【正廢柴】想溝到女千祈唔好學我咁

李卓正 = 田一榮

live左 暫時都幾好 加油

可能係我問題
開始有啲亂 唔記得邊個打邊個

留言

感謝

開心仔

加速加速
好睇

今晚今晚

此話一出，啲雄性動物嘅眼神由色迷迷，馬上變得兇悍咁望住阿星。反之阿星目無表情，完全冇因為呢一隻浪蝶作出嘅主動而興奮。

「咁...莊偉雄你介唔介意？」

「都...唔介意嘅。」阿雄望一望阿星，見阿星冇任何表示，就應承咗。

「咁太好啦，你就坐去嘉慧隔離嘅空位啦。」

「吓！！！」

原來邵月，係因為阿星而轉校。佢係阿星上次籃球比賽嘅觀眾。阿星喺果場比賽其實冇符文安講到咁廢，而且表現唔差得過符文安，所以吸引到嚟睇波嘅阿月。佢足足糾纏咗阿星一個暑假，講得糾纏，當然係因為阿星完全對佢冇興趣，佢嘅心神只係會花喺阿柔身上。

「嘩，呢條女都幾癲，為咗呢樣嘢而特登轉校。」當阿星向我哋講返前因後果之後，洛賓講。

「都話咗女人係恐怖嘅生物。」我答。

「係啦係啦，而家你得阿南係好女人嚟㗎姐。」阿星嘲笑我。

「唉，點解我阿媽叫我打乒乓而唔係打籃球。」阿雄講。

「你要攞去。」阿星毫不留戀咁相讓。

「唔洗啦，已經有人出手。」阿雄指出窗外，見到符文安已經向阿月搭訕緊。

見到呢個情景嘅，仲有坐喺課室嘅子晴，從佢嘅神情睇得出，佢好努力去遏止自己嘅情緒，只不過仍然滲透咗一份黯然神傷。

「算啦，唔值得。」當我返埋位經過子晴嘅位置，順便同佢講。

講到尾，佢都係呢場遊戲嘅其中一個輸家。

插班生嘅出現，令班級呢幾日都引起唔少哄動，特別係我哋班，每日門口就好似變咗個動物園咁，大家都想觀摩一下插班生嘅絕世容貌。

而插班生，就每日跟住阿星，佢去到邊就跟到邊，仲要撓到佢實一實。當中更經常將果對偌大嘅胸脯壓落佢手臂，但收到咁大塊波餅嘅阿星仍然不為所動。大家都唔明白，呢個單細胞運動白痴，究竟做咗啲咩好事，先惹嚟呢個人間凶器嘅痴纏。

