【正廢柴】想溝到女千祈唔好學我咁

「正哥哥，我哋點啊？係咪跟住南姐姐？」若儀拖住我隻手，好無助咁問。

「唯有我哋分開兩組搵，咁樣會快啲。」

「我哋搵邊到先啊？」

「嗯…搵呢個先囉。地圖上面嘅提示係『音樂天使』，即係邊到？」

「嗯...音樂室！姑娘會同我哋喺音樂室唱歌！」若儀諗一諗之後答。

「好，咁我哋就去音樂室搵！你帶我去啦！」

我哋去到音樂室之後，搵唔到任何寶藏，即係話謎底唔係喺音樂室。

「咁點算啊正哥哥？」若儀語氣有啲失落，你問我點算我都唔知。

但我估都要先穩定佢嘅情緒，唔好令佢有挫敗嘅感覺。

「若儀，唔好心急，失敗咗最多再嘗試。仲有冇其他地方你哋平時會去唱歌㗎？」我嘅語氣史無前例咁溫柔，連我自己都俾自己搞到打冷震。

「小…小聖堂，Sister會教我哋唱聖詩。」

「喔，原來天使就係咁解，今次一定冇錯，去啦我哋！」我連聲都擢埋，真係豁出去。

果然，我哋喺聖堂真係搵到第一個寶藏，係一張咪型嘅卡。搵到寶藏嘅若儀突然信心大增，不斷指引我去唔同嘅地方尋寶，即使有啲地方唔係謎底，佢都好堅強咁繼續搵。

直至經過更衣室，先發現阿南不斷向住男更衣室敲門。

「聰聰，聰聰，出嚟先啦，我哋努力啲一定搵到㗎。」

「搞咩？」我問阿南。

「聰聰一開始就盲樁樁咁亂搵，我叫佢睇住地圖搵，佢又唔要。結果咩都搵唔到就發脾氣，仲衝咗入更衣室。但始終係男更衣室…我唔方便入去。」佢騰曬雞咁講，聲線仲有啲抖震。

對唔住我講錯嘢霎眼間最新賽果已經係負皮領先

「你冷靜啲先。」我講。

然後連龍Sir同一位同事都過埋嚟觀察情況。

「龍Sir，點解聰聰會咁樣嘅？」阿南問。

「唉，聰聰嘅爸爸本來係小巴司機，但因為有外遇而離開咗，媽媽之後獨自養佢，不過太辛苦先將佢寄養喺呢到，之後更失咗聯絡。佢覺得自己冇人愛所以就變得好百厭，周圍整蠱人。」龍Sir拉開我哋，同我哋講返聰聰嘅背景。一聽到佢嘅故事，我嘅手心忍唔住不斷冒汗。

「陪住佢嘅只有一架爸爸送俾佢嘅小巴車仔，但最近佢唔見咗架車仔，每一日都喺到周圍搵架車。因為佢一直相信，只要搵到車仔，爸爸就會嚟接佢走。」

「所以原來佢頭先一路都只係搵架車…」阿南回應。

「我入去睇吓佢咩事啦，再一次麻煩你哋。」龍Sir見慣不怪咁講。

「等我試下入去。」我自告奮勇，佢哋都好愕然。

「可能唔係咁好嘅，始終我哋都有我哋守則。」龍Sir拒絕。

「俾佢試下啦，規矩係死㗎姐，我相信佢可以。」阿南講，我唔知有咩令到佢咁信任我，但好彩龍Sir最後都係妥協咗。而入去之前，我秘密咁同若儀交待少少嘢。​​​​​​​

「聰聰，聰聰？」我逐個廁格咁敲門，睇吓佢喺邊一格。直至聽到其中一格嘅廁所板有聲音發出，先發現佢嘅蹤跡。

「你做咩發脾氣啊？」搵到佢之後，我用善意嘅語氣咁問佢。

「走啊，你個傻佬！唔關你事！」佢大聲吆喝返我轉頭。

「你做咩咁討厭我？」我問。

「我唔鐘意你無表情！同媽媽一樣！」

我呢一刻先發現，原來我嘅「黑面」令佢諗起痛苦嘅經歷。成日話小朋友嘅聯想力好豐富，會將所有相似嘅嘢連接埋一齊，原來係真。

「其實我唔係無表情，我只係同聰聰一樣，好掛住爸爸。」或者聰聰仲細，唔知道爸爸離開嘅原因，所以對爸爸嘅回歸仲有憧憬，佢覺得媽媽成日唔理佢，仲帶佢嚟孤兒院，所以喺佢印象中，媽媽先係壞蛋。

