《我的MK妹同桌》第二季（2）

「可以啊，又去影相啊？」已經唔係第一次，之前先去完個西九龍海濱長廊。

「係啊，想開學前去玩下。」呀詩佢知自己之後有排忙，所有想喺忙碌前，多啲享受下。

「啊⋯⋯我下個學期就住hall啦，你之後得唔得閒幫我手搬啲嘢啊？」呀詩突如其來一問。

「哇，你又想出去玩，但又要搬嘢啊？」我盡量排下我個更表。

「係咪唔得啊？」呀詩通常知自己唔夠我講就會打橫嚟講。

「得，實得嘅！」我笑住講，包容呀詩嘅任性，係我應該做嘅。

我哋兩個有來有往，如果淨係得我單方面嘅話，我諗我唔會咁包容，呢啲都係需要建基於平等嘅關係上。

我對住hall完全無乜概念，淨係聽聞過一啲好荒淫無度嘅事，仲有啲奇奇怪怪嘅事，所以我一開始都擔心呀詩。

當然唔會擔心佢純品，驚佢俾人呃啦，係驚佢玩過龍。

「你洗唔洗咁多嘢啊？」我係呀詩屋企幫佢執嘢，發覺佢間房大半嘅嘢都執清曬。

「你好似搬屋咁喎。」

「你都唔知我幾想搬離呢個屋企⋯⋯我恨不得清走曬啲嘢啊！」呀詩綁起個馬尾，呢個look好似好耐無見過，以前返學明明成日睇到，原來咁樣嘅佢好清純。

「係呢，你同你呀爸講咗未啊？」我關心地問道。

「問咗啦，佢淨係同我講咗個四字金句。」呀詩面無表情咁答我，佢哋兩個嘅關係可能就咁一世。

要咁樣對自己嘅仔女嘅話，點解當初要生佢落嚟？

「係咩啊？」我估唔到係邊四字金句。

「 理 撚 得 你 。 」

聽到呢度，我更加想俾多啲自由呀詩，等佢可以做自己想做嘅嘢，就算去玩咪去囉，只要唔好玩過火，踩到底線，一切都可以商量。

一路以嚟，佢都太痛苦。

我幫佢抬到樓下，樓下個姐姐都算通氣，見呢期大家都會搬嘢入嚟，就叫我哋快啲搬完就好走啦。

上到去之後，佢間房入面有人，我稍微有啲嚇親，始終都係女仔房，難免有啲尷尬。

個女仔一頭金色長髮，著住件寬身睡衣，係大到件衫已經斜咗落嚟，見到膊頭嗰隻，下半身係失蹤咗，露出白滑長腿，佢就咁盤坐喺張床度，低頭玩緊手機。

佢見我哋入嚟，就抬起頭望我哋，好好笑容咁對住我哋講咗聲「嗨！」

個女仔有對電死人嘅眼，係幾靚女，但感覺有陣妖氣。

我同呀詩都簡單咁回咗句嗨，就擺低啲嘢，因為真係又多又重⋯⋯

「洗唔洗幫手啊？」個女仔轉咗個姿勢，坐係床邊問我哋。

「唔洗啦，我哋兩個應該搞得掂。」呀詩有禮貌咁婉拒。

然後個女仔無出聲，微笑點下頭，無幾耐，佢又開口講：「你男朋友對你好好喎，肯過幫你拎嘢，仲幫你執埋嘢。」佢意味不明咁笑著說。

又多隻覬覦男豬嘅偷腥貓

上啦

好睇呀書生，留個正評加速

推

推

呀詩唔會請男豬上hall 嘅

「咁梗係啦。」呀詩佢捱埋嚟我度，撓曬手咁。

人大咗呢，見嘅場合多咗，就自然識得分辨啲人，好明顯眼前呢個女仔，係啲好有心機嘅人。

識得洞識人心，控制對方或者自己情緒，識得用說話去挑逗你、挑釁你，亦都知道咩係收放自如，知道自己去到咩位，講啲咩說話，可以為自己帶嚟咩後果同埋影響。

我未曾見過呀詩咁保護性，就連好似Gigi咁，其實呀詩都未當過佢係威脅，但呢個女仔唔係⋯⋯

仲要係第一次見面，可能呢啲就係女仔睇女仔嘅直覺？就如男仔一眼就睇得穿佢係咪一個狗公。

「佢真係好好㗎，呵？」佢望住我，其實係逼緊我答。

「係啊，係得你先咁覺得㗎咋。」我心諗，我唔想捲入啲女人嘅紛爭度。

唉，之後佢哋兩個相處一定收硬皮。

「好Sweet啊。」佢呢一句嘅語氣好明顯唔係真心咁讚，再問：「係呢，點稱呼你哋啊？」

自我介紹完之後，呢個女仔名叫呀May，Double May⋯⋯

佢見無乜話題，就繼續玩佢嘅手機。

我哋繼續執嘢，唔得閒理佢，太多嘢啦，雖然呀詩講話叫我唔洗執，佢自己嚟就得，但係我見佢咁多嘢，唔忍心要佢做咁多。

