【正廢柴】想溝到女千祈唔好學我咁

今晚仲會唔會有文？

「嘩世界變，你竟然幫咗啲女人。」阿星驚訝咁講

「係喎頂，點解？喔！係因為阿南都同我講咗個秘密。」

子晴同符文安暑假開始一齊咗幾個月，性格低調嘅子晴要求唔公開戀情，符文安為咗溝倒女，當然乜都應承，但直至上個月，符文安同子晴分咗手，子晴亦扮到若無其事，事實卻係難以忘記符文安。

「我諗子晴根本對洛賓冇感覺，佢只係希望得到慰藉，而洛賓就係果個及時出現嘅代替品。」

「吓，咁點啊，以洛賓嘅性格佢唔舂過頭埋去佢唔心息㗎喎。」阿星答。

「咁唯有狠一啲，叫子晴唔好再玩佢，同佢保持返距離。」我講。

「咁佢咪好傷？」

「俾佢知自己俾人當傻仔咁玩仲傷，唯有等佢冇乜感覺之後先同佢講啦。」

然後，阿星就搵機會同子晴攤牌。冇幾耐，有一日見倒洛賓垂頭喪氣咁，原來喺佢準備同子晴表白嘅時候，子晴已經率先同洛賓講清楚。

「咁...女死女還在，冇咗咪下個囉。」知道內情嘅阿星安慰佢。

我同阿星個樣都變得好為難。當時我哋根本唔知道應唔應該同佢講個事實，不過，當知道子晴肯接納我哋嘅意見，證明佢嘅心腸都唔壞得曬。至此之後，因為怕尷尬嘅關係，佢都好少再同我哋來往，只係會同啲女仔聯絡。而洛賓，唔知係咪因為呢件事而失去信心，之後都冇再聽過佢話鍾意人。

