保險問題 理性討論 佛系你問我答(6) 又到聖誕

理財係需要靠自己既
我一出圖或者公司名就好容易比有心人report
如果大家仲想見到我答下問題呢，就煩請自己用方法去領悟我講嘅野，理解下我係講緊邊間公司同邊個計劃，同埋點樣上網尋找多啦A夢，有緣份自然會搵到

如果我再俾人ban就真係再幫唔到大家，所以大家如果真係想見到我答下問題嘅就真係唔好叫我留聯絡方法或者好強求要我講清楚係邊間公司，你自己講完我再答你係定唔係會比較好。

要怪就怪呢個行業可能真係形象太差太容易report，再唔係就其他行家唔鍾意我講咁多，所以請各位原諒我點解冇上個post咁圖文並茂咁詳細解答，我只可以用文字加少少抽象去講，唔可以好似上次咁喂埋大家食

我自己好珍惜呢個戶口，承載住我五年呢個行業嘅成長，希望大家可以體諒我，如果支持我嘅可以俾個like我呢個post，你哋嘅支持我會睇到嘅

如果我再比ban就可能證明呢到容不下我呢個聲音，咁就大家到時自己搵方法去得返個答案，我都深信有心搵答案去學習嘅，自自然然都學得識，保險唔係難既野係睇有冇放心機上去，對大家有信心嘅。

最近小弟因為讀緊書嘅緣故，計數計到傻咗喺度， 經常上一陣水又冇上水， 首先講聲唔好意思先， 跟住到我想覆返嘅時候已經1001 想回覆返都唔得

最近都有個協助孤兒單跟進醫療嘅project 同埋優惠體檢做緊， 等處理好之後就可以幫助大家， 就算哪怕係買網上保險都好都可以有人協助去使用份保險， 因為人力問題我都係邊個搵我我就試行咗先嘅，之前有位巴打就搵我，我就試行咗體檢嗰部份。 好彩就係試咗先， 原來姑娘直接比咗份報告就走咗， 冇安排到醫生講解返份報告， 但正常係個價錢有包埋醫生講解的， 就係要咁樣先會知道原來有啲位係可以執得好啲， 最後都安排返醫療顧問打電話去講一次成份report， 好彩so far巴打都冇話體驗唔良好

大家如果有問題嘅都歡迎留低問題啦，有咩想問想講都可以傾，除咗人身攻擊既我見到就會覆嘅，但如果你見到我冇覆我唔係唔想覆你，係我忙緊啫
如果係想我回覆嘅就會引用我嘅內容，咁我先會睇到然後覆你，如果唔係就真係隨緣

同埋長氣都講多句，想我睇到就引用咁我先會睇到架

支持

想問下有無D 唔伏可以供斷既醫療保，因為睇保費單發覺年紀大保費越黎越貴，怕人老左收入無咁穩定或者怕失業會搞唔掂

應該無寫明係供斷嘅medical plan，班友都係sell你去買份儲蓄保，到時滾大舊錢就攞嚟比保費

問題係，你唔會知醫保加價可以去到幾多

2年都未賠，可以搵一線/東張喎

呢一間真係出晒名係咁

佢最過癮嘅地方又唔係佢唔賠，係玩程序拖好耐，簡單講就係將一條今年嘅數盡可能拖後先比，呢個地方係最仆街

你如果本身係亞洲區計劃嘅話，你可以keep到去當地買咗先，然後過咗當地新保險嘅等候期之後你先cut返，因為若果你本身都係比較難買嘅話，又或者突然之間有病歷嘅，咁都起碼都有個逃生門返去亞洲地區醫病

其實係冇的，係冇一個醫療保險可以供得斷的

要達成可以供斷需要符合兩個條件，第一個係本身醫保嘅價錢偏低或者係會維持不變好少加價，第二個係所謂嘅儲蓄計劃嘅增長係需要每年固定上升到同埋追到個醫保保費。

咁其實而家醫保都有加價的，除咗按照年紀上升呢個加價之外，每隔幾年你都會見到保費表係有調整到，咁呢個就已經係令到第一點係好難達成到，仲要未計第二點儲蓄計劃好多時俾人垢病嘅地方係佢呢類型月供計劃大部份回報都係非保證，就算做到非保證嘅情況下都係叫做勉強追到現時保費，都未計加價呢個情況落去。

最多係叫做幫輕下一部份，係冇可能做到完全供斷的，有嘅話你可以直接bye bye個agent/broker都得

實際上都係有啲可以供斷到嘅醫保，保險公司本身係有設計呢類型，不過個計劃係好廢唔係而家嗰啲有墊底費全包嗰隻，係屬於以前每個項目有限額嗰一隻，性價比真係完全唔高，係適合以前舊一輩嘅模式所以你見而家新嘅都冇再出過，而家好似冇得賣了，以前李澤楷同埋加拿大太陽係有的，我都有見過

而家嗰啲出面廣告講嘅就唔係呢一隻嘅，全部都係一個醫療計劃捆綁咗一個儲蓄計劃，用嗰個儲蓄計劃去做個供款，上面嗰一隻係直接個醫療計劃係可以俾你有得買斷嘅，如果唔係呢一隻嘅話都係不能供斷的

Thank you 巴打，好有心
咁即係已經唔洗諗將來注定要硬食貴保費

依家比較緊三間自願醫保，AXA 智尊守慧，FWD 尊衛你，同埋信諾靈活優越～想問下信諾做到保額大D 係純粹因為無agent cost ?
三間黎講，有無話邊間難claim D?其實最擔心係出院免找數方面唔知會唔會好難批～
同埋聽講大公司個pool大，所以對比起細公司，將來保費既升福會細D ?

