【正廢柴】想溝到女千祈唔好學我咁

點解明明甜蜜緊嘅情節啲留言都係咁灰

咁又唔會 唔好睇咁多TVB

睇topic 就知應該都係樓主做左on9仔先搞成咁

「係…係啦，咁冇禮物嘅大家都唔洗灰心，我哋仲有交換禮物環節，所以禮物係人人有份啊！」阿南揸住支咪講。

「咁大家嘅禮物都已經分曬編號放咗喺檯出面，每人喺抽獎箱抽到咩號碼，果份禮物就係你㗎喇！」

交換禮物，堪稱世上最令人崩潰嘅環節，大家一年內所有嘅腦細胞就係用嚟諗點樣可以喺呢到將抽到禮物嘅人玩弄得體無完膚。

而我同阿南好精明咁利用職權，可以從呢個環節中置身事外。果然，大家都各出奇謀，一時間，呢個地球上最無用嘅嘢都交到曬各位同學手上。

「邊個送㗎呢個！」阿星攞住一大袋洋蔥，流曬眼淚咁問。

「你都好啊，可以食咗去。我真係唔知點拎呢個返屋企。」阿雄講。唔知邊個同學有咁嘅本事，抬咗一個地盤用嘅水馬上嚟，阿雄抽倒嘅時候，仲呆過收到嘉慧整嘅蛋糕。

「嘩，好彩我哋真係冇玩姐。」我細細聲咁同阿南講。

雖然大家表面詐曬型，但我知道呢個會係大家一個好美好嘅回憶，人生可以瘋狂任性嘅時候唔係好多，能夠毫無責任地去整蠱一個人，已經不枉自己滿腦子壞主意嘅青春。

之後落嚟，我哋玩咗一啲遊戲，懲罰咗一啲輸家，食咗一啲嘢，就已經去到完結嘅時間。

「好喇大家，下年見！」Miss Lam放學之前講。

「你考第幾啊？」攞咗成績表之後，阿南問我。

「第六。」

「嘻嘻，我第四！你輸咗！請食雪糕！」

「咁都得啊？」

「係啊，咁你請唔請？」

「請啦請啦。」

今日成間學校都充斥住好濃厚嘅聖誕氣氛，喺我哋買完雪糕返課室嘅路程，大家都跑嚟跑去搵唔同嘅人影相。

「點啊，準備咗禮物未？」阿南問。

「準備好喇。」我答。

「真係㗎？咁叻仔？好想知係咩添，最衰今晚我唔嚟啦，唔係就今晚交換咗去。」

「係囉，冇辦法啦。」一諗起今晚呢個普天同慶嘅派對竟然見唔到佢，就有啲失望。

「喂，我哋都影相囉！都未同你影過相。」阿南拎出電話，打開個相機。

「吓，喔。」

第一次同佢影相嘅我緊張到死咁滯，成個人都僵硬咗咁，連笑容都係隔硬擠出嚟。

「企埋啲啦，你就企出鏡啦。」佢對住我講。然後就一嘢拉我埋佢身邊，然後身體輕壓住我後背，隱約間，好似都感受到佢胸部嘅觸感，軟淋淋咁，呢種新奇嘅感覺，更加令我心煩意亂。

