西班牙朝聖之路 (五十日長篇)

大佬你可唔可以...唔好一quote, 就quote哂人地成日嘅遊記, 好長, 你edit一下, cut淨你想回應個part好嗎

唔知點解，其實我同允貞係冇約好既，但係今朝就一齊出發一齊行。

老實講，我同佢速度係差唔多，不過大家嘅興趣就唔係好同，

例如我鐘意週圍行下啲鎮仔，睇下景點，但係佢就鐘意快啲行到庇護所，然後去到同其他人social，所以大家嘅節奏唔係好一樣，我諗呢個亦都係我地之後冇一齊行嘅原因。



一出發個天好靚，大家都忍唔住停低影相。


不過今日呢20km我地係並肩作戰咁行完，而 Leon呢一個城市對唔少朝聖者黎講都應該有特別意義：

佢係行到Santiago 之前最後一個大城市，之後有個大少少既鎮叫 Ponferrada，但係就無乜特色，歷史文化都冇 Leon咁深厚同精彩。


而且Leon亦都算係Meseta高原嘅終結，之後嘅路就會多返少少起伏，要上吓山落吓山咁，再唔會好似之前八日咁，行兩三粒鐘啲風景都完全冇變過。


加上Leon亦都會有好多新人加入(舊人離開？好似少啲 )，之後又會多左好多新臉孔，又有機會識新朋友。

種種因素加埋，令到Leon呢個城市喺camino上都算係一個幾重要嘅交叉點。如果你問我，行到去Leon到底有乜感覺？

我就覺得時間真係過得好快，咁就行左廿日，成條法國之路只係淨返三分之一，雖然話之後仲會行去世界盡頭Finisterre，但係嗰個感覺已經同未去 Santiago 嘅時候唔一樣。

至於行完meseta又覺得點？

可以話係難離難捨想抱緊些，可能係因為唔想咁快行完 camino，所以連埋高原呢段都唔想完，因為好快就會進入最後衝刺，行完camino我就冇得再逃避現實。


由 Mansilla 行去 Leon呢段路，同之前高原所有路段一樣，都只係穿過一片又一片既農田，偶然會見到一啲村仔。
但係愈接近Leon，就見到愈多大馬路同高速公路。

噚日幫我地煮飯嘅一班西班牙大叔




允貞同印度工程師。第一次見到印度工程師係Atapuerca一齊去考古基地，之後Bericanos食飯嗰時佢仲坐我隔離，但係我地好少傾計，所以就冇乜提起佢。




臨入城之前，要爬過一座山仔先至可以直奔市中心，到頂之後可以睇到成個Leon市，離遠就已經見到地標Leon Cathedral，心情又興奮又感動，呢次入城體驗算係好好。


黎到Leon除左行教堂睇古蹟之外，最重要就係食 tapas ，之前日本伯伯Hitoshi同我講，Leon地區有一個好特別嘅文化，就係點嘢飲送tapas，就算你點份量最少嘅啤酒cana，佢都會跟嘢飲俾件tapas你。


聽到呢度我就已經好興奮，好期待去 Leon，因為1,2歐可以有飲有食，真係聽都未聽過。

而伯伯見到我O曬嘴嘅樣，就覺得好不可思議，話我竟然連呢啲野都唔知～～ 我都冇做功課就過黎行，又點會知道呀。


另外，今日去 Leon仲有一個好消息！就係可以見返西班牙人Josan！

自從佢四日前同我掰掰左之後，我仲諗住冇機會再見到佢。 我地都一齊去過洞穴教堂、考古基地、行入Burgos個城、又係高原巧遇最後仲住埋動物農莊，其實都有好多共同經歷。 所以我聽到Josan話會係 Leon留多日嗰陣都幾開心，可以同佢一齊去食 Tapas。
其實佢比我早一日已經到左 Leon，可能佢都想見返啲舊人，而且又見呢個城市唔錯，所以就喺度訓多晚。

因為Josan要連住兩晚，而一般公營庇護所就只可以住一晚冇得續住，所以佢就搵左San Francisco呢間私人庇護所，佢又話呢度條件okay，咁大家就拉大隊去搵佢啦。