聰聰同佢媽媽嘅互相折磨，令到佢留下好大嘅陰影。

「你…爸爸呢？」佢問。

「佢去咗好遠好遠嘅地方，去行醫救人，拯救好多生病嘅小朋友囉。」我同佢分享我細個其中一個對我老母嘅幻想。

「喺香港都有得救點解要去好遠嘅地方？」成功引起佢嘅好奇心，我都暫時鬆一口氣。

「因為喺好遠嘅地方有啲小朋友連住嘅地方、食嘅食物都冇，所以成日都生病，但佢哋又冇錢睇醫生，所以我嘅爸爸就要去救佢哋。」

「你掛唔掛住你爸爸？」佢問。

「掛㗎。」

「聰聰都好掛住爸爸，好想爸爸返嚟搵我。但聰聰知道爸爸媽媽都唔要聰聰喇！」佢開始大喊，我將佢個頭倚向我嘅肩膀盡情發洩。或者係我勾起咗佢掛住爸爸嘅情緒，但作為過來人，我覺得小朋友係需要將情緒釋放，唔可以壓抑自己。

早安各位

好瘧心

聰聰表示都想大人們比次機會

Lm
幾好睇

多謝！

「我應承聰聰，只要聰聰乖，我同南姐姐都一定會成日返嚟探你。」我對聰聰作出承諾，我知道我犯下一個大忌，唔可以對小朋友作出任何承諾，但我相信我一定做得到先咁講。

「唔要！我唔要你親近南姐姐，佢係我㗎！」佢一路嗔鼻水一路講，原來呢個小鬼當咗我係佢情敵。

「咁你頭先搞到南姐姐唔開心你知唔知點做？」

「我會同佢去搵寶藏。」

「你同若儀合作，南姐姐就會好開心。」

「點解？」

「南姐姐想見到你同若儀成為好朋友囉。」

不過我都唔明白，點解我咁想令阿南釋懷，因為係佢頭先對我嘅信任？但當佢見到我拖住聰聰，由更衣室入面出返嚟時望住我果個鬆一口氣嘅笑容，我覺得好溫暖，好似好耐都冇見過，咁真摰嘅笑容。

