［冇圖］睇左好多年聖經 你問我答（3）

*Typo 並唔可以話佢係一個冇智力嘅BB*

罪既意思其實就係唔完美。你樣樣跟住神咪完美囉，你唔跟，咪唔完美，咪有罪囉。神既標準係咁高架喇，得耶穌一個人meet到。

夏娃吃下水果係因為佢認為神收埋左d好野（分善惡的能力）唔俾佢，佢要自己拎，唔信神係俾最好既野佢，咪出事囉

至於佢係咪實真係由佢自生自滅呢？咁你似乎未睇到當中既救恩

最尾果句，愛神就是因為愛神囉，冇解架。係都要講，係我信世界有永恆的真理，而真理就是在神裡面，所以我願跟隨神

其實前面講咁多係我想分享下我睇創世紀領悟到嘅hidden message (不過教徒可能覺得有冒犯 唔鍾意可以skip)

首先係我前面講嘅矛盾位
冇分辯善惡能力嘅人嘅犯罪

然後係犯罪之後
佢哋第一件做嘅事係好特別
就係著衫

分辯善惡同搵衫著嘅關係
我覺得明顯係寓意社會化

人因為要一齊生活
唔可以比性慾主宰
為咗壓抑過盛嘅性慾所以有咗要著衫嘅習慣（即使唔凍）

同理 其實善同惡
或者道德 係冇一個天然標準
（雖然你哋教徒會話以神為標準）

人同動物之間好大嘅分別就係人會話某啲野係善（未必關宗教 甚至人有善惡先於宗教）judge某啲野係惡

但你係唔會話乜乜動物好邪惡
因為你知道佢哋冇呢個concept
佢哋一切嘅行為只係為生存

所以我見到係
人為咗社會化嘅需要
為咗人同人一齊生活唔會互相侵害
共同協議咗一啲道德同倫理嘅規範

可以咁講

所謂「原罪」其實係人嘅作繭自縛
因為人（社會）需要有「罪」呢樣野嚟限制人 所以人自己創造咗罪嘅概念出嚟

而神其後將人逐出伊甸園 亦寓意人已經脫離咗神嘅創造 脫離咗「自然」而係演化為有自己道德判斷同創造嘅高等生物

我覺得教徒嘅解釋 多少有種「神本位」嘅習慣 並喺呢個基礎上加以elaborated

我唔想太過challenge你哋嘅信仰
因為我都相信宗教嘅力量係而家呢個社會仍然有需要

不過應該唔會令我信服到

退場先

多謝你嘅sharing 幾特別 好多都冇聽過～

但我上面 矛盾位有解答到你嗎？
衫同性嗰度，我亦都冇好抗拒你呢個講法
我冇深入研究睇吓有冇其他人補充。

但係，我認為對錯善惡係冇中性
我哋用聖經立論善惡都唔係慿感覺的
有章節，有次序，有背景。

例如：美國係用基督教立國教
好多我哋而家認知嘅善惡
都係由聖經去衍生價值觀出嚟

至於人同動物 ，好大分別因為佢哋冇靈
人係有靈魂體，所以有唔同

原罪係亞當夏娃犯左罪之後
人同人之間罪性 火燒連環船咁樣，成漣漪般效應

矛盾位方面就係我下一個comment講 感覺都係用緊「神本位」嘅角度嚟elaborated 我覺得作為信徒嘅話係可以解釋到嘅 不過對我就未必

同埋你話美國用基督教嚟做國教再用聖經嚟衍生價值觀

喺我角度係覺得現今主流宗教演化至今 好多地方都隨時代去改變咗解釋（相信讀歷史都知一直以嚟都有唔同嘅人同教派去爭聖經嘅解釋權 甚至基督徒都分咗天主教 新教 同東正教出嚟 伊斯蘭教都睇舊約聖經咁）有少少係為咗迎合時代嘅需要咁樣 簡單啲講就係世俗化咗

