《是咁的,我一炮過有咗三個女朋友(假)》

983 回覆
148 Like 26 Dislike
2022-06-07 22:52:09


「喂!收聲呀八婆!」面紅耳赤嘅恆樂向吳純破口大罵。

2022-06-07 23:45:16
暴走
2022-06-08 02:26:38
作者真係好癲
2022-06-09 01:36:02
今日有冇
2022-06-09 11:20:16
琴日俾老細審判緊
2022-06-09 21:37:07
「受死!」恆樂襯機揮動空樽,揮出一招下斬。

Alton喺慌亂中用左手護頭,但係今次喺恆樂佯攻,恆樂繞到Alton背後橫掃兩下(6分)。

Alton轉身後向恆樂突刺,擊中恆樂右手(1分)。

9:9。

Match point。

恆樂一口氣追返上嚟。

恆樂發癲咁亂咁揮舞巨樽,Alton每一下都用防御嘅手將攻擊格檔落嚟,每一下格檔都發出「啪啪」嘅巨響。

連還攻擊後,恆樂嘅手因為疲倦而慢落嚟,Alton馬上認真起嚟,不斷揮舞津路樽斬向恆樂,恆樂則用8公升樽輕鬆化解所有攻勢。

「你玩完啦!」恆樂突然用力斬開Alton嘅劈擊,Alton因為突如其來嘅衝擊而向後退幾步,恆樂則直線刺用樽底向Alton心口(1分)。

中招後嘅Alton跌倒喺地上。

「搞掂,我先係帝王。」恆樂將水樽嘅頭指向喺地下嘅Alton。

「我係五月姐!羅馬競投生死鬥嘅裁判!我在此宣布,呢場決鬥嘅勝利者係吳純嘅男朋友——恆仔!」五月姐擺出一個Jojo式站姿講。

「恆仔!」吳純高興咁撲向恆樂,成對波貼上去。

「恆仔好嘢!」

「我一早就覺得埋土帝王好中二病,要俾啲教訓佢!」

「我又要玩!」

吳純嘅莊員又起哄起嚟,然後就莫名其妙地開始打起上嚟。

「你哋到底幫邊個㗎!?」坐喺地下嘅Alton向倒戈支持恆仔嘅莊員破口大罵。

「叻仔呀你!」吳純摸摸恆樂頭頂再講:「我今鋪真係吐氣揚眉,搞掂個出軌ex。用大樽去反擊呢啲咁卑鄙無恥嘅做法真係得你先做到!」

「喂喂!點解我覺得你係攻擊我多過讚我?」

「我係真心讚你㗎!」

過咗一個鐘之後,外賣嘅嘢食送到,呢一班玩緊羅馬競投生死鬥嘅大學生先停落嚟食嘢。

吳純去咗廁所嘅時候,May行過嚟講:「多謝你。我哋純純有你睇住我真係好放心。」

「唔使,做男朋友嘅應份。」

扮男朋友最主要嘅目的就係向前男友復仇,今次落咗佢面都算係做咗「男朋友」應份嘅嘢。

「唔怪之純純成日讚你。」

「話時話,點解莊內戀分手之後,你哋仲可以叫齊兩個分咗手嘅莊員一齊來玩?」

呢個問題恆樂一直都想問,但又唔敢問吳純。咁啱而家有機會佢就向比較友善嘅五月姐問。

「其實我覺得佢哋分手,純純都有錯嘅。」

「但係佢哋分手唔係因為隻gym撚出軌咩?」

「我覺得呢樣唔係主要原因。」

「咁都唔係主要原因?出軌喎。」

「主要原因係你呀。」May姐面帶微笑咁講。
2022-06-10 03:19:15
純純一早就鐘意恆仔
2022-06-10 21:37:04
Push
2022-06-10 23:03:18
「我?我乜都冇做過喎!我都係佢哋分咗手先同吳純一齊!」恆樂拗曬頭,心諗關我撚事咩,恆樂喺吳純分手之後先被迫要扮佢男朋友。