「聰聰，做咩咁百厭，匿喺更衣室？」阿南扮到責怪咁問。

「佢唔見咗一啲嘢，但而家搵返啦係咪啊？」我問聰聰，佢點點頭，然後似懂非懂咁望住我，果然仲係小朋友。

「你搵咗幾多個寶藏啊？」聰聰鬆開我嘅手，走去問若儀。

「搵咗4個啦，但爭一個。我唔知咩係『友誼萬歲』。」

「會唔會係我哋上次喺禮堂表演果陣唱果首歌？」

「果首係叫友誼萬歲咩？」若儀如夢初醒咁問。

「好似係啊，去搵咗先啦！」聰聰捉住咗若儀隻手就跑走咗，淨低我哋一班人喺到。

「卓正，真係唔該曬你，可以哄得返聰聰出嚟。」龍Sir對住我講。

我好似聰聰咁點點頭，一時之間都唔太識俾反應。

「但我知你一定會守承諾㗎可？」但下一句，佢就好正經咁問，似乎想追究我頭先嘅越軌行為。

「一定會。」

「好，我相信你，但記住，我會保留向你學校報告嘅權利㗎。」

我再一次點點頭，但今次係堅定嘅反應。

「佢唔會我都會！」阿南喺我旁邊講。

「又關你事？」我問。

「你頭先話『我同你』都會去探佢㗎嘛。」

「唔好講住啦，你哋要去搵返兩個小朋友！」龍Sir喺旁邊截停我哋嘅對話。

「喂，你爸爸真係無國界醫生嚟㗎？」喺行去禮堂途中，阿南突然問我。

「關你咩事。」

「我嘅志願都係做無國界醫生！救好多好多嘅人！」

「關我乜事。」

「點解你成日都咁樣講嘢㗎！明明你頭先對住聰聰都唔係…」

「佢小朋友嚟㗎嘛，你係咪都要我哄？」我故意扮到好冷漠咁問。

「咁又唔洗～」佢仍然笑瞇瞇咁講，唔知心入面盤算緊啲乜。

當我哋搵到聰聰同若儀，佢哋都順利搵到最後一塊拼圖，可惜我哋喺更衣室所浪費嘅時間，令我哋變咗最後一名完成任務嘅一組，所以要接受懲罰。

「嘻，估唔到你會衰喺我手，受死啦！」揸住兩個水彈嘅洛賓不懷好意咁奸笑，我哋嘅懲罰就係要被同組嘅另外四個人用水彈投擲。佢突然好似化身打棒球果啲投擲手，擺好一個擲球嘅姿勢，然後用力將個水彈掟向我身上。

一聲「砰喳」，無數嘅水花喺我褲襠炸開，即刻令我下半身濕曬。

「Oh sh..你仲話唔啱打手球…」我掩住小正正，當我正想講個Shit字嘅時候，先醒起唔可以喺小朋友面前講粗口。

「啊哈哈哈！」洛賓帶頭笑咗出嚟，然後其他小朋友都跟住指住我嚟笑。見到咁有威力嘅一球，智輝亦都有樣學樣，將個水彈掟向聰聰，當然力道差好遠。到子晴掟阿南果陣，聰聰竟然企喺佢面前話幫佢擋，令到阿南都忍唔住失笑。

「記住啦，唔准再蝦若儀，唔係我下次嚟你就知死。」喺臨別之前，我吩咐聰聰。估唔到，短短嘅探訪，會令我愛上呢個地方，愛上呢到嘅小朋友。可能係因為佢哋嘅溫柔，可能係喺佢哋身上見到自己嘅小影子，可能係因為一份想將佢哋變得更好嘅使命感。

「知道啦！我會學習成為一個男人！」

「咁叻仔？」阿南摸一摸佢個頭，好安慰咁講。

「嗯，等我大個咗我就會打低正哥哥保護返你！」聰聰童言無忌，仍然當咗我係搶走佢南南姐姐嘅大魔王。

「好啊，等你打低呢個壞人。」​​​​​​​

而當我哋準備走，我哋組嘅小朋友都好唔捨得我哋咁，或者佢哋平時真係太孤獨。雖然只係短短一日嘅接觸，已經令雙方產生一種羈絆。

尤其係子晴同千千，喺子晴走嘅時候，千千好似眼濕濕咁。佢哋相擁住對方，難離難捨。

反而阿南就一臉愁眉苦臉。

「做咩？」我問。

「最衰都係我，睇唔住聰聰。」原來佢喺到責怪自己睇唔住聰聰。佢到離開果刻先敢將擔憂表露出嚟，可能果陣驚影響小朋友吧。

「咁我望住佢走埋嚟蝦若儀都阻止唔到我咪仲差。」我答。

佢冇應我，只係呆咗咁望住我。

「又做咩？」佢咁猶疑咁望，望到我好唔自在。

「你安慰我？」

「痴線。」

「你終於肯同我講嘢！」佢一路講，一路好用力咁打我膊頭。

「嘩！咩事啊你！」我好痛咁問。

「嘻，冇嘢。」

當我哋臨上旅遊巴之前，阿南叫住咗我。

「喂，壞人！」

「點？」

「多謝你喎。」

「多謝啲咩？」

「多謝你叫若儀陪住我，安定住我嘅情緒囉。」

「一組入面有兩個喊包好難搞姐。」我死撐。

回程果陣，好快佢同子晴頭貼頭咁瞓著咗，頭先應該消耗咗大家好多能量。

「啲細路都幾可愛啊可。」洛賓問我。

「都係嘅，雖然佢哋缺乏咗親人嘅愛，但好懂事，咁細個已經識為人著想。」諗返起若儀哄我嘅畫面，心底仍然有一份觸動。

「想唔想知點解若儀識送糖俾你食呢？」洛賓問。

「佢乖囉。」我諗都冇諗就答。

「一半啦，我頭先聽到，佢問阿南點解你好似好唔開心咁，然後係阿南教佢咁做嚟逗你笑囉，仲因為咁疏忽照顧聰聰，令到後面嘅事先會發生。」

「喔…佢唔係好嬲我咩？」

「一早冇啦，都話人哋冇咁小氣。」

「你又知冇？佢啱啱仲打我。」

「子晴同我講嘅，佢話阿南都明白自己睇得件事太輕鬆，諗深一層，其實你都冇錯。」聽到真相嘅我實在難以置信，原來我先係間接導致佢自責嘅人。其實每一次同佢接觸，佢嘅行為都係奇奇怪怪，大情大聖嘅性格亦令我覺得好難捉摸。

