【正廢柴】想溝到女千祈唔好學我咁

符文安條契弟，喺Facebook放咗一張，阿月喺涼亭錫我嘅相。好可能，果一晚佢一直匿埋喺暗角偷偷哋留意住我哋，先捕捉到呢個時刻。

「佢突然錫埋嚟咋！我完全反應唔切！」我情急之下，有啲大聲咁講。

「咁點解佢會咁…」

「佢…」如果我答因為我聽完佢分享心事所以佢先回禮，呢個答案會唔會太滑稽？

「我都唔知。」我頭都耷曬咁講。

「咁我諗你要搞返清楚件事先啦。」佢突然變得淚眼汪汪咁講。

「好清楚㗎！我唔鍾意佢！因為我…」

「我講過㗎，一段關係入面唔可以有第三個人喺到，即使係咩形式，你搞清楚之後再搵我喇！」之後佢就落咗車，淨低我一個人…同埋一炸我哋送俾對方嘅禮物。

點解會咁？頭先唔係仲好哋哋㗎咩？點解我要咁手痕打開Facebook？

唔係。

點解我唔識得同阿月，保持返距離？

返到屋企，老豆見我垂頭喪氣嘅樣，估我九成失敗咗，所以就安慰我：「可能要啲時間姐，冇問題嘅。」

「唉，唔係，好複雜。」我答，之後我就入咗房。

我將條頸巾除咗落嚟，將佢放好喺衣櫃。望住一針一線都好完美嘅編織，唔知佢用咗幾多時間先織得好呢條頸巾？

點解佢會知我冇頸巾？點解佢會知我鍾意炭灰色？

但我就從來冇細心咁留意過佢嘅嘢，就連佢對貓敏感都唔知。

我打開咗佢寫俾我嘅信，信入面出現好秀麗而且熟悉嘅字跡，啲字跡成日出現喺佢借俾我嘅筆記上面，估唔到而家會出現喺一封親筆寫俾我嘅信中。

未end啊

樓主唔好

樓主唔好 sad end

你sad end 就打柒你

警誡大家唔好Gel頭

睇落去就知

如果係sad end
不如符文安溝左阿南

感謝你對阿南嘅喜愛

唔係話唔得 唔make sense嘛

樓主請自重

追到live左
勁好睇 支持樓豬繼續寫

樓主請謹慎……

「我願意啊！我願意啊！你聽唔聽倒？」一睇完封信，眼淚就控制唔住咁不斷咁流，無盡嘅自責感同懊悔不斷喺四方八面咁湧出嚟。

點解佢對我咁好，而我就傷害咗佢？

我不斷咁打俾佢，甚至Whatsapp留咗好多嘅言，但都得唔到佢回覆。甚至第二日去到佢屋企樓下，我呆企咗喺到八個鐘，都見唔到佢嘅身影。後來阿星靜靜雞話我知，阿南去咗佢媽媽屋企暫住，仲話阿柔千叮萬囑佢唔可以話我知。

原本我哋可以過一個好開心嘅聖誕節，甚至係一齊倒數，一齊邁向新嘅一年。

除夕夜，佢哋個個都有街去，只係淨低我一個孤零零咁喺屋企。

「十、九、八...」電視傳出倒數嘅聲，但我都冇心情再去睇。

冇咗阿南，同冇明日有咩分別？

「新年快樂。」

我喺Whatsapp打咗呢句說話俾阿南，由一個剔、到雙剔、上線、Bluetick、之後下線。經過一絲絲嘅期待，但都得唔到佢嘅回覆。

去到後來，我甚至開始質疑，既然佢咁了解我，點解唔肯相信我嘅清白？我曾經想搵阿月去幫我解釋，但阿月同阿南一樣，好似喺我嘅世界入面人間蒸發咗，點搵都搵唔倒。

然後終於等到開學嘅日子，我滿心期待，一早就返到學校等阿南返嚟。

一返到學校，大家嘅目光好似都放咗喺我身上咁，令我好唔自在。原來成名嘅感覺都唔係咁好，尤其當你係因為一啲醜聞而出名。

而始作俑者符文安。更加喺我面前趾高氣揚咁行過。

「咦，情聖，返嚟啦？你...啲女朋友呢？」佢好囂張咁問。我真係冇試過咁想打一個人，如果殺人係合法嘅話，或者佢而家已經俾我分屍。

「你知唔知呢，你個廢柴樣真係好乞我憎。你同你班Friend都只係一班垃圾，尤其是果個咩洛賓，仲想同我爭子晴？吔屎啦！你啲咁嘅垃圾憑咩食曬阿南同阿月？」或者喺佢眼中，女仔只係一堆俾佢消遣嘅玩具。所以當佢出言侮辱阿南同阿月，我再控制唔住我嘅怒火，向住佢塊臉打咗一拳。

「你含撚啦仆街，你啲二世祖先係垃圾！除咗錢之外你乜撚嘢都唔係啊！」估唔到，佢一拳就俾我打到瞓咗喺到。一下突如其來嘅一拳，令我都唔知自己到底出咗幾多力。但見識到佢嘅脆弱，我好似失去理智咁不斷向住佢個身好用力咁踢。

「你估個個都係你嘅玩具啊？」一下。

「你估我哋就只可以俾你糟質咩？」兩下。

「人哋怕你，我當你Kai子咋。」三下。我將呢個禮拜所有不快嘅情緒發泄曬喺佢身上。

見到主人俾人打，佢班跟班即刻撲出嚟拉開我。符文安見到我受制，即刻企起身並且向我暴打以報復。

大家冷靜

多謝你

屌…feel到阿南想大愛成全阿正同阿月