執得七七八八，呀詩就嗌肚痛，就去咗廁所。

得返我同嗰個女仔，尷尬嘅空氣令我都想去廁所。

佢趁得返我哋兩個嗰陣，坐埋嚟，我哋兩個就咁坐係床邊，唔講仲以為拍緊愛情動作片。

「你哋一齊咗幾耐啊？」呀May故作輕鬆咁問。

「都成三、四年啦。」

有出嚟返下part time，又係asso讀咗一個學期，睇人都係一種需要磨練嘅一種技巧嚟。

呀May成個人俾出嚟嘅感覺，就係其他人有嘅好嘢，佢都想得到手，佢係會想盡辦法點都要得到為止，甚至乎佢係享受呢種追求嗰陣嘅刺激。

呀May越貼越埋，我亦都越坐越過，就嚟坐到埋牆了。

「都好耐喎，佢有咩咁好啊？」佢有股好獨特嘅香味，係好似成熟女人會散發出嚟嘅嘢，帶點俗氣。

老實啊，男女都一樣會遇到引誘，無特定嘅條件。我唔係咩靚仔，又唔係高，又唔係型，好明顯佢唔係貪你啲咩，只不過係佢想破壞你哋之間嘅「好」。

「佢無咩唔好。」我講到好玄。

「姐係點姐？咁⋯咁我好啲，定佢好啲啊？」呀May用佢對勾魂眼望住我。

「如果你要挑剔一個人嘅話，你挑剔一世都挑剔唔完。」最後佢成功逼我去牆角，我未至於正氣到咩企起身，推開佢，然後正義凜然咁屌柒佢。

我覺得咁樣做實在太戇鳩，成個馬國明同埋郭晉安咁嘅feel。

佢將隻手放係我大脾度，輕輕咁掃到落膝頭哥度，我任由佢掂我，講真，我無蝕底。

「我唔會背叛呀詩，就算你點樣挑逗我都好，我個心都唔會動搖，你呢招對其他男仔係會有用嘅⋯⋯」

「我同你係第一次見咋喎，三唔識七你都對我做呢啲嘢，我唔知你係想試我定點，但至少我唔係你之前遇到嘅男仔咁。」

「我唔想講咁多廢話，更加唔想猜度你嘅用意，但係如果你係想咁樣嚟搞散我哋兩個嘅話，我諗你做多咗啦。」我好認真咁講，我唔需要俾面一個啱啱第一次見嘅人。

不過我擔心嘅係，呀詩同埋啲咁嘅人住姐。

「係咩？」呀May唔服氣咁講，好明顯佢條氣好撚唔順。

呀詩開門返咗嚟，我無驚惶失措，因為我行得正企得正。我企返起身，行去唔知點好嘅呀詩隔離，同佢講，我都要去一去廁所。

臨出去前，我擰轉頭望一望呀May，佢用色瞇瞇嘅眼神望住我放電，呢一幕好我覺得佢唔係做俾我睇，而係呀詩⋯⋯

痴線！！女人古惑起上嚟，真係好撚恐怖。

有文繼續推

我覺得呢個只係小風波，男豬處理得好好

呢啲嘢守到幾耐呀
好快會失守架

呢幾日都好難過....
完全無任何心情寫文，Sorry各位
但今晚會出文

題外話，今朝返工想落街買份蘋果都賣曬想幫朋友買份都無

我係廁所度洗咗個臉，俾自己冷靜啲，返去嗰陣，呀詩已經執好啲嘢，坐係度㩒緊手機。

佢間房靜到呢⋯⋯兩個都黑口黑面咁，呀詩面無表情咁講：「走啦。」

唉，仆街啦咁樣。

睇嚟我之後都無乜機會上嚟啦，如果我同呀詩真係想扑嘢，睇怕都要返佢屋企，或者嚟我度。

「唔好咁啦，對唔住啦，但⋯但我⋯⋯我頭先真係無做啲咩㗎！」我好認真咁澄清。

佢都係無講嘢。

我拖住佢，咩都講下，引下佢注意力啊，話同佢食好嘢啊，話嗰度有隻貓同隻狗係度扑嘢啊⋯⋯

佢都無理到我。

「唉，我無嬲你，但我真係唔想講嘢。」經過一番鬧騰後，佢都算睬下我。

「係咪因為頭先你返嚟到我同佢咁樣？」咁佢要嬲，係無可厚非嘅。

「唔係，如果你真係有心要搞啊，就唔會係我面前啦，仲要趁我去廁所？唔好傻啦，甚至乎你唔會俾我知添啦。」呀詩呢一番說話，我駁唔到。

佢咁清楚？？莫非⋯⋯

只要一個人唔想俾其他人知，真係可以一世都唔知。

又係信任嘅問題。

「咁係咩事啊？」我問道。

「我只係諗，點解我搬出嚟，都要遇著呢啲咁嘅人？」

「一係轉房囉，同埋只要我唔上去，就無事啦。」我天真咁講。

