《是咁的，我一炮過有咗三個女朋友（假）》

樓主之前搞乜

睇嚟到恆仔回合了

「我個銀包⋯⋯」恆樂一臉不可思議咁望住子瑜手上嘅銀包講，恆樂都意會到自己就係抹黑宇宙嘅原因。

「不過好彩最後無都無事。」子瑜鬆一口氣。

「又發生咗啲乜嘢轉折？」

「就係⋯⋯算！我都係唔想同你講！見到你就忟憎！」無開戰嘅原因，子瑜覺得好難開口，特別係胡蝶話會追求恆樂嘅事。子瑜一嚟唔知道點樣整合嗰晚嘅事，二嚟唔想畀恆樂知，因為自己嘅心情都好複雜。

「即係點呀？唔好吊我癮啦！」

「總之你放心，我哋三個都知晒啲嘢，無人會怪罪於你。」子瑜言之鑿鑿。

「咁呀⋯⋯咁好啦。」即使有啲嘢無問到清楚，但係知道唔會有事已經令恆樂好滿足。

「話時話，你下個禮拜生日？」子瑜轉移話題。

知道胡蝶要追恆樂嘅子瑜，想要多一次，同自己鍾意嘅男仔好好咁約會多一次之後先至告別。咁樣對胡蝶可能唔係咁好，但係自己真係好想留下一啲回憶。

所以子瑜先想問生日嘅事，想係生日嘅朝早同恆樂好好咁慶祝一下。

子瑜有好好咁問過胡蝶，有whatsapp同胡蝶講話恆樂生日嗰日嘅朝早想約恆樂扮自己男朋友，問胡蝶介唔介意，胡蝶答話可以，佢會將約恆樂六點後。

得到胡蝶嘅首肯之後，子瑜先放心去去約恆樂。

「係呀，有禮物？」恆樂無恥咁問。

「你呀⋯⋯！係呀，有呀，想唔想要呀？」子瑜嘟起個嘴不滿咁講。

「要，老閪都要！」恆樂激動咁講。

「咁嗰日朝早⋯⋯我哋去玩？」子瑜鼓起勇氣、雙頰泛紅，將拳頭放喺胸口前緊張咁問。

明明以前約佢都唔會緊要，明明好容易就做到，以前。

「無問題啦，你plan！」

「你真係⋯⋯咁快射個波畀我⋯⋯不過算，我本身就諗住我plan，玩到三點左右散水啦。」

「好！」

「咁請你走啦！」子瑜講完就推恆樂出studio外再講：「我要做直播，bye bye！」

「哦⋯⋯bye bye。」恆樂被無情咁趕到門外。

門內嘅子瑜乏力咁坐咗落地上，頭先向恆樂提出約會請求真係用咗好多心力。

雖然有得到胡蝶首肯，但係背德感都係好重。

即使胡蝶首肯，但係清楚對方唔係心甘情願嘅子瑜難免有罪惡感。

自己最後嘅願望就係同朋友鍾意嘅男仔約會。

勇氣可以話一鑊燒盡。

內心亦受到罪惡感嘅煎熬。

做咗之後，子瑜心切面後悔、懊惱同高興等幾種矛盾嘅情緒混埋一齊。

另一邊廂，無嘢做嘅恆樂就只能夠自己走出去坐鐵走人，但係一行到葵廣附近就撞到胡蝶。

「胡蝶！？咁啱呀！」恆樂熱情咁打招呼。

「唔啱⋯⋯唔係⋯⋯咁啱都有嘅⋯⋯」胡蝶唔自然咁講。

子瑜一早同胡蝶報備咗恆樂衝上佢studio嘅事，知道呢件事之後，胡蝶就一頭熱咁衝咗去葵芳，想上去子瑜到阻止壞事發生，但係當佢去到葵芳嘅時候已經收到message話恆樂走咗。於是胡蝶就喺葵芳四周圍行吓，睇吓會唔會 撞到恆樂，然後胡蝶就唔知講乜好。

