148 Like
26 Dislike
綠嶺
2022-08-26 00:27:39
留咗喺沙灘嘅胡蝶捉緊呢個空檔,向吳純問:「你同恆樂⋯⋯點呀?」
「係喎,冇同你交代。打俾你之後淨係掛住喊好對唔住呀,煩到你。」吳純竟然會覺得唔好意思,吳純勉強地露出微笑,右手拗下後腦。
吳純呢個答案其實乜都冇答到,於是胡蝶再問:「你whatsapp話鐘意佢,仲話會同佢表白⋯⋯」
胡蝶遲疑一陣, 佢唔知應該講落去,生怕會惹吳純唔高興,而吳純就係呢個時候先開口。
「從結果嚟講呢⋯⋯佢拒絕咗我⋯⋯」吳純展現出少見嘅痛苦表情,即使佢勉強笑緊,胡蝶都感覺到佢嗰種心痛。
見到向來開朗嘅吳純擺出呢幅表情,胡蝶都有啲心痛,眉頭不禁皺起嚟。
「啪!」吳純突然雙手拍落胡蝶面頰兩邊再講:「你咁可愛,皺眉頭唔適合你!快啲笑返啦!」
「吳純⋯⋯對唔住⋯⋯」胡蝶垂低頭致歉。
胡蝶都唔清楚點解自己要道歉,但係呢一刻自己一定要講對唔住。
「有乜好對唔住?應該我話對唔住!明明同你講我鍾意佢,但係轉過頭就同佢表白。」
老實講,胡蝶聽到呢度即刻鬆咗一口氣,但係佢有因為吳純嘅痛苦而感到痛心。
兩種情緒混雜喺一齊。
因為吳純嘅失敗而鬆一口氣。
因為吳純嘅失敗而為佢痛心。
鬆一口氣嘅係胡蝶自己,痛心嘅只有吳純。
胡蝶點諗都覺得自己有啲自私。
但係如果吳純唔傷心,傷心嘅就會係自己。
最少吳純嘅失敗代表胡蝶唔使再咁心急去追求恆樂, 目前應該冇其他對手。
「吳純⋯⋯」胡蝶輕輕攬住吳純,以自己嘅體溫去慰藉佢。
「我無嘢喎⋯⋯不過俾美少女咁樣攬下我又無任歡迎。」
「你仲講到笑⋯⋯無事就好。」胡蝶放開吳純,再無意識咁吐出一口氣,就好似自己心頭大石已經放低一樣。
「我無嘢喎,拒絕一次又唔代表啲乜!之後仲有機會嘅!」吳純講。
「!?」胡蝶瞪大雙眼,一臉難以致信咁望住吳純。
「唔使咁震驚喎!如果你同恆仔表白,但佢拒絕咗你,你都唔會即刻放棄啦,係咪先?」
「係嘅⋯⋯」胡蝶都明呢一種諗法。
原來未放鬆得。
對手仲係到。
心情好混亂。
原來對手未放棄。
先攻,失敗,再企返起身籌備下一次攻勢。
吳純真係好堅強。
朋友係情敵。
鐵拳無敵鍾培生
2022-08-26 01:45:51
吳純竟然冇同胡蝶講個最強力對手喺道
米凱拉的鋒刃
2022-08-26 10:20:48
吳純都唔識子瑜
鐵拳無敵鍾培生
2022-08-26 10:22:20
係喎
恆仔冇話係子愉
Chicharito_14
2022-08-26 23:01:04
Push
Chicharito_14
2022-08-27 09:18:34
Push
牧羊記
2022-08-27 11:07:43
打錯字
綠嶺
2022-08-27 16:40:08
胡蝶都好扎心。
若吳純追到恆樂,自己一定唔能夠好好咁祝福對方,因為只有自己被拋低,自己嘅戀情告吹。
胡蝶一啲都唔想自己嘅戀情失敗。
若吳純再失敗,胡蝶一定會再因為咁而替佢傷心,但心入面無可避免地會覺得有一絲喜悅,情敵失敗帶嚟嘅喜悅。隨之而嚟係愧疚,愧疚自己為他人傷心嘅時候感覺到一絲快樂。
醜陋。
內心醜陋。
明明唔可以開心,但係感情,就係控制唔到。
朋友傷心,自己就會開心。