又要講返句老實說話，間庇護所好似又俾 Josan伏左 ，比公家嘅貴啲之餘，其實條件都係一般，我間十二人房竟然住左十個韓國人，當中包括允貞、高恩同女神。

淨係得我同另一個鬼佬唔係韓國黎，搞到我仲以為自己去左韓國旅行。


擺低個背囊之後我再去搵 Josan食飯，順便行下成個禮拜冇見過嘅大城市。

話說今日Leon真係好多人，大家都著住藍色波衫，原來係Leon對Oviedo有場波要踢 ，而今晚呢場丙組聯賽附加賽就喺Leon踢，贏左嘅話就可以升上乙組，所以啲球迷全部黎曬呢度睇波。







不過奇怪嘅係，雖然呢度係Leon主場，但係週街都見到既藍色波衫其實係屬於Oviedo嘅，所以成街都係oviedo球迷，反客為主。

大家氣氛都好高漲，而且撞啱今日星期日，條街就更加多人，成個舊城區都好似開緊嘉年華咁，仲有點球迷無端端就係條街唱返幾句，真係好熱鬧。


同Josan 一齊行左去Leon Cathedral 前面嘅大廣場，原來今日仲有一個活動，就係要打破Largest serving of Cecina嘅世界紀錄。

咁講返西班牙火腿叫 Jamon, 係由豬腳用鹽長時間腌制，而Jamon又分用白豬做嘅Serrana，同埋黑豬做嘅Iberico，Iberico 亦都係西班牙美食嘅代表人物。

不過今次要破紀錄既火腿係 Cecina，唔係用豬肉而係用牛肉做，之後我係超級市場買過黎食，價錢比 Jamon貴啲但係味道清新啲，至少冇咁咸。




Josan今朝黎嗰陣，成班廚師仲係到切緊火腿，但係我地依家二點黎到已經係成地火腿。
上網睇返，今次總共切左283.1kg火腿，擺滿左 80平方米嘅地下，所以鋪到成張紅色地氈咁，遠睇都唔覺，近睇先知原來係一塊塊火腿。
(網上偷圖)


我同 Josan見大廣場咁多人(其實成個old town週度都好多人)，所以就去左食晏先。之前咪講過要食Tapas嘅，我地去左四間唔同既bar食嘢，估唔到咁樣飲杯嘢食件tapas都駛左成7歐，所以話歐洲消費真係幾高。


其中一間Bar叫Jamon Jamon，顧名思義，“火腿 火腿”，所以係專食西班牙火腿嘅，成間鋪頭都好多人，迫到連企係度食嘅位置都冇，真係好癲。

Jason話呢間野好出名，今日係佢第三日，但係佢已經食緊第四次。 我覺得以食火腿黎講，呢度算係幾平，但係我其實唔係好識分邊種jamon好唔好，所以味道就 okay啦。




之後我地仲食左coquette，呢樣小食亦都係西班牙出名既，但係都已經黎左廿日，今日我先第一次食到。

佢係一個炸芝士薯仔波，裡面有時仲會放煙肉，我一放入囗感覺真係驚為天人，估唔到西班牙有啲咁好食既嘢。雖然其他free tapas冇想像中好食，但係coquette就俾到意外驚喜我。

城入面仲有個古董車展，同一日入面有咁多活動，怪唔之得週街都係人。


高第嘅作品casa bonites，但係入場費好似好貴，所以冇打算入，門口影個相就算


食完飯之後再去廣場，啲火腿已經俾人食曬，大家都係度傳緊張健力士世界紀錄證書黎影相，

我同Jason就O左，心諗咁多火腿係點樣咁快食曬架，


咁都無計啦，所以Josan就返庇護所訓午覺(西班人既siesta時間)。

而我就隨便入左間教堂訓晏覺，最奇怪就係訓醒之後竟然成地濕曬，睇黎我訓左嗰一個鐘落左一場大雨，所以我訓得真係時候，啱啱避開左場雨。




不過，我繼續毒遊既時候先發現今日係星期日，好多景點去到下晝都唔開，我想去嘅 Cathedral 同St. Isidone兩個教堂都已經閂左門，就連我冇諗住去嘅Casa Bonites 都冇開，真係好灰。

