【正廢柴】想溝到女千祈唔好學我咁

「我哋可唔可以去睇佢啊？」阿南問。

「都得嘅，但佢好似瞓緊覺。」

當我哋入到聰聰嘅房間，見到佢頭上貼住散熱貼，狀甚痛苦咁。

「爸爸...爸爸...」佢喺到發開口夢，或者佢再次夢見到佢爸爸。

「爸爸...正哥哥...玩...」喺佢矇矓之間，竟然都提起我個名。

「傻仔已經當咗你係哥哥咁，成日都會提起你。」龍Sir同我講。

「證明壞人你對佢嘅好佢都感受到。」阿南答。

「佢喺孤兒院乖唔乖？」我問。

「都係好百厭囉，但都比以前聽話咗好多，近排都有人過嚟睇，有對夫婦對聰聰都幾深印象。」

「所以佢有機會俾人收養？」

「唔係咁容易㗎，有好多手續。」龍Sir解釋。「但都要睇下佢自己嘅意願。」

「希望有機會嘅話佢會有好錫佢嘅屋企人照顧佢啦。」阿南講。

「我哋唔好阻佢休息啦。」我講，之後我哋就出咗去同其他小朋友玩，玩咗一陣，我已經攰到要休息，相反阿南仍然係精力充沛。

「咁渣㗎，男仔！」龍Sir都特登過嚟取笑我。

「少運動，頂唔順。」我答。

「但都多謝你仍然出心出力嚟探訪嘅，你知嘛，你同第一次嚟果陣唔同咗好多。」

「有咩唔同？」

「笑容多咗，而且係由心而發嘅笑容。」佢咁講，令我都諗返起當初嘅面無表情，成為聰聰討厭我嘅原因。

「或者人大咗，所以豁達啲。」

「定俾某人改變咗啊？」佢問，然後將目光，轉移到阿南身上。

「佢？」我問。「或者啦，你睇佢永遠都係咁好精力，好似唔會攰咁。」望住阿南咁全情投入咁同班細路玩，不禁都令我諗返起呢一年嚟佢喺我身邊發生過嘅事，每件事都令我有所改變，變得冇咁懶散、冇咁我行我素。可能冇佢嘅出現，我仍然只係果個，麻木地虛度每一日嘅人。

