【正廢柴】想溝到女千祈唔好學我咁

係咩風格

你好

星期日嘅自推一個

Push

我唔想我嘅朋友浪費時間喺錯嘅地方。


「喇，最後一張。」阿南返嚟之後，我將洛賓填好嘅表格交到佢手上。


「洛賓...點解嘅？」


「因為阿正佢...啊！」知道洛賓想講俾我用三百蚊收買咗，我即刻暗地用電流筆電一電佢，阻止佢講出真相。


「佢突然話唔想踢波。」我答。


「喔...多謝你啊洛賓！」


「唔...唔洗客氣。」電流嘅餘震令佢變得口齒不清。


「仲有你哋都唔該曬！」佢對阿雄同阿星講。


「得閒幫我喺阿柔面前講吓好說話就得，嘻嘻！」阿星摸摸後腦咁講。

連阿星同阿雄都有聲「唔該」，反而我冇得到任何感激嘅說話，心底竟然有種失望嘅感覺。


去到放學前嘅班主任課，阿南將所有表格交到Miss Lam手上。


「你哋真係好叻啊，咁都搵到最低門檻嘅人數。」Miss Lam雙手合十咁多謝我同阿南。


「好彩有壞人…阿正咋，都係因為佢招遇強即屈先搵到咁多成員。」阿南講。


「遇強即屈？」Miss Lam好疑惑咁望住我。


「啊哈哈哈…細個睇戲學返嚟之嘛，呃細路㗎用嚟。」我突然覺得好尷尬。


「點都好啦，麻煩晒你哋，我請你哋食下午茶啊！」


「唔洗啦Miss Lam，你教好佢哋就可以啦！」阿南笑住回答。


「喂…」手到拿來嘅下午茶，咁就飛走咗…仲諗住當補貼返個四百蚊。


亦都因為呢件事，令我第一次同阿南有多咗接觸，亦係我第一次，為咗一個異性去做一啲自己本來毫不願意做嘅事。唔知點解，當我見到阿南放下心頭大石果一刻，自己嘅心情都感到無比暢快，當見到佢好開懷咁笑，自己個心亦會砰砰咁跳得好快。


