【正廢柴】想溝到女千祈唔好學我咁

多謝你嘅正皮

啊係 俾人打果個先係阿雞

「咪嘈咪嘈！要鬧出去鬧，唔好阻住我抄功課！」阿星大聲嗌。

「邊個抄功課！」突然門外出現一把好有威嚴嘅聲音。

「頂...」頭先大大聲嘅阿星今次只能夠暗地裡講嘢。佢哋喺側邊突然爆笑，點解得佢哋笑而我冇？因為...

「哎，真係唔好彩，咁都俾訓導捉倒。」

「唔好彩嘅係我啊？點解我要同你一齊受罰啊！」

阿星真係名乎其實豬一樣嘅隊友，咁大聲叫搞到俾經過嘅訓導聽倒而罰佢留堂，而我因為俾佢抄而都要罰埋一份。

「咁咪好囉，一陣可以睇阿南打波。」

「有咩好睇姐，成班人追嚟追去都唔知做乜。」

「邊個叫你真係去睇姐，叫你支持下佢之嘛。」

「洗唔洗啊？睇唔睇都贏架啦。」

「好難講。」阿星指一指出窗，望出窗可以見到操場上面嘅賽事，阿南代表嘅黃社正落後緊對手藍社8分。

「咁就算我去咗都冇用架姐！我又唔係符文安。」阿南成日話佢好靚仔，打波又有型，讀書又犀利，係佢嘅夢中男神。

但我就覺得…

「都唔知話你蠢定話你鈍好。」當時嘅我，仲未領悟到阿星嘅意思，只係全盤否定佢嘅說話。

「李卓正、車震星，你地可以走啦，以後唔好再俾我見到你地做嘅嘢。」訓導主任入嚟留堂室，俾咗我地一人一張缺點紙。

「知道知道董Sir！董Sir再見！行啦李卓正！落去睇啦！」阿星以九秒九嘅速度執好曬書包拉住我走。呢條大隻仔又唔知自己大力同跑得快，我根本跟唔切佢嘅步伐，我爭啲俾佢好似放狗咁拖。

阿星落到去，即刻用佢籃球隊成員嘅身份攝咗個靚位。果陣嘅分數同頭先稍為拉近咗少少，阿南果隊而家只係差咗6分。而時間只係淨返2分鐘。但係佢地都打到喘曬氣，而對家仲係好處之泰然。我呢啲行外人都知佢地俾人㩒住嚟打。

「阿南加油！樂芷柔加油！」個波一出界，阿星就即刻大叫。

幫阿南打氣都只係順便，佢其實係幫佢嘅意中人樂芷柔打氣。由中二去到中四，佢同樂芷柔表白過九次，但都係俾人拒絕咗。不過運動人始終係運動人，果種天生屬於佢地嘅體育精神令佢仲未捨得放棄。

佢嘅大叫引起咗場上面嘅人注目，阿南都望咗過嚟呢邊。佢呆一呆，然後對住我笑咗一笑就重新投入賽事。

開波之後，對方喺三分線起跳投射，阿柔趁對方未跳起之前率先跳起拍走個波再即刻搶返主動權，阿南亦馬上向住對面籃底跑，然後接應阿柔喺半場嘅傳波，成功走籃，將比分拉至4分之差。

或者拉近分差令到對手都緊張起嚟，重新開波之後佢地學阿南上一球咁走籃，點知唔覺意走多咗一步，走步犯規。

阿南即刻大叫「上！」，佢嘅三個隊友率先跑去籃底。阿南同芷柔透過極佳嘅配合將個波送到去前場，速度之快竟然運精力充沛嘅對方都追唔上。佢嘅隊友喺接應下順利拎埋果兩分。

睇到咁緊張，我都不禁跟住阿星幫佢地打氣。原來打籃球果種追分嘅感覺真係會睇到人好緊張，唔怪得學校咁多人鐘意打籃球，果種揮灑汗水同埋團隊合作嘅感覺應該真係好熱血。

時間只係淨翻五秒，樂芷柔拎到波之後企喺三分區外起手，盡最後一次機會利用三分反勝對手。突然全場都靜曬，屏息以待咁見證住呢一球帶來嘅逆轉勝。
.
.
.
「你唔好咁唔開心啦！差少少之嘛！過程開心咪得囉！」比賽完結之後，始終現實唔係《黑子的籃球》，冇咁多奇蹟嘅壓哨球出現。最後球三分入唔倒，結果佢地都係以兩分之差落敗。阿柔因為內疚而崩潰大喊，而阿南就一路喺到安慰佢。

