【正廢柴】想溝到女千祈唔好學我咁

歡迎

係咪中晒

點會

TVB 劇情 阿南老母 同主角老豆結婚

有文未

做生意喎
咁咪變咗果套 繼母的拖油瓶是我前女友

「好啊，靠你延續唔同病人嘅生命喇。」從阿爸嘅回應中，佢好似幾欣賞阿南。

「但你最犀利嘅，都係一個人養大阿正。」阿南突然講。

「咁佢又唔難養嘅，由細到大都算乖，除咗性格係怪咗啲。」

「改咗好多㗎啦！」阿南為我護航。

「咁係因為阿南你姐，喺學校靠你睇住佢喇。」老豆都睇得出，我近來嘅轉變好大原因都係因為阿南。

「一定！」阿南搭住我膊頭，單曬眼咁講。

食完飯之後，阿南同我幫手洗碗，而老豆就去咗沖涼。冇幾耐，佢就返咗屋企，老豆都邀請佢下次再嚟食飯。其實佢喺到嘅短短幾個鐘，屋企出現久違十幾年嘅熱鬧，所以佢就走咗之後，呢到再次變得寂靜，缺乏生氣。

「阿南唔錯，幾純品。女朋友？」當我坐喺梳化玩電話嘅時候，老豆攞咗兩罐啤酒過嚟。

「唔係啦，只係同學。」

「唔止帶過返嚟屋企一次喇喎。」佢將啤酒斟落個酒杯，再遞俾我。

「你唔洗返工咩？」我問。

佢擰擰頭：「聽日放假。」

「佢屋企早排有啲事，所以先借宿一宵。」我答返佢嘅問題，我估佢打掃嘅時候，已經一早發現有啲殘留落嚟嘅長頭髮。

「你有冇意思先？」佢問，但我冇答，只係攞起酒杯飲酒。我發現一遇到唔想答嘅問題，我就會不自覺咁樣做。原來呢個習慣，由果陣時已經開始。

「你由細到大，見圍住你嘅朋友都係阿星阿雄佢幾個，從來都冇見你提起過有女仔朋友，仲要每次提起你學校啲女仔，你都會好唔耐煩咁。」

「我知道唔係啲女仔衰，係你忘記唔到你阿媽，所以先對啲女仔咁有戒備係唔係？」

「係。我好憎佢嘅不顧而去。我曾經以為，所有女仔都會好似佢咁衰。」今次我冇逃避到，而係好咁肯定咁答。我諗，大概都係因為阿南俾呢個勇氣我去面對過去。

「講個秘密你聽，但呢個秘密可能會令你仲痛苦，你會唔會想知？」

「想。」

「其實當年我先係你阿媽同果個男人之間嘅第三者。」

「吓？」

「當年佢哋有一啲誤會而冷戰，喺你阿媽好傷心嘅時候，我先乘虛而入。人喺痛苦嘅時候最容易做錯決定，佢轉投咗去我懷抱，之後仲結婚、生埋你。直至佢哋重遇，搞清楚所有誤會，先發現原來彼此仲係好鍾意對方。」

「咩誤會？」

「咩誤會唔重要，重要嘅係，既然上天安排佢哋嘅重遇，就代表佢哋先可能係最應該一齊，我始終都只係一個過客。」

「大曬啊？就可以丟低我哋唔理咩？」我好冷靜咁問。

「其實佢咁多年嚟都唔見你，係我嘅要求。做錯嘅人係我，我唔想我同你嘅存在再令佢有啲咩牽掛，而且我相信我自己係可以養得起你。」

要求佢就應承，都唔知話我阿媽係守諾定殘忍嘅人好。不過唔知點解，我半點嬲嘅情緒都冇。

仲覺得，原來真正嘅聖人模式，先係我老豆呢隻。我都唔能夠相信，真係可以有咁偉大嘅人，將平日對病人嘅大愛應用埋落家庭。

我只係覺得好笑，原來我嘅存在，係一個錯誤嘅決定。

甚至覺得，如果冇咗我，可能成件事會簡單好多。

「恭喜你做到。」我同佢碰杯，當然我知道佢嘅唔容易。當年我細個，佢每日返工嘅時候我就喺住附近嘅阿星屋企逗留，直至佢放工先會湊返我。到我大個啲，可以獨立少少嘅時候，佢已經變成更加忙嘅人，成日要出席唔同會議同演講，返到嚟仲要煮飯，講真父親呢個角色，佢真係滿分有突。

聽完佢咁講，我先發現，一個啱嘅人同啱嘅時間，對於一段關係係幾咁重要。我發現身邊真係好多錯配嘅人同事。子晴同洛賓、阿星同阿月、老豆同老母...如果佢哋都可以喺啱嘅時間遇到，會唔會就少好多痛苦？