「笑啦！一二三！」我哋第一張相，就留低咗我呢個好似痾唔出屎咁嘅慘白樣。

「痴線，個樣營養不良咁。」見到張相之後，佢笑到癲咗咁。

「雪糕攞返嚟！」我扮搶佢手上嘅雪糕。

「唔笑...唔笑...哈哈哈。」佢一路忍笑，點知喺行樓梯嘅時候差錯腳，成個人向後仆。

「喂，睇住啊！」好彩行佢後一級嘅我及時伸手截住佢後背，於是佢就成個人瞓咗落我懷抱之中。

「唔...唔該曬。」企返穩之後，佢好羞澀咁向我道謝，然後就一支箭咁跑咗上去。

「噢...」呢一幕正好俾經過嘅阿月睇倒曬。佢嘅樣首先有啲定格，然後再展現一個不懷好意嘅笑容。

「喺學校抽水咁張揚啊。」佢講。

「佢差錯腳我扶佢咋。」

「喔，係啊？」我知道佢知我冇講大話，但佢仍然用一個懷疑嘅語氣回應，之後就沿住樓梯走咗。

「咩嘢事...？」兩個女仔嘅反應，都令我覺得好莫名其妙，完全捉摸唔倒佢哋諗緊乜。

返到課室之後，同唔同嘅人影曬相之後，阿南都要返屋企準備同佢媽媽共渡嘅晚餐。

「唔洗唔開心喎，仲有我哋嘛！我哋去阿星屋企打牌！」見到我有啲鬱鬱寡歡嘅樣，阿雄提出呢個建議。

「咁你哋死得啦，知道咩叫情場失意，賭場得意？」洛賓自嘲。

「打完咪知！」我笑住講，萬大事都有佢哋，呢種感覺真係好。

結果成個下晝，我哋都喺阿星屋企攻打四方城，打到過曬時都唔記得。

「好彩星哥你住學校隔離姐。」我哋即刻跑返去，其實都只係阿星同阿雄跑，佢哋唔想要伊人等佢哋。

推一個

推推推 live咗

樓主今晚幾點更新

你個名好貼題

同以往一樣每晚差唔多十一點幾十二點

好驚瞬間多咗兩個負皮

推一推 live咗

夠鐘啦

去到學校門口，佢哋嘅心上人就唔見，反而見到阿月企咗喺街上面等。佢同今朝嘅裝束唔同咗，本來扎起咗嘅頭髮放咗落嚟，變成波浪形嘅曲髮。佢換上一條黑色連身裙，條裙仲要淨係遮到落大脾，令幼長嘅雙腿表露無遺。更唔好講佢胸前果片偉大嘅風景，喺貼身嘅剪裁中更顯得緊迫，幾乎每個男學生入門口之前都會望一望佢。

「咦啊！何方妖孽？」洛賓離遠望到呢個畫面，都即刻煞停腳步。

「嘩，裝扮過喎。」阿星行到埋去就講。

「點啊，有冇對我有啲心動嘅感覺？」佢用好挑逗嘅語氣反問。

「非禮勿視非禮勿視。」阿星答。

「得八度咋喎，你唔凍㗎？」我問阿月。

「凍...凍啊...但唔係要著到咁㗎咩，點解你哋同朝早嘅裝扮一樣？」

「啊哈哈哈，張通告寫著便服喎。」洛賓笑住講。

「點知啫...我以前學校嘅聖誕晚會要Smart Casual…」

「著住啦。」我將外套除咗俾佢，應該都夠佢上身保暖，但下身就...

「阿月好靚喎今晚。」路過嘅符文安講，佢一副狼相咁覬覦住阿月，阿月只係好虛偽咁對佢笑咗一笑。

「今晚做我Partner呢？我帶你識多啲人一齊玩啦。」符文安再講。

「唔洗啦唔該。」之後佢就拉咗我入去。

「全世界都想仆過去佢到，係得你唔落搭。」我對佢講。

「見到佢懶有自信嘅樣就想嘔。」

禮堂正播放住一啲柔和嘅音樂，而且環境都幾昏暗，中間仲有一個舞池，所以好似變到一個小型舞會咁。阿星同阿雄一早已經搵心上人跳舞，落單嘅洛賓就同胡一刀喺到吹水。

「喂，你話會成晚陪住我㗎，你唔好走咗去啊！」阿月見我望嚟望去，就警告我。

「去得邊啦，多一個識嘅人都冇。」我答。

「你第一次嚟呢啲Party啊？」見我好似好唔自在咁，所以佢問。

「係啊！以前都唔鍾意嚟。」

「嚟呢到要跳下舞㗎！咁先好玩！」然後佢都拉咗我出舞池。

「咪玩啦，我識鬼跳舞。」我企咗喺舞池，而佢就輕輕擺動身體，已經融入咗呢到嘅氣氛。

「咁樣郁下就得㗎啦，你唱歌都敢啦，唔係唔敢跳舞啊？」之後佢就捉住我嘅手，自己喺到跳。

我依照佢嘅指示，跟住節奏慢慢擺動，講真我一套街坊裝咁同佢跳舞其實個畫面都幾好笑。

「隻手要咁樣先得。」佢突然將我對手放喺佢腰間，然後將佢自己對手搭上我雙肩。

「唔係咁好...」

「殊...跳埋隻舞再講。」唔知係咪受到音樂嘅薰陶，我地都好全神貫注咁互望住大家。

有個咁性感又靚嘅女仔喺我面前跳舞，話冇胡思亂想真係呃你，加上由佢身上發出嘅香水味就好似迷魂藥咁，令我有啲迷迷糊糊。喺爭啲把持唔住嘅一瞬間，腦中浮現出阿南嘅樣貌，好似一個警號咁要我保持清醒。