「純純就好似一個小朋友咁,蠢蠢地又直率,衰啲講即係冇乜用腦去諗其他人感受。當然啦,佢連自己感受都冇諗過。佢同Alton一齊嘅時候都日日提住你,喺度話佢個鄰居幾好幾好。」

「佢蠢呢一點我真係冇辦法否認,駁五刀。」

「就係因為純純傻傻奸奸,大家都對佢有種保護慾,覺得一定要睇住佢先安心。Alton追咗佢大半個莊期先追到手,點知拍拖嘅時候又係咁提另一個男人,做男朋友嘅咪慢慢心淡。」

「佢點解要喺男朋友面前講其他男人?佢真係傻傻地。」

「所以純純都有錯㗎,明明唔係鍾意Alton但就因為人哋向佢表白而一齊,結果就變相玩弄人哋感情。咁樣Alton變心都叫做情有可原,我哋莊內都同情佢。」

「原來都係條八婆做錯,我都唔知點話佢好。」

「雖然我哋都知道純純有錯,但係佢嘅性格同埋氣場真係令人放唔放心落嚟,又嬲佢唔落。我諗到點形容啦!就好似睇住隻寵物咁,我哋唔可以隨便棄養!就係因為咁樣我哋先兩個人都冇放低。」

「寵物⋯⋯」恆樂即時諗起吳純平時喺佢屋企食完就去睇電視再瞓覺,毫無生產力輸出嘅樣,於是點點頭:「都幾似一隻懶貓。」

「係呢。就好似啲貓打爛你啲杯碟,你係嬲嘅,但係又唔可以趕佢走或者打佢。」

「即係佢係一隻莊寵啦。」

「又無講錯。我哋呢個靚女莊寵依家俾人領養走lu。」

吳純突然跳出嚟,從後攬住May姐:「你哋講咗啲咩啊?」

「講緊你囉。」May姐用雙手搓吳純臉頰。

「痛呀痛呀!」

「放過你先啦。玩多陣我哋散水啦,好多人晏就要返工。」May姐講完就行開。

「咁我去拎嘢食先!」吳純講完就跳下跳下咁去拎pizza食。

呢個時候,恆樂收到子瑜嘅whatsapp。

子瑜:係邊呀B?有冇掛住我?

恆樂即刻較暗個mon,再㩒入message等條通知唔好再顯示出嚟。

到底點解會咁問?唔通恆樂陪緊吳純單嘢黃咗!?唔通呢間真係子瑜開嘅party room?唔通佢一睇閉路電視就見到恆樂同另一條女攬嚟攬去?

今次仆街啦!

到底點樣應好?

如果同佢講喺葵芳party room準備參加soc活動好唔好?因為過多一個鐘佢哋個系會就會喺同一個party room搞完sem聚。

唔得!如果間party room真係佢開嘅話,佢一睇閉路電視,就會見到恆樂同另一條女玩,咁恆樂咪仆街。

恆樂匆忙咁帶返頂hoodie帽再拉高件衫遮住個口,千萬個唔想俾閉路電視影到自己個樣。

唔可以誠實咁回答呢個問題,恆樂諗到嘅回應方法就係故弄玄虛。
2022-06-11 02:21:34
懷疑子愉已經發現
2022-06-11 22:46:14
恆樂:我係你心入面。

Send咗呢句出去之後,恆樂都因為自己嘔心而打冷震。

子瑜:咪flirt我,唔受呀~

子瑜:快啲講係邊到啦

恆樂:去party room參加系會活動。

子瑜:咁算啦,我自己行,byebye!

去到最後,恆樂都係唔知道呢間party Room係唔係子瑜開嘅。

食完嘢之後,吳純之莊就散水,恆樂就同吳純講轉頭約咗人,送咗吳純上巴士後就行返去party room。

然後,去到工廈樓下,恆樂見到子瑜同胡蝶傾緊計。
2022-06-11 22:52:02
六、女友們的關係!?