「有啲人唔會輕易喺其他人面前展示佢嘅軟弱姐，會嘅話，都係因為相信佢。」龍Sir答。

「係咩，咁睇嚟佢唔係好信任我，哈哈。」

「點都好啦，捉緊眼前人啊。」佢講。

「龍Sir你今日係咁亂講嘢嘅？」

「大家男人，唔畫出腸啦。」

龍Sir嘅說話，喺我腦中揮之不去。我對阿南嘅感覺係唔係「喜歡」？我都唔太清楚，甚或可能只係一種感激，感激佢令我改變咁多，幫助我，亦可能只係佢樂於助人嘅慣性。

「係囉，佢對個個都咁好㗎啦。」我喺心入面安慰自己。

「喂！壞人！李壞人！」喺離開嘅路上，阿南突然叫住我。

「嗯？咩？」

「做咩發曬呆咁？」佢問。

「冇啊，攰姐。你唔攰咩？」

「攰啊。」

「咁咪係囉。」

「喂，你睇吓，個日落好靚，仲靚過上次沙灘果個！」佢衝咗去石堤，坐咗喺啲石上面。

「上次果個同呢個咪又係同一個。」我講。

「你知唔知道，要睇到日落係好唔容易嘅事，好多人要特登去唔同嘅地方捕捉佢，就算去到都未必見到。」

「洗唔洗啊，都唔係好特別姐。」

「點會唔特別，每日個日落時間、位置、色澤都唔同，每一日嘅日落都係唔同嘅景色。同埋同唔同人睇都有唔同感覺啦！」

「同你啊，零感覺。」我口是心非咁答。

聽日又係禮拜一
又要返工鳥

好眼瞓

Ching 番工都要出文架

咁harsh㗎咩
不過都有打吓嘅

扮harsh黎側面反映比你g你啲文有令人追的動力

原來係咁多謝你

我會

「死啦你！」佢好大力咁打我背脊。

「啊！！」我忍唔住大聲咁叫咗出嚟。

「啊！Sorry Sorry！係咪好痛啊？」佢俾我嘅叫聲嚇親，即刻笠曬水咁問。

「冇事啦，玩下姐。」我答。

「你個壞人！」佢又想一掌打落嚟。

「唔好啊！再打就真係痛。」

「好，放過你！」

雖然我覺得日落係一樣冇乜特別嘅事，但我哋都仍然並肩坐咗喺石堤，望住個太陽慢慢咁消失。

忽然，我膊頭感受到一陣重量，原來阿南不經不覺間瞓著咗，仲挨咗落嚟。

「白痴。」今次應該係我第二次望住佢瞓覺，佢靜落嚟嘅樣真係好甜美，就好似一隻純真嘅小白兔，令人不自覺咁產生好想保護佢嘅想法。

「有啲人唔會輕易喺其他人面前展示佢嘅軟弱姐，會嘅話，都係因為相信佢。」

龍Sir嘅說話再次喺我腦中響起，一直以嚟，佢都好似好堅強咁支撐住所有人，喺籃球隊成為領袖、幫助Miss Lam建立手球隊、阿柔唔開心馬上去陪佢，仲有...我。

唔係佢，我仲係一個唔明白人生有咩意義嘅廢人。

「就等我嚟支撐返你啦。」我細細聲咁同佢講。

「喔，有板有眼喎，賓仔。」有一日放學，應阿南嘅要求，我留咗喺學校幫手球隊整合物資，順便睇吓佢哋嘅練習。

佢哋即將迎接第一場正式嘅比賽，所以好多隊員都好落力練習，尤其係洛賓。

「緊係，我唔要再做後備啊。」佢眼神充滿幹勁，識佢咁耐都未見過佢咁認真做一件事。

「你一定得嘅。」我鼓勵佢。

「唔止我啊，你睇吓果個。」佢指向球場，赫然見到阿雄喺場上練習。

「吓，佢幾時都加入埋手球隊？」我問。

「唔知喎，有一日佢突然話想入嚟打，話玩厭咗乒乓。」

「都正路嘅，學校乒乓波邊個夠佢打？」阿雄小學嘅時候已經幫學校攞個學界冠軍，係薄有名氣嘅乒乓球手，當初手球班招募嘅時候，阿雄連續受到校隊成員挑戰依然可以全身而退。

當喺一個領域做到最勁果個，就係時候尋找新挑戰嘅時候。

「等陣，之前佢唔係話有機會打上青苗咩？」我問。

青苗，你可以當係香港代表預備隊，即係類似踢波果啲青訓。

洛賓聳一聳肩，表示唔清楚。

但又估唔到，弱不禁風嘅阿雄，纖小嘅身形竟然係個優勢。見佢喺球場上左穿右插，同以速度見稱嘅胡一刀默契極佳，多次攻破球門。