知道子瑜已經約咗恆樂，胡蝶都唔想執輸，雖然未有完整計劃，但係佢都唔想執輸，佢想贏。

雖然子瑜話唔鍾意恆樂，但胡蝶感覺都到唔係呢一回事，所以胡蝶好忐忑。

只有盡快追到恆樂先可以排解呢種感覺。

要盡快同佢交往。

追到恆樂，子瑜又繼續唔鍾意恆樂，咁樣就可以。

子瑜約恆樂，應該唔會出事，唔好出事。

胡蝶想自己約恆樂嘅時候先出事。

首先要做嘅就係約恆樂，唔約嘅話點出事。

「下個禮拜⋯⋯你生日？」胡蝶問。

「又嚟⋯⋯無嘢，係呀，我生日呀。」

「 晏晝同夜晚你得唔得閒？」知道子瑜只係約咗朝早到三點呢段時間嘅胡蝶故意問呢段時間。

「er⋯⋯晏晝未必得，但夜晚可以呀。」諗起子瑜話會玩個朝早，但怕一時興起會玩耐咗嘅恆樂唔敢約實晏晝，所以淨係同胡蝶講話晚上得閒。

恆樂覺得有啲唔太舒服，因為係生日同兩個唔同女仔出街，有啲似一腳踏兩船嘅仆街。

不過兩個都唔係女朋友，所以應該無嘢。

恆樂心入面有啲期待，期待佢哋其中一個或者both會同恆樂講「我就係禮物」，咁樣恆樂就可以享受成世仔最想要嘅禮物。

講穿恆樂嘅心態就係漁翁撒網，釣起邊條魚先就食邊條。

再簡單啲講就即係，邊條女俾我食我就食。

子愉molamola

「太好了。」胡蝶聽到恆樂應承自己，於是鬆一口氣 。

「咁我諗吓做乜嘢？」恆樂提議。

「唔好啦，你生日，畀我安排好唔好？」胡蝶雙手輕輕握住恆樂手掌問。

有個計劃，胡蝶已經做好心理準備，要去到盡、用齊自己所有本錢去令佢成功。

「呀⋯⋯好呀。」畀女仔咁樣捉住隻手嘅恆樂緊張咁答。

「太好啦！敬請期待。」胡蝶甜笑住答。

「你已經有計劃？講嚟聽吓。」恆樂試圖套料。

「唔好問啦，到時你就知。所以，可唔可以唔好問？」胡蝶用一副可憐嘅模樣請求，恆樂見狀就心動起嚟，只能夠連環點頭。

「多謝你。」胡蝶輕輕一擁恆樂，再突然鬆開手，紅住臉咁解釋：「唔好意思！一時控制唔到、太開心所以攬咗落嚟。」

胡蝶因為自己大膽嘅身體接觸而感到害羞，雙耳耳根都紅到快冒煙。

雖然胡蝶之後打算做嘅事佢更加大膽，佢唔應該因為呢啲小事而面紅耳赤，但係呢刻嘅佢就係覺得非常之害羞。

「小事啦！」被攬嘅恆樂則容光煥發，好好咁回味胡蝶胸部壓落嚟嘅質感。

「對唔住⋯⋯」胡蝶低頭致歉。

「無事。一係，你依家有冇嘢做？我哋一齊行下街？」本來想想返屋企嘅中恆樂突然之間提議，反正冇嘢做不如行吓葵廣。

「淨係我哋？」胡蝶確認一下。

「邊度嚟第三個人？」

「咁行啦。我得閒呀。」胡蝶連忙回應。

「咁行囉。」

恆樂語畢，胡蝶就主動伸手拖住恆樂再講：「我哋⋯⋯仲係情侶⋯⋯拖手⋯⋯見到熟人時會好啲。」

胡蝶斷斷續續咁解釋。

恆樂則用力拖返實胡蝶，認真咁樣去扮佢嘅男朋友。

「呀！」大喜出望外嘅胡蝶先係因為嚇親而叫咗出聲，之後再用力拖返實恆樂。

果然，佢係可以。

要用我有嘅一切去得到佢嘅一切。

我想要佢。

對唔住子瑜，你係唔鍾意佢，所以我無對你唔住。

胡蝶咁諗。

另一邊廂， 已經被恆樂拒絕過一次嘅吳純，決定唔會約恆樂正日去約會。

佢哋兩個由細到大都唔會喺生日同對方出街，只會喺屋企等待對方去完夜街之後返嚟慶祝。

所以吳純決定貫徹佢哋一貫嘅風格，留喺屋企慶祝。

重要嘅係，就算樂觀如吳純，佢都未完全準備好同恆樂單獨出街，如果喺熟悉嘅地方度相處反而都會比較輕鬆，所以吳純決定一切照舊。