呢一刻，我竟然見到比利時人坐左喺間 bar入面，對住個廣場畫畫，咁我就去打個招呼啦。


點知又有一個令人更灰嘅消息：以後都可能見唔到比利時人喇！原來有一條 Camino叫Camino de San Salvador，由Leon行去Oviedo，大約行五日左右，然後接住原始之路繼續行去Santiago。比利時人聽講呢兩條路都好靚，而且又冇乜人行，唔駛再喺法國之路人迫人，加上佢又可以返去Oviedo回憶下中學嘅時光，所以就改變計劃行過去。(唔知點解今日oviedo嘅出鏡率好高 )因為行去北面再兜返落黎路程遠好多，所以至少比法國之路行多五六日，就算去到santiago大家都應該唔會見到了。

估唔到由 SJPP 開始嘅緣份去到Leon就完，唯一安慰嘅就係我地有正式道別過，唔似好多人都黎唔切講掰掰。











行行下又竟然俾我見到Camino de San Salvador 嘅路牌，當時我都冇諗過除左比利時人，仲會有人行啲咁冷門既路線。後記：點知李高恩行到 Santiago之後，Finisterre 都冇去就撘車返黎 Leon，行左呢條冇乜人識嘅 camino，fb睇到啲相好似又真係幾靚。所以話，朝聖之路上面真係好多癡線佬。


去到下晝唯一仲開嘅景點就係現代美術館，而且都算係Leon嘅地標，所以我就好似仲未行夠咁行左2k過去。博物館啲畫我就唔係好睇得明，不過佢有個關於camino嘅展覽，嗰個就幾得意。

我係博物館都行左好耐，尤其係我已經行左三份之二條 camino，睇返啲展品就特別有共鳴。




見到世界盡頭燈塔張相，我就忍唔住諗，到底我行到去嗰度嘅時候會係點，會自己一個去定係同啲咩人一齊去，日落又會唔會好似傳說中咁靚。








晚飯我為左慳錢所以留左係庇護所食麵包，但係大家都出去玩到好夜先返，我就上下網用下大城市強勁既 wifi。我原本有諗過好唔好留係 Leon住多一日，但係見好多人都打算繼續行，而 Leon又有啲太嘈太亂，所以我就放棄左stay多日嘅計劃。不過，唔留兩日最主要既原因係，睇返個進度，我覺得姐姐同佢朋友冇論如何都追唔到上黎，所以我自己行返自己想行既速度就得，唔駛去就其他人。

我發現如果嗰日行左好多路嘅話，消費亦都會相應提高 ，因為我已經唔會介意駛幾多錢，淨係想對自己好啲慰勞自己。結果就餐餐豪食，住貴嘢

哈原來法國之路都有gaudi

我都係絲
今年六月會去
希望有緣相遇

而且有兩間 ，不過我嗰時諗住會去聖家堂，所以就冇話一定要參觀呢啲

我都打算六月再去行多次

到時香港旗仔相認啦

到Leon個時我都有諗過留多一日。特登前一日行多d, Leon個日10點幾就去到。住公營albergue.
兜完舊城區，夜晚就無咗想留多日個種諗法。


diu, 我記得喇，Leon個晚公營albergue入住個時有得買埋隔離餐廳嘅dinner. 跟住個晚同台灣阿姨嘈咗一餐 。跟住就谷氣走人

可能係我嘅心情影響，我覺得Leon冇Burgos咁靚，而且大城市觀光雖然好正，但係住落就麻麻地。

同咩人一齊真係好影響自己既進度，去到最後我唔想再就住其他人，所以就自己一個行多

前言：Leon之後好多新人加入，同埋我呢幾日又做埋啲奇怪決定，搞到之後遇到啲人都唔同曬。
不過，呢三丶四日遇到嘅人亦都好大機會同我一齊去Santiago 衝線，因為仲有十幾日就行到，好快就行完，所以呢一段路感受真係好深刻～～

朝早食完麵包之後，又係同允貞一齊出發，不過噚日大家研究過條路線，離開Leon行大約七公里之後，就會係命運交叉點，因為上下路嘅選擇會直接影響大家今晚訓既地方一唔一樣。


上路係沿住公路行，由交叉點計起，要一直行至少廿幾公里路，然後先至可以再揀返山路或者公路。

下路係山路，雖然風景靚啲而且冇廢氣，但係要行多4km，計返都要成個鐘，加上呢段多出黎既路要喺聽日行，所以如果揀下路既話，聽日就要行33km，亦都會破左我暫時嘅紀錄。