「喂，你女神喊仲唔去遞紙巾？」我同阿星講，佢只係喺遠處望住樂芷柔喊。

「吓...唔係咁好啊？由佢自己靜下先啦。」

「去啦婆媽！」我遞咗包紙巾俾佢，再推佢埋去。

而我都準備拎起書包走，但正當我起步行果陣...

「壞人！李卓正！」我擰轉頭望，原來係阿南嗌住我。

Lunch Break完眼瞓哋推一個

尋晚眼瞓得滯未打落去

吓冇㗎啦？

屌！睇睇下停咗

來了來了

「等埋我！」

「你唔洗安慰阿柔咩？」我問。

「唔洗啦，有人做啦！」原來阿星坐咗喺側邊一路遞紙巾，就好似逃學威龍2入面啊政治部大佬陪住朱茵咁。

「噢！」然後我繼續向前行。

「喂啊！」然後阿南繼續追上嚟。

「點解要一齊行姐？」

「有個伴嘛！」

一行出學校門口，就撞到學校嘅萬人迷，符文安。

「喂阿南，打得唔錯啊今日！」佢笑住同阿南講，又無可否認真係幾Charm。

「係咩，OK啦哈哈！」

「可惜輸咗，下年再嚟過啦。」

「唯有啦！」阿南答。

「好啦，唔講住！我都要翻去球場執埋啲嘢。」

阿南一路行一路喺到甜笑，似乎仲回味緊頭先同符文安嘅對話。

「又話唔嚟睇嘅？」阿南問我。

「阿星係咁拉住我囉。」

「哦...嘻嘻！」佢冇啦啦喺到傻笑。

「你笑咩啫？輸咗喎，咁開心嘅你？」

「今日決賽啦喎，輸咗都有亞軍啊！亞軍都好叻啦！」

「咁你又講到唔輸得咁？」

「比賽得緊係想嬴~同埋…啊嘛。」

「講咩啊你？」

「冇嘢。」

「痴線。」

傾傾下都好快去到地鐵站，上到地鐵之後，我見佢淨係著住件籃球背心，就拎咗件外套俾佢。

「喂。」我遞上外套。

「嘩，李壞人，暖男喎！」

「我廢事你病咗傳染我。」佢酒窩好似有啲泛紅，可能只係運動完之後嘅作用，但呢個樣嘅佢真係幾靚，令我一時間都眼定定咁望住佢。

「喂！作死你啊，眼都唔眨咁望住我！」佢發現咗我望住佢之後突然打咗我一下，將我喺對佢嘅欣賞中抽返出嚟。嗯，始終呢個粗粗魯魯嘅先係佢。

「唔望囉。」

「5紅1黑…飲啦你哋5個！」阿柔好興奮咁揭起張黑色牌，在場得阿星唔洗飲。

「頂，咁你都記得嘅？」連輸兩局嘅洛賓好痛苦咁問阿星。

「因為肚痛果個係我。」阿星答。「嗰陣佢喊到收唔到聲，仲話要食雪糕，咁咪去食囉。佢一次過就叫咗五杯雙球嘅，然後又自己喺到喊，咁啲雪糕一路咁融我咪食曬去囉…仲搞到肚痛咗兩日。」原來果日仲有個咁嘅下文，早知果日就留低睇下佢點食曬啲雪糕。

