西班牙朝聖之路 (五十日長篇)

明明25km好短，但係都行到狗咁

pamplona之後, 水泡就與我同在, 直到世界嘅盡頭.
高峰時期, 左右腳加埋6粒定7粒. 仲試過吉穿咗嘅水泡下面同生多粒水泡
鞋真係好緊要, 一夾腳, 鞋墊唔靚, 襪唔靚, 背包太重, 行得太遠, 就生. 中段Leon之前嘅高地, 我換咗對涼鞋行咗3日, 好到淨返一兩粒, 但對涼鞋就行到裂, 唔係行山鞋底真係差D

真係只能夠用奇幻嚟形容，好多野係用常理解釋唔到，同埋好掛住沿路啲炸青椒

一開始都唔知道對襪有影響，着住普通襪去行～之後就唯有一次過着兩隻襪

涼鞋都裂。。。會唔會係行得太遠

你知高地行埋D 沙石地, 馬路邊, 天氣好, 日日曬到趴低, 行30k 左右.
比起對行山鞋, 涼鞋軟淋淋, 舒服勁多, 有水泡都唔會銀住銀住 不過咁就行到涼鞋底裂咗, 好彩帶咗AA膠, 痴一痴, 收返埋, 到albergue先換黎當拖鞋著

好想返去，夢入面冇常理， 但係個夢只可以發一次，發第二次已經係另一個夢。

炸青椒係。。。？

好慘呀。。。對涼鞋

其實講到尾都係因為要咩住背囊行，負重太多行長途太chur鳥。 如果冇咩住10kg，日日行30、40其實又唔係咁難，所以寄背囊係一個辦法。

係, 個袋重真係問題之一,
我行個時, 遇到兩個退咗休台灣阿姨, 佢地日日都寄, 寄去一日或者兩日後嘅鎮, 淨係孭一套洗換嘅衫. 一路行到Burgos都無出水泡.
後尾我行得快, 甩開咗佢地, 之後其他一個line我話佢出水泡, 我問佢之前唔係無出水泡嘅咩, 做咩咁突然. 佢話成日寄, 每次5歐都幾貴. 變咗自己孭翻, 就開始出水泡

歸根究底都係個袋太重。caimno之前/之後行山我都冇出水泡，只要個袋得3、4kg，條路幾艱辛、行幾遠路都冇事。

唔知巴打會唔會有堅持，我對寄袋一直都有啲抗拒，覺得唔咩住背囊就唔係朝聖，所以係自己攞苦黎辛。。。呢個又係一個冇謂既執著。

好掛著camino
近排工作壓力大到想辭工
就黎爆煲:(

試過有一日寄背包miss 左
擔心左一晚
下一晚寄去後日既地址
但驚到唔敢再寄

無堅持，但我無錢。唔洗錢我實日日寄。
我都係行camino先第一次行到出 水泡

miss咗，咁去咗邊？

原來留左係前一晚間hostel度無寄到....
個間hostel得幾間單人房, 可能因為咁miss 左
之後就搵下間hostel 個人幫手打電話寄去聽日個目的地
兩間hostel 啲人都唔係好識英文, 要用埋google translate 去講
去到下間albergue, 等到背包個下勁開心

pimiento de padron

啱先發現隔離post 爛尾完左
但個結局有啲sad
返到香港最後又打回原形
又灰又頹
唔通真係只有camino 入面既世界先係最奇幻最美好?

我就咁睇啦, 當你踏上camino, 就好似睇一套電影咁, 唔同嘅係, 你親身代入咗"朝聖者" 呢個角色.
咁好多人睇完戲, 套戲就完咗, 閒時同朋友講下套戲, 開心share下.
有D人睇完, 嗯, 一套唔錯嘅戲, 就無了.
有D人就從套戲領悟到一D野, 但可能過一段時間, 生活忙碌, 就唔記得咗.
有D人消化咗, 溶入自己嘅生活入面.

我係第一類人, 無乜領悟, 亦溶入唔到生活入面.

