因為庇護所七點先有早餐食,所以就冇人五半點起身執野走人,今日可以比平時訓多成粒鐘。
早餐都係常見嘅餅乾加蛋糕仔,麵包搽果醬、牛奶同咖啡。
雖然食早餐係三個人一齊食,但係一樣分開出發。
唯一唔到既係,今日姐姐好快執完嘢就出左發,我同大叔今日就殿後,之後我地又去搵cafe買麵包晏晝食,點知麵包買唔到,但係就俾我地撞到Charlie。
當我地正想入間Cafe嘅時候, Charlie就啱啱食完早餐推門出黎,咁都咁啱撞到所以就一齊行啦。
今日條路由Logrono到Najera,基本上都係冇得揀一定要行28km,因為只係得兩個選擇:
1.行12km去到Navarrete就停,然後成日都唔知可以做乜
2.行28km去Najera,一個更靚更值得停留嘅小鎮。
相信正常人都會選擇後者,所以我都有心理準備今日要行好耐。
一開始出城條路都算係有趣,沿住個公園行有山有水,經過一個湖風景算係唔錯。
但係出左個湖之後就弊喇,一路沿住高速公路行,不斷吸廢氣。
加上今日嘅朝聖者異常地多,路上每隔二三十米就一批朝聖者,真係想係路邊搵個地方小便都唔得。
Navarrete係一個好多庇護所嘅小鎮,應該係俾啲唔住Logrono嘅人黎呢度投宿一晚,小鎮本身冇乜特別,不過佢有個都算幾華麗嘅教堂,App話佢既祭台係呢個地區最有代表性嘅作品之一,屬於十七世紀巴洛克風格。
其實我本身都幾鐘意睇教堂,
法國之路上每個村鎮,無論幾細都好,都會有一座教堂係村嘅中心,而佢既規模同精緻程度住住同條村嘅大細唔成正比,算係展現左朝聖之路係中世紀輝煌嘅一面。
所以每經過一個教堂,我都會去睇下佢有冇開門,呢個亦都可以話係我朝聖嘅方式(事先聲明我唔信教架)。
雖然沿路大部份教堂都因為冇人看管而唔開門,我諗我每去五間先有一間開,但係每次開到門,見到教堂裡面嘅建築嘅時候,我都會覺得好彩我有入到黎,因為裡面真係幾靚。
呢個就係一出城嗰陣個湖,唔知點解同Charlie影相嗰時都係呢個pose
大叔喺我參觀教堂既時候又行左去,之後由呢度去Najera又係一直沿住高速公路行,而且高手可以選擇唔補給直踩十六公里過去,應該會悶到喊。
不過一般人都會兜路行多一公里去 Ventosa 休息下,然後再行十公里到 Najera,而我地當然都係咁行。
當我同 Charlie行到去Ventosa 嗰時大叔已經飲住嘢坐係到等,由於我實在太窮唔可以餐餐都食十歐嘅朝聖者餐,所以就咁點左杯咖啡就算。
話說朝早冇買到麵包,雖然我背囊係有咸火腿同芝士片,都冇理由齋食火腿芝士架,咁點算好呢。
大叔佢點左份朝聖者餐,跟餐有麵包所以我同Charlie就攞左黎夾火腿芝士食。
理論上,餐包係任食,所以大叔見我地食曬啲麵包就好"慷慨″咁叫人添麵包,結果最後加包人地收左錢
(大佬,三個人食一份麵包,人地唔收錢至奇)。
食完飯之後要行多10km,可以話係全程憑意志力完成,事關條路實在太唔似行山,完全冇朝聖嘅感覺。
睇下佢又係呢個pose
就快到終點嘅時候我地終於追返姐姐,佢除左隻鞋坐左係路邊,話啲腳趾行到好痛。
其實噚日行完30k之後佢已經話有個水泡生左係指甲下面(唔好問,我都想知點解可以生到係指甲下面
),以佢話,可能係隻鞋頭太迫。
雖然姐姐隻舊鞋之前都着得好舒服,但係為左今次朝聖之路佢著左一隻普通襪加一隻厚羊毛襪,所以鞋裡面嘅空間就變細左,可能就係因為咁迫住啲腳趾。
去到Najera我地又跟住個app搵左一間評分唔錯嘅庇護所,點知去到既時候已經滿左。第一個諗法就係:咩料呀,四十個床位嘅私營庇護所都full,依家玩賽跑牙?