「仆街啦，你戀愛啦李卓正。」當我將我嘅感覺話俾三個禽獸聽，佢哋反應異常地大。

「痴線啦，點會。」聽到阿星咁講，我即刻落閘否認。


「我二家姐話，呢個感覺，就係心動嘅感覺。」佢回答。


「你二家姐一個月都三個男朋友，佢就嚟心跳都話係心動啦。」我好不屑咁講。


「但我對阿柔都係咁，佢開心我就會開心，佢唔開心我亦都會想令佢開心返。」


「算把啦，佢咁討厭女人，我以為佢遲啲會出家做和尚。」洛賓舉起單手，做出一個阿彌陀佛嘅手勢。


「彈開啦，你就和尚。」我答。


「我…覺得佢內疚姐，知道自己做咗衰人。」阿雄呢個回答我好滿意。


「係囉，同情之嘛。」


唔得，唔可以俾一時嘅同情蒙蔽，於是我決定疏遠返阿南，廢時惹嚟咁多誤會。


點知，命運嘅愚弄再次擺我上檯，果陣我哋有一堂叫做「生命教育」。我哋要喺學年裡面完成一個Project，老師將我哋成班分成每4個一組。

我同洛賓、歐陽南，仲有一個叫關子晴嘅女仔一組。每堂同一組嘅同學都要坐埋一齊，方便交流意見。


「多多指教。」一分好組，坐喺我前面嘅阿南好熱情咁同我打招呼。


「點解…又係你。」


「你好唔想同我一組咩？」佢好不滿咁問。


「係啊。」我亦直截了當咁答。


「同女仔一組你掂唔掂啊？」洛賓喺我隔離問，一嚟就篤爆我嘅死穴。


「點解唔同得女仔一組？」偷聽到嘅關子晴笑到好古惑咁問。


「佢唔鐘意女人㗎。」

似似地啦
如果最尾有句野，仲要係靠右邊既，就係十之八九都係啦

心跳都話係心動啦
依句好笑，
我有keep住番工睇嫁

多謝你希望陪你渡過blue Monday

多謝支持

「ohhh..你同性戀嚟嘅。」關子晴笑得更古惑。


「彈開啦你，我唔係同性戀。」我對住越描越黑嘅洛賓講，但其實係向兩個女仔澄清。


「各位，今日同大家講嘅第一個課題就係─父母，想問大家一個問題先，介唔介意講吓你哋父母係咩職業？」上完呢堂發現，原來重點都係想講父母對自己嘅好要好好報答。呢一堂一直扮到好開放式咁同學生討論唔同人生課題，但最後都係以一個標準答案要求每一個都做到社會所規範嘅好人，學校入面嘅好學生。於是，我就喺課堂問咗個令到老師都口啞啞嘅問題。


「老師，咁如果父母拋棄仔女又係咩原因？」


在場嘅人，包括老師、同學都呆咗咁望住我，除咗認識我家庭背景嘅阿星、阿雄同洛賓。


「老師，答唔到嘅話呢堂就白上㗎啦喎。」我再講。不過老師冇因為受到挑釁而發嬲，或者佢都明白，自己喺堂上講嘅嘢都只係照指引教，世事當然冇咁黑白分明。

「鈴鈴鈴！」落堂鐘聲好似及時雨咁響起，老師都即刻鬆一口氣。


「我哋下堂再答翻呢個同學嘅問題，一陣你哋搵一位組員出嚟抽取一個地方，你哋將會去果個地方做一次探訪，然後Project就係根據果次嘅探訪做一啲紀錄。」但據我嘅記憶，老師喺下一堂，已經再冇提及過我所問嘅嘢，就開咗下一個課題。