今次嘅決擇同以前唔一樣，因為以住大家嘅選擇其實都一面倒，唔會話有啲人鐘意咁行，另外啲人就唔鐘意，所以好多時大部分人都會揀返一樣嘅路。 但係今次就真係50/50，唔少人都覺得行多4km實在太多，而且第二日仲要爆三十，所以寧願行公路都唔揀靚啲嘅山路。 Josan就一直以黎都鐘意兜路，所以唔駛問都知佢會揀山路，允貞同其他韓國人就揀公路，為左聽日就唔駛行咁遠路。


雖然我都心思思仲未決定好，但係就覺得要行自己想行嘅路，唔好因為人地行邊就跟住行。







Leon出城呢段路真係悶到抽筋，佢條行人路只係勉強可以俾兩個人並排行，肥啲都會迫左出馬路，如果有人迎面行黎就更加煩，要避來避去。


而且行行下仲要穿過工業村，考察一下西班牙嘅工廠同經濟～～點解入去 Leon嗰陣就咁舒服，出城嗰時就咁白痴。

不過高原嗰一段其實我就習慣左，有時候條camino 嘅風景就係唔啱睇，並唔係全程都咁精彩。

(又俾我見返哈比人屋仔 )






允貞離開Leon之前想去寄張明信片，所以我地就搵左間郵局買郵票，好似都唔平，寄去韓國都要接近兩歐。

鎮嘅盡頭有成批Cafe，大家都坐曬係度食早餐，唞夠先繼續行，亦都可以諗下之後應該要揀山路定車路。

英國人Nick同允貞嘅兩個法國朋友都坐左係到食早餐，咁我地又搭檯坐低唞下。

之前一路都冇提過 Nick，其實佢係羅馬尼亞人既friend，之前我係Hontanas同佢都有一臉之緣，但係去到今日先再撞返，而我地一開口就傾到羅馬尼亞人：

我係itero同佢掰掰之後，佢就繼續攞住佢嘅單反同 laptop，日日爆三十，早我兩日就已經去到Leon。但係轉折就係呢度發生鳥，因為羅馬尼亞人每日行太多，所以佢依家行到全身傷患，頂唔順之下佢就問老闆可唔可以請多一個禮拜假，估唔到佢老闆好好人咁話：你慢慢行完先返工啦！所以羅馬尼亞人依家就用龜速前進，每日只係行十幾公里。

我諗，可能佢都掛住啲舊人，已經唔知道當初點解要行咁快，所以就一於行慢啲等埋我地。





(我睇返Atapuerca嗰日嘅相，原來Nick已經出現左係我部相機入面 )


去到命運叉差點，我同允貞好快咁掰掰左之後，佢就要行快啲追返佢啲法國朋友，而且我發現其實好多人都行上路。

不過，我就揀左風景靚啲嘅下路，重新出發，感覺好似好耐都未試過自己一個人行過咁(其實計埋先兩日 )。

沿路嘅風景有啲似返去Burgos之前咁，雖然理論上，呢度仍然係屬於乾燥嘅西班牙中部高原，但係一兩日之後會行返入山區，當中有法國之路最高點Cruz de Ferro，同埋屬於Cantabrian Mountains一部分嘅O Cebreiro。


少少地理資訊，位於西班牙北部嘅Cantabrian Range長300公里，平均高度超過一千米，係一條重要嘅分隔線：
山嘅南面就係啱啱行左一個星期嘅中部高原，氣候又乾又熱，
而山嘅北面就背山面海，所以有大量雨雪，亦都係西班牙人嘅避暑勝地。

因為依家正係向山區進發，所以景色同天氣都會開始有變化，再唔係一路望住農田或者工廠。








行左無耐 Josan追到黎，我地一齊行左陣佢又去左bar啤一啤，我見唔係好攰所以就繼續行。

之後Nick都追到上黎，咁我地又一齊行左陣，其實我地一直以來都冇傾過計，所以今日係第一次(亦都解釋左點解我一直都冇提過佢)。

Nick以前做過警察(唔係散仔，高層嗰啲)，當年未回歸之前仲派過黎做英國駐港警察，之後佢走左去做航運業，大貨輪嗰種，亦都黎過幾次香港工幹，不過全部都係英屬香港嘅年代。

