【正廢柴】想溝到女千祈唔好學我咁

「好啦，大家都知我新嚟咩都唔識，所以我哋好需要有能力嘅班長，去幫助我解決一啲班中嘅要務。」班主任Miss Lam係今年新嚟嘅年輕老師，所以完成咗一啲開學嘅瑣碎事之後，就先選咗班上唔同嘅職位。

「女班長緊係阿南啦！一個阿南頂全家啊！」一把豪壯嘅聲音響起，但又冇男性聲線嘅低沉，唔留意嘅話仲以為係邊個男同學仲未變聲。


「嗤，佢把聲成隻老牛咁。」阿雄忍唔住笑咗出嚟。


「你笑咩啊莊偉雄！你把女人聲又好好聽啊？」原來講嘢嘅人係嘉慧，聽到阿雄咁笑佢即刻起曬槓咁大罵阿雄。


「好啦好啦，唔好鬧交！邊個係阿南啊？」Miss Lam見倒咁即刻打圓場。


「我係！」阿南好興奮咁舉起手，笑容滿面咁認頭。估唔到，因為揀嘅科差唔多，我同佢又有機會同班。但佢而家已經唔同當初寂寂無名嘅新同學，佢臉上嘅果份自信，已經同中一入學果時完全唔一樣。


「睇你嘅樣都肯做班長㗎啦。」Miss Lam講。


「緊係冇問題！」阿南好爽快咁講。


「咁男班長呢？」


結果冇人舉手，我特登縮埋一舊，希望Miss Lam隨便點嘅時候都唔會點中我。


「Miss Lam！」突然，有三個人舉手，Miss Lam眼神即刻充滿希望。

早安大家輕輕推一個

多謝你 我會努力

「搵阿正啦！佢好幫得手！」當我回過神，先發現，原來舉手果三個，就係阿雄佢哋幾個。


「喂！」我大叫咗一聲，希望阻止，但可惜，已經為時已晚。


我再一次俾佢哋出賣咗，而且班長仲要兼任埋班會主副主席，負責統籌班會職務。


「麻煩曬阿正同學、阿南同學。而家係小息，咁交俾你哋第一個要務，就係幫我落校務處拎啲校簿上嚟先！」


我行出班房，回頭一望阿雄幾個，佢哋笑得好奸，仲奸過中一開學時候。


「喂，壞人！」行路途中，阿南打破沉默，主動向我示好。


「嗯？」


「估唔到我哋又有機會同班，多多指教！」


「多多指教。」我求其答，只係想快啲攞完簿，快啲返課室。


「新嚟嘅Miss Lam好似幾好人啊可？」


「唔知呢，第一日想留好印象掛。」


「我就話唔係，真摰嘅笑容係呃唔倒人。」


「你嘅笑容已經呃唔少人啦。」當然我冇講出嚟，只係心入面諗。

同佢共處嘅每一秒都好難熬，果種尷尬嘅氣氛真係差啲令我窒息。

所以一返到課室，我即刻同幾個始作俑者算帳。

「係咪玩嘢！」我箍住阿雄條頸問。

「唔係啦，你諗吓，做班長幾好啊，又有特權，講句說話都大聲啲啊。」阿星講。

「你哋有特權，你哋講嘢大聲啲咋啩！」

「抖...抖唔到氣！」我越講越激動，將阿雄嘅頸勒得越嚟越緊。

「咳…咳…你睇果個鄭嘉慧，咬死人咁款，唔係咁樣實俾佢恰死啦！」阿雄講。

「咁你應該搵阿星做，佢咁大隻。」

「就係驚佢會打死人，你懷柔得嚟又不畏強權，啱曬啦。」洛賓搭嘴。

其實佢哋再點說服我都冇用，呢個已經係改變唔倒嘅結果。

原本諗住，就算做倒班長都冇乜所謂，只要咩都唔理，Hea 下 Hea 下就可以過咗呢年去。但過咗冇耐，已經有第一件麻煩事發生，都不特止，仲要係職權以外嘅事。

有一日放學，Miss Lam突然要我同阿南留低。

「歐陽南、李卓正，老師剛剛先入學校，最熟嘅就係你哋班嘅同學，我諗只可以搵你兩個幫手。」

「冇問題啊！老師叫得都唔會係犯法事。」未聽係咩事，阿南已經答應。

「多謝你歐陽南！」Miss Lam即刻流出好感激嘅神情。

「咁嘅，我係以前手球代表隊嘅成員，學校要我哋每個老師都負責一樣課外活動。所以我諗住搞手球興趣班，發展得好嘅話就可以組一隊校隊。學校批准咗我呢個建議，但要我自己去搵球員，如果喺星期五課外活動申請完之前搵唔齊球員，就唔可以搞球隊。以我喺學校咁新嘅資歷，呢個難度好大，所以一定要你哋幫手。」