要自己開心,就無可避免地令朋友傷心,而自己好大機會就係嗰一個劊子手。
即使荊棘滿佈,胡蝶都打算不顧一切咁做到恆樂女朋友。
不擇手段都要做到,因為呢次係佢人生第一次有鍾意嘅人,第一次有非常之渴望得到嘅嘢。
解釋唔到自己點解想要,但真係好想成為佢身邊嘅人。
若果鐘意嘅人同自己講鐘意自己,胡蝶一定會開心到流淚。
打斷胡蝶傷春悲秋嘅係吳純嘅聲音:「不過咁樣落去,你失敗嘅機率都好大。」
「我⋯⋯?」胡蝶指住自己問。
「係呀。恆仔同我講,除咗我哋之外,佢仲有一個女仔非常之在意。佢仲話佢依家最鍾意係嗰個女仔。呀!嗰個人同我哋一樣都搵咗恆樂扮男朋友。個衰仔唔知行咩桃花運, 無啦啦咁多女埋佢身。」吳純努力覆述佢由恆樂到聽到嘅嘢。
「又有假女朋友!?」胡蝶震驚咁叫出聲。
「係呀,除咗我哋之外有第三條女呀!但我冇睇過相所以我唔知道嗰條八婆係邊個!竟然係我唔知情嘅情況下勾引恆仔!一定係死八婆嚟。」吳純咬牙切齒咁講。
「第三個⋯⋯最鐘意⋯⋯」胡蝶喃喃自語。
綠嶺
2022-08-27 16:45:31
「但係放心喎,佢哋應該有排都未一齊。恆仔話應該冇咁容易追到嗰條女,再講呀,恆仔依家對你都好有好感,我諗你表白嘅話應該會成功。」吳純嘅笑容帶點落寞。
「我⋯⋯表白?」胡蝶憂心戚戚咁望住吳純,佢唔知自己應唔應該咁做,特別係吳純啱啱先俾人拒絕完,所以佢試圖用眼神去尋求對方嘅認可,認可佢去表白。
「唔使擔心我喎⋯⋯就算你哋一齊咗又唔代表唔會分手,我都可能有機會㗎。」吳純唔識相咁講。
胡蝶雖然有啲驚訝,但又好似理所當然咁,因為呢個係吳純,做第三者、搶男朋友呢啲嘢,只要佢心情好佢真係會做得出。
胡蝶苦笑幾聲後再講:「我同恆仔一齊,我只係話如果!如果佢真係應承我,而我哋就一齊㗎話⋯⋯你ok?」
OK呢個字好曖昧,胡蝶唔想將啲嘢講到咁死,唯有將自己嘅話語加點曖昧嘅成份落去。
「唔⋯⋯唔ok㗎,但都無計,睇下到時有冇機會搶到啦。」
雖然胡蝶好想話搶人男朋友呢啲事好唔道德,但係一切十劃都未有一撇,胡蝶同恆樂嘅距離又唔係特別近,胡蝶依家擔心一齊之後嘅事實在太過杞人憂天。
總之,就算同恆樂一齊到,都要提防吳純,雖然以胡蝶認識嘅恆樂,應該唔會出軌。應該。
「我⋯⋯我會追到佢返嚟。但係⋯⋯要啲時間。」胡蝶都明白佢同恆樂嘅感情唔係咁深厚,就算一步一腳印都需要多啲時間去培養感情,如果唔係就算一齊咗都好易散。
總括而言,胡蝶目前嘅目標就係鞏固感情基礎,同時令恆樂追自己。另外仲要提防未知嘅第三方女仔。
不過胡蝶諗到呢到就有啲心痛,有一個係恆樂心入邊比自己更加重要嘅女仔。
綠嶺
2022-08-27 17:19:38
就算係第二名都冇問題,只要坐到女朋友嘅寶座,去到最後就會成為第一。
第二呢個身份只不過係暫時。
先奪取正印嘅位置,之後培養好感情,就可以穩定坐喺第一嘅位置。
做唔到正印就一切都係廢話。
胡蝶心入邊默默為自己打氣,要將自己想要嘅嘢攞到手。
「總之我哋都要小心嗰條未出現嘅八婆。」吳純提醒。
「我會小心⋯⋯個女仔⋯⋯八婆。」為表自己某程度嘅決心同埋希望改變自己嘅願望,胡蝶試圖由勇於叫人八婆作為起點。
「喂!」一把熟悉嘅聲音突然由胡蝶嘅後方傳出。