洛賓同阿星我唔知，但至少我估我會喺一個比較快樂嘅家庭長大。

不過唔係因為呢個背景，又未必會拉近好多我同阿南嘅距離，所以你話係好定差，我都冇辦法俾一個正確嘅答案你。我淨係知道，對嘅人我已經遇上，唔想再錯失對嘅時機。

好文留名

感謝

原來100正皮了
感謝大家
下個目標可能係100淨正皮
期待一下

加油樓主，睇到live左

有文未

多謝支持！

嚟緊！

「仔，我試過同唔同女人開展關係嚟麻醉自己，但始終冇一個可以代替你阿媽嘅位置，佢真係我最愛最愛嘅女人，當你遇上你鐘意嘅人，你千祈唔好放手。」

「你又話女人信唔過？」我問。我唔明白點解佢咁鼓勵我爭取。

「我幾時有講過？」

「我細個你飲醉講囉。」

「飲醉講嘅嘢你都信？」

「咩唔信啊，我信咗十幾年啊。又話酒後吐真言？」

「你未醉過你唔知，係『借醉後吐真言』，真醉嘅人講果啲一律當係廢話就得。」

我最無言以對嘅，竟然係呢一刻，為咗佢一句醉咗之後嘅「廢話」，令我耿耿於懷咗十幾年。

「好好笑啊老坑？」我忍唔住挖苦佢。

不過因為老豆嘅鼓勵，我腦中竟然真係...泛起表白嘅念頭。聖誕節、禮物、浪漫時刻，一定係表白嘅好機會！

「送咩好！送咩好！」之後，我馬上召集佢哋幾個，睇下收集倒咩意見。

知道咗我打算表白之後，阿柔同嘉慧亦都話要傾埋一份，佢哋係阿南最好嘅朋友，我當然求之不得。

「手作嘢囉，有心思。」阿星率先講。

「唔係個個都好似你咁又識整蛋糕又識織嘢。」洛賓回應。今次我撐佢，咪睇阿星大大隻隻，但如果學校有家政科佢應該年年考第一。

「送個簽名嘅籃球俾佢夠有紀念性！佢又鍾意打籃球。」嘉慧建議。

「我又唔係球星，簽個名上去做咩？」我問。

「有冇啲咩喺你哋之間係好有回憶嘅嘢嚟啊？呢樣應該得你自己諗到。」阿雄講出一樣好重要嘅嘢。

好重要嘅嘢…

雖然我同阿南之間好似發生過好多事，但又好似冇乜邊樣係可以用一個物體去紀念住。

「你聽啦，好聽㗎！」

「我唔聽流行曲。」

「第二個你可以唔聽，但Eason真係聽得過呢！」

「唔要。」

係喎，佢鍾意陳奕迅。

「我尋晚終於睇倒陳奕迅個演唱會！好好睇啊真係！」

「你完夢啦，終於睇倒。」

「最衰睇得一場！首大開眼戒真係唱得好好聽！」

佢曾經為咗睇陳奕迅通宵去排隊買飛，我果晚仲同佢Whatsapp咗成晚。

「懷著樂觀總有轉機啊嘛，我自有方法。」

「你…唔係唔聽陳奕迅㗎咩？噻…」

「你講到咁好聽，咪聽下囉。」

「衰人、壞人、仆街！」


仲因為陳奕迅，先可以令我氹返嬲咗我嘅佢。

「你哋話，如果我錄一首陳奕迅嘅歌俾佢，佢會唔會感動？」我對住大家問。

「嘩...正哥你真係變喇。」洛賓嘆曬氣咁講。

「真啊，竟然會為咗個女仔做呢啲嘢。」阿雄都附和。

「但係你五音不全㗎喎師兄！」阿星講出咗個重點。

「好嘢喎李卓正，有勇氣！我撐你！」竟然第一個鼓勵，會係喺嘉慧口中得到，呢幾個人真係禽獸不如啊。

「點撐，得返咁少時間真係做倒咩？」阿雄依然喺到潑冷水。

「咳，係時候我呢個Sing Con冠軍出場嘅時候。」阿柔突然坐直個身咁講。

「係喎，有阿柔幫手實掂喇！」嘉慧好激動咁講，仲激動過我呢個當事人。

「哈，希望阿南聽到果陣唔會嚇到即刻燒咗隻碟。」洛賓依然喺到蹂躪我。

LM
樓主好似真係寫得有啲太仔細 唔通學其他人講 係你個人經歷

有啲係有啲唔係最主要係因為想大家睇果陣個代入感強啲 所以寫得仔細少少
但係咪有啲冗長