人同人之間嘅關係真係可以好脆弱，之前仲可以一齊燒住嘢食有講有笑，下一刻，分分鐘會變成形同陌路嘅普通朋友。

我有時都喺到諗，如果當初我認識嘅，係子晴先，然後依循住洛賓嘅劇本一路延伸，當我知道子晴咁樣對我之後，本來已經對女人非常恐懼嘅我會再變成點？

但永遠都唔會有如果，確實我認識嘅係歐陽南而唔係關子晴，確實改變咗我嘅，都係歐陽南。

「嗦！」知道真相之後嘅洛賓，深呼吸咗一啖氣，睇到佢眼眶有少少濕潤，大家都唔敢出聲。

「你..唔會怪我啊嘛？」阿星問，語氣好有試探嘅感覺。

「唔會…唔會。」洛賓低吟。

「真係？」

「傻啦，你為我好我唔知咩，只係估唔到原來係咁姐。」佢呼出一口好沉重嘅氣，然後就行開咗去廁所。

「佢有怪我。」多年之後，阿星已經唔似當初咁單細胞，佢好明確感受倒洛賓嘅耿耿於懷。

「乜佢有咁鍾意子晴㗎原來？」阿雄細細聲咁問。

「周星馳都話啦：『初戀，係最刻骨銘心。』」我答。

當初本來係想等洛賓嘅感覺丟淡之後，先再同佢講出真相，點知呢一等，就等咗咁多年。更估唔到嘅係，咁多年之後，佢依然咁在意。

呢樣嘢，以後可能會成為佢同阿星之間嘅一條刺。

「咁仲...玩唔玩？」阿雄問。

「玩，緊係玩啦，原來咁多Juicy嘢聽。」喺廁所出嚟嘅洛賓講，但在場嘅人都聽得出佢係話中有話。

所以接下來幾輪大家講嘅嘢都相對地保守，唔敢再因為講錯嘢而惹倒啲咩事端。

「喂喂喂，你哋仲有冇啲勁爆啲嘅嘢講？就住就住好玩咩？」洛賓見狀，開始唔耐煩咁講。

「好啦好啦，你醉喇，我扶你去抖吓先啦。」阿雄對住佢講。

「我冇醉！你哋每個人，都係有唔同嘅秘密隱瞞住大家！係咪！」

「冇啦，點會姐。」我多口咁講。

「唔係！好似你啊阿雄！你係為咗證明俾嘉慧你都可以好Man先轉打手球，都唔係咩打到悶！」

「喂，又攞返出嚟講做咩？」阿雄都俾佢攪到炆炆哋。

「所以你連有機會入選青苗隊嘅機會都放棄…」嘉慧好驚訝咁講。

「仲有你啊李卓正！鍾意阿南咪講囉，做咩收收埋埋姐！」洛賓越講越激動，大家都知道佢喺酒精薰陶下，少不免會亂咁講嘢，只不過估唔到，會挖到咁徹底。

「講咩啊你，你醉啦！」我慌忙咁回應，希望塞住佢把口。

「冇啊！我冇！你唔認啊？」不省人事嘅洛賓喃喃自語，整個環境都變得寂靜。呢一剎那我同阿南對望上眼，佢嘅眼神變得好複雜，我唔清楚係尷尬、疑惑、痛恨定係愕然。

有啦

Yay!

我唔清楚係尷尬、疑惑、痛恨定係愕然。

各位請戴好安全帶

唔夠

推

怕炒車？

垃圾故

提供唔倒一個好嘅閱讀體驗俾你 我好抱歉

幾好睇 加油

知道

因為呢件事，令我哋嘅Presentation都好草率咁就完成咗。而之後上生命教育堂唔需要再分組坐，當然可以避免倒洛賓同子晴之間嘅尷尬，但同時亦表示，我冇得再同阿南坐。

唔知幾時開始，我慢慢變到好期待上呢一堂，當然唔會係為咗啲左膠教學，而係習慣咗阿南喺我身邊講嘢嘅感覺。即使係一啲好無聊嘅日常，我都會好想知道。

冇同佢坐，我哋少咗好多傾偈嘅機會。但就算上緊其他堂，高啲而坐喺後排嘅我，都總會默默望住佢後背，望住佢抄筆記、上堂偷食嘢、或者舂眼瞓。

坐窗邊嘅佢原來好鍾意睇風景，佢有時會將耳機線穿過冷衫袖，再用手托住隻耳去冚住耳機聽歌，再望住街外嘅風景發呆就可以渡過沉悶嘅一堂。

而我，就不斷望住佢望住出面嘅風景。

「究竟出面有咩好望？」有一次我問佢。

「望下天、望下樹、望下飛機、望下雀仔。」

「唔怪得淨係見你𩓥高頭望。」

「你咁留意我嘅⋯」佢語帶甜絲絲咁講。

「我全班都有留意。」我扮到唔在意咁答。

「車..」

「咁有咩好望。」

「冇㗎，但人望高處啊嘛。」

嗯，人望高處，佢一直都對自己嘅未來好清晰，佢要做醫生，仲要做無國界醫生，原來唔係佢隨口講嘅嘢，佢一直都向住呢個目標進發。每次上Bio同Chem，佢都會特別專心，唔會有一點恍神。佢抄嘅Notes，分分鐘仲厚過本教科書。

相反我嘅目光，好似永遠都放喺眼前，亦唔會望得好遠，有啲咩就做啲咩。喺佢面前，我就好似一枝無鏢頭嘅飛鏢。

「喂，壞人，你有冇諗過你第時想做咩？」

「冇。」

「你冇為未來諗過咩？」

「冇啊，夠分入大學，出嚟打份工咪足夠。」

「咁樣好冇衝勁姐，做人點可以冇目標㗎！」

「做唔倒嘅目標定嚟做乜？」

「你唔試又點知自己做唔到姐！我幫你諗啦！不如做漫畫家啊？你咁鍾意睇幽遊白書。」我由細到大，都好鐘意睇幽遊白書，成日幻想，自己就係有型到爆，但好容易迷失嘅飛影。

「我都唔識畫畫。」

「咁…不如做作家？你作文叻啦啩。」

「香港做作家冇錢賺喎。」

「唔係講錢㗎嘛，要講鍾唔鍾意先！」

「咁..都鍾意嘅。」自小我對文學都好有興趣，儲儲埋埋都有好多書喺屋企，所以都培養咗寫作嘅興趣。

「喇，咁就做作家先！你第一本書嘅主角要搵我嚟做喎！」

「吓？點解？」

「咁我幫你搵到目標緊係要回報返我啦！」

「做咩要幫我搵目標？」

「做人有目標先會成長，唔理啊！一定要搵我做主角！」

「都唔知係咪會做作家。」

「唔得！一定要做！」

我未來嘅職業，就係咁隨便就決定咗。雖然我當時冇應承到佢，但不知不覺間，我開始鑽研唔同作家嘅寫作風格，學吓點樣去「講故事」，有時仲會俾啲散文佢過目。

有時佢會稱讚，有時佢會批評，會俾好多佢嘅感受俾我知，令我點樣去令自己寫嘅嘢更加立體，甚至學校嘅一啲徵文比賽，我都有參加，間中更會有幸奪魁，學校會將我嘅文章刊登，令更多人睇到我嘅文字。