「哈哈哈，頂你個白痴仔！你家姐冇教你雪糕唔好食咁多咩？」洛賓好安慰咁講，似乎好滿意呢個答案。

「彈開啦你！下個啦！」阿星不忿咁講。

我望一望阿南，見佢個樣若有所思，唔知佢係咪都諗緊果日嘅場景？佢會唔會都記得有人喺地鐵站遞過件外套俾佢？會唔會都記得我哋喺車入面嘅打鬧？

「Oh，到我喇哈哈？！」抽中最大果張牌嘅洛賓講。

「你唔講啲爆啲嘅嘢你出唔到呢個門口。」阿雄語帶威脅。

「咁驚...好啦，我講啦。既然提起籃球賽，我記得之後我哋搞果個BBQ，果陣咪話要阿正你幫我做Wingman嘅，當日你駛開咗阿南之後，我同子晴其實...錫咗。」

如果係真嘅話，呢個真係一個令人好驚訝嘅秘密，但驚訝嘅係，洛賓竟然會主動重提返呢件事。

關子晴，應該係洛賓人生中最難以忘記嘅一個人。

「正哥！」

「閘住你！哥前哥後三分險啊！賓哥！」

「正哥！Let’s go to 燒嘢食！」見佢稟神咁，就知佢冇好大挈。

「有人知道子晴又去喎。」阿雄喺旁邊講。

「咁關我咩事？」

「再標青嘅飛行員都要有偉大嘅Wingman幫手，飛機先可以順利降落。正哥，你就係果個Wingman！」

「咩飛機咩Wingman，我唔明你講乜。」

「到時就靠你駛走阿南，等佢哋可以獨處。」阿星解釋，原來又想借我過橋...