「呀!」
突如其來嘅冰凍感覺突襲胡蝶嘅臉頰兩邊,嚇到胡蝶情不自禁咁叫咗出聲。
「嘻嘻,嚇親?無糖可樂嚟㗎,我請你地兩個人。」一臉得意嘅子瑜由胡蝶身後走出嚟,將頭先用嚟凍胡蝶嘅可樂分別遞俾胡蝶同吳純。
「多謝晒!」吳純爽朗咁接過無糖可樂,再咕嚕一口飲晒佢。
「多謝你。」胡蝶則優雅咁喺子瑜手上接過可樂。
「係呢,頭先你話八婆,鬧緊邊個啊?」子瑜問。
「唔⋯⋯我都唔知邊個⋯⋯」對於正身未明嘅第三方,胡蝶都唔知自己鬧緊邊個。
「冇乜特別啊!只不過係一隻狐狸精。」吳純插嘴。
「狐狸精?」子瑜疑惑地反問。子瑜心諗,應該唔係講緊我嘅。
「唔好講呢啲啦!」吳純講完之後就一手搶走子瑜手上嘅太陽油再講:「我哋塗太陽油啦!」
吳純將子瑜同胡蝶推倒喺沙灘墊上面,再將佢哋兩個反轉身,背脊向天,然後自己跨坐喺佢哋兩個背上。
天大地大有容乃大
2022-08-27 17:45:29
綠嶺
2022-08-28 15:19:56
「做⋯⋯做咩呀⋯⋯」胡蝶膽怯地問。
「我自己嚟得啦!」子瑜估吳純係想幫佢哋塗太陽油所以先推倒佢哋,身體好敏感嘅子瑜慌忙咁想嘴遁吳純。
吳純一面猥瑣笑顏咁答:「放心!等大姐姐嚟幫你哋!」
「呀!」首先驚呼嘅係子瑜。
吳純一手先拉開子瑜綁喺頸上嘅結,等子瑜無處可逃, 因為只要子瑜一郁,佢上身就會赤裸裸咁喺海灘上露出。子瑜只能夠將自己嘅胸脯壓喺沙灘墊上邊,等他人幫佢綁返好泳衣個結先有機會走到。
吳純左手突然將太陽油吱落胡蝶背脊,突如其來嘅冰凍感覺令胡蝶「呀」一聲咁樣叫出嚟。
吳純嘅手指輕輕劃過了子瑜嘅臉龐,吳純舔唇後將頭哄埋子瑜耳邊:「你皮膚幾滑。」
「嗯~」因為敏感,子瑜情不自禁咁發出呻吟聲。
吳純從胡蝶背上抹走太陽油,雙手搓均,再左右手同時係兩個背脊同頸上打轉,然後用佢瘦長嘅手指喺兩人臉上塗上一層太陽油。
「好冰呀⋯⋯呀!」胡蝶情不自禁咁扭動身體同低吟。
「呀。」子瑜合埋雙眼強忍敏感嘅感覺。
吳純聽到呻吟聲後覺得非常之滿足,佢進入步將雙手由下而上伸入子瑜嘅泳衣入面,將手上嘅太陽油抹到子瑜雙乳上。
「你呢件泳衣⋯⋯會露北半球,對波會曬太陽,我會幫你好好防曬。」吳純用手踭抹一抹嘴角嘅口水,之後雙手就好似搓泥膠咁樣搓子瑜雙乳。
「嗯~喂也⋯⋯呀⋯⋯」子瑜雙乳越來越多太陽油,北半球唔知幾時開始已經反光。
子瑜嘅泳衣無露肚,所以吳純跟住落嚟就將指尖伸到子瑜雙腿。
綠嶺
2022-08-28 15:21:07
吳純由子瑜嘅大髀內側開始摸起,手指慢慢向下掃,去到腳板底嘅時候,吳純好似握手咁樣捉住子瑜腳板,等每一隻腳趾罅都有太陽油。
搞掂子瑜之後,吳純就馬上將魔爪伸到胡蝶身上。佢首先將輕輕拍打胡蝶屁股,再喺佢屁股到打圈,然後再將胡蝶個身反過嚟,正面向天。
吳純離開子瑜,騎乘喺胡蝶身上。
吳純右手喺胡蝶鎖骨到上油,左手喺胡蝶肚上打轉,由輕輕篤一篤胡蝶肚臍窿。
胡蝶雙腿不受控制咁抖動,之後吳純將雙手伸到胡蝶腋下,由此開始向下抹,同時為胡蝶左右手搽上太陽油。
搽到佢手掌嘅時候又同胡蝶十指緊扣,然後突然鬆手,再由腳趾開始將太陽油向上搽。
「嗯⋯⋯」俾人不停觸摸身體嘅胡蝶係咁不受控制咁扭動身體。