即使係一般嘅作風，吳純都想有啲唔同，有啲驚喜，一啲可以顯示到佢女子力嘅方法。

吳純嘅決定就係整蛋糕，咁啱佢身邊有一個識整蛋糕嘅人，於是就向佢請教。

「家純呀，你使乜整個蛋糕比個衰仔食？」恆樂老母笑容可掬咁講。

恆樂老母由細睇到吳純大，已經當咗佢係自己嘅親生女，甚至錫佢多過恆樂。

「想俾驚喜佢呀！同埋我覺得做女仔嘅識煮下野都幾好呀！咪當係練習吓煮嘢食，唔好食嘅都逼佢食晒唔好浪費！毒死佢！」吳純講笑咁講。

雖然已經識咗20幾年，俾伯母知道自己鍾意佢個仔始終有啲唔好意思，所以吳純都冇講出口。

「啱㗎啦，毒死個衰仔！咁大個人都冇女朋友都唔知佢想點！」恆樂老母抱怨。

「都唔係無嘅⋯⋯」吳純衝口而出。

「咩話？老人家撞聾聽唔到，你講多一次？」

「冇啊我冇講乜嘢。」

「如果個衰仔冇人要嘅話，你幫我要佢喎！」恆樂老母打趣咁講。

「到時再算啦。」恆樂而家嘅情況應該唔會冇人要，只有佢要唔要人。吳純已經衰咗一次，都唔知仲有冇機會。

「家純呀，伯母我呀，一早就當咗你係自己粒女。當左你係家人㗎啦。」

「多謝你。」吳純會心微笑。

「好啦，等伯母教你整蛋糕啦！首先呢，我哋就要整個餅底！」

吳純就係咁開始學整蛋糕，恆樂生日當晚，吳純就會拎住佢手掣嘅蛋糕喺恆樂屋企等佢返嚟，再一齊吹蠟燭慶祝。

希望個衰仔會鍾意，同埋會感恩吳純嘅努力。

希望。




恆樂生日當朝，子瑜朝早五點就已經起身化妝，換上白色一字膊衫配上牛仔心裙。

見過吳純後嘅子瑜偷偷將兩塊胸墊放入胸圍到，希望墊大一啲。

子瑜再仔細咁去確認雙腿係冇腳毛，白白滑滑咁。

希望恆樂會鍾意。

明明已經決定咗唔會再鍾意佢，但係另一方面又好希望佢會鍾意。

矛盾。

就算自己唔鍾意人哋，希望人哋鍾意自己都好正常。

子瑜咁樣說服自己。

喺等身口鏡前轉咗一圈，確認衫同埋自己嘅身體都冇瑕疵之後，子瑜就拍一拍雙頰同自己打氣：「今日就要結束。」

胡蝶同咗恆樂一齊，而我就繼續同佢哋兩個嘅朋友，咁樣就可以繼續留喺佢哋兩個身邊。

唔算受苦，只係選擇嚟，選擇鍾唔鍾意一個人。

只要咁樣做就會大家都幸福，子瑜亦可以繼續喺自己重視嘅人身邊，繼續同佢地做朋友。

子瑜將琴晚整好嘅細生日蛋糕放落手袋入邊，再出門坐Uber去恆樂屋企樓下等佢。

正，有文

好多文

見過吳純後嘅子瑜偷偷將兩塊胸墊放入胸圍到，希望墊大一啲。

太好笑

p牌推唔到

為咗留下美好嘅回憶，子瑜琴晚偷偷地準備咗蛋糕，用莎莉蛋糕切出一個細圓形，再喺上面加cream同水果，希望個衰仔會鍾意。

聽講啲男仔都好鍾意女仔整嘅料理，雖然都唔係啲乜嘢複雜嘢，但係子瑜都好俾心機整。

要成就一場唔會遺憾嘅約會。

就當係拍一次拖。

就當係一次自我滿足。

去到恆樂樓下，子瑜就打電話叫佢落嚟，點知個衰仔仲未瞓醒，話要畀10分鐘佢刷牙洗面落嚟。

子瑜當然只能夠點頭應承。

就係呢10分鍾，子瑜忐忑不安，突然之間好驚恆樂會唔出現，驚佢已經成為咗其他人男朋友，但係明明已經決定咗唔會再鍾意佢。

胡蝶會唔會已經出咗手？點算點算？

子瑜不停來回踱步之際，恆樂從大廈正門走出嚟，同子瑜碰個正著。

「呀！」子瑜驚慌咁叫咗出聲。

莫名其妙。

自從知道胡蝶鍾意恆樂之後，子瑜對恆樂嘅在意就莫名其妙咁放大起嚟。