喺遠一遠就見到兩位女朋友傾緊計嘅恆樂,立即一個前滾翻匿埋到停泊喺街邊嘅車後面,再慢慢向佢哋嗰邊潛行過去,一定要偷聽到佢哋嘅對話。

恆樂驚佢哋兩個會知道佢哋嘅男朋友(假)係同一個人。

恆樂手心冒汗,戰戰兢兢咁樣烏低身向前走,就好似一個忍者咁。

恆樂個心卟卟咁跳,好似自己真係出軌,兩個女朋友喺度對質。

「唔該你呀瑜瑜,咁平租間房俾我哋。」胡蝶捉住子瑜雙手講。

「使乜客氣姐,我哋朋友嚟㗎嘛!同埋我都有收錢。」子瑜微笑地道。

朋友?到底佢哋幾時認識?

唔通胡蝶都係vtuber?

無可能嘅,胡蝶個人咁內向,又唔識表達自己。

「你都應該參加下系活動呀嘛。」胡蝶講。

「如果你係我個系嘅莊員我咪參加囉。」子瑜調皮地回答。

「咁樣你識唔到朋友㗎。」

「有你咪夠囉!我先擔心你識唔到朋友呀!」子瑜講。

「我有去上堂就識到。」胡蝶扁晒咀咁答。

「但唔係個個都係好似我咁,係一個好嘅project mate!」子瑜突然讚自己。

按照咁樣推論,兩位女朋友應該係某一個semester 一齊讀書做project而認識。

「嗰個人好好。」胡蝶雙頰泛紅地講。

「嗰個人⋯⋯唔通係男仔!?」子瑜激動地問。

「我識咗男朋友呀。」胡蝶一面嬌羞地講。

恆樂聽到之後渾身抖震,個身震到停唔到。

點解話題會去到自己度?同埋明明只係假男朋友,點解胡蝶嘅語氣講到識咗一個真嘅男朋友咁?同埋佢要趕走嘅只係狗公,根本冇必要喺女仔面前講。唔通佢係想炫耀自己有男朋友嘅事?

咪住先,未必係講緊恆樂嘅,可能係講緊其他男仔呢。

「吓。幾時嘅事啊?你做咩唔同我講啊?咩人嚟㗎?」聽到戀愛話題子瑜蝶興奮到連珠發炮咁問。

「唔⋯⋯」耳根都紅埋嘅胡蝶唔知點困應。

「有人怕羞呀。」子瑜不停篤胡蝶泛紅嘅臉頰。

「佢同你一樣係同學嚟㗎,佢係一個好照顧我嘅上莊。」

恆樂知道係講緊自己,上莊。

子瑜會唔會知道胡蝶嘅正上莊係自己?

比胡蝶知道自己有做其他人男朋友都冇乜大不了,但係俾子瑜知道就有啲麻煩,始終佢講明唔可以扮其他人男朋友,自己又有把柄係佢手上。
2022-06-11 23:25:41
「哎喲哎喲,我哋胡蝶大個啦!」

「唔好玩我啦⋯⋯」

「有冇個男仔嘅相睇吓?」

恆樂虎軀一震,嚇到就快瀨屎。

「相呀⋯⋯無呀,佢無ig fb㗎。」

「咩怪人嚟㗎!竟然冇社交媒體!佢會唔會係有,但係唔講俾你聽咋!啲男人好鍾意咁樣去識多幾個女朋友。」

部分正確!

冇社交媒體係真嘅,識多幾個女朋友又係真嘅。

「有機會嘅話,我俾你見吓佢啦。」胡蝶莞爾一笑。

唔洗啦!多謝夾盛惠!