「禮拜日我去探班小朋友，你要去嗎？」有日放學，我同阿南要做值日生清潔課室，抹抹下黑板，佢突然問。

「OK。」

「嗰個新嚟嘅插班生，同阿星好熟㗎？」阿南都忍唔住問。

「唔算。」

「唔算？」

之後我就將件事一五一十咁講俾佢聽，佢聽完之後都呆咗。

「咁都好啲。」佢之後答。

「？」

「至少佢仲係鍾意阿柔啊，少啲定力都會死喺呢個女仔手上。」

「都係㗎。」

「你都要啊，唔好辜負任何女仔啊知道嘛。」佢突然同我講。

「又關我事？」

「唔關啊，提醒你之嘛！」佢答。

「無聊。」

「壞人啊。」隔咗一陣，佢突然又叫我。

「嗯？」

「男仔係咪都鍾意呢啲又靚身材又好又會投懷送抱嘅女仔？」

「係掛，日日門口都咁多狗公。」

「咁你呢？你係咪都鍾意呢啲？」

「零感覺，心哋好就夠。」我答，好似我老母咁，靚又如何，只係紅顏禍水。

「咁我呢，心哋好唔好？」佢用個好盼望嘅眼光望住我問。

「算唔錯啦。至少仲記得班小朋友。」我答。

「咁…」之後佢就冇再講嘢，好似硬生生將想問嘅嘢收返落肚。

當我哋清潔好課室一齊離開嗰陣，竟然意外見到一幕…

「阿柔！阿柔！」一落到去，就見到阿月同阿柔講緊嘢，講講吓，阿柔仲好失落咁離開。阿南見到阿柔嘅異狀，即刻追住阿柔睇吓咩事。

「爭都唔同我爭下，No Fun。」正當我打算離開，經過阿月嘅時候，佢出聲講。

呢個人，應該好享受贏嘅優越感。

「我唔會將你嘅說話話俾阿柔聽㗎喎。」表面上佢係自言自語，但我聽落似係專登喺我經過嘅時候講。所以踏出校門之前，我轉身答佢。

「嘛，幾聰明喎，激將法冇用添。」佢輕佻咁回應。

「唔好嘥時間啦，你唔會追到阿星。」

「未有結果邊個知！」

「咁你試下囉。」我答，之後我就離開咗。但佢隨即大叫：「好啊！我一定會追倒阿星俾你睇！」

「頂，又喇屎上身。」我心暗忖，明明啱啱仲睇得出佢係唔激得嘅人。

「阿柔點？」返屋企果陣，我Whatsapp問阿南。

「佢扮冇事，仲話唔會擺阿月嘅嘢上心。」

「即係點？」

「即係會讓阿星俾阿月。」

之後佢再解釋多啲，自從上次輸咗籃球賽，阿星一直陪住阿柔之後，阿柔都開始俾阿星打動，亦都有發出過唔同嘅暗示俾阿星，阿星就好似個傻佬咁錯過曬。

阿星佢，以為因為有三個家姐就好了解女仔，其實對女仔嘅理解同我一樣咁少。

等我整個人物介紹先

主角阿正：阿南口中嘅「壞人」，單親家庭長大，自小對異性好抗拒。讀書幾叻，尤其作文。性格比較內斂被動，對任何事亦都缺乏興趣。

三個死黨：

阿星：單細胞運動白痴。頭腦極度簡單，高大健碩，非常講義氣。雖然係鐵漢但有好柔情嘅一面。由小學開始已經鍾意阿柔，表白過好多次都失敗。

阿雄：比較女性化同瘦弱，話唔多，但永遠都會用行動支持朋友。性格樂天，就好似四兄弟之間嘅潤滑劑。乒乓波高高高手，喺學界薄有名氣。

洛賓：口沒遮攔，性格大情大聖。無論做啲咩都唔係最顯眼果一個，但一直好努力去證明自己。


女主角阿南：集善良、美麗、善解人意於一身嘅美少女。曾經被阿正討厭，但因為各種優點而改變阿正唔同嘅習慣同看法。

阿柔：身材極好嘅靚女，同阿南一樣係籃球隊嘅隊友，高中同主角群唔同班，但因為同阿南嘅熟絡而一齊玩。性格比較冧善同優柔寡斷，所以喺同阿星嘅關係上都兜兜轉轉咗好耐。

嘉慧：係一個極度男仔頭嘅女仔，同阿雄截然不同，亦睇唔起阿雄嘅柔弱，但後來點解會一齊咗，並且可以走到婚姻殿堂？咁就拭目以待。

邵月：為咗阿星而轉校過嚟嘅女仔，擁有不亞於阿南嘅美貌，同埋唔輸洩俾阿柔嘅魔鬼身材。但比起佢哋更多添一份神秘感。

仲有子晴

「或者冇阿月都係嘅。」但當愛苗開始培植，又突然殺出一個程咬金。

