「好!由頭嚟過!」刷完牙嘅吳純走到梳化前對住胡蝶大叫。
「吓!?」胡蝶嚇一跳。
「吳家純,花名叫吳純,埋大year 2,上緊莊,讀BBA。」吳純翹埋雙手講。
「我叫胡蝶兒,大家都叫我胡蝶。我都係year 2 bba同上緊莊。」胡蝶勉強配合吳純。
「咁講咩好呢?呀!恆仔叫我教你外向啲,但係點教?」吳純一臉疑惑咁問胡蝶。
「你問我⋯⋯我都唔知。」
「我反而唔知點解啲人咁內向。點解你咁怕同人講嘢?你唔會諗到想做嘅嘢就即刻做㗎咩?」吳純瞳孔放大,一臉好奇咁問。
「我⋯⋯都唔知。」比起唔知,胡蝶更多嘅係唔想講。
「咁呀,由佢啦。我哋出去玩lu!」輕易放棄嘅吳純唔再理恆樂俾佢嘅任務,反而決定做自己想做嘅嘢。
錢已袋,理撚得恆樂。
「哦⋯⋯」被吳純牽住走嘅胡蝶只能點頭,之後去乾衣機到拎返琴晚吳純幫佢洗好嘅衫褲。
兩個女仔出去之後,吳純就拉住胡蝶周圍去,佢哋先去咗將軍澳pop corn試下衫褲鞋,然後去Donki行下,買下零食,最後喺將軍澳河畔嘅其中一間cafe坐低飲嘢吹水。