好似演化論咁
啱啱出嚟都比人屌到仆街
但而家啲宗教已經發展咗「神導演化」嚟解釋演化論 令佢唔會同聖經矛盾

所以我始終認為宗教係好方便嘅一種教化人民嘅工具 冇野比一個至高無上嘅神嘅權枘 更有效去限制人嘅惡性行為 亦冇一樣野比至高神更可靠嘅存在嚟比嗰啲迷失嘅人一個依靠

其實係㗎講到信仰&宗教最後都係好個人嘅，老實講，信仰幫唔到佢嘅仲信 都係傻仔啦，所以仲信其實好多個人嘅經驗，真係經歷到上帝先至繼續信嘅，聖經理論就咁聽囉，最重要係日常生活覺得上帝有介入，有幫到

咁冇經歷過嘅，又真係好難信服係正常
我又唔覺得你咁諗會好錯 ，其實係好正常。

迷失嘅人一個依靠，其實係㗎、今時今日香港邊個唔迷失
，好似啲人睇星座占卜塔羅牌都係想搵啲出路一樣。

正解，跳出聖經既話，神的存在係好難能被客觀地驗證的，只能夠透過經歷去認識，不過人要相信「冇神」、「一切都係巧合」、「一切都係自然演化」本身都係一種信念

重溫一次李天命vs 韓那，韓那輸唔係因為神唔存在，或不知道神是否存在，而是命題上俾左李天命好大優勢。佢只要證明，「信神存在」不比「不信神存在」邏輯上合理，已經立於不敗。

ありがとう~多謝你分享你個角度

我係信神，但係我睇法有少少唔同，唔係因為我先當左神係存在，而係我試下睇下現今理解既歷史，有咩可能係冇神既情況咁發生。

創世記講全球性既洪水，有幾百個唔同民族記得，仲要山頂都搵到海洋生物化石，同聖經描述吻合。如果冇神，咁要好好彩唔知點解咁多水沖出黎，又要有個人唔知點解起定隻船，人先冇絕種。

出埃及記講以色列人受壓迫之後，連續既神蹟奇事發生針對埃及攻擊，最終法老全軍覆沒，以色列人浩浩蕩蕩咁出黎，並開始守一堆同列國唔同既律例，同守騎呢既逾越節同其他節日。如果冇神，咁要無啦啦有堆以色列人，咁啱全部人一齊擺脫到勞役，又唔知點解搞到自己咁騎呢都一路延續到今日。

四福音書講耶穌預言自己比人釘十字架死，過三日復活。如果冇神，咁真係要好好彩，個個釘十字架斷骨，係佢咁啱冇斷，好似聖經之前預言咁；面衫比人分，底衫比人抽籤攞，又同聖經之前預言一樣；又要咁啱封墳墓舊大石比人看住都轆走左，而之後個皇帝又特登立個碑話「唔比搬走舊封墳墓大石移動屍體呃人」。

使徒行傳講教會成立，傳講耶穌復活，之後基督徒受迫害，寧願受變態折磨死都堅持信耶穌復活左。如果冇神，如果神冇令到耶穌復活，咁要好好彩先可以令咁多千人一次過加入教會，又要唔知點解D初代信徒一次過痴線，用條命黎講一個明知錯既大話，咁先解釋得到。