「喂！仲傾偈！啲號碼衫執好未啊？」遠處嘅阿南大叫。

「你女神呼喚你啦。」洛賓講。

「死啦你！」不知不覺我連阿南嘅口頭禪都學埋。

「喺到啦。」我將一堆摺好嘅號碼衫放到佢面前。

「又摺得幾整齊喎！」

「單親家庭嘅優勢。」我自嘲。

「經理有冇水飲啊！」無耐，練到一身汗嘅球員們走過嚟搵阿南。

「有啦有啦，呢到！」佢逐支逐支遞俾佢哋。

「有勞啦姑娘。」胡一刀接過水樽之後，同阿南講。

「刀兄客氣客氣。」阿南都拱手回應，佢話呢個係佢哋獨有嘅溝通方法，原來佢接任球隊經理之後，同胡一刀亦變得熟絡。

唔知點解，得悉佢哋有一啲獨特嘅共同習慣之後，心入面竟然會有啲酸溜溜嘅感覺。

到咗第二日比賽，因為比賽球員有幾個都係我哋班嘅同學，加上教練更係班主任Miss Lam，所以阿南拉大隊，召集我哋班嘅同學落操場支持。

我同阿星當然義不容辭，畢竟兩個兄弟都係主力之一，估唔到嘅係，子晴亦有嚟打氣。

「多謝你喎。」我同佢講。

「我都希望佢贏。」對洛賓嚟講，贏得呢場比賽，就證明咗佢都有能力，唔係只係一塊當後備嘅材料。

比賽開始前，球場上嘅球員都蓄勢待發，阿雄暫時坐喺後備席，而洛賓同胡一刀係首發成員之一。手球同其他球類一樣，目的都係鬥將個波打入對方龍門多。唔同嘅地方，係規則相對地多，喺相對狹小嘅賽場上更加容易犯錯，所以更需要隊友配合，去突破對手。

一開波，洛賓同其他隊員馬上拉開進攻線，球員之間分散嚟企，採取大幅度嘅傳球方式，一路推至內線，再傳俾內線球員侍機進攻。而胡一刀就企喺較後嘅位置，以防止敵方嘅反攻。相反，對方喺防守上唔太雀躍，好似故意放寬空間俾我方球員進攻。

睇到對方防守上嘅消極，洛賓都有啲遲疑，生怕一唔小心就會跌落對方陷阱。

「賓仔試下進攻！」Miss Lam喺場外大叫，於是洛賓從外線走到進攻區域，接應隊員傳球之後，透過兩步助跑起跳，再出力將球擲向龍門。但射球輕易被龍門撲出，我方隊員即刻搶返個波，再嘗試射門，結果亦同樣被龍門救駕。頃刻發現，對方並唔係疏怠，而係對鋼門充滿信心。

喺短短時間內，佢哋不斷嘗試射門都係無功而還，但體能就急速下降。

「到我哋喇！」鋼門傳球俾敵方球員，敵方前鋒8號球員大叫：「H！」，然後連同兩條邊線嘅球員馬上衝上前，途中不斷橫向交換傳球。溜後嘅胡一刀霎時間亦判斷唔倒應該防守邊個。

「胡一刀，你左我右！中間等恆仔守！」回防嘅洛賓下達指令，同胡一刀合力抵制邊線球員，並將中間嘅進攻留俾龍門恆仔防守。

可惜恆仔唔同對面鋼門，只見8號仔將眼神同手向龍門左方揮向，令恆仔誤以為佢會向左角投射，當恆仔向左方撲救果陣，再突然將手腕拗向右方，令球往右角直飛，輕易破網。

「唔緊要！繼續試下！用丫叉！」Miss Lam喺側邊好肉緊咁指揮，同平日斯文嘅佢截然不同，可見佢對手球隊真係投放唔少精力。

我地隊繼續從外線嘗試進攻，但今次不斷收窄傳球路線同走位，將對面防守隊員嘅戰力向中間收縮，從而獲得更大嘅進攻空間。

「呢到！我嚟射！」洛賓大叫，然後隊員就將波傳到佢手。佢再次嘗試起跳，鋼門亦專注防禦佢。佢先用大幅度嘅動作欺騙鋼門，再馬上傳俾正跑動嘅隊員，隊員輕輕一拋，終於成功將球打進龍門。

「勁啊洛賓！Fake得好！」阿雄即刻喺後備席彈起大讚，Miss Lam亦都拍手鼓勵。

從開戰到而家，洛賓係我哋隊最活躍嘅成員，策動咗唔少嘅戰術，雖然未必每次奏效，但已經成為進攻核心，球員亦因為入球而士氣躍升。接下嚟球隊越打越順，雖未至到同敵隊平分秋色，但亦可以避免比分越拉越遠。

