不過大叔唔係一點就通，唔明白姐姐係想自己一個人行，如果唔係我拉住佢走，佢仲以為姐姐嘅意思係叫我地兩個等埋佢。
但係出發無耐大叔又發現自己唔見左個散紙包，所以佢就放低個背囊俾我睇住，然後自己行番去庇護所搵(好彩我地只係行左十分鐘
)。所以，去到最後我地三個離開星星鎮嘅時間又係差唔多。
今日出左星星鎮行唔夠三公里就到左camino上最出名既fountain，一個俾朝聖者免費任喝紅酒嘅地方。
雖然話就話fountain 聽落好似好勁，其實只不過係一個好似60年代制水嘅水龍頭，紅酒一滴一滴咁去得好慢。
我地一大班朝聖者個個都係到排隊等飲酒，雖然規矩話唔好攞成個水樽去裝，但係我冇其他嘢可以裝紅酒飲，所以就倒曬自己水樽入面啲水，裝左大約五分之一嘅紅酒試下味。
好既！我依然係唔識飲！
App嘅介紹話"con pan y vino se anda el camino" ，即係話只要有麵包同酒就足以行完全條 camino，聽落又好似有啲道理，啲鬼佬每日都係食條法包，飲幾杯酒就一日。
之後行唔到一公里就到左分叉路，
官方路線(黃線)係長少少但係比較平坦，
另一條支路(藍線)短啲但係就要上上落落，
其實大部份人都係行官方路線，只係咁啱行我地前面嘅人都行支路，我地冇睇地圖所以就跟隊行啦。
雖然有上有落係辛苦啲，不過呢日風景係一路以黎最靚嘅一日，呢家睇翻相，我覺得佢算得上係五十日裡面嘅top 5。
今日天氣唔止好好，而且兩邊既油菜花田都黃金燦爛，條路亦都闊左啲所以冇左之前幾日人塞人嘅壓迫感。
姐姐今日行得好快，過左呢段路之後就冇再見到佢，
其實自己行自己係會舒服啲，唔駛成日就住其他人啲節奏，可以想行幾快就行幾快，之後我先明白呢一點。
大叔同我係後面慢慢行，行完一片又一片嘅油菜花田之後，換上嘅係側邊一支支紅色嘅罌粟花。
呢個人行下行下“啪”一聲，行到連行山杖都斷埋
去到路邊嘅小食部，我地停左係到坐左陣。
大叔點左杯咖啡嘆下，而我就覺得呢幾日不斷飲嘢個荷包就快頂唔順，所以就乜都冇點。
襯住大叔飲緊咖啡既時候，我走左上去隔離個山仔影相，遠遠望到成條朝聖之路都係人，好似螞蟻咁一個接一個向前行，但係兩側嘅農田就人影都冇個。
我忍唔住係到諗，
點解一定要行呢條路？
點解唔可以行其他路？
點解一定要跟住啲箭咀行？
愈諗就愈唔明，到底我係因為人地行所以我就跟住行，定係我真係知道我要行朝聖之路嘅原因呢。
雖然我係帶住疑問開始行 camino，但係我真係冇信心搵到答案。
有啲人行係為左減肥，更多人係為左尋找人生方向，但係行完七百幾公里就可以解答到人生終極難題，咁又好似太簡單。由嗰一刻起，我一路諗：到底我係咪人云亦云咁開始行camino呢？
小食部又遇到一路上一直見到嘅兩個韓妹同一個韓仔(我叫佢地三人組)，佢地三個一直都一齊行，最初我仲以為佢地三個係約好一齊由韓國飛過黎，點知其實佢地都係黎到先識(就好似我同大叔同姐姐一路被誤以為係一家人咁)。
其中一個韓妹全程都攞住部相機行，好易認，佢幫我同大叔影左張相，我諗佢係想紀錄低camino上佢遇過嘅人。
行左22km左右，終於黎到一條大少少嘅村落。
Los Arcos有少少似前晚訓過嘅皇后鎮，一樣古色古香，歷史可以追溯到古羅馬時期。夏天既時候每晚都會有朝聖者彌撒，所以呢度亦都係大部分人留宿一晚嘅地方。
我地行到呢度已經差唔多下晝兩點，呢個時候有個兩選擇：
1.今日住呢度，聽日爆三十公里去Logrono(一個好多嘢睇既大城市)
