講自己只係第一次行camino，因為無論Frances、Portuguese、定係Primitivo，冇左之前既一段路，就唔會有之後行嘅路，我一直都覺得佢地係我2018年所走過既同一條camino。

三條camino，甚至計埋Finisterre四條，每一條路都好值得行。成日比較邊條路靚啲、難行啲、有意思啲，其實意義唔大～實際上每條camino都差唔多，所有camino嘅人同風景都好靚，冇乜話邊條好過另一條。

就好似我成日問老豆去旅行去邊好，佢每次都答我，去邊都得啦～邊度都未去過，個個地方都好玩。。。所以每次都係話隨便揀個地方就得。

如果想行 camino，但係又猶豫要行邊一條，其實唔駛咁惆悵，即使嗰條camino未必係最適合自己，都一定唔會話浪費時間去行左呢條路，或者因為行路本來就係浪費時間。



上次因為大雨冇乜點影相，今次因為衝刺緊所以依然冇影相。





我聽住音樂行左7個半鐘，終於喺12點半行到 Monte do Gozo，呢度好多人好熱鬧，同我記憶中冷清既氣氛完全相反。













今日由山頂望過去市中心，可以好清楚咁望到大教堂三塔。

我係咁咦影左幾張相，唔作停留就繼續行，其實我呢一刻可以話係心如止水，除左有少許傷感，主要都係對衝線既期待。

我冇行去朝聖者雕像影相，直接落山入城，沿路經過Monte do Gozo既超大型庇護所。





上次喺度訓左晚，今次就連門口都冇入。

落到橋已經見到另一間庇護所Seminario Menor喺度買廣告，今晚我都會重遊舊地，Andrea同 Artur都係住呢度，可以有個照應。







冇人幫我影，只可以自拍。



經過上次由Finisterre返黎之後住過既庇護所，不過今次就不了，佢離市中心實在太遠鳥。



Europe was made on the pilgrim road to Compostela，愈講愈遠，已經唔止係西班牙嘅事。

黎到最後2km爬頭已經係冇可能，所以就跟住大隊慢慢行，今次我沿住官方路線行去大教堂。 過左巴士站之後呢段路好熟悉，大大話話我都已經係第六次行，不過就真係一次自己一次友行過去。

入左舊城好快就會到大教堂，沿住啲石板路上上落落，跟住前面班單車佬，





最後經過大教堂北門，

一路落斜穿過拱門～～～

我終於返到黎終點大廣場！

終於見返大教堂正面！



呢次衝線係我努力爭取返黎，呢十日行到腳斷，每日平均過3，感覺特別得來不易！

可能係因為過程好辛苦，所以先會覺得難能可貴，即使已經係第二次衝線，同第一次對我黎講意義一樣咁大。

雖然都係同一個大教堂、大廣場，人唔同左，鷹架拆左，天氣好左，感覺好唔一樣。











下晝2點，9個鐘，40km。

10日，308km。

50日，1267km。

由上飛機前嘅23歲，到今日仲有11日就要過24歲生日，時間過得好快。

行完camino，好自覺會將距離換算成時間，4km/hr。寫post嘅時候，大約預一日寫一篇，亦會將字數換算做時間。

時間呢樣嘢真係好虛無，但係好多野都可以用佢黎表達，依家年青有嘅就係時間，成日都話返工係用時間換金錢，但係老左就無辦法用金錢買返時間。 問返我係咪哂左呢四個月，你話我呢段時間學左啲乜，我真係答唔到你，同離開香港之前比，我好似冇乜改變、冇乜學到啲咩新技能。

本來我就唔係一個好執着既人，行camino或者睇到我一少部份嘅堅持，不過，我覺得自己好似變得更加隨心。 而最開心既係，我好似樂觀左，雖然只係少少，不過至少唔會再係姐姐一開始話我～乜你份人咁悲觀架。









講開姐姐，我line佢話自己又衝左線。



黎到大廣場，我自己一個人坐左喺地下，週圍既人全部都唔識，一個熟人都見唔到，只可以望住其他朝聖者歡呼擁抱。

我又whatsapp Artur同Davide，點知佢地仲有排先行到，又係只可以約今晚食飯。 反而佢地兩個就去到Monte do Gozo會合左，唔駛孤毒入城。



唯一比我早到既就只係得跑山佬Andrea，佢今日只係行廿幾公里，朝早十點就已經衝左線，比我癲好多。

坐左陣之後，我慢慢行去Seminario Menor庇護所check in，呢個被墨西哥大叔喻為an albergue that can never be full嘅地方，黎到八月尾，門口都一樣貼住Completo張紙。