「孤兒院喎...」關子晴代我哋出去抽籤，唔知係咪命運使然，結果係抽到孤兒院，同樣係擁有好多被拋棄小朋友嘅地方。


「咁咪有好多可愛嘅小朋友？」歐陽南好似好高興咁講。


「可愛定可憐都未知。」我答。


「一定好可愛！」阿南講。


「住得喺果度嘅人根本連最基本嘅家庭溫暖都冇，佢哋只係一堆俾人遺棄嘅垃圾。」我忍唔住講。


「佢哋唔係垃圾！每個人都有佢嘅價值！」

「由被拋棄果刻開始，已經注定佢哋失去價值。」我反駁。


「佢哋雖然失去父母嘅愛，但唔等於佢哋要俾人放棄！」佢收起咗平日嘅笑容，好嚴肅咁同我講。


我承認當時我係諗得有啲偏激，所以都唔係好識再回應。


「啊...不如我哋傾吓有咩要準備？」見到呢個咁尷尬嘅場面，關子晴都出嚟打圓場。


「嗯…一定要準備啲小禮物，小朋友收到禮物最開心！係咪啊，阿正？」洛賓都難得地認真俾意見。佢同我打曬眼色，想我作出破冰嘅一步。


「係…係啩。」我答，但阿南仍然係嬲爆爆咁，唔願意參與討論。呢次係我第一次激嬲一個女仔，見到佢失去神采嘅樣，會有啲不知所措嘅感覺。

正負皮又變返0

最後，喺一個冇乜溝通嘅討論下，好粗疏咁決定咗我同洛賓會去買食物同物資，阿南同關子晴會準備遊戲同小禮物。


「你搞乜啊，大家要一齊做嘢㗎。」去買嘢果陣，洛賓問我。


「我都係覺得件事唔可以睇得太輕鬆姐，佢哋會係一班好敏感嘅人，唔可以當佢哋係一般小朋友。」


「但你唔覺得你講嘢過份咗咩，話人哋係垃圾。同埋唔係所有小朋友都係俾父母拋棄，或者有啲係父母已經死咗呢？」


「咁我都知個比喻有啲過份嘅...但唔講都講咗，佢哋又聽唔到...最多果陣同佢哋玩多啲補番數囉。」


「呢樣就一定啦，但係歐陽南呢？唔通你想成年都係面左左咁？」


「咁係佢小氣啦，其實見親佢都係咁笑臉盈人，你唔覺有啲偽善咩？」

「我話係你小心眼就真，人哋又冇得罪你，做咩咁憎人？定係上次我哋笑你，你避忌咋？」


「有乜好避忌，女人就係咁麻煩。」


「車，你有陰影都唔好曲解人啦，呢啲都係你一廂情願姐，我又冇乜聽過有人會講佢壞話。」


「佢掩飾得好囉咁，識佢第一日已經見識過佢嘅極速變臉，又喊又笑，好難捉摸。」


「你都喺到掩飾！你自卑，唔抵得人哋咁受歡迎！」


「痴線，邊有。」我即刻否認，但俾洛賓講中咗，或者我對阿南嘅壞印象，係源於面對一個優秀嘅人時嘅自卑，所以先不斷挑剔佢，嚟掩飾自己嘅平凡。

夜晚再推一個
聽朝返工見

又係我啊
應該男主角同女主角既背景都有啲野既

睇文有代入感，同埋有少少諗番中學既生活

歡迎留多啲言討論多啲

加速中
今晚見

即使經歷過搵球員嘅過程，知道佢根本冇想像咁虛假，但仍然衝破唔到幼時嘅心理關口。


果一日嘅洛賓，每一句說話都好實在，原來佢嘅心思可以咁剔透。或者因為我從來冇好好同佢傾過偈，每次都係講埋啲無聊嘢，所以咁遲先發現佢嘅粗中有細。


又或者睇嘢太單一嘅，從來只有我。


我從來都冇了解過阿南，又憑咩覺得咁樣誤會佢？


「好啦，各位同學，首先舍監會同你哋做一啲指導，然後你哋就會見面院內嘅小朋友，盡量記住每一刻嘅感受，會對你哋做研習有好大幫助。」去到探訪果日，隨行老師簡單講咗兩句就帶住我哋去到個會議室見舍監。


「嘩你睇吓佢哋，好似準備咗好多嘢咁，又扭扭氣球、又道具服裝咁。」關子晴見到之後講，相比之下，我哋組只有一啲食物同小遊戲物資，好似有啲輸洩。


「又唔係比賽，做好自己就夠！」阿南答，佢到而家都仲未同過我講嘢，完全將我隔絕在外。

明明而家得償所願，成功同佢保持距離，但又會有種心癢癢嘅不快。


「哈囉，各位同學你好，歡迎大家嚟到呢到探訪我哋嘅小朋友，我係呢到嘅舍監，我叫做龍Sir。」入嚟嘅，係一位高高大大，黝黑而且健碩嘅年輕男人，甚具條件嘅外形令一啲女仔見到佢果陣都不禁講咗一句：「好型！」


龍Sir講咗好多關於佢哋孤兒院嘅歷史，亦都大致講咗唔同小朋友會住入嚟嘅原因，當中有被遺棄、有喪親、有啲只係父母冇時間扶養。


「唔係每一個都係屬於被遺棄嘅『垃圾』，佢哋只係冇得選擇。」阿南對住子晴講，但當然係俾說話我聽啦。


「總之，佢哋嘅心靈都比較脆弱，你哋只係佢哋記憶中嘅過客，千祈唔好對佢哋作出任何承諾，同埋唔好問及佢哋嘅家庭背景。」龍Sir作總結果陣，特別強調呢兩樣嘢。

「啱啊，千祈唔好作出任何承諾，如果係做唔到嘅話。」我心諗。