「下，今日星期三啦喎。」我答。

「包喺我哋身上！」但阿南聽完之後，諗都冇諗就幫我應承埋。

「搞錯啊你，唔問過我就幫我應承埋。」等我哋離開之後，我責任佢。

「難得Miss Lam求我哋，我哋都好應該幫手姐。」

「你幫得啦，你喺學校咁受歡迎。實大把人肯加入啦。」

「咁...即係你唔幫啊？」佢有啲失望咁問。

「唔幫，班會以外嘅事我唔干涉。」我答，之後我轉身就走。

「壞人！」喺轉角之際，我聽到佢嘅大叫。

第二日，一返到學校，就見到阿南好落力咁喺走廊招募人入球隊。

「嘩咦，負心漢返嚟囉。」一行入課室，就受到阿星嘲諷。

「咩啊！」

「你唔幫手招募球員嘛，阿柔講咗我聽啦。」

「嗯~估唔到你咁絕情。」阿雄都加入嘲諷。

「嗯你個頭。」我回應。

「慌死佢唔係怕同歐陽南共事咩，無膽鬼！」洛賓笑得最大聲。

「我已經做咗班長仲想點。」

「暴殄天物啊，正哥枉你飽讀詩書，誰料係個卑鄙小人，一啲都唔識得憐花惜玉。」阿星一輪嘴講咗好多成語出嚟。

「暴殄天物好似唔係咁用啊？」我問。

「有得同學校女神共事你都唔珍惜，仲唔暴殄天物？」

「你唔去幫？俾埋個班長你做啊！」

「噓，我籃球隊㗎嘛，況且又唔係阿柔要幫手。」

「我足球隊㗎嘛！」我望住洛賓，佢答。

「我...我乒乓球隊㗎嘛...」見我將眼神再瞟，阿雄都即刻答。

自推一個

我冇理到佢哋就坐咗返埋位。我嘅位置咁啱可以望到走廊，見阿南不斷奔波，似乎佢嘅知名度對招募冇咩幫助，大家仲因為佢嘅善良而輕易婉拒。去到小息、放午飯，佢都好落力咁招募，但睇佢嘅神情，招募情況依然唔太理想。平日所謂嘅受歡迎，都係一種無需付出嘅追捧。

「唉，我哋唔同賤男食飯嘅喎。」而阿星佢哋，亦都不斷俾說話我聽。

點解佢會為咗老師嘅要求，而不計回報，拼盡全力咁付出？即使招募失敗，佢唔會有任何損失，最多都係Miss Lam少咗一樣課外活動，學校少咗一個未知能唔能夠奪魁嘅機會。