因為其他人都鍾意，所以自己就更加鍾意，小癲。

「你搞咩咁大反應？我太靚仔嚇親你？」

「嘛⋯⋯少少啦⋯⋯呀！唔係！你邊鬼到靚仔呀？咪鬼係到認叻啦！」子瑜一時慌心透露咗真心話，佢「呀」一聲後馬上撤回前言，再邊打恆樂邊講。

呢條友，成日懶係風趣，又成日有啲唔知邊到嚟嘅自信。樣勉強叫做中上，整體嚟講算係咁。

今日到底能唔能夠同佢開心咁玩？一切都係最後一次，咁嘅諗法下可唔可以開心咁一齊？

只能夠見步行步吧。

「我淨係聽到你話我少少靚仔，其他我我乜都聽唔到。」恆樂雙手㩒住耳仔講。

「你呀！」子瑜谷一谷氣後突然走前一步，毫無徵兆咁牽起恆樂嘅手，胸壓落佢手臂，趷高雙腳後勉強喺恆樂耳邊以柔和嘅聲線吐出一句：「衰人。」

就畀一啲啲福利佢，近排睇youtube片知道啲男人好鍾意俾啲女貼埋去。呢啲小小嘅身體接觸會令佢哋小鹿亂撞。

要佢心動？明明要放棄佢，要心動嚟拓？

始終想佢心動，即使決定咗要離場。

就當係小小嘅自我滿足。

子瑜嘴巴噴出嘅空氣劃過恆樂耳腔，酥麻感穿透恆樂全身，令恆樂全身放軟一下，身體由上而下輕輕咁抖動一下，眼亦不受控制咁反白。

「嘻嘻！你癲癇呀？」子瑜見惡作劇成功就一副得戚嘅樣咁講。

條淫蟲好爽咁。

「直頭就嚟高潮啦，俾你搞到。」恆樂唔要臉咁答，佢壓根唔怕係人面前柒。

「又講衰嘢！」雖然嘴在抱怨，但係子瑜臉帶笑容，拖住恆樂嘅手亦都無鬆開。

依家係最後可以捉實佢嘅時間。

「咁樣點呀？我哋去邊到玩？」恆樂問。

「首先⋯⋯」子瑜喺袋中掏出一個小盒子然後遞俾恆樂：「生日快樂！」

男仔都鍾意電子嘢，日直播嘅時候講電腦配置嘅話，留言都會推得好快。

「哦⋯⋯多謝。」恆樂有啲手足無措。

「第一次收到女仔嘅生日禮物？」

條友呢啲位又幾純情。

「唔計家人同青梅竹馬嘅話係嘅。」恆樂指頭拗住下巴試圖去掩飾怕羞。

青梅竹馬⋯⋯即係吳純啦。子瑜心中默念。

但係無事，因為恆樂有呢個反應已經令子瑜滿足同高興。

多多少少都係有feel嘅特徵，對我。

「拆嚟睇下呀！」子瑜雀躍咁講。

揮走腦海多餘嘅諗法，我想知道佢鍾唔鍾諗你份禮物。

恆樂打開盒子，凝視盒中嘅禮物，再將佢放上手把玩一陣後講：「Air tag？仲有卡比獸嘅。」

子瑜送出嘅係一個apple air tag，連埋一個印有卡比獸嘅手機套，仲有一個卡比獸嘅air pod套。

子瑜同恆樂都鍾意卡比獸，佢哋兩個第一次約會時嘅回憶。

只屬於我哋細小嘅回憶。

「俾你掛喺銀包或者電話，唔好再漏嘢係人哋到啦。」子瑜笑騎騎咁拍恆樂膊頭道。

恆樂知道子瑜講嘅係因為自己漏咗銀包喺子瑜studio而令到假女朋友知道晒各自身份，玩到差啲爆炸。

恆樂尷尷尬尬咁接過份禮物後：「多謝晒⋯⋯我以後會小心啲，每日會check下銀包去咗邊。」

放銀包嘅話，佢每一次打開之後都會諗起我。

唔能夠一齊，但我唔想佢忘記我。

「識諗就叻仔。以後唔好再錯啦～」子瑜輕輕拍一拍恆樂頭頂去獎勵佢。

恆樂以後同胡蝶一齊之後，就唔可以俾胡蝶發現恆樂同其他女仔一齊玩，咁樣會好hurt胡蝶。

所以要好好做好隱瞞，唔好令胡蝶傷心。

恆樂佢出軌嘅機會⋯⋯我覺得好大，佢咁鹹濕。

或者田就係因為我？

子瑜猛然搖頭將呢個諗法fing走

卑鄙嘅女人。

只有今日就夠，未來就送畀你。