256張床竟然滿左，我突然有一種人生勝利者嘅感覺，行完全條原始之路可以有一間自己既獨立房，算係唯一對自己少少嘅安慰。











放低背囊之後，我去超市買左包超大薯片、1L可樂，返去大廣場坐住等Artur 同Davide衝線。

Pilgrim's Mass7點先開始，Andrea都去到大廣場等望彌撒。 我地等來等去都等唔到Artur、Davide佢地兩個，之後先知道原來出現左誤會：佢地入城之後，竟然唔係直接行黎大廣場衝線，而係先去庇護所放低背囊然後沖個涼。

Artur仲突登買左兩罐啤酒，以為我喺庇護所度，大家可以啤一啤慶祝一下。

所以我地就等到彌撒完左先會合，一齊去食最後晚餐。





















第二次參加彌撒，喺Santiago過嘅第四晚，依然睇唔到Botafumeiro，

教堂入面好多人所以我同Andrea都冇位坐，行左9粒鐘之後，仲要罰企企左成個鐘。











雖然隻腳好攰，不過我依然好想睇完彌撒全程，觸動我既唔係宗教(或者有少少啦)，而係見到有咁多人來自世界各地一步一步行到呢度，大家喺同一日參加同一場彌撒，你話緣份到底係必然定係偶然？

呢一刻我只係覺得好奇妙，聽住聖詩，我個心就好似飛走左咁。

彌撒完左，我地四個人約好喺教堂南門會合。





一見面，Artur就話 I don't understand how you can arrive at 2pm， 又問我係咪坐左巴士。

Santiago既夜晚好熱鬧，餐廳好多都坐滿人，食飯都要迫下迫下先得。 Artur已經黎過Santiago好多次，本身佢帶左我地去一間佢覺得唔錯既餐廳，點知menu of the day得晏晝先有，所以我地就隨便食啲嘢算，然後仲去街邊檔買左片 pizza當宵夜。







嗰一晚，我第一次見到夜晚嘅大教堂，西面正門喺黑夜中睇落特別寧靜。





歐洲教堂大部份都係東西走向，西面係正門入口，東面係教堂最重要既祭壇。

祭壇喺東面唔單止面向耶路撒冷，而且面對日出，每朝陽光可以穿透彩色玻璃照射到祭壇，所以東方代表光明、天堂。

相反西面入口背向耶路撒冷，有既只係日落，西方代表死亡、地獄。

行入教堂，由西走向東，就好似由黑暗走向光明。

最奇妙既係，camino行既方向啱啱相反，由東面行去最盡頭西面嘅Santiago，由光明行向黑暗。

雖然朝聖者愈行離太陽愈遠，但係朝聖者既心就愈來愈平靜，其實咁樣亦都更貼近人生，由出生到老去、死亡，就好似由日出慢慢去到夕陽。

每件事都兩睇，向邊度行都係由自己揀，其他人要向東行，冇話你唔可以向南向北向西行。









呢一晚我好開心，

有對離別既傷感，

有對離開camino既唔捨得，

但係更多嘅係對完成一段路既喜悅。

上次行完法國之路我好傷心，心情好失落冇辦法接受camino已經完左，就算去到Finisterre、Porto，個心依然隱隱作痛，唔識放開繼續向前行。

今日再黎到Santiago，覺得呢段路雖然已經行完，不過之後仲有機會再行 camino，或者唔會係去Santiago而係開始行其他既“路”，而我再返黎之前一定要開開心心咁過每一日。

就好似之前所講Santiago is not the end of live. Let's do it!

24/8

最後一日！

再一次衝線


上次因為大雨冇乜點影相，今次因為衝刺緊所以依然冇影相。





我聽住音樂行左7個半鐘，終於喺12點半行到 Monte do Gozo，呢度好多人好熱鬧，同我記憶中冷清既氣氛完全相反。

個銅像完全無見過，原來我唔知行咗咩路入城，淨係記得行咗好耐馬路邊。

真正的改變
便是在你回首的時候

個銅像係camino地標，就喺大路側邊，巴打係點樣missed ，重點係可以由嗰度望到Santiago～

巴打好有詩意 ，而且講得好啱

睇住你從零開始
真係好正

時間都唔短，多謝你由頭追到尾

送君千里
終需一別

前一晚住咗喺O Pedrouzo，跟住仲飲成一枝紅酒，成晚頭痛瞓唔到，4點半就出發 摸黑入到santiago前面條高架橋，乜都見唔到。
點知拆橋維修，個moment完全唔知點入城。google map廢嘅，無update條斷橋。
最後截停咗一部車，問司機，教我跟車路左轉個邊仲有另一條橋

