【正廢柴】想溝到女千祈唔好學我咁

「唔洗找！」到咗殯儀館之後，我隨意丟低咗一張銀紙就落咗車。

「死啦咩府呢？」而家有八個禮堂都做緊白事，無計可施之下我只好逐個禮堂搵。每經過一個禮堂，見到唔同先人嘅遺照，心底都會泛起一陣莫名嘅寒意。

直至搵到第六個，一個細細嘅禮堂入面人唔係好多，令禮堂顯得有啲冷清。所以即使我企喺遠處，都好容易就認到果個，著住麻衣、燒緊衣紙，喊得好傷心嘅佢...

呢次係我第二次見到佢喊，唔同嘅係，今次我嘅心都不自覺咁變得好痛。

「先生，你識我媽媽？」喺我隔離路過嘅中年女人問。

「你係...阿南媽咪？」我反問。

「係啊，你係...？」

「伯...伯母你好，我係阿南嘅同學。」望真啲伯母個樣，先明白阿南點解會生得咁靚，原來係有好優良嘅遺傳。

「喔，有心啦，入去坐啦。」佢好黯然咁講。

「啊...等陣。」當我諗住封返帛金，但我摷勻銀包，得返一張五百蚊紙同一個裝護身符嘅利是封，早知頭先就叫個司機找錢...