或者係香港呢個城巿實在太絕望

20/8











之前我一直都好少睇到日出，不過，由原始之路嘅第一日開始，我就每日都睇到太陽由背後升上黎。

八月嘅日照開始愈來愈短，而且我每日7點前都已經出左門口，天仲未全光，路依然好暗。

太陽出黎嗰一刻永遠都好值得令人期待，唔駛再摸黑行山實在太好，唔會仆低，唔會蕩失路。







我停低左影日出，突然俾我見到幾個熟悉既身影 ，原來係Francisco、德妹同埋波蘭女警，我當然好錯愕，下？ 點解又會見到你地嘅～我明明拋離曬所有人喎。

原來噚日佢地3個人行左41km，同Andrea一樣追左上黎，個個都踩盡油門趕路。

德妹又問返我，咁點解我又會喺度 ，所以我就講返前日行左47km。 雖然佢地同我一樣趕左兩日路，不過就比我精神好多，依然步步有力，同之前一樣三、兩步就爬左我頭。

上山既時候，Francisco兩手 fing fing，仲要攞住手機一邊(扮)講電話 ，一邊行勁快咁超越我，好明顯就係要報復Campiello嗰日我半行半跑咁爬佢頭。

不過今日我已經行到死下死下，腳板底好痛，所以就冇得同佢計較呢件事。











今日係山區行山最後一日，翻過最後一座山之後去到Castroverde，聽日就會行去平坦既大城市Lugo。

山區靚景係原始之路嘅賣點，呢3日嗰100km風景好靚 ，可惜大部份時間我都行到喪屍咁，如果有機會俾我再行一次 primitivo，我一定會分4日行好好享受呢段路。

如果，如果。。。

就係因為有遺憾，所以先會想返去同一個地方，做返同樣嘅嘢，或者係camino特登想我返去，所以先留啲遺憾俾我？

我份人其實都幾貪新棄舊，好少有衝動同一個國家去兩次，今次返歸之後都唔知幾時先會再去西班牙。 Camino可能會再行，不過可能係好耐之後既事，我會覺得，有時間點解唔去一個新地方，點解要去返一個熟悉嘅地方。

呢一次黎行primitivo其實好唔符合我嘅風格，最奇怪就係我堅持要衝線 ，返去一個已經去過兩次既城市。我都唔明有乜驅使我要返去，或者呢個就係camino嘅魔力。







Montouto山頂有個廢棄左既pilgrim's hospital，大家都停左喺呢度影雲海。









之前成日覺得雲海可遇不可求，依家已經連續第3日見到，就開始覺得好平常普通，上到山頂望到雲海係理所當然。

落山段路好斜，雖然只係下降300m，不過就已經穿過左雲層，黎到雲海既下面。





喺雲層入面好大霧，又一次進入結界，我一邊行一邊睇下Santiago嘅住宿，好多都已經full曬，7、8月旺季既camino果然好癲。

我喺 卜傾.com 睇左好多間hostel，最後終於俾我到搵到個only 1 bed left，而佢竟然就係巨型庇護所Seminario Menor～

既然個天想我返去嗰度住，我諗都冇諗就即刻book左間單人房。

連住宿都訂埋，愈來愈大機會行到 Santiago，可以舊地重遊既感覺好唔真實，而且好興奮。

之後一段路好無聊，行來行去都喺樹林入面，有時會行馬路邊，經過一條又一條細到癲線嘅村仔。

去到O Cadavo (Baleira) 之後少左好多朝聖者，唔少人都決定今晚住喺度，聽日行30km去 Lugo，好似Fransico佢地咁就停左喺村口間庇護所。

不過噚日都講到，我要行多8km去下一條村 Castroverde。 喺Baleira咁啱追返始作俑者美國夫婦，咁我就話自己決定要繼續行，大家去到Castroverde庇護所再見啦。





由Baleira去Castroverde有兩條路揀，路邊既指示牌話，左手邊條路近啲但係多啲上落 ，右手邊條路就遠少少，遠1公里，不過就平坦啲而且“靚啲”所以“比較推薦”。