多謝絲打一直以來嘅支持！

巴打飲完酒，然後可以4點半起身出發。。。

條橋指嘅係呢條？

後記：

第二日朝早，Davide一早去左office攞證書，然後搭巴士去Finisterre，夜晚先返Santiago 撘夜巴去Madrid。

Andrea就一早出發繼續行，最後用左兩日行到 Muxia， 另外再用一日行到 Finisterre，喺世界盡頭遇返西班牙仔Dani佢地。

Artur都會繼續行去Muxia，但係佢會撘一小段巴士離開Santiago，然後再開始佢既行程。

我地9點check out之後一齊去食早餐，坐左喺入城嘅camino側邊，食緊嘢嘅時候仲見到成日住唔到庇護所嘅法國情侶， 不過佢地就好似唔係好認得我。





之後Artur帶左我去公園坐下，由公園可以望到大教堂全景，然後佢就要返去趕巴士。 再見之際，大家只可以講一句，Buen Camino。











我坐多陣都要行返去巴士站，如果話唔好傷心，講真我仲未完全做到。

返巴士站條路同camino入城啱啱反方向，所以迎臉而黎嘅人都係準備衝線，我只係比某啲人早一日到 Santiago，我一路行一路期待會唔會見到舊人。。。

真係俾我遇到美國夫婦！

佢地只係慢我一日，好佩服佢地五十幾歲都咁行得！

巴士係ALSA，早一個星期買要28歐，如果早一日買就要48歐。但係好似Artur一早買定Ryanair，就只係要10歐。





中午1點上車，夜晚11點到馬德里，沿路穿過Galicia、Castilla y León，最後去返我玩左一個星期嘅Madrid。









途中經過好核突嘅Ponferrada，同埋我最鐘意既Astroga，望住車窗外嘅景色就好似逆行左一次法國之路，好懷念～



























由巴士站去機場要坐地鐵，車飛連卡竟然要7.5歐，咁就差唔多一個pilgrim's menu。







去到馬德里機場仲要過一晚夜先可以飛，雖然check 左 in可以入禁區裡面訓，不過啲升鐵板凳真係好Q凍，訓到我以為自己有低溫症，去到英國仲病左。











出境既時候好順利，我已經計好自己喺Schengen Zone只係留左89日，啱啱好係90日限期之內。







去到倫敦，我仲同墨西哥大叔食左餐飯，冇錯！就係一齊行法國之路(最尾幾日)同葡萄牙之路(第一日)嘅墨西哥大叔！

～～～～～～～～～～～～～～～～～～

寫左個半月，用嘅時間、心機比我想像中多，有好多地方可以做得更好，期待下次有機會可以進步。 50日嘅camino遊記黎到呢度結束，雖然話係遊記，事實上似日記多啲，每一篇都係我珍貴嘅回憶。如果大家睇到呢一頁，好感謝各位可以睇完全篇追到尾。

各位每一句留言都係我嘅動力，特別多謝馬戈巴、烏拉拉巴、首席巴積極留言。 其他有追post嘅巴絲，我都好多謝你地唔嫌我寫得悶， 有時連我自己都覺得自己寫到1999，而且好多錯別字，啲相又唔係好跟次序。

我唔會話Camino適合每一個人去行，但係如果你已經睇到呢度，又有時間嘅話，不如就咩起個背囊出發～～～因為路上發生既事每一件都會人非常難忘。

如果有巴打、絲打未行camino但係有興趣，歡迎喺樓下提問。又或者行完camino既各位，都可以繼續喺度討論～如果想直接同我傾，tg都可以，我會盡量回覆。

再一次多謝各位嘅支持！


Camino de Santiago - The End 5/2018 - 8/2018

係，我個時成條橋拆咗，得返d柱，封咗板過唔到去有個朝聖阿伯想越板過去，但根本過唔到。
勁徬徨，無影到相，企咗喺度google map點行，google map 又勁廢，教我兜入工地，搞咗半個鐘先決定截車問人

條橋咁長都拆左～而且咁都仲入到城，一定行多左成公里。 去到最尾要俾啲考驗你。