雖然依家Nick都仲係做緊航運，但係佢知我知，香港既貨運物流已經走緊下坡 ，曾經世上吞吐量最高嘅葵涌貨櫃碼頭已經俾大陸同新加坡超越左，所以Nick之後都冇再黎過香港。

我地又傾到羅馬尼亞人，今日佢同我地差唔到20km，所以聽日去到 Astorga就可以見返佢。 諗返都好笑，有時候，你會覺得聽日仲會見返嗰啲人，但係佢地可能就係咁消失左。相反，當你以為以後都唔會再見到一啲人，佢地就會係你面前一再出現。

Nick之後都停低左唞下，所以我又變返千里毒行，一鼓作氣就行到Villar de Mazarife，然後搵左間最平嘅庇護所。







呢間albergue不得了，5歐但係間房好靚，木造嘅床架同地板，張床褥好厚好舒服，而且望出窗風景仲好靚。

咁我第一時間就緊係同Josan 講，我呢間 albergue好正呀快啲黎住呢度～～(係喎，估唔到我今日仲快過佢達陣)






Mazarife呢條村唔大，行三個字就已經行完，而且下晝開始就一直落雨，落到訓覺嗰時雨都未停，所以全日都只係可以摺喺庇護所入面，煮下飯仔，訓下覺咁。







同房黎左一家三口嘅英國人，個老竇見到我係checkin薄上面寫Hong Kong，就話以前自己都係中電做過工程師，青山發電廠佢都有份幫手設計，不過呢啲都係回歸之前嘅事。 今日又會咁好彩，遇到兩個英國人都去過香港做野，呢個就係camino。

Josan遲我一個鐘之後先到，佢check左 in之後，我就懶醒咁問，間庇護所係咪冇介紹錯呢？

佢就難露難色咁話“okay la"，

我心諗，吓？咁都係okay咋？

所以我就叫 Josan帶我去參觀下佢間房，一開門嗰下真係O左，間房好細不突止，而且張碌架床只係普通鐵床架，加上個窗好細對住條街，成個陰暗嘅環境就好似重慶大廈咁。

我就不停講 sorry，原來同一間庇護所唔同房係差咁遠，今次到我伏左 Josan，算係大家拉返平手。


為左證明我唔係有心伏 Josan，我都帶左佢去睇我間房，佢都覺得環境唔錯。 之後姐姐都住呢間庇護所，依佢嘅觀察就係咁：
checkin個職員原來係會大細超，如果黎嘅係西班牙人，佢就會帶佢地去重慶大廈，但係如果黎嘅係我地呢啲“外國人”，佢就會俾我地住高汁房。

今日啲朝聖者都好摺，冇話成班人係度高談闊論，
不過，其實就算有我都好少加入，可能係英文能力或者性格問題，成大班人嘅時候好多時我都插唔到嘴，所以覺得好無聊，變左我都好少群埋大堆頭。


出面一直落雨，Josan就話今晚餐飯想煮tortilla。

哇，唔係掛？！連Josan都咁厲害識得整呢味菜？

咁我就好期待可以開大餐啦，點知佢淨係叫我去買雞蛋同腸仔，唔駛薯仔，嗰下我先知道原來tortilla只係cake嘅意思，而我鐘意食嘅薯仔蛋餅全名係叫tortilla de patatas，所以我當晚有一種希望愈大失望愈既感覺。


咁我自己又煮左個無味既意大利粉食，煮左半包都食得曬，所以話，如果食慾不振嘅話黎行 camino就啱喇。

廚房入面仲有對法國情侶，雖然佢地係由法國開始行已經行左兩個幾月，但係今日係我第一次見到佢地，呢個老國佬之後keep住都撞到，算係我camino後期比較常見嘅人。


因為法國佬英文好差，但係佢又識少少西班牙文，而 Josan咁啱又識啲法文，所以佢地兩個就不斷互換英法西三語溝通，好似又真係得喎。

法國佬同佢女朋友係camino上面識，不過就全程都一齊行，雖然只不過係識左兩個半月，但係日對夜對應該都已經好熟悉對方嘅一切。

傾傾下又有個丹麥佬入左黎，全身濕曬咁講：Josan, I come to Spain for the sun and beaches, what the fuck is this rain? I'm freezing right now!