我喺路口掙扎左一陣，最後揀右手邊條路，因為捷徑睇落好似係一條又上又落既山路，估計都係一路行一路un腳板底 ，行返平路始終舒服啲。

下晝又係全程一個人都見唔到，我已經開始慢慢習慣獨自一個人搏鬥。

行緊嗰時好熱好攰，靚景見唔到，前幾日嘅山區風景已經冇左，由呢一段路開始我 feel到自己真係黎到Galicia。









一個人好無聊，諗起出發之前睇過嘅一本小說，講既係半馬接力比賽。

長途賽跑係一樣好孤獨既運動 ，跑手一直都係自己同自己戰鬥，雖然同場有其他跑手一齊競爭，不過講到尾其實都係自己跑自己。

一個人跑緊既時候好孤單，只可以同自己嘅內心對話，透過心靈嘅對話突破自我，冇其他人、隊友可以幫到你。

書入面話，對長跑選手黎講，最好的讚美並唔係“你好快”，而係“你好強”，強呢個字真係好難解釋，長跑世界指嘅強唔單止係跑得快，仲可以理解為堅持跑完全程既強韌。

令我諗返起camino，雖然行路冇跑步咁辛苦，但係路上一樣要經歷長時間既獨處，要堅持行完全程，背後都係一個強字。







由7點出門口，冇停過咁行左8個鐘，下晝3點我終於達陣！

見到庇護所嗰一刻有少少感動，因為呢幾日我終於征服左最難行嘅一段路，之後行既都係“平路”，唔駛又要上山又要趕路鳥。

Andrea早我個半鐘已經達左陣 ，咁啱我就訓佢下面，又會咁好俾我訓到下格床。 Andrea話聽日佢會飛左Lugo，行遠啲去下一條村，所以我地訓完今晚就要掰掰，去到Santiago先有機會見返面。

一入到common area又俾我見返意大利仔Davide ，兩日前喺Grandas撞到之後，我地就冇見過臉，估唔到大家第一次住到同一間庇護所。

其實我都算早達陣既人，第四個到～第一個人喺連續住兩晚唔算數，第二個人係跑山佬Andrea，第三個就係Davide，估唔到佢都行得幾快。。。

不過Davide就解釋自己撘左巴士過黎。 原來嗰日行完37km之後，Davide同我一樣行到撞曬牆，今日見要行32km，所以掙扎左一番之後就決定搭車，唞返一日。

我就安慰佢話搭車啱呀，如果真係捱唔到就唔好死撐～

明明四日之前，我仲有啲睇唔起佢話要搭巴士，四日之後，我竟然真心尊重佢嘅決定，覺得佢咁做完全冇問題。 只不過係行左四日山就令我放低偏見，真係有啲不可思議。













Castroverde同一路上經過嘅小村一樣，好細只係得兩間超市幾間餐廳 ，庇護所喺村口，超市喺村尾，為左買支口樂過下口癮，竟然要行成公里路過去，然後又要行返咁遠路返黎。

庇護所冇乜朝聖者，數埋先得十一、二個，我諗大部份人都住左喺上一條村。 識既只係得Andrea、Davide同美國夫婦，其實全部人都唔係好熟，所以都係自己一個人亂行算。

成條村太細，行左十分鐘影左幾張相就已經冇嘢可以做，











村既上面有一座城樓，以前係城堡嘅一部分，依家城堡已經倒塌消失左，淨返嘅只係得呢坐城樓。

我踢住拖咁去解鎖“一個人的城樓”，不過座嘢基本上已經爛曬，冇辦法行到上去，所以我只可以喺下面影下相。













着住人字拖行上黎有啲搵笨，原來上山喺石仔路，上到去甚至變左做大草地，啲草好高一直幫我隻腳R痕，所以行左一陣就返庇護所食飯。







Galicia嘅公營庇護所一般都好新淨，好多都翻新過，普遍佢啲洗衣機都會自動加洗衣液，所以連洗衣粉都駛放。

Wifi就統一用同一個系統，先連一個唔駛密碼既wifi ，用自己嘅電話號碼註冊個戶口，然後佢就會send個sms話你知username同password，咁你就可以用佢黎連要密碼既另一個wifi。