「到我。」吳純幫胡蝶搽完太陽油之後舔一下唇從後熊抱胡蝶,身緊貼對方:「你身上多出嚟嘅太陽油就抹落我身上啦!」
胡蝶同吳純就好似兩條肉蟲咁樣不停磨擦對方同扭動身體。
胡蝶好快已經放棄反抗,乖乖哋俾人蹂躪。
「搞掂!」吳純滿足感咁起身講。
同吳純相反,子瑜同胡蝶喘晒大氣咁攤起沙灘唞大啖氣。
「仲⋯⋯仲攰過游完一日水⋯⋯」子瑜邊喘氣邊講。
「呼⋯⋯我要休息一陣。」胡蝶氣喘喘咁講。
「你哋兩個講咩呀?行啦!」吳純一把手拉起佢哋兩個,然後拖住佢哋奔向大海。
「嘩!!」被拉住嘅二人異口同聲地叫出嚟。
天大地大有容乃大
2022-08-28 16:06:16
Chicharito_14
2022-08-28 23:10:07
Push
伊藤園菜肉包
2022-08-29 10:56:47
鐵拳無敵鍾培生
2022-08-30 00:18:46
吳純真係好有活力
綠嶺
2022-08-30 23:31:23
「卟!」三人同時跳入海裡,水花四濺,冰涼嘅感覺瞬間透過雙腿傳到腦袋,身體馬上得到降溫。
「嘻嘻!」吳純自豪地笑。
「又幾舒服。」開始習慣吳純隨性嘅胡蝶已經某程度上逆來順受,對吳純嘅行動都盡量唔會覺得驚訝。
「都⋯⋯都係⋯⋯」子瑜對俾人拉住走只能夠苦笑。
「小心!」吳純出其不意咁向胡蝶同吳純撥水,之後子瑜同胡蝶好自然就開始撥返水嚟反擊。
美少女們一瞬間就濕晒。
子瑜雖然好想搵同胡蝶獨處嘅機會,但係喺吳純嘅暴走之下一直都搵唔到機會。
之後三個人又去咗玩沙,砌下沙嘅城堡。
胡蝶入面擔憂咁望住表白失敗嘅吳純,唔明白點解佢失戀都仲咁有精神玩得咁開心。到底自己應唔應該安慰佢,到底吳純係唔係只係扮作堅強,心入邊其實好痛?吳純琴日打俾胡蝶嘅時候默不作聲,只係大聲痛哭一場。或者自己應該真係要出聲安慰一下佢?
另一邊廂, 子瑜就望住胡蝶,不停思索點樣開口。子瑜反而最想問嘅係自己,點解自己唔可以開口講話其實自己都係恆樂嘅假女朋友,話自己知道胡蝶只係恆樂假女朋友。雖然唔知胡蝶因為咩原因要話恆樂係自己真正嘅男朋友,但係其實子瑜唔介意,只係希望胡蝶可以繼續做朋友。大家就一齊忘記呢個謊言。
但係好難講出口。根本預計唔到胡蝶會有咩反應,惱羞成怒?當場決裂?一諗到後果可以咁黐線子瑜就乜嘢都唔敢做。
另外,子瑜都一直都搵唔到機會同胡蝶單獨相處,不過講又咁講,子瑜玩得開心,已經有少少唔記得自己處於一個麻煩嘅狀況。
始終俾吳純拉住走咗咁耐,子瑜一直都搵唔到主動拉走胡蝶嘅機會。
至於吳純,佢有難得咁認真諗緊點樣先可以砌到一個高嘅沙城堡。
「我想去曬下太陽,胡蝶你嚟唔嚟?」已經按耐不住嘅子瑜試圖製造獨處嘅空間。
「哦⋯⋯好呀。」胡蝶答應,子瑜當堂鬆一口氣,心諗終於成功製造到獨處嘅空間去傾想講嘅嘢。
可惜,事與願違,有個人唔會俾佢順心如意。
「咁一齊曬啦!」吳純一腳踢爛佢辛辛苦苦砌好嘅沙城堡,然後就跟住子瑜同胡蝶返去擺嘢嗰張沙灘墊嗰到曬太陽。
子瑜嘆一口氣,估唔到計劃失敗。
子瑜曬咗一陣太陽之後,又提議同胡蝶一齊出去士多度買啲嘢食,點知吳純又話要一齊食。
咁樣都算啦,子瑜又話想胡蝶玩下水,點知吳純死都要跟嚟,搞到子瑜頭都大埋。
子瑜開始諗,吳純係咪特登阻住佢?