我自己都試過經歷到神（如有追post會見到）。如果冇神，發生係我身上既事係唔合理既。

仲有好多歷史同考古係同聖經一致，同埋直到今日都有人見到超自然但又符合聖經既事。所以我覺得信有聖經講個神比信冇神更加合理。

心硬的人可以一句「全是巧合」

上面嗰啲就唔逐一回應啦

因為其實好多野嘅取證種種都好多位有爭議 我目的並唔係嚟挑機 最緊要係你「相信」然後呢樣野對你係work就得

同埋某程度上我都信「神」
只係我信嘅神唔係人格神而係形而上嘅神
類似萬物規律 包羅萬象
接近道家嘅「道」同印度教嘅「梵」嗰類

明白
唔係搵機挑，但想聽下爭議位。
講到尾，聖經係咪啱係冇得證明，神又係見唔到，所以學樓上巴絲話齋，係要感受既

講其中一個
山頂搵到古生物化石

其實因為地殼變動
一億年前嘅海底
推到變咗座山出嚟係好正常

逐出伊甸園都係一種愛啊
你只係睇到神收番佢既永生，你睇唔到既係，罪已經進入左佢既生命裡，與罪一起永活都係好慘的。

又，你睇唔到既係，佢都無冇衫著的，佢著既係無花果樹葉，你可以試下著無花果樹葉織既衫著一日，包你皮膚敏感結果點？神俾左佢毛皮。毛皮邊度黎？羔羊囉（雖然聖經冇直接講）。佢用左羔羊的生命為佢地遮醜啊
罪有罰，但罰唔代表冇愛啊

冇 我係用搵背後寓意嘅方式嚟解讀呢一段
你可以當我解緊摩斯密碼咁
唔會太著眼佢嘅表面訊息
而係睇佢表面訊息隱含嘅hidden message

同意有咁既可能，所以我都係話一致（冇矛盾），而唔係證明~

就算再掘到咩出黎都好，我都係睇重耶穌釘十字架復活果一段既歷史，因為我信既神係會同人一齊，同之前耶穌降生咁一樣，我係佢既子民，佢係我既神，係一家人，有愛係中間。唔係學佢既話，我都唔識點愛人

我中學都係基督教學校
對信徒嘅印象唔錯

「在耶和華造化的起頭， 在太初創造萬物之先，就有了我。 從亙古，從太初， 未有世界以前，我已被立。 沒有深淵， 沒有大水的泉源，我已生出。 大山未曾奠定， 小山未有之先，我已生出。 耶和華還沒有創造大地和田野， 並世上的土質，我已生出。 他立高天，我在那裏； 他在淵面的周圍，劃出圓圈。 上使穹蒼堅硬， 下使淵源穩固， 為滄海定出界限，使水不越過他的命令， 立定大地的根基。 那時，我在他那裏為工師， 日日為他所喜愛， 常常在他面前踴躍， 踴躍在他為人預備可住之地， 也喜悅住在世人之間。」
‭‭箴言‬ ‭8‬:‭22‬-‭31‬ ‭CUNP-神‬‬
https://bible.com/bible/46/pro.8.22-31.CUNP-神

根本耶穌係舊約已經同我地玩緊捉迷藏

睇完順手講兩句
箴言 8：30-21 和合本2010
//8:30 那時，我在他旁邊為工程師，
天天充滿喜樂，時時在他面前歡笑，
8:31 在他的全地歡笑，
喜愛住在人世間。//
歡笑 （mascheqet ,同以撒 yischaq同源）係陰性，形容智慧 chokhmah ，可以代表基督


見識少，第一次聽基督教中學留低好印象，好事黎

出埃及記講以色列人受壓迫之後，連續既神蹟奇事發生針對埃及攻擊，最終法老全軍覆沒，以色列人浩浩蕩蕩咁出黎，並開始守一堆同列國唔同既律例，同守騎呢既逾越節同其他節日。如果冇神，咁要無啦啦有堆以色列人，咁啱全部人一齊擺脫到勞役，又唔知點解搞到自己咁騎呢都一路延續到今日。

其實以色列人本來已經係一個民族，係打輸仗先畀人賣咗去埃及

所以唔係無啦啦有以色列人，亦唔係無啦啦擺脫到奴役

而係呢個民族由摩西帶領而團結一致爭取自由

同埋古文明都係集中喺美索不達米亞、印度次大陸、埃及北部

呢幾個地區同時水災真係唔係無可能，只要嗰年有高度嘅拉尼娜現象再加上一啲月蝕、日蝕就有可能了

但水災到浸上山又難啲嘅
所以我都係傾向地殼變動呢個假設