「你發羊吊？」恆樂問無啦啦用力搖頭嘅子瑜搞乜。

「無呀⋯⋯抽筋姐。」無恆樂咁好氣嘅子瑜嘆氣。

「奇奇怪怪咁。」恆樂邊講講邊將子瑜頭先送思俾佢嘅手機套同air tag裝上自己嘅電話到再講：「多謝你。」

「你鍾意就好。」子瑜滿足地歡笑。

「咁樣我哋依家去邊到玩呀？晨早流流有咩搞？你會唔會當自己係禮物送俾我？」恆樂講笑咁講。

會，可以送畀你。我都想可以送人畀你。

「喂也！又亂講嘢！」子瑜用力地拍打恆樂再拖返實佢：「我咪話過去迪士尼囉！無心裝載！」

然後子瑜就拉住恆樂坐狗鐵去迪士尼。

想兩個人獨處。

前往迪士尼嘅列車上，子瑜輕輕咁依靠住恆樂坐，恆樂都默默咁畀個膊頭子瑜挨住。

子瑜只係想咁樣嘅時光可以延長一點，係呢個男仔成為其他人男朋友之前。

可以嘅話人我想可以用到某張票。

迪士尼酒店嘅票。

子愉計好晒

Live

「有你就係夢幻嘅國度。」子瑜輕聲咁講。

恆樂聽到子瑜咁講，就壯起個膽用手攬住子瑜膊頭將佢擁入懷中。

條淫蟲竟然咁大膽！？咁唯有滿足一下佢。

佢懷內⋯⋯出奇地溫暖。

子瑜內心翻滾咗一小會。

兩人呢段時間過得好快，狗鐵一轉眼就去到迪士尼，兩人被迫落車，但手仍然係牽住。

子瑜已經諗好晒今日要做啲乜，首先佢將一條黑布遞畀恆樂：「戴住。」

要畀啲驚喜佢。

子瑜決定。

「咩嚟㗎？」

「要你蒙住眼呀，有驚喜。」

「蒙住嘴說愛我？」

「好爛呀！快啲戴啦！」

「係係。」

恆樂戴好眼罩之後，子瑜又講：「陣間拖住我行。」

然後子瑜以以迅雷不及掩耳嘅速度將兩個耳塞插入恆樂左右兩邊嘅耳窿。

「呀！」身體嘅洞穴突然被插入，嚇到恆樂情不自禁地叫咗出聲。

子瑜連忙捉住恆樂雙手去畀安全感佢，恆樂過咗一陣出奇地適應咗之後就跟住子瑜行。

或者因為無咗視覺同聽覺，恆樂嘅觸覺變得敏銳起嚟，子瑜嘅手好纖細而柔滑，摸上手非常適服，令人唔想放手。

恆樂用力握實子瑜，子瑜都用返力捉實恆樂。

「呀！！！！！！」

視覺同聽覺被阻隔嘅恆樂因為突如其來嘅離心力而放聲大叫。

子瑜為咗畀驚喜同震撼恆樂，包著佢對眼同耳之後就帶咗佢玩飛越太空山，睇唔到又聽唔到恆樂喺感受到離心力嘅時候嚇到失禁咁濟，仲要叫到鬼鍊咁聲。

一山落過山車，恆樂就隨手拆開眼罩同拎走耳塞，再大口大口咁透氣。

子瑜拉住恆樂買咗張佢哋坐過山車嘅相，當時恆樂蒙住眼，個口擘大到好似嗰個呃細路買nft嘅Sunny咁。

揸住張相嘅子瑜捧腹大笑，同佢隔籬黑口黑面嘅恆樂認識強烈對比。

「做咩黑口黑面咁呀，笑得幾開心，喺張相入邊。」子瑜用手指篤恆樂臉頰再講。

呢份快樂係最後啦。

「點解你次次都撚到我仆街。」恆樂嘅語氣無奈得嚟有啲怨氣。

「你嬲豬？」子瑜故作可愛咁講。

仲有幾多機會可以扮住可愛同佢講嘢？

「你話呢？」恆樂翹埋雙手背對子瑜。

「有人嬲呀⋯⋯咁樣就⋯⋯」

反正最後，反正今日嘅事都要被封印，咁不如大膽啲。

子瑜趷高雙腳，微微向前傾。

「啾～」

子瑜蜻蜓點水式錫恆樂臉頰，恆樂因為驚訝而猛然擰過頭望住子瑜，怒氣當堂逃逸無蹤。

高興，錫人都咁開心。

「你⋯⋯下次要錫嘴。」心動到個心烈停卜卜咁跳嘅恆樂明明已經紅都面晒，但係就夾硬搵啲嘢去掩飾自己嘅怕羞。

我都想可以呀，但錫嘴嘅話就太超過，錫咗嘅話我仲可唔可以保持遠離你嘅決心？

最後瘋狂

子瑜再大膽 d 啦