鐵拳無敵鍾培生
2022-08-31 02:47:16
但其實吳純就只係單純想跟埋去
綠嶺
2022-09-01 00:49:25
落到水之後,子瑜突然諗到一個方法可能會有效洗走吳純。
「不如我哋鬥快游出浮台?」子瑜講。
「好呀!我出發喇!」吳純一講完就好似一條飛魚咁沖去浮台。
而子瑜終於鬆一口氣,呢一個單細胞生物估唔到咁易就洗得走。
子瑜開頭只係諗,呢啲單細胞生物應該好鍾意同人鬥,所以先話鬥快游出去。
估唔到效果超群。
子瑜終於成功製造到只有兩個人嘅空間,內心嘅話語唔講出嚟嘅話呢段關係只會朦上陰影。
況且牽涉到友情嘅愛情,若果大家都將所有事情收埋喺心中,若果他日有爆發嘅話,大家都會身受重傷。
唔太識游水嘅子瑜同胡蝶捉浮板,慢慢咁游出浮台。
首先開口嘅係子瑜:「你⋯⋯同男朋友點?」
即使已經決定好要講呢樣唔係咁愉快嘅話題、呢樣可能令胡蝶覺得蒙羞嘅嘢,子瑜都想好好咁講好佢。猶豫咗一陣,子瑜都係成功問出口。
子瑜已經盡咗力盡量唔好吞吞吐吐咁講。
雖然好想直接進入正題,但係都要慢慢鋪陳。
子瑜如果直接同胡蝶講我知你個男朋友係假男朋友,雖然唔知道你鍾唔鍾意佢,但我已經鍾意咗佢。咁樣講嘅話,不論胡蝶鍾唔鍾意恆樂,胡蝶都會變得非常之難堪。
若果唔好彩(子瑜嘅角度),胡蝶真係鍾意恆樂所以先話佢係自己男朋友嘅話,咁樣某程度上反映到胡蝶對恆樂有好大嘅佔有慾,想驅趕所有潛在接觸恆樂嘅女朋友,以確保自己可以慢慢爬上去女朋友嘅位。
不過胡蝶可能冇諗咁多,只係單純地想享受一下俾人誤會係情侶嘅感覺。
子瑜要等待嘅就係胡蝶嘅答覆。
「都⋯⋯幾好。」胡蝶堅持謊言,但係因為心虛所以佢講嘢窒咗一陣。
子瑜都知道,謊言唔係咁容易去拆穿,尤其是好難有講出口嗰個人拆穿自己。
「咁幾好。」子瑜虛應。
子瑜完全冇覺得幾好,反而係覺得更加難開口去將事實講清楚。
「你呢?同個男仔點?」胡蝶反問。
胡蝶冇察覺子瑜嘅內心戲,佢以單純嘅心去關心朋友。
胡蝶冇預計過子瑜在意嘅男仔就係恆樂,所以先可以咁輕鬆咁問出呢個問題。
胡蝶當刻嘅心情完全只係因為八卦而問,子瑜嘅煩惱同迷惘,胡蝶沾唔上一點邊。
因為未知。
鐵拳無敵鍾培生
2022-09-01 01:35:22
喺海中心談心真係好咩?
Chicharito_14
2022-09-01 21:02:58
Push
綠嶺
2022-09-01 23:05:46
胡蝶唔知道恆樂同子瑜嘅心意,所以先冇乜煩惱。
但係子瑜唔係,子瑜知道。因為佢知道,所以子瑜忍唔住諗,到底胡蝶係唔係知道咗子瑜都係恆樂假女朋友嘅事所以先咁樣問?
胡蝶係咪想試探子瑜先問?
同個男仔點,即係胡蝶問緊子瑜同胡蝶稱為男朋友嘅男仔發展成點?