寫咗好耐嘅一段唔知寫成點
但一直都想試吓寫啲比賽片段
算係小試牛刀

比賽嘅下半段仲未寫好
俾多些少時間我

喺半場休息時間，Miss Lam亦不斷調整策略，將胡一刀同洛賓嘅位置調換，令洛賓可以暫時從高壓跑動中喘息。亦希望透過胡一刀嘅速度將體力漸耗嘅對手進一步逼壓。而呢個決定十分正確，下半場開始之後，就成為胡一刀一支獨秀嘅時刻，兼具力量同速度嘅佢令對手不得已加強對佢嘅防守，反而留低空隙俾我哋隊其他球員射門。而鋼門喺密集嘅攻撃下亦都失咗分，令防守線開始崩潰。

「胡一刀加油！」阿南好落力咁幫胡一刀打氣，令我心頭感受到一陣怪異嘅感覺，好奇怪地我竟然想睇倒佢出醜於人前。

但可惜佢好似遇神殺神咁，冇人可以擋得住佢嘅攻擊，對方都俾佢呢個喺上半場隱藏實力嘅秘密武器打亂陣腳。

「爭三分就平手啦！加油啊！」Miss Lam仍然十分緊張，應該係話，現場嘅觀眾都為佢哋而緊張。

「洛賓，睇實8號！」喺對手下一輪嘅反攻，胡一刀對洛賓大叫。只見洛賓眼神緊緊盯住8號仔，8號仔一踏入射球線就即刻射球。喺佢跳起嘅瞬間，洛賓亦跟住跳起，強大嘅意志令佢滯空時間竟比8號仔稍長，8號仔一下嘅失神，就俾洛賓拍走個波。

但正當洛賓成為英雄之際，喺落地嘅時候一時失足而扭倒，傷勢令佢唔可以繼續比賽。

Andy Warhol講過：「每個人都有15分鐘的時間成名。」。本來呢一刻係佢人生最光輝嘅時間，佢仲想帶領球隊贏得比賽，佢仲想可以威俾睇唔起佢嘅人睇。

「啊！」佢仰天長嘯，好唔甘心。

「嗚...」佢坐咗喺後備席低頭痛哭。

「冇事，我會幫你贏返返嚟。」阿雄用毛巾蓋住洛賓嘅頭，遮蓋佢嘅醜態。

「喂。」洛賓叫住佢，然後遞上佢比賽帶住嘅護腕。

帶上護腕嘅阿雄，眼神史無前例地凌厲，同平日「女人型」嘅佢好唔同。

「點解阿雄變咗第二個人咁嘅？」我問。

「你冇睇過佢打乒乓咩，佢一比賽就係咁。」阿星喺我側邊講。

「真㗎...？我仲以為佢講笑。」我身邊嘅嘉慧講。

「佢講過咩？」挨喺阿星側邊嘅阿月問。

「妖。」阿星聳肩擺脫阿月嘅倚靠。

「佢叫我一定要嚟睇，話如果佢有份上場一定會令我跌眼鏡。」

「咁你跌定眼鏡都得。」阿星答。

望住嘉慧，突然對阿雄毅然放棄打乒乓球嘅原因搵到一啲端倪。

代替洛賓上場嘅阿雄，喺冇任何表現下，已經俾對方重重困住，或者佢哋都吸收咗輕視胡一刀嘅教訓。

「阿雄掩護我！」控球嘅胡一刀講，阿雄隨即走向胡一刀，將佢從防守球員中解救。胡一刀再從低傳球俾其他隊員，鋼門錯估射球方向，打算跳起擋波，點知俾胡一刀呃倒，佢得到隊員回傳，直接從射球線遠擲，球就如一道重炮強轟入網。

「掂啊！兩分炸！」阿雄講。

「大家都打得好啊...」見到班進攻球員仍然唔放棄咁追分，場旁嘅Miss Lam不禁低吟，一啲眼淚水更喺眼圈打轉。而防守嘅球員亦好似裝咗好多個大盾咁，一一擋住對手進攻，就連恆仔都意外地擋到好多幾乎必入嘅波，之後嘅比分真係如佢哋所願打成平手。

「最後一球就交俾你。」恆仔對住阿雄講，開波前阿雄對住胡一刀做咗個「X」嘅手勢，胡一刀點頭表示明白。

lm