「爭一蚊...啊！」好彩頭先幫阿月買珍寶珠，個姐姐找返一蚊俾我。

「小小心意。」我將帛金交到阿南媽媽手上。

「有心、有心！」之後佢就帶我去靈堂入面。

「有客到！賓客請留步！」堂官聲如洪鐘嘅開場白吸引靈堂入面嘅人望過嚟，當阿南見到我出現時，原本已經喊得好傷心嘅佢，眼淚更加不自控咁流落嚟。

當完成堂前三鞠躬後，我行到佢前面，佢二話不說就撲向我懷抱大喊。我能夠做嘅只有不斷輕撫佢後尾枕安慰佢。

「點解...點解你會嚟，我叫咗阿柔唔好同你講...嗚嗚嗚。」

「傻阿南！」我不斷咬緊牙關，我怕一放鬆，就連我嘅淚腺都會失守。

「壞人點算啊，以後冇人理我、冇…冇人照顧我喇！」

佢不斷喊不斷喊，身上嘅校服都俾佢嘅淚水淹到濕咗一大撻。

「你有我啊，我唔會丟低你一個。」我答佢。

「係…係咪㗎…」

「嗯。唔好喊啦。」

隔咗無耐，或者眼淚都俾佢流乾，佢先開始平伏返。

但可恨嘅儀式，好似係要逼到親屬崩潰咁，一時又要家屬招魂，一時又破地獄咁，阿南每次一到呢啲環節，又會變到泣不成聲。

喺所有儀式完曬之前，我都陪住阿南，冇離開過一步，希望俾佢感受到被重視嘅感覺，呢樣係我唯一可以做嘅事。

「正同學，真係麻煩曬你。」走之前，阿南媽媽同我講。

「伯母唔洗客氣，我都受阿南好多嘅照顧。」

見到阿南咁樣，心都up埋

再黎再黎

推

我寫嘅時候都係

唔捨得玷污阿南

多謝！

俾啲時間我啦 當我ChatGPT咩

後面無甜就負皮

推推推

寫得好好，樓主加油

推

「你可唔可以幫我送佢返屋企？我仲要返夜班…」

「冇問題，我會睇住佢。」

由於都已經好夜，阿南忙咗一日都好攰，我哋就喺街截咗㗎的士上。

「將軍澳唔該。」我講。

「喂，我住油塘喎。」阿南講。

「你去我到啦，我唔想你一個人返到去亂諗嘢。」

「吓，怕唔怕…」

「唔怕啦，我老豆今晚會喺醫院做嘢。」

「咁咪仲怕…」佢仲識講笑，睇嚟心情真係好返少少。

「壞人。」

「嗯？」

「人死咗之後係咪會喺天上面，守護佢重視嘅人？」喺搭車途中，佢一直望出窗外面嘅天空，眼神好空洞咁問。

「緊係會。」

「咁佢可唔可以守護埋媽咪，唔好令佢再咁辛苦？佢一個人要返兩份工，仲要照顧我，又要租樓。已經捱到五癆七傷。」

「你哋都係婆婆嘅屋企人，佢一定會守護你哋，所有唔好嘅嘢都已經過去。」

「係就好啦。」佢好冇神氣咁答。

「司機前面有落唔該。」指向停車個位之後，正當我諗住攞錢嘅時候先突然記得，我連最後個五百蚊都用埋嚟做帛金，身上已經冇曬錢。

「吓…仲話唔好嘅嘢已經過去嘅？」阿南問，然後佢就攞錢出嚟，好彩都夠錢。

「嘻嘻…最後一樣。」我苦笑。

「要還㗎！」

我哋經過便利店，我幫阿南買一啲日用品，順便㩒埋錢，然後就返我屋企。上到去之後，我拎返上次佢著過嘅衫俾佢，佢拎住啲衫，苦思咗一陣，然後竟然講：「不如…一齊沖？」

「快啲沖啦你！沖完到我！」我好努力咁克制自己咁講。

「算你啦，你話好我就打死你。」呼，好彩仲有三分嘅理智救咗我一命。

我趁佢沖涼嘅時間，好快咁煮咗兩個即食麵，再求其淥咗兩條腸仔。我哋喺殯儀館果幾個鐘都完全冇食過嘢。

「嘩，超香啊！我喺廁所入面都聞到。」煮好麵嘅瞬間，佢都啱啱好沖完涼出嚟。

「熟手技工啦，老豆唔喺到我就煮公仔麵食。」

「咁咪好唔健康囉？」我哋面對面咁坐，佢一邊「享受」我個麵，一邊講。個畫面就好似一對新婚嘅小夫妻咁。

「嗦嗦…嗦…是但啦，好又一餐唔好又一餐。」

「我得閒煮俾你食！」佢講。

「你？得唔得啊？」

「咩唔得啊，我婆婆教過我…」佢唔覺意又提起佢婆婆，表情即刻變返好失落。

「好啦，食完快啲休息，聽日仲有啲手尾。」我即刻轉移話題。

「嗯，咁你都早啲瞓，聽日仲要返學。」

「唔洗啊，我聽日會陪你去，阿星話我病咗幫我請埋假嚕，補返張醫生紙就得。」

「吓，邊到嚟醫生紙？」佢天真咁問。

「傻南，我老豆做乜㗎，攞張醫生紙有幾難？」

「又係喎。」

「你睇下，阿雄都話佢同嘉慧會暫代我哋嘅職務，其實仲有好多人關心你。」我遞上我哋四個男仔嘅Whatsapp Group內容俾佢睇。

「多謝你哋…」佢好似好感動咁講。

「你點對人，人就會點對返你。」我答。

食完麵之後，佢就推咗我去沖涼，仲話會洗好啲碗碟。剎那間腦中閃過一個念頭，如果可以娶佢做老婆，佢一定係個賢妻。

欸，人哋啱啱先有家人過身，唔諗埋啲無厘頭嘅嘢住。

沖完涼之後，阿南已經坐咗喺我張床上面㩒電話，似覆緊一啲慰問訊息。

「快啲瞓啦，我去我老豆間房瞓。」當我準備轉身走嘅時候，佢拉住咗我。

「一齊瞓啦。」佢講。

「又想試我…我唔會…」

「今次唔係試，真係，一齊瞓。」佢講嘅時候，個頭越垂越低。

「我唔想…自己一個人…」佢繼續講。

「好啦，咁我瞓地下。」我答，始終我唔想呢一刻有太過僭越嘅行為。

我熄燈之後，望住天花板，一直眼光光，心裡有一個疑問，一直都未搵到答案。

「傻阿南。」

「嗯？」

「做咩唔話俾我知...要一個人頂曬所有嘢？」我問。

佢靜默咗好耐先開口回答我：「我唔想成為你嘅壓力。」

「咩壓力？」

「我知你嘗試緊解開你心入面嘅枷鎖，我唔想你再失望。」原來呢個傻人一直怕會麻煩到我而令我對女人再次產生唔好嘅觀感。所以有咩事都唔會話我知，有咩事都寧願自己啃咗去。

感謝你

但呢個唔係甜故