一路上同噚日幾乎差唔多，有一半時間行高速公路邊，
只有兜入鎮仔嗰時可以離開下啲車，而且全條路都好多朝聖者一齊迫，感覺有啲煩燥。
由第一日出發嘅七百嘅公里，依家已經變成580，時間過得好快。
好多人都話幾日之後嘅Burgos到Leon好悶好無聊，但係我其實都唔係好鐘意離開Logrono之後呢幾日。
因為又攰又燥，行左五六個鐘都冇乜同其他人傾計，只係想快啲行到終點，咁就可以快啲訓低休息下。
途中經過Ciruena，呢個係一個非常之古怪嘅小鎮，鎮上面有好多棟三四層高望落好新淨既村屋，但係全部都落曬閘好明顯就冇人住，唔知係啲人搬走曬、啲屋冇人買、定係呢啲係渡假屋所以屋主放假先黎住。
而且呢條村嘅教堂竟然唔係村嘅中心，來回竟然要兜多一公里先去到個教堂。
我話想行過去大叔就緊係睬你都傻，咁我同Charlie兩個就兜過去睇下，大叔就自己抄捷徑直奔Santo Domingo。
結果，個天冇俾我地嘅誠心感動到
，即使係特登走過黎，個教堂依然係冇開門。好彩大叔冇跟黎，如果唔係佢一定鬧到飛起。
因為教堂冇開，所以我地就坐左係外面唞下，坐低嗰時我係到諗到底之後嘅camino會係點呢，到底又有冇人會一齊同我行到Santiago呢？嗰一刻，我已經有預感依家識到嘅所有人，應該冇幾個可以一齊衝線。
我地四個人(大叔姐姐Charlie同我)去到Santo Domingo 嘅村口會合左，然後正式入城！
我地叫呢到公雞鎮，因為佢教堂裡面養左對公雞母雞，而且我地嘅庇護所後花園都養左幾隻公雞，無時無刻就咯咯咯幾聲，好彩佢地夜晚都訓覺冇係咁叫。
行到公家庇護所門口其實只不過係一點，但係我已經攰到唔想郁，正當我地要行入去checkin 嘅時候，大叔就好猶豫，話今日想再行多啲唔想咁快停。
好明顯，公雞鎮亦都屬於佢心目中“不值一顧”嘅小鎮之一，所以一日只係行廿一公里住係到，對佢黎講實在係太無聊。
聽到大叔話要繼續行嘅一刻，我心入面既係唔捨得但係又好似放下心頭大石：
不捨嘅係，我知道今日同大叔講掰掰之後，我就冇可能再追得上佢，所以算得上係camino上嘅永訣。
但放心嘅係，我潛意識其實係知道大叔冇可能同我行到去終點，大家嘅朝聖方式同旅遊態度都差好多：
我鍾意慢慢行睇下景點，佢鍾意快啲行完休息。
我要慳啲唔可以餐餐大魚大肉，佢就唔駛因為價錢而就住食嘢。
我諗大叔同我分開行亦都係好事，咁佢就會有機會遇到同佢更夾既人，唔駛成日因為我拖慢左佢嘅進度。
不過，話冇唔捨得其實就假啦，話曬過去嘅八日，有七八成時間我都係同佢行，其實真係唔簡單。
我地係庇護所登記完、放低背囊之後，就同大叔去食晏晝算係餞行(我同姐姐本身都冇諗住中午出街食，但係依家一定要去食，因為好可能係最後一次同大叔一齊食飯)。
餐飯感覺好快就食完，我幫大叔 down左個camino app (就係Buen Camino嗰個)，又教左佢點用黎睇地圖同庇護所，雖然大叔係當兵嘅方向感絕對唔會比我差，但係對呢啲“高科技”同英文就一竅不通。
之後佢大概會走去Granon，所以我就幫佢睇埋有邊間庇護所比較值得去。
嗰時我有一陣莫明既內疚感，因為我陪唔到大叔一路行落去，所以如果佢發生左啲咩意外，我就覺得自己好似有責任咁。
(依家諗番，其實呢一切都應該係我自己諗多左 )
送走左大叔之後，我地番去庇護所恰左陣先出番黎行。
話說點解呢到間教堂要放隻公雞同母雞係裡面呢？
就係因為曾經有個朝聖者俾人屈然後判左死刑，但係最後又俾個朝聖者死裡逃生，
而當個官聽到個朝聖者仲未死嘅時候，當然覺得難以置信
，所以就指住自己食緊嘅雞話：如果嗰條友仲未死嘅話，我食緊隻雞都識番生啦！
話囗未完，隻雞真係番生
，而呢個故事亦都成為著名嘅 camino 神跡。不過話知佢幾出名都好啦，因為噚日俾間修道院伏左，所以我今日唔想再俾3歐入教堂參觀喇。
呢個就係庇護所養嘅雞～～
我同姐姐由城東行到城西，又由南行到北，順便幫姐姐揾下洗臉膏，然後發現西班牙人原來係唔洗臉嘅，因為真係一支洗臉膏都搵唔到。
行緊嗰時大家傾下之前去過歐洲邊度玩啦，講下講下傾到原來姐姐以前都黎過西班牙，不過淨去過巴塞，又話巴塞其實同西班牙其他部分好唔同，所以話自己又唔係好算去過西班牙。
諗番轉頭，我去exchange嗰時一直都冇諗過去西班牙玩，
咁啱身邊亦都冇朋友話要一齊過黎，
到依家呢個國家已經成為我最鍾意嘅國家，真係有啲不可思議。
翻到庇護所，有一件諗都冇諗過既事發生左，一直好關心朝聖之路上安全嘅人要注意喇，因為偷竊竟然發生左：
我對拖鞋竟然唔見左？！
因為呢間庇護所上樓要除鞋，所以出門口嗰時亦都要着住拖鞋落樓下換鞋，而我出去嗰陣就將自己嘅拖鞋放左係鞋架上面。
你話點會諗到有人偷拖鞋咁無大志，鞋架上面成堆名牌鞋唔偷，竟然偷我呢對街市買嘅拖鞋！
我揾黎揾去，又睇下其他朝聖者隻腳，都唔覺有我嘅拖鞋出現，實在係我遇過其中一件最奇怪嘅事。
咁既然無左對施鞋好簡單啫，好買過對咪得囉～唔～問題就係買唔到！
因為所有舖頭夜晚七點就閂門，而我八點先發現對拖鞋俾人偷左，而之後幾日一路都冇大城市，一直去到三日後嘅 Burgos先有機會買到拖鞋。
頂！邊個人渣會偷啲咁嘅嘢架，可惜我冇香港腳如果唔係一定傳染你～～我詛咒你以後淨係著拖鞋冇鞋著！
呢日就係咁反高潮地完左，如果你問我今日大叔走左，算唔算係我朝聖之路上嘅一個分水嶺呢，我覺得又未至於咁誇張，但係都可以算係呢本書嘅其中一個章節完左。
咁你又會問呢一章好唔好睇呢，我覺得呢個章節同其他一樣精彩