胡蝶到底係咪咁嘅意思?子瑜唔知,但係有機會真係咁諗。
胡蝶係咪想借呢個機會提起恆樂嘅事,再叫子瑜遠離恆樂?胡蝶係咪想大聲呼喊,話自己係恆樂女朋友、或者話要成為恆樂女朋友,所以要麻煩子瑜呢位朋友讓路。
胡蝶你無呢個身位趕走我呀!明明你就唔係真正嘅女朋友。子瑜心入邊浮現呢個答案。
但係子瑜唔確定。
胡蝶可能真係乜都唔知,單純地因為關心朋友而咁問。
若果真係咁嘅話,子瑜以上嘅猜想就對呢位朋友好失禮。
子瑜都只不過從嗰一句短短嘅說話去做出無限嘅猜想,因為雙方都冇坦誠,雙方都向對方隱藏一啲嘢。
而大家隱藏嘅嘢卻有對方嘅存在,子瑜肯定嘅係自己知道,但係唔肯定嘅就係胡蝶知唔知道。
結果煩惱嘅就只有子瑜。
背德感。
子瑜一瞬間對胡蝶呢位朋友產生厭惡感,佢對自己有呢種感情又產生左另一種厭惡感。
或許係自己心入邊,愛情已經凌駕於友情。
即使子瑜友情同愛情都唔想失去,但係矛盾呀。
核心問題係胡蝶係咪鐘意恆樂?係嘅話子瑜又要點做?
子瑜要隱藏呢份心情,默默哋鐘意朋友鐘意嘅男仔,一直到時間將呢份感情沖淡?
咁樣咪又係另一種背叛。見到胡蝶同恆樂一齊嘅話,子瑜大概會係心入面咒罵佢哋。
子瑜嘅頭腦混亂得好似打風時嘅海洋,海浪不停翻滾。
「幾好⋯⋯我應該真係鐘意佢。」子瑜坦白講,但係礙於依家未搞清所有事情,子瑜只能夠用佢呢知字隱晦咁去代替恆樂。
「咁你要加油呀。」胡蝶一面純真咁同子瑜打氣。咁樣反而令子瑜有啲內疚同羞愧,因為自己鍾意嘅人好可能就係朋友鍾意嘅人。
綠嶺
2022-09-01 23:22:43
或者胡蝶真係乜都唔知?子瑜心諗。
好難開口問。
一諗到開口問嘅話,如果問到一個自己唔滿意嘅答案,即係胡蝶講明自己係鍾意恆樂嘅話,要做出退讓嘅就好可能會係子瑜。
呢個係人類莫名其妙嘅習慣。
一個一班朋友,一齊鍾意一個男仔,第一個講明話自己鍾意嗰個男仔嘅人永遠都會有優先權。所謂嘅優先權就係,其他女仔唔可以對過一個男仔出手,否則就係背叛、就係臭雞。
因為我係最先講呢份感情嘅人,所以我先可以追個男仔。如果其他人都會追呢個男仔嘅話,其他人就會變咗明知自己嘅朋友鍾意呢條仔,都要去追求呢個男仔。
換一句說話嚟講,你同咗朋友講你鍾意一個男仔,就係變相牽制住佢,令你個朋友唔可以對嗰個男仔出手。
因為你已經講明左你係鍾意嗰個男仔,如果其他人出手追佢嘅話就會變咗踐踏自己嘅心意,背叛朋友之間嘅信任。即使個男仔拒絕咗自己,自己嘅朋友都唔可以出手,因為你已經講過自己鍾意嗰個男仔。你朋友明知你嘅心意嘅情況下仲溝你鍾意嘅男仔就係唔道德。
我先講,你後來,你出手,背叛和不道德。
所以,如果胡蝶依家同子瑜講鍾意恆樂嘅話,子瑜就會變得非常之難出手去追求恆樂。因為喺呢個情況下,就算子瑜追到恆樂,自己都會俾他人指責係臭雞、俾人指責明知朋友鍾意果條仔都會溝,死臭雞。明明呢一刻,大家都鍾意恆樂,只係大家都冇講出口。
如果因為喺朋友之間先講出口而有道德高地嘅話,咁樣實在太唔合理。
不過呢一切都只不過係子瑜嘅猜測,胡蝶對恆樂有冇feel,呢一刻嘅子瑜只能夠估估下,就好似薛丁格的貓咁,胡蝶對恆樂嘅心意係子瑜眼中就係徘徊喺鍾意同鍾意中間。
鐵拳無敵鍾培生
2022-09-02 00:30:13
子愉唔好諗喇,學吳純啦