睇離丹麥佬應該遲啲黎，依家既天氣同香港嘅濕凍真係有得比。


後記：朝早嗰時姐姐問我去到邊，我話我啱啱離開左Leon行緊去Mazarife，

佢就話我做乜唔係Leon留多一日，因為佢地改變計劃今日就到。

咁我就有啲驚訝，早知係咁我就係Leon住多晚啦，所以問姐姐做乜唔早啲話我知。

跟住佢就講到我Line已讀不回(情況係佢最後一句只係打左兩個字，咁我當然以為唔駛回) ，話我做乜唔覆佢，所以佢就冇提前同我講早一日會到 Leon。

呢件事既教訓就係，同女人text，無論乜野歲數，做男人嘅都要回最後一句。

一次過追晒

我都明樓主人來人往果種感覺，人生就係咁

我自己冇興趣行


巴打有冇一路d人物相睇下

多謝捧場～～

之前我以為自己對離別無所謂，行緊camino嘅時候先知道自己其實放唔開

本身我就好少用鏡頭對住人影相，而手機裡面有嘅人物相就更加少

Leon之後, 我行咗上路...又係馬路邊行, 悶到仆喺度, 又無乜樹, 曬到...如果唔想同人傾計, 淨係自己行平路...應該還好

欸。。。咁好天嘅

其實好似比較多人行上路，如果一直行公路去 Astorga，可以慳返7km

因為舊路線係指上路...

噚日講到我為左行山路，所以今日就有報應，要直踩33km去Astorga，

咁人有可能會問，點解一定要行到去Astorga，中途停低係其他鎮仔唔得咩？


咁係因為大部分人(包括Josan) 都會行去Astorga，我都想跟返大家嘅節奏，而且我前一晚做左功課，聽講嗰度係一個幾值得訓一晚嘅城鎮，如果今日行唔到去個城，之後嗰日就可能會飛左呢個地方，好似好可惜。

所以我就下定決心要衝33喇！

33km對好多朝聖者黎講其實唔算好遠，因為日日過3爆4嘅大有人在。

只不過，我從來都冇試過一日要行咁遠，唯一一次過3嘅經歷就係由 Burgos 行去 Hontanas，結果行到淨返半條人命。


所以今次我就如臨大敵，前一晚就已經準備好，
校好六點十五鬧鐘希望準時六點半出發，
睡袋都冇攞出嚟背囊已經一早執好，
聽朝牙都唔刷食個飽就可以直接出門口。


由Mazarife去下一個大鎮要行15km，但係朝早嘅時候真係好凍，大約得六、七度左右，而且咁早天都未光曬，基本上係冇咩風景睇，所以我就一直加速完全冇諗過停落黎。

雖然途中有個村仔可以俾人停低唞下，有唔少朝聖者都會兜入村去間bar食早餐，但係我又唔想煩要行入去，天氣太凍嗰陣我只係想行快啲行熱個身，所以就一直行大直路算。


最後我九點半左右就行到 Hospital de Orbigo，即係大約三個鐘就行左15km，算係我咁多日以黎行得最快嘅一段路，

以咁樣嘅進度，大約一兩點就可以行到Astorga，咁就可以避開下晝最熱嘅時段。



呢個時候雨開始愈落愈大，其實Hospital呢個鎮都幾靚，

但係今日嘅光線實在太差，所以影出黎嘅效果好普通，

加上落緊雨我又冇心情影相，都只係半停半行咁就穿過左個鎮。




成個鎮最有代表性嘅建築就係一條連接兩條村既橋，佢亦都係法國之路上比較容易認得嘅地標，

由於條橋都幾有戰略價值，十九世紀拿破崙入侵西班牙嘅時候，當地人仲自毀城牆橋樑，希望可以阻礙法國軍隊既推進。

我行過條橋嗰陣，見到有啲人喺度搭緊帳篷，仲擺左好多旗仔同道具喺下面，睇黎過幾日就會有大節日。

咁我就上網查到原來四日之後有個長矛節，到時候個個人都會着曬中世紀嘅服飾，而且係橋下面仲會有重頭戲：長矛比賽。參賽者會騎住馬衝向個公仔牌，然後用長矛吉向牌上面嘅圓心(好似係，其實我係唔太知佢點分勝負)，同好耐之前兩個騎士騎住馬對衝係有分別嘅，不過為左安全，我覺得依家咁都已經幾過癮。


