只係淨返40km就到 Santiago,已經行左31日,再行多兩日就會去到令人日思夜想嘅終點。
之前一直係到諗,去到終點到底會係點樣,依家唔駛再幻想,因為夢境好快就會成為現實。
嗰一刻嘅心情好矛盾,一方面好期待去到終點完成朝聖,另一方面又唔想咁快行完返去現實。
另一個矛盾位就係,我清楚明白Santiago 係法國之路嘅終點,行到之後我嘅camino就正式完左,但係我又知道之後仲有路要行,要繼續行去 Finisterre、Muxia甚至葡萄牙之路,到底真正嘅終喺邊度呢?
今日又變返三人行,一出黎天氣唔錯,有久違嘅藍天白雲。
一上路就已經好多朝聖者一齊行,其實黎到今時今日都預左會有咁多人,但係每次一咩起背囊要行嘅時候,都係唔習慣呢個轉變,依家我最懷念嘅係反而meseta高原嗰段日子,雖然孤毒啲,但係至少有自己嘅空間。
就好似去旅行咁,同唔夾嘅人一齊出去玩,真係仲慘過自己一條友。
Santiago 嘅住宿一般都好貴,而且要住平嘢嘅話就要一早 book定,所以噚晚我地就已經睇定住邊好。
呢次係行左咁多日以來第一次book定住宿,所以亦都篤定左我地聽日會行到 Santiago。
格過價之後就揀左Seminario Menor,係一間勁大有200幾張床嘅super alberge,當時都唔知道原來呢間嘢咁熱門,之後先發現住呢度係一個正確嘅選擇。
Josan就一次過book曬三個人嘅床位,不過,間庇護所分開多人房同單人房,多人14歐,單人17歐。
只不過係多3歐,正常都會揀單人房啦,但係最詭異嘅就係卜傾.com話只係淨返一間單人房,想 book多間都唔得。
最後Josan就book左1個單人,2個多人,大家除返三個人每人15歐,然後去到之後再猜包剪揼,贏左嘅就可以住單人房!
今日一路行,我地就一路傾呢件事,個個都話間單人房係自己嘅,你地兩個唔駛同我爭。尤其是係姐姐,好肯定咁話
the single room is mine,話自己包剪揼嬴硬。呢一刻又令我諗起O Cebreiro 嗰日發生既事,點解成日都有呢啲兩難情況發生架。
之後姐姐為左去廁所,佢行返轉到去間Bar順便飲嘢,我同Josan就繼續行。
米奇米妮,RIP,Josan仲送上鮮花
因為諗住等埋姐姐追上黎,所以我地行得好慢,行左幾公里之後仲見到有另外一間bar喺路邊,咁我地兩個都入左去坐下。
老闆個樣望落好惡,我點左杯coffee milk,佢整黎整去搞左好耐,最後竟然幫我拉左個花。
Josan去完廁所出黎,我影低左拉花張相俾佢睇,佢唔敢相信個樣好似黑社會老大嘅人,竟然會做啲咁溫柔既嘢。
我地飲野嗰陣見到姐姐好快咁行過,不過間bar喺馬路嘅另一邊,姐姐又帶左耳機聽住歌行,所以完全聽唔到我嗌佢,結果就調轉左係我同Josan係後面追佢。
之後呢段路好多人,好難爬頭人過人,Josan仲俾個大叔拉住吹水,咁我又聽唔明西班牙話所以就行先。
姐姐一條友行得勁快,十一點半就已經去到O Pedrouzo,我慢佢半個鐘,而Josan又再慢半個鐘,大家12點半嗰陣喺間 bar集合返。
去到O Pedrouzo 就已經進入最後20km,大約就好似由馬鞍山行去尖沙咀咁,感覺愈來愈sad。
我地係bar度一邊坐一邊諗要唔要繼續行:大部份朝聖者今晚都會住係 O Pedrouzo呢度,聽日行埋最後二十公里去 Santiago,
但係app嘅建議就係,最後一晚住得愈近Santiago就愈好,咁第二朝就可以避開下午嘅人潮,去office攞證書唔駛排隊之餘,亦都可以參加中午十二點既pilgrim mass。
再行嘅話就係行多14km去 Monte do Gozo,嗰度有一間有400個床位超巨型庇護所,所以就算我地幾遲行到去,都一定唔駛訓街。
最後我地決定繼續行去Monte do Gozo,因為今日天氣唔錯,依家行左 20km就停低好似太早。
出發之前我地去左食 pizza,hea下先再行。
好耐都未試過唔駛擔心床位曬,所以就享受下最後難得既悠閒,結果一食就食左兩粒鐘。
走嗰陣我地遇到Nick,佢已經check左 in,今晚住O Pedrouzo呢度,佢覺得兩點半仲要行14km係傻左,所以就See you in Santiago la。
(點知最後係Santiago都遇唔到
)
然後仲遇到高恩同允貞,佢地會行多8km去Labacolla,而女神就一早坐巴士去左嗰度。
呢個時候開始落雨,真係食嘢嗰時兩個鐘都冇雨,一開始行就落。雨愈落雨大,大到我都唔敢再㩒手機,怕整濕部電話。
行到中段仲要上斜,要繞過Santiago條機場跑道,上山嗰時又係爛泥路,加上大雨同大斜路,姐姐同 Josan都行得好慢。
我又好似O Cebreiro 嗰日咁做導隊,喺前面係咁講“almost there! almost there! ”,不過大家問仲有幾遠嗰時我都唔敢答,因為行極都仲有10km。
行行下我地追到前面三條友,其中一個係噚日識落嘅墨西哥大叔,佢同兩個英國姨姨一樣想行去 Monte do Gozo,但係行得仲慢過我地,所以我就話去到庇護所見。