Foncebadon 呢個地方其實係唔錯,除左凍啲之外,佢遠離大城市同所有閒人,係一個幾有朝聖feel嘅地方。
而且Foncebadon 距離今日嘅重頭戲:Cruz de Ferro,只係2km左右,行半個鐘快好就到。
因為庇護所包早餐,所以班痴線佬未至於5點就起身嘈醒所有人,大家都等到7點食完早餐先開始行。
出門口嘅時候就已經落緊雨,出面就好似silent hill咁,除左條路其他乜嘢都睇唔到。
唔知由邊日開始,出門口之前都會幫個背囊笠返個防雨罩,呢個已經成為每日日常一部分,因為即使出發嘅時候冇落雨,行行下都一定會落。
Cruz de Fero (即係Iron Cross) 係法國之路其中一個最重要既check point,如果第四日行到嘅風車山代表開始,呢度就係臨近終結。
按傳統,朝聖者會由家鄉帶住一塊石頭,一路咩住佢黎到Cruz de Ferro然後將佢放低。
塊石頭代表你嘅罪孽,你嘅罪孽愈深,咩住嘅石頭亦都應該愈重。不過,石頭亦都可以係你唔想再記住、唔想再有嘅壞習慣,將石頭留係十字架下面,就係將一切惡習同傷心事留喺度,行落山之後就要重新做人。
我一路都冇執塊石頭旁身,直到我行到去Iron cross,我先至喺側邊執起塊石仔,象徵式咁將佢放上小石丘上面。我都唔知塊石頭對我黎講算係乜,可能係懶惰,可能係懦弱,我放低佢之後又應該做一個點樣嘅人呢?其實呢啲咁虛無既問題真係愈諗愈lost。
好多人都行到黎,除左影相之外,大家都企起到望往個十字架,沉澱一下過去廿幾日嘅經歷。
不過雨繼續落,路始終係要繼續行,Marc、美麗、Ellie嗰班人都行得好快,掰掰之後就行到唔見左影,要去到Ponferrada間庇護所先見返佢地。
由Cruz de Ferro又行左2km左右,就去到Manjarin,亦都係Camino上其中一間最出名嘅庇護所。
理論上Manjarin係一條村,但實際上成條村就淨係得間庇護所。呢度冇熱水冇暖氣,加上佢只係一間簡陋嘅木屋,噚日訓呢度既話可以話係屋漏偏逢連夜雨。
我係庇護所門口撞返Mazarife識嘅法國佬,原來佢噚晚就住呢度,成晚落雨屋頂一直漏水,加上間屋又冇暖氣,所以凍到完全訓唔到覺。我諗 Manjarin都係要夏天先黎住,依家咁嘅天氣黎訓真係需要莫大嘅勇氣。
不過今日見到法國佬嘅時候,佢竟然係自己一條友行,之前提過佢路上識左個女人,一齊行 camino行左兩個半月,今日就唔見左佢呢個女朋友。
當時我都不以為然,之後Josan先話我知,原來嗰個女人飛甩左法國佬想自己行,所以嚴格黎講,法國佬堅係失戀,簡直就好似離婚咁。
我同姐姐講之前係Mazafie就遇過法國佬,點知佢話佢再之前都見過法國佬,而且仲見到一件好奇怪嘅事:
嗰時姐姐同佢朋友行行下,竟然見到有對情侶喺camino路邊野戰~~
冇錯,係日光日白眾目睽睽之下做愛,不過佢地係女上男下,女人背住條路,男人就訓低左睇唔個人,所以姐姐就男女兩個人嘅正面都睇唔到。
之後睇返髮型,因為個女人有曲髮,姐姐就覺得個女人望落好似法國佬個女朋友,所以就估嗰個男人就係法國佬。
唔知點解我永遠都睇唔到呢啲咁有趣嘅事,除左呢件事,姐姐仲遇到一個女人係路邊屙屎,嗰個女人亦都冇諗住搵個隱蔽啲嘅地方,所以就一邊屙一邊同大家對望。
The boat is safer anchored at the port; but that's not the aim of boats. 出自牧羊少年奇幻之旅既作者,佢係行完 camino 之後先寫嗰本書,而佢都另外寫左一本佢行 camino嘅書。
過左Cruz de Fero同Manjarin 之後就係漫長嘅落山,因為山路實在太濕太跣所以大部份朝聖者都行返車路,唯一風險就係太大霧驚俾車車死。
落斜嘅時候真係好爽,半行半跑咁好快落到底,算係離開Burgos 咁多日以黎最有行山感覺嘅一日。
落山途中,姐姐又問返我,行到世界盡頭之後要唔要一齊逆走葡萄牙之路,我之前都諗過好唔好跟隊行,然後覺得既然自己有嘅就係時間,又未決定行完camino之後去邊,咁一於就go啦!
由Santiago去Porto 只不過係十二、三日,行到之後我仲可以留係西班牙同葡萄牙玩多陣先返香港,呢個計劃好似都唔錯。
上網睇相 El Acebo係一個幾靚嘅村仔,但係我黎到嘅時候就大霧迷茫,如果唔係有個牌話我知已經到左,我真係唔知到已經唔會留意到,原來霧後面就已經係El Acebo。
再行多冇耐就去到Molinaseca,雨愈落愈大,我地入左間bar唞下順便避雨。我指住托盤上面嘅tortilla話要一件,點知老闆就將淨返既三份之一個tortilla 全部俾曬我,結果食左我一共4歐。
呢一餐亦都由小食變左做我嘅午餐,真係好耐都冇食過咁多蛋。
食緊嘢嘅時候,電視播緊西班牙議會投票罷免現任首相,因為之前嗰個涉貪,而罷免投票亦都通過左。新首相Pedro Sánchez係一個靚仔,我唔知佢係乜人,亦都唔知佢咩背景。
之後問下Josan西班牙新首相係一個點嘅人,點知佢連自己國家換左首相都唔知。
最後行去Ponferrada 嘅4km一樣可以揀山路同車路,姐姐堅持要行山路結果就伏左大家,山路遠一公里多啲唔止,我地仲要一邊行泥路一邊鬧,鬧左成個鐘先行到去庇護所,隻新鞋著左一個月睇落好似已經著左半年咁。
講返Ponferrada呢個地方,算係西班牙有少少名氣嘅城市(至少Josan聽過呢個地方
),嗰度有一個好完整嘅中世紀城堡,歷史留返之後講,而且人口都幾多下。
Josan有諗過好冇係度訓多晚,不過最後就決定噚晚住喺Molinaseca,今日行4km黎Ponferrada訓第二晚,會合我同姐姐兩個人。仲誇張過我由Sahagún 去 Bercianos 嗰日只係行10km,情與義,值千金。