不經不覺間，我都相信，自己可以成為一個作家。

如果一切可以咁順遂，我諗我做唔到也斯，都可以做到孤泣。

講笑姐，但有時發下夢都得啩？發夢同夢想最唔同嘅地方，就係發夢可以諗下就算。

所以我幾鍾意無情白事就發下夢。

喺我印象中，中四係一個來去匆匆嘅一年。當中好似發生咗好多嘢，但「嗖」一聲，就不經不覺過去咗。如果將一切轉變成一首歌，中四發生嘅嘢可能都只係前奏。

上到中五，Miss Lam為咗方便，繼續搵我同阿南做班長。

「今年再多多指教！」知道呢個消息之後，阿南Whatsapp我講。

果陣Whatsapp開始興起，唔洗再受到SMS因為唔同台而產生嘅收費重擔，人與人之間溝通都方便咗。我同阿南都經常會Whatsapp傾偈，無論係上堂果陣定放學返到屋企之後。一開始都係佢主動同我講佢自己嘅嘢，但慢慢，我都會同佢分享我嘅動態。

「有你唔洗我指教。」我講。

「死啦你！我唔會再幫你㗎啦，我要幫Miss Lam個手球隊！」

「幫咩？」

「佢哋暑假果陣打過幾場友誼賽，亦招募多咗人加入，學校終於應承俾佢哋搞返校隊！我應承做佢哋嘅球隊經理。」

「唔怪得洛賓成個暑假都唔見人。」我回覆，開頭仲以為佢為情所困，淨係想收埋自己。

「喂，恭喜喎，手球隊有校隊打，今次唔係後備啦。」喺我覆緊Whatsapp嘅同時，亦同坐我身邊嘅洛賓講。

「必然正選啊。」

「咁犀利？」

「犀利嘅係胡一刀，佢真係勁到飛起，真係唔明點解佢唔去打籃球。」

「咁你唔打籃球啦？」我繼續Whatsapp問阿南。

「應該唔打喇，練波花嘅時間太多。」

「喔…」

當我仍然埋頭覆訊息嘅時候，Miss Lam講嘅嘢突然惹起班上男生一陣哄動。

「各位各位，今日會有位插班生加入我哋班，係女仔嚟喔！」

「啊！！喔！！」大家都好聲嘶力竭咁大叫。但我興趣就唔大，對我而言，最好、最靚嘅女仔已經喺我身邊出現。

點知，當果個插班生行入嚟嘅時候，班上嘅男同學已經報以熱烈嘅歡呼聲。佢嘅外貌真係有一種勾魂攝魄嘅魅力。一頭曲髮遮咗半張臉，但仍然見到長而幼嫩嘅長眉，配上大小勻稱嘅雙眼。一張薄唇只係微微張開，但已經好似想將你蠶食。仿佛只需要望一眼，亦足以將佢容貌印喺記憶中縈繞。

同充滿陽光味嘅阿南相比，陰鬱嘅佢就好似一個惡魔嘅化身，帶俾人一種準備到凡間作亂嘅感覺。

「新同學，介紹一下自己？」Miss Lam純真地同新同學寒暄，完全感受唔到班上男仔充滿獸性嘅垂涎欲滴。

「大家好，我叫邵月，可以叫我阿月。」蘇麻嘅聲音由新同學口中發出，令有啲同學幾乎把持唔住呻吟出嚟。

當大家希望聽到更多資訊時，介紹已經結束咗。

「啊...大家慢慢再熟識都唔遲。新同學你可以坐...」當Miss Lam諗住打圓場嘅時候，新同學意外地指住阿星隔離個位。

「我要坐果到。」

不經不覺已經係開Post之後第三個weekend
祝大家有個Happy Weekend
今個星期好似多咗好多新讀者我愛你們

鍾意嘅就留吓言支持吓
唔鍾意嘅就批評吓
好睇嘅就正評吓
唔好睇就當鬼掩眼 直接上一頁離開吧

加油
支持樓豬