「點解要揀我？明明你有好多選擇。」我問。

「因為你有安全感。」然後佢更將頭伏咗落我到，合埋雙眼咁跳。

「我知你唔會乘人之危。」佢繼續講。

「如果我會呢？」

「我都冇所謂。」呢個答案即係代表咩？代表佢願意俾我抽水？點解？

一個可怕嘅念頭喺我腦中閃過。我唔敢再問落去，我怕會聽到一啲令我唔識面對嘅答案。

「食嘢啊...啲Pizza好...食...」突然之間，阿星嘅聲音將我喺兩難中抽離，但佢見到阿月依附喺我身上時，神情都有啲驚訝。

阿月亦即刻離開我嘅懷抱，並且跑咗去搵阿柔。

「嘩，好有艷福喎。」阿月離開之後，阿星即刻講。

「本身你㗎。」我答。

「唔好玩出火就得啦。」佢突然好正經咁講。

「洗唔洗我幫你出火啊！緊係唔會！」我偷襲阿星下面，好輕浮咁講，我有信心我唔會做啲對唔住阿南嘅事。

「喂！睇住啊，搞壞咗點搵食。」

「你仲想搵食？頭先見你哋攬曬喎，得米啦！」

「差唔多！我諗住一陣就同佢表白埋！」佢好有自信咁講。

「祝你成功喇兄弟。」我講，呢個已經係，我能夠作出最大嘅祝福。

冇幾耐，學生會嘅司儀就出嚟暖場，為接下來出場嘅表演嘉賓作鋪墊。

「估唔到會有表演嘉賓喎。」連明星嘅真面目都唔多見過嘅我講。

「唔知係邊個呢？有啲期待。」阿月喺我側邊講。

「真係多謝我哋嘅符文安同學，我哋先請倒以下落嚟嘅嘉賓！」

「躡」嘅一聲，一盞Spotlight打咗落符文安身上，全場人都對佢報以掌聲同歡呼聲，而佢都懶謙虛咁揮揮手。

「好喇我哋有請！羅力威！」台上嘅紅幕慢慢升起，羅力威就好似個白馬王子咁，著住一身白色衣服坐喺鋼琴前。

「啊！！羅力威！！」全場嘅同學都好興奮，就連身邊嘅阿月都好似發咗癲咁叫囂，原來佢係羅力威嘅Fans，但之後羅力威講嘅嘢反而令到佢靜咗落嚟。

「啊，好多謝大家，好難得聖誕可以同大家一齊過。喺到送上第一首歌，亦係阿安特別想送俾邵月同學嘅《雙子情歌》。多謝！」

悅耳嘅鋼琴聲響起，令場內所有人都變得陶醉。唯獨阿月，佢個樣越聽越難受，仲有啲眼泛淚光，唔知以為佢聽果啲係魔音。

「咩事？」我遞上紙巾俾佢抹眼淚。

「冇。」佢答，然後呼出一啖重氣。

人純情才易分心 人無情才算花心
理智得多麼肉緊 纏綿時慈悲眾生
還請體諒我 兩個我無論在鬥在爭
思想雖分裂能被抱緊 全身都認真

「呢到好焗，不如出去抖下氣。」唱完第一首歌之後，阿月對我講。

「喔。」

我哋走到禮堂附近嘅涼亭，坐咗喺石櫈上面。所有嘅人都聚曬喺禮堂聽羅力威唱歌，周圍一個人都冇，真係靜到而家將阿月就地正法都冇人知。

用咗一晚時間追到live 樓主加油唔好爛尾
見到洛賓個名就自動聯想條友係光頭