「你搵佢哋兩個做你嘅左右翼啦！」我指住阿星同阿雄。

「唔得喎，阿雄都要做我Wingman纏住男人婆。」阿星沾沾自喜咁講，自從上次做完暖男之後，佢同阿柔嘅互動都多咗好多。

然後我望住阿雄，佢個樣突然變到上刑場咁，睇嚟都受咗唔少脅迫，先肯啃呢舊豬頭骨。

「你有嘢我都撐你，你唔係唔撐我啊？」洛賓開始連情緒勒索都用埋，我先發現，原來佢上次嘅支持係個大伏啊！

「撐...撐啦...撐啦。」 但我知佢唔係為咗利益先支持我嘅，況且對象係阿南，都唔算太難為。

於是果日，我哋呢個四男四女嘅奇怪組合就出發去到石澳燒嘢食。喺搭巴士果陣，阿星同洛賓仍然好安份咁同我哋一齊坐，佢哋話唔好太進取住，唔係會嚇親啲女仔。

「嚟，我攞！」落車之後，阿星自動波將啲重嘅嘢拎走曬，仲扮到唔覺意咁展露佢果隻麒麟臂，但唔知係咪太重，見佢都有啲辛苦。

「洗唔洗幫手啊？」阿雄見佢逞英雄逞得有啲吃力，就善意咁問。

「你得唔得啊，瘦骨仙，小心甩臼喎。」嘉慧又取笑佢。

「咩...咩唔得啊！」佢用盡全力拎起一包炭，個樣比起阿星更加唔掂，艱難地行咗幾步之後，嘉慧搶走咗佢手上包炭，輕輕鬆鬆咁行去燒烤場。

見到阿星同阿雄為咗小小面子而辛苦自己，我都冇眼睇落去，直接行去燒烤場。

「好彩今日係教師發展日唔洗返學！唔係都冇咁多爐燒嘢食！」望住一個人都冇嘅燒烤場，阿南好興奮咁講。

「一陣仲可以去沙灘玩！」子晴講。

「沙灘？！玩？！」阿星同洛賓即刻色瞇瞇咁，實係幻想緊班女仔著住三點式，碧波蕩漾咁喺沙灘跑嚟跑去。

「喂阿星，你估我哋邊個透爐透得快啲？」嘉慧同阿星講。

「試吓咪知！」好勝嘅人真係可以咩都鬥一餐。

不過連透爐都有人負責，我同阿雄就攞正牌喺側邊休息。好快，阿星已經透好個爐，令嘉慧都十分佩服。

「咁嘅料都學人挑戰。」阿雄撓住腳，拎咗把電風扇出嚟吹。

「好過你個乸型坐喺到咩都唔做啦！」被嘲笑嘅嘉慧當然唔忿氣咁講。

「你都得㗎，你多事之嘛。」阿雄輕佻咁講，唔知佢係咪真係俾阿雄激親，見到嘉慧好似真係嬲到頭頂出煙咁。

「你哋成日都嗌交㗎！」洗好啲肉丸嘅阿南咁啱返到嚟講。

「咪係，出嚟玩開心啲嘛。」子晴都喺側邊搭訕。

「係囉係囉，鬧得太僵都唔好嘅。」阿星向阿雄打曬眼色咁，應該係擔心呢個Wingman會阻礙到之後嘅行動。

當準備好曬啲嘢之後，大家就開始圍埋一齊燒嘢食，其實果日天氣都幾凍，凍到我唔係好想講嘢，我都唔明白點解要應承佢哋出席，諗返起都覺得自己戇居。相反阿星好努力咁諗唔同話題，令到個氣氛唔會太尷尬，畢竟我哋同班女仔都唔係話好熟，只不過當時正值青春期，大家總會渴望同異性接觸多啲，尤其有啲係自己鐘意嘅女仔。

「嗯，啲雞翼好好食！」阿柔拎住隻雞翼，津津有味咁講。

「真係㗎？我自己醃㗎！」聽到女神稱讚，佢即刻好雀躍咁回應。

「咁勁？下次教我啊！」

「冇問題！」佢拍一拍心口，開心到好似中咗獎咁。

「我又學~」阿雄喺佢隔離嗲，把作狀聲真係聽到人起雞皮。

「你俾人叉住嚟燒金沙骨就得。」嘉慧講，聽到呢句，我都忍唔住笑咗出嚟，佢哋幾個更加笑到停唔到，令成功報仇嘅嘉慧笑到見牙唔見眼。

燒到一半，阿星同阿雄話落沙灘打排球，熱愛運動嘅阿柔同嘉慧即刻響應。得返我哋四個留咗喺爐到繼續食嘢。

「你唔去打？」子晴問阿南。

「唔打喇，上次打決賽隻腳仲痛緊，休息下好過。」

「係喎，我哋個Presentation諗住點分配？」洛賓突然問，我先發現淨低落嚟嘅就係我哋幾個同組嘅。

「個Present主要都係想我哋講返呢兩次探訪嘅過程同得著，我諗住每人可以講一件發生喺大家同小朋友之間嘅有趣事，再帶出從中學到啲咩。」阿南答。

「都好啊，我同芊芊有好多搞笑嘅嘢可以講。」子晴和應。

佢哋一邊講，我依舊喺身邊聽，哈哈，我就係無恥嘅Freerider。

傾到半路，都係時候製造一啲獨處機會俾洛賓同子晴。於是，我硬住頭皮「邀請」阿南同我一齊去睇日落。

我哋都落咗沙灘，搵咗個無咩人嘅空地坐。佢一嚟就除咗對鞋，將對腳插咗落堆沙，再堆埋去。

「咁樣暖啲。」

「會㗎咩？」我問。

「會啊，唔信你試下。」之後我就學佢咁做，點知一啲感覺都冇。

「哧，咁你都信。」佢嫣然一笑，夕陽照射佢密長秀髮之下輕露出嚟嘅小臉龐，雖然不至傾國傾城，但仍然非常迷人，隱約見到佢笑起上嚟嘅小酒窩，更多添幾分可愛。

每次望到佢嘅樣，心底都會有一種唔識形容嘅感覺，總係好似有啲窒息。所以我都即刻望返個日落，唔俾自己亂諗嘢。

「做咩啊？好悶啊？」一輪沉默之後，佢問。

「還好。」

「咁你唔出聲嘅？」

「諗唔到講咩姐。」

「我發覺每次你喺我哋面前都好少講，係同佢哋幾個男仔一齊先會多嘢講。」

加速

Lunch Time 係打文嘅好時間