「噻…噻…」上到最後一堂，我忍唔住瞓咗覺，估唔到一瞓，就瞓到就嚟天黑，課室亦早已經一個人都冇，只有一把𢱢鼻涕嘅聲音嘈醒咗我，唔係，聽真啲好似係嗚咽聲。

我抬頭望一望，有個女仔扒咗喺檯到啜泣，果個座位，係阿南嘅座位。

「喂，做咩喊。」我行過去問佢。

「唔關你事…你個壞人。」其實唔洗佢講，都知道係為咗咩而喊。

「今日收咗幾多個啊？」

「唔洗你假惺惺！」佢繼續喊，喊到我突然為咗我嘅絕情而有啲內疚。

「聽日就截止啦，但今日只係搵到三個人。今次一定冇機會啦！」之後佢又突然間回答我問題，然後喊得仲大聲。

「殊！！你唔好喊住先啦，一陣啲人以為我整喊你。」

「唔係你咩！我企到腳都軟你都若無其事！」

「你咁努力搵做咩？Miss Lam都話咗搵唔到都唔緊要。」

「應承咗人就要做到，我唔想Miss Lam唔開心。」

呢個白痴，為咗個只係嚟咗一個禮拜多啲嘅老師咁仆心仆命。

「得啦得啦，我聽日幫你一齊搵啦！實搵得齊嘅！」唔怪得林黛玉流吓眼淚就搞到賈寶玉頭都大，眼淚真係女人最大嘅武器。

「得返一日點搵啊？」

打文中 今晚會再出

「懷著樂觀總有轉機啊嘛，我自有方法。」我強顏歡笑咁講，雖然由我講出嚟好冇說服力，但要止住佢啲眼淚，用返佢偶像嘅歌似乎係最有效嘅方法。

「你…唔係唔聽陳奕迅㗎咩？噻…」

「你講到咁好聽，咪聽下囉。」

「衰人、壞人、仆街！」冇啦啦比佢鬧咗一餐，但能夠令佢唔再喊，都算。

第二日，我一早就返咗學校，等果三個禽獸返嚟。出賣我咁多次，係時候喺佢哋身上攞返啲甜頭。

「哼…」當佢哋三個返到嚟，見我攞住我哋暑假貪玩買果枝電流筆，即刻臉都青埋。

「咩…咩事又拎返枝筆出嚟玩？」阿雄一邊假笑，一邊臉青青咁問。

「玩唔玩，就睇你哋啦。」我不懷好意咁講。

說時遲那時快，我地企咗喺學校嘅籃球場，亦有好多圍觀嘅同學。

「得唔得㗎…」喺籃球場上，阿南好擔心咁問我。

喺我嘅威逼之下，阿星喺籃球場上設下咗擂台，除咗佢籃球隊嘅成員之外，任何人都可以同佢1on1，先取兩分者勝。勝者得$100，輸者就要答應阿星一個要求。

雖然要求都只係加入手球隊，但一早就講定仲邊會有人嚟挑戰？

「唔好嘥你啲錢啦，我哋俾心機去搵人好過啦。」佢仍然好唔放心咁講。

「冇問題喎。」

好快，已經有一個挑戰者出現，係一個面無表情，眼神卻充滿俠氣嘅男仔。

「報上名來。」阿星毫無怯色。

「3B班，胡一刀。」

「遼東大俠胡一刀？」阿星詫異咁講。

「我開波先？」胡一刀問。

「隨便。」

「Check波。」胡一刀將波拋俾阿星，阿星立刻回傳俾佢。

頃刻，胡一刀將籃球擲向籃板，再繞過阿星衝向籃底接應，最後以一個反手走籃作結，成個過程乾脆俐落，速度之快，令阿星一時間都跟唔上。

「有趣。」受到壓力，阿星眼神即刻變得認真。

到阿星開波，佢將成個人重心調低，身體向左傾後，以一個假動作呃過胡一刀，再立刻轉向右邊切入禁區，點知胡一刀仍然緊貼，令阿星一時間亦冇辦法起手。一個失神，手上籃球更被胡一刀拍出三分區。胡一刀搶返主動權後，直接衝入禁區，打算突破阿星因失誤而產生嘅空檔。


但阿星見識胡一刀本領後，亦唔敢怠慢，迅速調節返節奏之後，已經追得上胡一刀嘅速度。誰不知胡一刀突然將腳步向後縮，一個後徹步射球，球徐徐入網。


二比零，設下擂台嘅第一場，阿星已經落敗。從胡一刀純熟嘅技巧，獵豹般嘅速度，阿星驚訝咁嘅高手竟然冇加入籃球隊。

不過，落敗嘅佢，反而露出狡黠笑容。

「利害，好高興認識你。」阿星向佢握手，眼神中都感受到佢嘅意猶未盡。

「一百蚊呢？」

「一百蚊喺到，借問刀兄有冇興趣加入我哋手球班？」我遞上一百蚊，順便問。

「手球班？」

「見刀兄你，行動敏捷，出手果斷，確實係我哋手球班需要嘅人才，雖然暫時只係興趣班，但有刀兄你加入，變成校隊亦指日可待。」其實我都唔知手球隊需要咩人，但做得運動都係需要咁上下嘅運動奇才啦。