2.依家行多7公里去下一條村仔，咁聽日就可以輕鬆行。
一到左Los Arcos我就問下姐姐去到邊，點知原來佢已經去到albergue涼都沖埋，話呢度環境唔錯仲有馬沙池所以就決定住呢度。
而按大叔嘅講法就係，無論呢個小鎮定係下個小小鎮都“不值一顧”，呢啲咁無聊嘅路段應該快啲行過，所以今日要行多七公里去 Torres del Rio。
我其實覺得Los Arcos都幾靚吖，而且大部分人包括姐姐李小龍都住係到(冇錯，係羊群心理)，感覺都唔錯。但係心裡面又唔想聽日行三十公里，所以向左走向右走好掙扎。
我買左個六歐既三文治坐左係教堂出面食(唔知點解咁貴)，一路諗應唔應該繼續行。
呢個時候見到羅馬尼亞人Oliver，佢都苦惱緊要唔要行多七公里，
佢只係得四個星期假，某程度上都趕趕地路，所以可以行多啲嘅話其實都應該行。
但係佢又話佢聽日無論如何都會停係Logrono，所以呢兩日既路程基本上係定左五十公里，唔會話今日行多啲就可以趕到路。
聽完佢咁講，覺得佢又講得啱喎，亦都點醒左我：就算我今日同其他人講掰掰都好，聽日咪一樣可以係Logrono 見面！
所以我下定決心，今日要行29km到Torres del Rio，因為我心入面其實都係想繼續行，而今日既路程亦都係暫時行得最遠。
點知到最後羅馬尼亞人就話佢想留係到，頂，你地一個二個買低我。
二點鐘，我同大叔繼續行。
一點鐘過後嘅 camino 好安靜，
尤其是係今日其他朝聖者都住曬係Los Arcos，而僅有會行去Torres del Rio 既人又行得好快，
所以成段路嗰個幾鐘都係得我地兩個人。
離開左之前五日嘅熱鬧，我覺得呢一刻最有朝聖嘅感覺。四方八面望過去都係得自己一個人(唔計大叔)，感覺好自由，而且一路上有微風吹過，一路行一路覺得自己好似要飛起咁。
雖然今日係第一次我地三個人一唔住同一間庇護所，心情係有少少影響，但係朝聖係屬於自己既，我諗冇人～包括我～會希望自己既朝聖之路俾其他人騎劫左。
去到Torres del Rio都就快四點，唔睇都唔知原來我有好多日都行到咁晏。
顧名思義：河上嘅高塔，河嘅一邊係Sansol，另一邊係Torres del Rio，兩條村都係起左係個山仔上面，所以每次來回都要落左去再上番黎。
去到庇護所竟然俾我地撞到寶兒同 Charlie，仲有最唔想見到嘅打呼王(好彩佢住嘅係另一間庇護所)，估唔到大家都咁行得，一早已經行到。
放低背囊之後食左啲嘢，問大叔要唔要行番去對面嘅Sansol睇風景，得到嘅答案都係一樣：今日仲未行夠牙。
咁我就拉埋Charlie 去行啦。
又上又落咁行番去村口，嗰度有間cafe所以就點左杯咖啡坐左陣。
望住呢片綠油油嘅菜田，老闆話夏天呢片草會開曬花，好靚咁話，不過冬天嗰陣呢度會落雪，天氣變化好大。其實我覺得依家就已經好靚，但係老闆既意思係：再行多轉法國之路的話，要六七月黎到呢度呀。
今日嘅小插曲就係我攞左Charlie部相機睇下佢影左咩，睇下睇下竟然發現一個熟悉嘅背影，原來咁啱 Charlie又會影到姐姐係路邊野餐(佢地兩個未識架)。
問下問下，又發現原來佢噚日都上左十字架影相，但係大家又遇唔到。
總之朝聖之路就係由各種巧合串連起黎。
介紹話呢個教堂屋頂係八角星，起嗰時深受阿拉伯文化影響～～～
唔好意思相比較少，行緊嘅時候好少影嘢，有時一日影得嗰十幾張相。預告：之後有幾日直情冇相。