「好啊,等你嚟放閃!」

你做咩應承佢啊?恆樂千萬個唔想見到子瑜。

「到時唔好笑我呀。」

無到時,恆樂點都唔會出嚟自殺。

「點會呀!我最近都同一個男仔幾親密,佢仲送咗隻卡比獸公仔俾我。嗰一下搞到我心動咗一秒。」今次到子瑜含情脈脈咁講。

呀,又係我。恆樂額冷汗越來越大粒。

不過好彩嘅係,子瑜無話恆樂係男朋友。

洗咗成$500先令你心動1秒,你啲女人有冇咁貴?

但係依家唔係講呢啲嘢嘅時候。

「你幾時識㗎?」平時寡言同唔太講嘢嘅胡蝶都興奮起嚟。

「無耐之前咋,我哋嘅相遇有啲特別⋯⋯哎呦!唔講啦!」面紅紅嘅子瑜不停擺動身體。

「你最少都講下佢係咩人啦。」

「佢呀⋯⋯因為一啲原因佢離唔開我,佢仲好癡我身,最唔想俾人知、最唔見得人嘅秘密都好放心咁交托到我手上。佢一定係好信我先至咁做。」

個原因係你用非禮相威脅我,仲要係你主動影,唔係由我交托俾你!恆樂喺心中大鬧。

「你講到你哋拍緊拖咁嘅?」

「我哋⋯⋯友達以上戀人未滿掛。」子瑜紅著面咁擰身擰勢。

我識得你一個月咋!朋友都未算啦!

無得鬧出口嘅恆樂只能夠好似連登仔咁喺心入面鬧人。

「你有冇佢嘅相呀?幫你過下眼。」胡蝶問。

「有呀!」

仆街!子瑜幾時有我嘅相!?

唔通係嗰張摸波相!?
2022-06-12 00:36:50
恆仔今鑊仆街
2022-06-12 01:33:38
好頂癮
好想知係咩相
2022-06-12 03:13:50
頂!live左
2022-06-12 13:39:23
子瑜突然一副震驚嘅樣,再講:「唔好意思呀⋯⋯我哋得一張相,我應承過佢唔可以流出⋯⋯即係唔可以俾人睇到。」

個張相唔可以流出,都算你有職業道德,恆樂興幸子瑜有啲職業道德,不過睇嚟係揸波相。

「咁好啦。」胡蝶失望地扁嘴。

「唔好失望啦,遲啲我帶佢出嚟同你見吓面啦。」子瑜笑著講。

「好啦,我都帶我朋友出嚟啦到時候。」

「咁樣就係四人約會啦喎!」

三人咋!同埋唔會係約會,而係公開處決。

明明我知係你哋兩個嘅假男朋友,點解你哋兩個可以講到我係真男朋友咁?

點解你班女人要因為有男朋友而走出嚟同人曬命?有男朋友好威咩?

師傅呀,你哋老老實實咁樣話係扮男朋友咪算,點解要講到好似真係拍緊拖咁樣?

你呢啲女人到底諗緊啲乜?我真係諗唔通。

你哋兩個都當我係真男朋友嘅話,咁我就係一腳踏兩船、一個出軌嘅賤男。

唔係,應該係兩腳踏三船,最後一位女朋友仲未出場。

喂,真係出軌還好,我起碼可以揸吓波仔同埋鹹濕下,但係我冇呀!

唔係喎,好似由摸過波仔。

恆樂諗起子瑜對波嘅質感,緊張感隨之散去,心情都平復起來。

波對男人嚟講果然好特別。

「咁我準備走啦,你依家返屋企?」胡蝶問。

「唔係呀,我諗住上去睇住你哋玩。順便睇吓你男朋友個樣。」

一聽到子瑜嘅回應,緊張感又返晒嚟。

走啦八婆!

走呀!

「但係⋯⋯」胡蝶欲言又止。

係啦,講落去啦,阻止條八婆上嚟。

加油呀胡蝶!