望住佢瞓覺嘅背影，開始明白點解佢會有咁多朋友。原來佢真係有一種令人冇辦法將眼神喺佢身上移開嘅吸引力，唔係來自佢嘅外表，而係佢對所有認識嘅人果份誠懇真切嘅情感。

不過都好，我有叫若儀陪住佢，都算係打個和，冇拖冇欠。

「咁你哋呢？玩成點？」

「打成一片，簡直掂過碌蔗啊。」佢好自信咁講。

「咁犀利？」

「緊係！默契呢啲嘢儲儲下就有，我哋帶住兩個小朋友好快就搵曬啲嘢。你哋就廢啦，最後一名。」

「一言難盡啊。」之後我就同佢講返曬更衣室發生嘅嘢。

「講笑咋？成日過嚟探個小朋友喎。」

「冇啦。」

「需要做到咁？」

我當然有諗過洛賓嘅問題。但聰聰一直欺騙自己搵到車仔就會見返爸爸，其實佢明白爸爸唔會返嚟，媽媽都唔再要佢，但係小朋友唔識面對現實，只能夠搵方法逃避。

我好明白佢嘅感受，當初我都係，不斷用好多方法麻醉自己，令自己忘記離開咗嘅媽媽，只係我比聰聰幸運，我有一個好愛我嘅爸爸。所以當我了解到佢嘅故事之後，我好想去保護佢，好想釋除佢所有嘅怨氣。

「不過你講得出都好少做唔到嘅，識你咁耐，你兄弟我都會陪你嘅。」佢用拳頭輕碰我膊頭，微笑咁講。

其實佢講呢句果下，我係有啲感動，但如果我知道呢句說話原來係有代價，我寧願佢冇講過。​​​​​​​

今晚完 聽日見
Have a goodnight and good weekend

打文中 今晚見

「咁個細路有冇返嚟溝你？」喺我哋嘅聚會中，無意間都提起呢件事，於是阿柔就問阿南。

「講笑咩，細個講嘅嘢都當真！」

「都唔係啊，個細佬而家可能都十八歲，你又單身，諗得過喎！」聽到南南仲係單身嘅消息，心底又有一種難以形容嘅觸動。

「諗你個死人頭，冇咁飢渴啊我。」

「喂，單身喎，有機喎。」阿星喺我隔離細細聲講。

「關我咩事姐。」我答。

「想就關㗎啦！」

「妖。」我即刻用手肘批佢個肚。

「喂，不如搵啲嘢玩啦，難得咁齊人。」洛賓講。

「有咩玩啊？又係Truth or dare果啲『行」嘢啊？」阿柔問。

「嗯，呢個係個好主意，不如玩『自爆彈』？」佢答。

見大家你眼望我眼咁，於是洛賓再解釋。

「即係呢到有一疊啤牌，紅色同黑色，每輪大家都抽一張牌但唔俾得人睇，只可以講牌上面嘅數字，A最大，2最細。每次數目最大果個就要講一個冇咩人知嘅秘密，紅色牌就要講真話，黑色要講大話。超過一半人估中就要飲一杯！」

「喔，咁又幾得意。」阿雄講。

「玩親呢啲都係反面收場。」我答。

「唔會啦，關於我哋嘅都知得七七八八，唔關嘅都唔會嬲啦。」洛賓自信地答。

「好！嚟啦！」阿雄講。

「搞錯啊！一嚟就抽隻A。」嘉慧第一回合就抽到最大嘅牌。

「雄嫂會講啲咩啦究竟？」阿星起哄。

「我...被求婚之後返到屋企喊咗成晚。」抽咗牌之後佢講。