「你覺得佢嘅性格淨係會關兩性嘅事？」可能事情真係比我想像中嚴重。

「你住幾日，睇下情況點，再諗下轉唔轉囉，實有得轉嘅。」我都想幫到手。

「唉，再算啦，之後又要開學，好多嘢煩啊⋯⋯」呀詩俾咁多嘢煩住，見佢頭都大埋，但自己又咩都幫唔到手，只係得無助呢種感覺。

大人嘅世界，就係有咁多呢啲濕碎而又煩鳩嘅嘢入侵你嘅生活。

推推推

個may咁q賤嘅

識得睇女人好重要

識得趁後生多玩玩都好重要

黑雨都要返工，怒打文宣洩一下

開返學之後，我哋嘅生活又再踏入忙碌。

而且慢慢又去返以前中學嗰個階段，我哋嘅感情出現停頓。平淡而無特別，無咁多事可以刺激我哋踲神經，反而好多嘢令你個腦會爆炸咁制。

功課啦，part time，自己前途。我哋唔再好似以前中學咁，咩都以愛情行先，嗰陣嘅我，所有心思同心機都係呀詩度，直到出現冷淡期嗰段時間，其實都離唔開呀詩，只係嗰陣我無為呀詩諗過。

雖然過咗唔係好耐，我哋一齊返好似差唔多一年，未夠一年，但依家我哋有各自追求嘅嘢。

我覺得依家嘅我哋，先係最好嘅狀態。唔需要為彼此嘅愛情提心吊膽，可以全心全意咁去投入其他事，然後喺你攰嘅時候，有人喺你身邊陪住你，會係你嘅避風港。

以前以為男人先係女人嘅靠山、避風港。原來唔一定，原來係自己攰到乜咁，身上面嘅精神被揸乾嗰陣，你知道有人喺你身邊，唔會離開你，你可以放心咁去搵佢嗰陣，係可以令你成個人安定落嚟。

我去搵呀詩遠咗好多，始終佢唔再係我附近住，出嚟食個飯，佢就差唔多要返去做嘢。

不過呀詩多咗呻佢嘅roommate。

「我真係唔知有咩得罪佢，成日搞埋曬啲小動作，仲要扮曬蟹咁話唔好意思，大佬啊，你係咪真係以為我唔知係你整㗎？」呀詩抱怨著。

「點解有人可以咁仆街？」我一定企係呀詩嗰邊，而且我好相信呀詩嘅人品，因為佢一向以嚟，都好識分寸，相反我就唔係⋯⋯

「我真係唔知，我依家好驚佢唔知搞啲咩出嚟，我出嚟食個飯都要鎖住部電腦。」我聽佢咁講，真係有啲誇張。

呀詩呢排都憔悴咗好多，負能量都幾多下。

而我除咗聽佢呻，就係俾多啲能量佢，盡可能甜蜜一下，搭遠少少見上一面，都會做。

「唉，真係好攰。」呀詩放低對筷子，望住佢食得一半嘅米線，我忍唔住伸手過去撫摸佢個頭。

「食唔落啦。」佢無乜神色咁講，然後就埋咗單。

我送呀詩嗰陣，見佢頹到捱落嚟係feel到佢成個人好重，睇嚟佢真係好攰。

我哋搵咗個公園仔坐，坐公園嘅感受其實無電視劇啊、電影望落咁好受。

有蚊啦，焗熱會搞到你成個人痴笠笠。

但係呀詩一坐低，就已經成個人連埋個頭靠係我度，我估佢想係我身邊瞓下，於是我坐直少少個人，調整好個位置俾佢，等佢可以有個最好嘅瞓教位置。

佢嘅長髮時不時飄過嚟搞到有啲拮肉，Sorry我放錯重點，只係現實同你睇戲完咗之後嘅幻想，係有出入嘅。

可能係韓劇入面，男女主角坐係度互訴心事，著到厚一厚，畫面飄著雨，close up佢哋嘅靚樣，好浪漫。

至少現實生活唔會係咁，不過此時此刻，可以咁樣依靠住，令我安心落嚟，緊繃咗一排嘅話，睡意都好快就嚟。

推

呢幾日我都係度諗緊轉唔轉行好
本來呢一年係諗住搵啲出版社嘅工，一開始係想搵呢類工，但上年無奈真係搵唔到，就做住教育先。
前排蘋果有出post我都有應徵，依家變成點大家都知咩事⋯⋯
教育界已經好多老師走，主任級咁高人工都走，轉行嘅轉行，退休嘅退休。下年我都諗住讀返啲自己有興趣嘅課程，方便轉行，或者去其他地方都搵到食。
所以呢排無乜點出到文⋯⋯我知你哋會默默地留低個正評，真係好感激你哋我都會繼續出，聽日放假，我今晚都會出嘅。
但係呢段時間見到香港咁真係好灰⋯⋯自己亦都唔知點算好。

cheer up