但係睇下時間其實都已經成三點,只可以怪自己行得太慢,而且都可以安慰下自己:打呼王就住左係呢間albergue,今晚見唔到佢就安落喇。另外我地去嘅公營庇護所亦都係donativo ,所以氣氛應該唔錯~~
點知氣氛點止唔錯,去到先發現原來呢間庇護所就係著名既百人交響樂廳。
第一次訓一百人通鋪真係呆左,而且兩張牀並排一齊,感覺好似要同隔離牀一齊訓咁,不過點都好至少有地方訓唔駛訓街囉。
坐左陣又拉隊四個人一齊出去行下,Najera小鎮風景亦都好靚,Charlie話佢好鐘意呢度。而我睇番介紹,呢到最出名嘅就係一座成立於1052嘅修道院,因為佢之後喺十五十六世紀亦都經歷過重建,所以成棟建築融合左歌德式、文藝復興式同巴洛克唔同嘅風格,App話強烈推薦參觀。
咁我就緊係有聲有色咁話到裡面好靚好值得去
,拉埋大家一齊去睇啦,點知又伏左所有人
。
其實裡面唔係話唔靚,只不過入場費要成4歐,多少會有高啲嘅期望。
成個修道院感覺有啲似英國嘅教堂,有迴廊,設計簡潔,不過就唔係太大,所以大叔行左都冇半個鐘就出左去等我地。
我覺得嘅然都入到黎,咁就留耐啲啦,話曬都係朝聖之路,就去下教堂同修道院感受下以前朝聖者既感覺囉。
之後大家就分開行等餐廳六點開門,我同Charlie去左河邊嘅公園,坐左係草地上面曬太陽。
大叔自己一個番左庇護所訓陣。
姐姐就先番庇護所收衫,然後再出黎買對新鞋,因為佢覺得再着住嗰對舊鞋嘅話佢會捱唔到Santiago。
其實我同大叔噚日喺Logrono已經幫佢睇過唔少對鞋,話曬都大城市可以選擇嘅款式自然多啲,最平既鞋所羅門Gortex先六七十歐左右,
但係姐姐就話再行多日睇下情況如何,再搞唔掂先買新鞋。
去到Najera全個鎮得一間舖頭賣鞋,當然係冇乜得揀,所以係無選擇既情況下姐姐買左對五十幾歐嘅行山涼鞋,咁就唔會再發生頂腳趾嘅問題。
講番我對鞋,我都係着cheap cheap所羅門嘅 trail runner,係香港出發嗰時着住對新鞋過去,行左一個月就發現對鞋已經唔防水
,之後係西班牙南部玩,計埋先着左兩個月,對鞋已經穿左個窿
,真係有啲心痛。到底係因為對鞋嘅質量太差定係因為朝聖之路嘅環境太惡劣呢?
六點大家一齊去到餐廳集合,因為間餐廳係tripadvisor第一名,所以都算係朝聖者嘅飯堂。
點菜嘅時候完全靠曬Charlie,呢個就係識講西班牙話嘅重要性,而且佢本身就做煮嘢食嘅,所以佢點咩食我就跟住點咩就一定唔會伏。
不過,Charlie本身呢個人其實就有少少伏,大叔三翻四次話要羊唔要牛,點知Charlie都係唔記得所以幫大叔嗌左牛,之後姐姐話見到上菜嘅時候大叔黑左一下臉,都唔知Charlie係咪特登嘅。
食飯嗰陣傾左好多自己地方嘅食物,我就緊喺幫港式點心買下廣告啦,而阿根廷菜我就真係聽都冇聽過,唔知有朝一日會唔會有機會去到南美呢。
嗰晚嘅百人交響樂演奏完全無影響到我嘅睡眠質素,只要打呼王唔係到,行雷都整唔醒我,所以打呼王嘅鼻鼾分貝應該比行雷仲要高。