加泰集會係我入紙既，等我簡單講下點解要搞

VL · 2019-10-22T01:14:45+08:00

自從早前有人臨急臨忙搞個無人去既加泰集會，就一直有人搵我幫手入紙搞一次正式既聲援加泰集會。本來我都係抱住幫到手就幫既態度，但係近來見到連登對於加泰議題既激烈辯論，我更加覺得有需要搞呢個集會。首先，集會既用途唔一定只係曬馬點人數，更重要既係引起公眾關注議題，同埋表明參與者既立場。連日既討論，發現其實大家雖然有注意到加泰既新聞，但對成件事既背景熟悉既人唔多。喺今次集會，我地會製作短片同埋邀請嘉賓發言，會係一個好好既機會比大家認識加泰議題。大家認識完先再辯論應該點幫加泰都未遲。呢個從來都係集會既一大用途。事實上，美國人權法議題，都唔係突然大家就明白，而係經過大大小小好多場遊行集會，引發討論，大家慢慢認識多啲，先變成而家大家都咁熟悉。所以單係提供一個平台比公眾了解加泰發生咩事，我覺得已經好值得。更何況香港一早被人同加泰連繫埋一齊，我地無理由咩都唔清唔楚。香港同加泰已經被相提並論，我地更加需要一個正式場合，清楚闡述港人立場。就算唔搞呢個集會，黎緊都一定越黎越多人喺唔同場合舉加泰獨立旗，亦會有越黎越多報導將兩地進行比較。呢樣嘢係無得逃避。與其俾外人無限詮釋，我地更加應該主動表明香港人就加泰事件既立場。我地既立場好簡單： 1. 呼籲西班牙政府和平處理加泰示威； 2. 譴責西班牙警察暴力對待示威者； 3. 沒有人應該單因政見而被判監。對於加泰是否獨立，我地唔會、亦唔應該有立場。因為呢個係加泰人既事，唔到外人插手。但我地香港人一定會堅持捍衛人權、自由等普世價值。如果你都認同呢啲價值，又同意我地需要清楚表明立場，咁今次聲援加泰集會，你就更加應該參加。 ============== 香港加泰人權自由集會日期：10月24日（星期四）時間：晚上七時至九時地點：遮打花園 *待發不反對通知書團結港加，自由無價！