【正廢柴】想溝到女千祈唔好學我咁

「咁又唔好，我都想知道自己係咪真係放得低啲所謂…『包袱』。」

「咩啊！當我實驗品啊！你去搵第二個試！」佢企起身，拍一拍褲後嘅沙輕佻咁講。

「好啦，咁我返去睇吓邊個肯。」

「壞人！打完齋唔要和尚！」然後佢轉身就走。

「喂！」我叫停佢。

「嗯？」

「多謝你。我會嘗試吓接納多啲大家。」

佢冇講嘢，只係微微笑咁回應。

其實當日嘅日落係點，我都已經唔記得。對我嚟講，比起夕陽更美麗嘅事物已經喺我眼前出現。

喺我哋行返燒烤場果陣，聽到沙灘傳出好大嘅嘈交聲，原來又係嘉慧同阿雄。佢哋分開咗兩組打比賽，阿柔同阿星默契好好，傳波、剎波，打得行雲流水。相反，阿雄同嘉慧打到好似綁手綁腳咁，好幾次阿雄仲俾嘉慧嘅傳球打中個頭。

「佢哋成日都好似撈亂骨頭咁嘅？」阿南笑住咁問。

「可能唔夾都係一種夾。」我答。

「哧！」呢個笑容，不經不覺間，成為我腦海中好深刻嘅記憶。

返到燒烤場，離遠望見子晴輕挨住洛賓膊頭，睇嚟得米嘅機會好高。

「乜佢哋...？」阿南暗地裡問我。

「嗯，洛賓鐘意子晴。」

「吓！佢哋唔可以...」阿南欲言又止。

「咩？」

然後阿南就同我講咗個秘密，而令呢段本以為即將米已成坎嘅關係添上變數。

「搞錯啊，原來你果日係特登駛開我㗎？」喺洛賓準備揭曉之前，阿南對住我講。聽佢嘅語氣只係講笑咁，但莫名地又感到一陣責怪。唔通佢怪緊，我唔係真心約佢去睇日落？又或者，佢覺得我肯同佢講咁多嘢，只係為咗拖住佢嘅時間？