「你真係ok?成個系有好多人,可能有啲人你都識。可能會⋯⋯」胡蝶不確定咁講。

氣氛突然之間變得凝重起嚟,胡蝶好明顯囉囉攣,而子瑜嘅臉上則浮現出一層陰影。

睇嚟子瑜有一啲秘密係胡蝶知道。

「傻女。」子瑜飛撲去攬實胡蝶,再講:「我知你關心我啦!我上去睇你哋玩嘅話我只會搞到自己好痛苦,所以我陣間就返屋企㗎啦。」

「對唔住,好似趕你走咁。」胡蝶面帶內疚地講。

「都唔關你事!你都係為我好姐!」子瑜輕輕撫摸胡蝶頭頂。

「我下次陪返你啦,對唔住呀要扔低你。」胡蝶講。

「無事啦!我信你唔會好似嗰啲人一樣咁衰。」

「我唔會!」平日冷靜嘅胡蝶激動地答。

「我信你唔會。」子瑜微笑著再講:「咁我走啦,你玩得開心啲。」

「拜拜啦,有機會就俾你見下我男朋友啦。你要keep住update我你同個男仔嘅發展呀!」胡蝶目送著子瑜離開。

用的士做掩護去偷聽兩個女朋友對話嘅恆樂見到子瑜嘅背易徹底消失之後就終於鬆一口氣,成個人坐落地下抖大氣。
2022-06-12 15:08:28
唔上去但偷偷睇cctv
2022-06-12 23:08:38
「喂!」突然有把聲向恆樂喝斥。

「嘩!」恆樂嚇到成個人彈起。

「死開啦!我點開工呀!」恆樂用嚟做掩護嗰架的士嘅dc9怒屌恆樂。

「Sorry 。」恆樂低頭致歉。

「上返行人路啦!死廢青!」dc9嬲爆爆咁屌柒恆樂,再手忙腳亂咁上車,好似趕住去死。

的士駛走之後,又有人叫:「Ken?」

恆樂認得呢班聲,係胡蝶。

恆樂嚇咗一個大跳,然後佢怯生生咁慢慢擰轉頭講:「Hi。」

恆樂擔心自己係到偷聽嘅事有冇俾胡蝶發現,佢即刻成頭冷汗。

胡蝶會唔會覺得係呢到匿埋好奇怪?

可以用乜嘢做藉口去解釋?

毫無頭緒。

首先開聲嘅係胡蝶:「你咁早到嘅?」

睇嚟胡蝶無發現,或者只係發現咗無講。

恆樂鬆一口氣後答:「擔心呀嘛。」

擔心呢間真係自己其中一個女朋友嘅party room。

「原來你擔心我呀⋯⋯」將恆樂嘅回應超譯嘅胡蝶嬌羞咁低下頭。

恆樂只係擔心自己會賴嘢,但係胡蝶就以為對方關心自己。

總之恆樂偷聽嘅事無俾人發現就算數,恆樂亦從驚訝中回復平靜。

「你唔好叫我Ken啦,今日唔係要我扮你男朋友咩?」恆樂轉移一下話題。

胡蝶有如醍醐灌頂,一言驚醒洛克人咁嘅樣講:「呀⋯⋯樂仔⋯⋯?」

怕咁樣稱呼會令恆樂唔開心嘅胡蝶將視線從恆樂身上離開去壓抑自己的尷尬。

知道怕生嘅胡蝶因為怕羞同無信心先咁樣嘅恆樂就講:「無問題㗎胡蝶。」

恆樂笑住咁拍拍胡蝶頭頂,胡蝶因為咁而紅都臉晒咁垂低頭去避免直望恆樂,因為佢知道呢一刻望到恆樂個樣嘅話,胡蝶塊面一定會更紅。
2022-06-13 09:26:19
留名加速
2022-06-13 13:00:20
2022-06-13 13:01:00
2022-06-13 14:36:03
仲以為恆仔個三人約會咁快成真
2022-06-13 20:55:49
講咗無懸念喎
2022-06-13 21:12:54
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