「咪住！」阿星叫停。

「點解你唔入我哋籃球隊呢？」呢個時候佢竟然殺出嚟阻止？！

「有符文安嘅地方，我唔會去。」符文安係我哋學校籃球隊嘅射手，亦係人氣高企嘅萬人迷。​​​​​​​

「咁得啦，我哋呢到冇符文安，我亦對佢冇好感。」我答。


「好，同仇敵愾，近排又冇嘢做。我應承你。」佢好爽快咁答應。


「多謝你啊！報名表！」一聽到有人參加，阿南即刻遞上表格。


「姑娘客氣。」呢個人…真係以為自己係武俠小說嘅人物。


胡一刀走後，立即有好多人都想挑戰阿星，奪得嗰一百蚊。


「計劃成功。」我偷笑。


「咩計劃？」阿南問。


「以阿星嘅實力，絕對可以同頭先嘅武俠男主角打個平手。我哋之前訂下嘅策略，只要遇到一個勁嘅對手，佢就會擴大對手發揮空間，從而令我哋搵到一啲有潛質嘅球員加強說服，增加球隊實力。順便亦可以俾接下來嘅對手一個錯覺，誤以為阿星實力唔太高，從而加入挑戰。呢招叫做『遇強即屈』。」

「咁如果冇一個好似胡一刀咁嘅人出現咪…」

「咪嚇走曬啲人囉。」

今晚係咁多
Happy weekend

早晨啊大家

「原來係咁…」阿南似懂非懂咁答。


認真起上嚟嘅阿星，好少人會打得過。


接下來嘅時間，有唔同嘅同學發出挑戰，但都係一一敗陣。好多人都遵守承諾，加入手球班，當中亦唔少運動神經發達嘅同學。

「明明有啲好啱打籃球，真係唔抵啊！」阿星唔忿氣咁講。


「你哋好犀利！一個午休就搵到咁多人，好過我企足成日都係得一個吉。可惜…仲係差五個人先夠數，喺放學前搵到根本冇可能…」阿南失望咁講。


「嗄！嗄！」突然阿雄氣都喘曬咁跑過嚟，身後仲跟隨咗幾個同學。


「咁遲㗎！」阿星講。


「我唔記得咗講校隊冇得參加，結果佢哋都嚟湊熱鬧⋯」


喺阿星力戰咁多挑戰者之時，阿雄喺另一邊嘅乒乓波檯亦做緊同一樣嘅招募。係因為未知阿星嘅行動可唔可以奏效，而結果亦真係湊唔夠數。


「你輸嘅錢我唔負責㗎。」我答。


「咁又冇輸錢，但就嘥咗啲時間，搵得四個咋。」

喺呢幾秒鐘，我望住阿南嘅表情由好有希望，又再變返失望，唔知點解，果刻有種好唔想令佢因為交唔到差而自責嘅感覺。


又或者亦係出於一份唔忿氣，唔服已經有雙重保障嘅策略都仍然失敗。


「幫佢哋填埋表格，淨低一張我會攪得掂。」然後我就跑走咗，去搵最後一個關鍵人物。


「喂！醒啊！幫我填咗去！」我返到課室，叫醒正喺到沉睡嘅洛賓。


「填咩啊...」佢睡眼惺忪咁問。


「課外活動表！手球班！快！」


「傻咗啊，我足球隊㗎嘛，玩咩手球？」

「頂，你後備嚟咋嘛，都冇得出場㗎啦。」


「咩冇啊...正選傷咗，正選...個後備傷埋就到我㗎啦！」


「你鐘唔鐘意踢波先？」我問。


「鐘...唔...鐘意啦緊係！」


「講大話啦，你叫洛賓姐，唔洗真係學果個球王洛賓。你練波果陣根本唔開心。」我有時放學見到佢跟住足球隊練波，但其實只係執下波、戥下腳，臉上一啲快樂嘅表情都冇。


「唔係啊，我好...」


「砰！」我將三百蚊放喺檯。


「三百蚊，買起你個足球夢。」


佢諗咗一諗，然後...


「多謝老細！多謝老細。」係，我只係為交差，先強迫佢轉去手球班。但如果三百蚊可以令佢放棄踢足球，就證明足球喺佢心目中根本唔算太重要。可能曾經係幾重要，只不過當連出場嘅機會都冇，幾大嘅熱情之火都只會慢慢熄滅。

咁有小姓奴早期啲風格

睇緊嘅say個Hi

Hi