定其實只係我諗多咗，佢真係單純地講笑？

「我奉命行事㗎咋。」我扮作無辜咁答。

「死啦你，早知唔同你傾咁多嘢，等你悶死！」

「傾咩傾咩？係喎果日之後，阿正突然變得好開朗，唔通你哋果日都...」阿柔突然八掛記者上身。

「唔話你知！」阿南答。

「Hello，Excuse me，可唔可以聚焦返呢到？投票啦大家。」

我哋全部人好一致咁估中咗黑色，大家都覺得洛賓冇咁大膽。

「搞錯啊你哋！又係我輸！」打開牌之後，果然係黑色牌，連輸三Round嘅佢已經連續飲咗三杯酒。

「下個...哈哈，車震星到你講秘密啦！你一定輸啊我話你知！」感覺上，佢都開始有啲微醉，開始有啲胡言亂語。

「喂，星！到你啦！」阿柔嗌佢，但佢好似有啲心不在焉咁。

「喔...其實...其實...」

「其實咩姐？快啲啦。」洛賓催促。

「其實…當年係我叫子晴唔好同洛賓一齊。」阿星突然之間講，呢個秘密一直只有我同佢知，估唔到佢會突然間自爆。

「咩話？」洛賓突然神色變得凝重。

突然間，大家你眼望我眼，大家都唔知道應該講咩好。

「嗯...投票先啦。」見氣氛有啲死寂，阿柔打破沉默。

「3紅3黑...咁點？」知道真相，投咗紅色嘅我問。

「咁睇吓隻牌係咩色啦。」投咗黑色嘅洛賓，望住阿星答。

「紅色...」阿星緩緩打開牌，大家嘅目光旋即投向洛賓。

「哈！又係我輸，玩嘢咩。」佢自動自覺拎起酒杯，將杯中酒一飲而盡。

「你聽我講先啦。」阿星講。

「想講咩姐你？」洛賓突然有些少發難。

當日完咗燒烤之後，洛賓打算再約子晴出街，然後就順便表白。

「會唔會太快啊？」聽到佢計劃之後，阿雄問。

「仲快？膊頭都肯挨即係有機啦！」同樣陷入愛情漩渦嘅阿星講。當年未見得太多江湖險惡嘅我哋，愛情觀，就係咁幼稚。

「一陣俾人搶咗咁點啊？阿正可？」洛賓叒拉埋我落水。

「欸...好似都太快。」

「你問佢嘥氣啦，佢實唔鼓勵你表白。」阿星答。

「唔係呢...可能你哋未了解清楚大家呢。」今次變成係我欲言又止，我終於明白阿南點解會咁吞吐，原來有啲嘢真係會好難以啟齒。

果啲老套嘅電視劇總會喺呢啲時間俾主角意外撞破一啲嘢，而破壞咗原本計劃嘅嘢。我哋好多時都會諗：「有冇咁橋啊？」

原來有啲嘢，就係咁巧合，但現實唔係電視劇，唔會有安排好嘅劇情，係要喺呢個時間點所出現嘅嘢，可能就係上天嘅啟示，企圖令我哋懸崖勒馬。

「喂阿星！」放學果陣，我同阿星一齊返屋企。咁啱撞倒符文安同佢另一個朋友，但驟眼睇，佢朋友似跟班多啲。

阿星同符文安，都係學校籃球校隊嘅成員，雖然未去到關係好好，但我記憶中都冇乜過節。可能因為阿星份人比較單細胞，冇咩事都唔會冇啦啦敵視一個人。而呢個萬人迷，有身高，有家底，有外貌，仲有識打籃球呢個迷女嘅必殺技，仿佛唔亂搞男女關係會糟蹋咗上天賦予佢咁好嘅條件。

佢呢種人生勝利組，永遠都唔會明白，得到一樣嘢會有幾難，失去一樣嘢，會有幾大傷害。

「喔，阿安、阿智。」阿星打招呼。

「返屋企？」符文安問。

「係啊，唔洗練波就早啲返屋企。」

「咁又係，早兩日先比賽完。」

「嘩講起早兩日場比賽安哥就勁咯，射入全場最高三十分。」擦鞋仔開始發功，不斷奉承老闆。

「基本啦，對手廢姐，阿星你都唔差，有兩球都係你助攻我。」聾嘅都聽得出喺到話緊阿星技不如佢，呢一刻先發現，原來唔係偶遇，根本係有目的嘅相遇。

今晚出咗街食飯 所以打少咗文
未瞓嘅睇住先

樓豬晚安

《無啦啦有隻女鬼跟住我》個結局係點？

中學寫嘅拙作都記得

早晨

「邊夠安哥勁，安哥一出手就溝曬啲女啦！早排同子晴玩完，果日比賽又抄到個低Form牌。」阿星未回應，擦鞋仔已經搶先答。

「子晴？關子晴？」阿星錯愕咁問。

「咪就係囉，個八婆係都要玩地下情，冇癮，咪飛咗佢囉。聽講你哋個friend溝緊佢喎，洗唔洗過佢兩招啊？」兜咗咁耐圈，終於入正題。

「賓仔踢波又做後備，溝女都要做後備嘅？」擦鞋仔好輕佻咁講。

「唔洗喇唔該。」見到阿星握實拳頭，眼裡好似充斥一份怒火，我即刻拉走佢，事關佢一發火就非同小可。

「做乜要拉我走啊！唔俾我打個賤人！」等我哋嘅視線再見唔到符文安同擦鞋仔，阿星先忍唔住問。

「人哋擺明過嚟挑釁你啦，你嬲咪中佢計。」

喺佢嘅字典裡面，「義」字就係放喺第一頁，佢唔會容忍任何人侮辱我哋幾個。小學果陣，有個高我哋成個頭嘅大舊衰，因為恰弱小纖纖嘅阿雄，搶咗佢啲嘢食仲叫佢「乸型」，佢即刻帶埋我哋去同人理論，結果細膽嘅我哋只敢縮喺佢後面，當佢聽到大舊衰再笑埋我冇老母果陣，佢用佢初學嘅柔道「懲治」咗大舊衰一餐。

結果佢當然俾人記小過，但換來大舊衰以後見到我哋都淨係敢耷低頭行過。

「記小過咋？我以為冇咗忽肉添。」當日佢好瀟灑咁拋低咗呢句說話，但我哋知佢返到屋企俾佢阿媽打到飛起，佢手臂嘅瘀痕已經出賣咗佢。所以雖然佢衝動冇腦，但我哋依然當佢大佬咁。

「挑釁我咪郁佢囉！」

「你夠膽打佢你估淨係記小過咩，踢出校都有份。」雖然我都好嬲，但暴力解決唔到問題㗎嘛，況且阿星而家咁大份，柔道仲要大有進步，打死人都似。

「邊有話打佢姐，我打個擦鞋仔之嘛。」

「你估有錢仔唔保佢咩，咪一樣。」

「佢咁樣侮辱洛賓就唔得！個關子晴…睇佢斯斯文文，原來係多情種嚟！」

「或者人哋有苦衷呢..」我衝口而出講。

趁搭車打多少少

等咗你五年喇
要叫個孫燒畀我

即係子晴係臭雞嚟？

幾好睇 有青春既感覺 希望唔好爛尾

果陣咩都唔識亂寫一通寫爛咗 估唔到你仲記得

過埋今晚睇你點睇

多謝你盡力寫到唔會爛

Live 樓主個手法幾好雖然一時口語一時書面語但咁樣先係青春 有種好懵懂嘅感覺

留名

自從有巴打講過呢樣我已經盡量用口語
但唔知點解覺得有啲Terms都係用成語或者書面語會傳神啲
希望唔會影響倒閱讀體驗

感謝

咁今次係唔係會寫完?