「有咩關係？」

「愛情係兩個人嘅事，點容納倒第三個人？」

「佢哋唔理嘅話，呢個第三人根本形同虛設。」

「你咪睇吓會唔會。」

去到第二日，阿月嘅攻勢仲更加明顯，幾乎阿星去邊佢就會去邊，而且佢開始整埋飯盒俾阿星食，阿星又出奇地肯食。

「點啊好唔好食？」阿月問。

飯盒入面係個燒鰻魚丼飯，我哋望住自己果盒叉雞飯，再聞到果浸鰻魚香味，終於明白咩叫同人唔同命。

「還好啦。」

「咁我聽日再整你食！」阿月聽到之後好開心咁講。

「唔洗喇掛？」

「得啦得啦！唔洗唔好意思！」然後佢就拎咗個飯盒出去洗。

「星哥估唔到你會食佢個飯盒喎。」阿雄講。

「食得唔好嘥啊嘛。」

「咁佢呢？係咪都食得唔好嘥？」阿雄再問。

「咁又唔會！我唔會出賣阿柔㗎！唔會唔會。」佢好堅定咁講。「呢啲女仔俾啲甜頭佢，再狠狠地拒絕佢，佢就會知難而退。總之就禮物照收，態度照舊！」

「你家姐教你㗎？」我問。

佢冇答到，只係羞慚咁點點頭。

「咁咪即係收兵。」

「我都冇辦法啦！唔係唔洗俾佢纏住咁耐。」

「阿月去咗搵阿柔示威啦，你再唔做嘢就係咁先。」我講。

「吓，佢講過咩？」阿星好焦急咁問。

「都係果啲例牌對白，話會搶走你，唔會俾你同阿柔一齊之類啦。」

「唔係掛？」

「其實你同阿柔係點㗎姐？」洛賓問。

「我都唔知，每次以為自己有機會果陣，又好似冇咁。」佢語帶無奈咁講。

「吓？你想講咩？」洛賓反問。

「我都唔知啊，硬係每次都尷尷尬尬冇咩嘢講咁。」

「咁你就要諗定講咩啦，人哋行緊過嚟。」我將眼角瞟向課室門口，阿南同阿柔行緊過嚟。

但當阿柔望到阿星果陣，大家嘅神情即刻變得有啲不知所措。

「有咩講啊？」阿南行到埋嚟問。

「阿星囉，頭先體育堂做熱身果陣用錯力拗親條腰喎！」阿雄突然講。

「冇嘢啊嘛？」阿柔問。

「冇...冇嘢！」阿星聽到阿柔咁問，有啲灰心咁答。

「我有枝藥油喺書包，平時打波準備定㗎，借俾你用啦！」講完之後佢就去咗攞。

周日推一推

推呀

推

推

「有機喎有機喎！借藥油啦！」阿雄好興奮咁講。

「痴…痴線！」阿星一邊否認，但佢上揚嘅嘴角已經出賣咗佢。

「你搞掂你啲蘇州屎先啦！」阿南一盤冷水兜頭淋醒阿星。

「乜你咁㗎，鼓勵吓朋友好冇？」我講笑咁講。

「我怕你哋到時失望炸。」表面上嘅一句提醒，言詞間，阿南已經暗示咗阿柔嘅想法。

「欸…欸，至少佢都肯借藥油俾你啊，情況都唔係好差姐。」阿雄打圓場咁講。

「咩唔係好差？」阿柔呢個時候都翻咗嚟，一臉疑惑咁問。

「阿…阿星囉，佢怕條腰以後廢咗。」我衝口而出，佢哋個個都呆咗咁望住我，果然執生呢啲嘢唔係我專長。

「喔…唔洗怕，我呢支藥油好有效。」

「做咩要搽藥油啊？你整親咩？」洗完飯盒嘅阿月咁啱返到嚟。

「你搽完俾返我啦。」阿柔好失落咁講，然後就返佢自己課室，明眼人都睇得出佢嘅妒忌。

「冇冇冇...嘢。」阿星泄曬氣咁講。

我：「原來真係會影響。」我Whatsapp講。

南：「話咗㗎啦。」

我：「咁點算？」

南：「由得佢哋自然發展啦。你記得禮拜日去探班小朋友啊！」

係喎，差啲俾阿星嘅事搞到唔記得件事添。自從應承咗龍Sir，我同阿南有遵守到諾言，定時去到孤兒院探班小朋友，久而久之，亦成為我同阿南嘅「專屬約會」。

「南姐姐，正哥哥！」一去到孤兒院，若儀就馬上衝過嚟攬住阿南。

「嘩，你洗唔洗咁熱情。」我取笑若儀。

「𡃁妹今次考咗第三，話要第一時間話俾你哋聽。」龍Sir喺若儀身後講。

「咁叻啊若儀，獎你嘅！」阿南喺袋入面拎咗份小禮物俾佢，係一個精緻嘅收納盒。

「聰聰呢？」我問。

「佢今日有啲唔舒服，所以休息緊。」