睇返介紹，馬上長矛比賽大約係中世紀後期至文藝復興時期比較流行，

當時，1434，Hosiptal呢度有條友挑戰所有騎士，要過橋就要喺長矛比武中打低佢，

而咁啱嗰時亦都係camino嘅聖年，所以路上嘅交通同人流都好多。

最後由11/7到9/8呢個月，嗰條友一共打低左三百幾個挑戰者 (佢自己話嘅)，算叫做一夫當關，百夫莫敵。

而最諷刺嘅係，二十四年之後，呢條友喺一場長矛決鬥入面俾人殺左，而殺死佢嘅敵人就係1434當年佢其中一個手下敗將。

睇到呢度，我真係有啲心動，考慮要唔要四日之後坐巴士返黎呢度睇下個節日，感覺好值得黎咁，而且只係差幾日，睇唔到嘅話好似有啲可惜。

不過，返黎既話就要擔誤一日時間，所以呢啲都係之後再打算。

係橋上面，我仲見到個韓國肥妹，睇落似觀光客，但係諗真啲又覺得唔會有觀光客黎呢啲咁冷門嘅地方，但係話肥妹係朝聖者嘅話好似又格格不入。總之就點諗都唔通。




過左Hospital 之後我繼續揀山路行，但係因為噚晚就開始落雨落到依家，成條山路都變左泥濘，今次係我第一次後悔點解自己冇揀到車路。


一路上都係上山落山同淋雨，冇乜特別嘢發生過，有一對韓國老夫妻keep住同我前後腳，跟住又有一批十五六歲既青少年少女行過，好大聲咁用英文傾計。

可能係因為一開始行得太快，所以由 Hosiptal 去 Astorga呢段路我行到就快死，好似行屍走肉咁，淨係想快啲行到目的地。












行到最後四公里，山上面有個十字架，由山頂望落去可以見到Astorga全鎮，

嗰陣時雨啱啱停左，太陽開始出黎，可以好清楚咁望到城牆丶皇宮同大教堂好有層次咁分佈係山丘上面，

真係好靚，我認真覺得仲靚過Leon。






呢四公里似近實遠，最後仲有一個大上斜先可以去到庇護所。

不過，亦都係因為呢條大斜路，間庇護所就有非常好嘅風景，

由房入面望出窗外景觀好開揚，而佢嘅床丶浴室廁所丶廚房全部都係中上以上，所以我都幾鐘意呢間albergue。


(之前有巴打話係度俾 beg bug咬，所以唔好信曬我講。。。因為我對呢度係有特殊感情嘅～～ )

講返checkin嗰時，我已經冇停過咁行左七個半鐘，

就快想死既時候，

當我一推開庇護所大門，竟然又見到高恩同女神，而佢地咁啱就係排隊尾，所以我就跟隊排佢地後面。


問返確認左佢地又出cheat搭巴士過黎，所以今朝已經觀光完畢，行過曬成個小鎮。

分房嗰陣咁啱間六人房只係淨返四張床，但係仲有我地三個亞洲人同另外兩個鬼佬，嗰兩個鬼佬好似好唔想分開訓，仲問我地三個係咪一齊嘅，咁高恩就話"we're together" 啦。 嗰一刻我突然間好似得到少少認同感。雖然我真係白撞嘅。