唔知點解Galicia 啲庇護所要將上網整到咁複雜，不過今次我有經驗 ，我亦都好樂意幫其他朝聖者連wifi～～

Galicia 庇護所既廚房亦係一大特色，就係乜嘢都冇，有啲連爐頭都冇個。 好彩今日間庇護所有一個電磁爐、一個煲同一隻叉，足以整熟啲食物。我去超市買左包急凍black risotto，2.5歐又解決一餐。



食緊飯嘅時候見Davide同一個大叔傾緊計，咁我就識左個新朋友。

大叔叫Artur係波蘭人，由十年前第一次行camino之後，每年都會行返兩、三轉，因為時不時都會有長假期 (點解咁好嘅 )，而行camino又可以旅行又可以慳錢，所以就成日飛過黎西班牙。

行左咁多年，Artur已經行過曬所有camino，有啲仲要行過好幾次，例如今次已經係佢第二次由Irun出發經Norte行到primitivo。

Artur話佢最唔鐘意嘅係銀之路，不過行得最多嘅都係銀之路 ，因為波蘭冬天好凍，所以放假嘅話飛去西班牙南部避寒就最合適。

而佢最鐘意嘅就係英國之路，佢話會遇到好多好人 ，唯一唔好就係條 camino太短。

之後傾開原來Artur都打算分三日由Lugo行去Santiago，所以在坐三個人都要24/8衝線，又會咁巧合嘅。 Artur以專家嘅角度分析佢會點行：

Day 1: Lugo - As Seixas 32km
Day 2: As Seixas - Arzúa 28km
Day 3: Arzúa - Santiago de Compostela 40km

雖然佢最後只係話 I'll do this，不過我同Davide都feel到佢係建議我地咁行。

我覺得佢嘅計劃都ok，本來我係諗住由 Lugo一日行50km去 Melide ，如果跟Artur嘅schedule就唔駛咁chur，只係得最後一日辛苦啲。


嗰晚Artur見庇護所出面有個花園，咁就心血來潮，話要出去訓街。 所以佢俾左6歐有床唔訓，要走去以天地為屋。

管理人走左之後，Artur就執好左個背囊，淨係攞個睡袋出黎，打開後門免得反鎖自己，然後真係走左出去訓。

第二朝佢話夜晚訓覺嗰時幾舒服，只不過係起身嗰陣有啲凍。

碟青椒好食

一見到佢就諗起Logroño 既台灣大叔同羅馬尼亞人，唉，回憶呀～

或者都唔係爛尾嘅～終點又未必要係 Santiago，正如絲打所講，去到所謂嘅終點，反而無一種“完”嘅感覺。冇人話Berducedo唔可以係終點，最緊要自己開心就得。

唔經唔覺，我都寫左個幾月，開post感覺好似又行左次 camino咁，各位就好似我嘅camino friend。自己想點寫、寫幾多、寫幾快，一樣係由自己揀，對我大半年前嘅經歷又有另一種睇法。

返黎香港又打回原形，其實又唔駛咁灰，雖然好多嘢都唔係一人之力可以改變，不過朝聖之路有好多條，唔鐘意行呢條，可以改行另一條。你可以揀要愁眉苦臉咁去行camino，定係提起精神，選擇要開開心心咁去行。

Wifi就統一用同一個系統，先連一個唔駛密碼既wifi ，用自己嘅電話號碼註冊個戶口，然後佢就會send個sms話你知username同password，咁你就可以用佢黎連要密碼既另一個wifi。

我申請極都收唔到sms, 張vodafone有個電話number, 但前面要+xx?
用香港張卡又收唔到sms

我記得我係用3UK，要加字頭，收到SMS

Galicia 真係簡單複雜化