如果你有睇到上面幾個嘅留言嘅話呢，咁實際上嘅選擇都係得兩間嘅啫

我自己父母係用李澤楷嘅，好老實，因為年紀大同埋少用嘅緣故，佢個無索償折扣對於我嘅幫助就比較大，同埋有咩事都係可以我去處理到，就變咗我唔需要驚要寄信或者paper form嘅問題。咁我自己就係用c記，我一來係鍾意佢無上限同埋佢有個最大嘅特色就係所有文件都係可以上網交，係所有，咁如果我都病到死死下，其實我都冇能力再特登去印份form去寫嘢再叫屋企人幫我處理，有得上去個網upload晒啲嘢就算同埋佢個portal都算簡單容易用，就算當我昏迷不醒屋企人都容易上網搞掂晒

至於佢保額大啲，呢個其實就唔關個成本問題嘅，主要係個定位同埋佢本身佢嘅Pool係點，呢間公司你覺得喺香港比較少見，但其實佢係美國一間大型嘅專注醫療保險嘅公司，佢同另外一間b記有啲類似，只不過咁啱佢哋都係做一般保險為主就冇涉獵人壽業務方面，變咗倚賴broker/上網或者電話直銷就算，就算當佢有請好多代理返嚟佢根本都冇產品去支撐呢班人嘅唔同業務發展

呢三間入面最輕鬆應該就係c記，李澤楷都係唔錯的，最後一間就都講到口臭，出院免找數其實個重點就係你本身個記錄如何，睇嘅病係屬於意外定係一啲長期病患，同埋最重要嘅一點係咪屬於early claim嘅時間一般就係講緊頭兩年嘅。呢三個Factor其實都好重要嘅，例如當兩個都係early claim嘅時間，一個係癌症，另外一個係落街俾車撞，一定係後者會快啲，因為冇疑點同埋係會有警方紀錄，前者就因為要查醫療記錄就要用好多時間，公立醫院為例就大概係六至八個星期先至拎到報告，呢啲位就會係搞耐咗

個pool大唔係講緊間公司大定細，係講緊佢多唔多人參加佢個計劃然後收集返嚟嘅金額係大定係細，呢個先係判斷pool大定係細。所以其實你都見到基本上個Pool夠大同健康嘅，就係多後生仔買同埋個plan你成日見到個名，因為數據上嚟講後生仔就少啲機會用得着同埋成日見到就即係多人買，咁呢班人就會幫手分擔多啲個風險令到個鋪檔用得着嘅人比較多都可以分擔開去，你用呢個去做個判斷Factor就可以

其實一份醫療保 點介定claim唔claim到

我個agent話
就咁自己去睇私家診所就claim唔到 話要有refer先得
但點解佢幫我安排去照腸胃鏡 都係直接去外科診所

物理治療claim意外保 佢就直接安排我去睇骨科診所 又claim到

正常大路主流 都係要收正本的
最多都係俾你email咗過去處理住先，之後都係要收返個正本，有啲直接係話冇正本係唔處理住

所以呢個就係點解我會揀一間直接所有嘢全部都係電子嘅，屋企人反而用返呢啲

呢個最主要係有兩樣嘢嘅

第一個，佢主要係驚你背後冇一個醫療需要嘅原因去做檢查，咁用佢介紹嘅醫生就多啲機會醫生問得比較詳細會知道你有邊個醫療原因需要去做檢查或者入院，呢個亦都係醫療保險背後需要嘅主要索償原因。如果係冇醫療需要原因做檢查嘅話係會有問題的，會比保險公司Challenge，不過都要小心佢介紹嘅醫生嘅類別係咩，例如做一啲美容相關嘅如果集團名稱係有醫美字眼或者價錢比出面高好多，索償就算係有醫療原因都好都會係有機會俾人challenge的

另外第二個問題，因為意外保險就好簡單嘅，睇完再一次普通科/專科之後做轉介，物理治療打後嗰啲都係就咁交張單就OK，嗰份索償報告就普通科/專科寫就OK。

積極考慮緊c記，因為有85折定7折，但係聽講會claim唔到其實係咩事

所以我信唔過富衞，有agent試過fake我，好彩早發現以後買保險一定要錄音，有得隱蔽錄影都會做

太好了，之前打算搵你但上個THREAD CLOSE咗。

呢排喺度睇緊啲醫療保，
腦裡面諗緊好多嘢：

我睇FWD 果間嘅無墊底費嘅醫療保
一萬蚊一年左右（無墊底，普通房，無煙）
但近排聽啲人講，買份有墊底嘅，平啲，
但用另一份醫療去CLAIM啲墊底費，
詳情係點RUN嘅呢？
如果保險公司設計出一份醫療保，無墊底費，要一萬。
點會又比到啲客去諗，買同一份但有墊底，再用另一份保險COVER墊底費。我斷估保險公司唔會有呢類漏洞，
咁但係實際分別又喺邊呢？

同上，一萬蚊一年嘅保費，我喺度返緊工，
可能一萬蚊未必係好大嘅支出，
但去到退休，無收入了，到果個年紀嘅保費可能倍升咗，
巴打，你見一般人，係會供到退休就斷供？
定還是點都供落去呢？

如果個客，少少病癥就去私家CHECK清CHECK楚，
三年唔埋去兩次醫院嚟排除自己唔係生癌嘅，
保險咪多得呢啲客唔少？

謝謝：）