放低個背囊之後我又去左廚房煮嘢食，俾我見返今日行緊嗰時不斷見到嘅韓國老夫妻。。。同埋韓國肥妹！

原來佢地係一家三口，爸爸媽媽就用寄背囊嘅方式行，而個女就做support，每日都會撘巴士先去目的地，買定餸煮埋飯係庇護所等爸爸媽媽行到。


我突然之間覺得肥妹全身發光，我仲話人地唔似朝聖者，其實佢都合資格做一個pilgrim，

可能係因為孝感動天，所以我對呢一家三口好感大增。

可惜嘅係今日之後我就冇再見過佢地，直到我去到Porto間albergue，我又去廚房煮飯嘅時候，竟然又俾我見到媽媽～～

嗰吓我地O嘴之餘，大家都好開心咁係到又跳又笑。

我諗行完法國之路嘅人都明，離開camino去到porto嗰種心情係幾低落，當你可以再一次遇到舊人，而且係以一種好意外嘅形式出現，嗰種喜悅喺由心而發。


我喺廚房煮意大利粉，一邊煮一邊等Josan黎。之後我地就約好一齊去睇 Chocolate Museum。








原來Astorgo出名既唔止大教堂同皇宮，仲有佢本土制造既朱古力，所以係市中心入面行亦都週街見到買朱古力嘅鋪頭。

而 Made in Astorga 嘅朱古力，出名程度係連身為西班牙人嘅 Josan都冇聽過，去到博物館嘅時候，Josan仲好驚訝咁話，疑？原來西班牙有出產朱古力架？


入場費盛惠3歐，個博物館真係好細，

臨走嘅時候門口有個試食櫃，但係有個女人會一直望住你食幾多塊，所以我同 Josan乖乖地每款試一塊就閃。

總括黎講，呢個博物館係一個伏，早知就直接攞3歐買朱古力食。




行返去市中心嘅時候，見到有間髮型屋，咁Josan就幫我問下單剪幾錢，順便幫我預約埋聽朝十點半剪頭髮。 事關我已經就快個半月冇剪過髮，熱到我自己都開始頂唔順，尤其係戴帽嗰時真係熱到喊。


仲有，冇錯，我係約左聽朝十點半剪，當髮型師話聽日先可以剪頭髮嗰一刻，我再決定要喺Astorga訓多晚。

其實呢個諗法一直都係我腦海，只不過我未有決心下決定。

但係我今日黎到Astorga發現呢度真係幾舒服，而且我都想有一個大轉變(指既係遇到既人)，所以就覺得係時候停低，

一來可以等姐姐追上黎，二來順便俾隻腳唞下。

我諗真係冇乜人會係Astorga留多日，我同Josan去左 bar飲杯farewell，雖然佢話佢可能會係 Ponferrada停多日等我同姐姐，但係明日事誰能料，離別永遠都係傷感嘅。

係大廣場我仲遇返Nick同好耐冇見既羅馬尼亞人， 佢地亦都坐喺度飲野唏噓一番。

好耐無見嘅人仲有Hontanas之後就無見過嘅韓國姐姐，我地兩個行路速度差唔多，頭兩個星期一直前後腳行，估唔到已經十日冇見過。 雖然同韓國姐姐一樣唔係好溝通到，但係大家都好開心可以再見返。

唉～無奈嘅係，聽日就要同所有人掰掰，因為我係唯一係度stay兩晚既人。



法國之路第二個高第作品，Bishop's Palace，但係我叫佢高第宮。








嗰晚 Josan帶左我去食西班牙版pizza hut，叫telepizza。大約七、八歐一個，我覺得味道都 okay，咁我地一人點左一個，互相交換半邊pizza黎食。嗰晚又落返雨，所以就係用 pizza同雨水結束呢一日。




本身我仲想同允貞講聲掰掰，但係佢間房啲人已經熄曬燈訓覺，所以我就算數，叫Josan幫我轉達呢個訊息。 (因為佢地訓同一間房)

講起 Hospital de Orbigo, 我淨係影咗條橋就過咗
之後路上遇到個西班牙嘅大叔, 問佢點解咁多鎮名咁奇怪, hospital 乜乜咁
大叔話以前決定起鎮名個時, 求其拎個度附近嘅地標黎當名
我第一時間諗起香港D小巴叫有落

講起肥婆...我見黎行嘅歐洲人好少肥....但美國/澳洲人就好多肥

嗰兩個鬼佬好似好唔想分開訓

原來路上都咁多高第作品, 完全無留意, 無去過睇
雖然我都唔識欣賞

因為以前太多pilgrim's hospital，搞到依家四圍都叫hospital

好多人都冇去睇高第啲屋，好似Josan就冇去(但係佢去左chocolate musuem )，我就因為多左日所以先去睇。

其實入場費都唔算太貴，4.5歐，比起巴塞Casa Mila 成廿幾歐，呢個算超值

巴塞個D仲要勁多人, 痴Q線

繼續

我識得有個丹麥仔都係路上剪左頭髮
行行下見到佢 心諗做咩髮型好似唔同左既