148 Like
26 Dislike
鐵拳無敵鍾培生
2022-05-31 21:09:11
好羨慕恒仔呀
綠嶺
2022-06-01 23:12:19
「喂喂。」
突然,有人從後拍恆樂背脊,搞到佢當堂嚇咗一跳。
「呀!」
「咩事呀你,咁誇張!」映入恆樂眼簾嘅係抱住卡比獸毛公仔嘅子瑜。
「嚇死人咩!⋯⋯你隻係卡比獸?」恆樂見到攬出卡比獸毛公仔嘅子瑜就帶啲困惑咁問。
「送俾你㗎!但係⋯⋯唔緊要啦!」察覺恆樂手上都有卡比獸,子瑜窒一窒之後就笑住咁將卡比獸遞向恆樂。
「咁⋯⋯呢個都送俾你。」恆樂都將手上嘅卡比獸遞出去。
「嘻嘻!多謝!」子瑜撲向恆樂到將佢攬實,而因為兩隻卡比獸夾咗喺佢哋中間,所以恆樂感覺唔到波仔。
可惜!
恆樂揼晒春。
「又會咁啱送埋同一樣嘢。」
「呢啲可能係情侶嘅心有靈犀。」子瑜含情脈脈再講:「我哋都鐘意卡比獸真係巧合。」
「話時話你係邊到搵隻嘢返嚟?我係夾公仔鋪到都見你唔到。」
「我去咗隔離新都會log on買㗎!頭先夾咗咁多錢都唔得我就已經知道無可能夾到啦!反而係你呀!你又就返嚟晒錢夾呀?」子瑜叉起腰問。
「因為一啲原因我無乜洗錢就夾到隻卡比獸返嚟啦。」恆樂含糊咁隱藏另一個女朋友幫手嘅事。
「咁呀⋯⋯都好嘅,無晒到錢就得啦,乖乖。」雖然有啲懷疑,但係子瑜決定相信恆樂,仲伸手摸佢頭頂。
「咁你鐘唔鐘意份禮物?」恆樂問。
「當然鐘意啦!最開心嘅係竟然送埋同一份!」
恆樂開始困惑,子瑜好似真正嘅女朋友咁,佢有啲懷疑對方已經鐘意咗自己。
今日嘅約會同真正嘅拍拖真係相差無幾,子瑜都好似一個真正嘅女朋友,仲係一個鐘已經可以不停俾到剌激同驚喜嗰一type。
子瑜再將頭陷入到恆樂嘅胸膛中:「多謝你。」
「咁可唔可以要啲獎勵呀?」恆樂露出咸濕嘅笑容問。
「你講嚟聽下。」天真嘅子瑜笑住回答。
「可唔可以摸下波仔?」恆樂有啲當作佢哋真係拍緊拖,所以向子瑜提出咸濕請求。
「咸濕!」子瑜推開攬住佢嘅恆樂。
「無話唔可以即係得?」恆樂一本正經咁問。
「唔得呀!」
「真係可惜。仲想俾你感受下我灼熱嘅手掌。」
子瑜拖住恆樂去保護自己對沒:「拖住就感受到!你陪我行去工廈嗰邊?我studio喺嗰到,當送女朋友返屋企?」
「你有studio!?」恆樂震驚起嚟。
「好出奇咩?啲毒撚洗好多錢課金㗎。我仲喺嗰到有兩間party room。」子瑜一臉自豪地講。
毒撚嘅消費力再次刷新恆樂嘅想像。
「咁你一個月可以收到幾錢到?」恆樂好奇咁問。
「未計廣告,淨係super chat同課金都有三萬一個月㗎!」
子瑜每一次都俾都好多驚喜恆樂,每一樣都真係估佢唔到。
「三萬!?不如我唔好扮你男朋友,扮你寵物得唔得?我識自己去廁所。」恆樂認真咁講。
「講笑咩你!男朋友!」
認真的。
但恆樂即刻諗到有啲嘢唔對路,於是問:「咁你有studio嘅話之前點解要返學校剪片?」
「因為嗰陣時我部電腦拎咗去apple整。」
不知不覺佢哋就行到工廈樓下。
「咁我就送到呢到算啦。」
「好啦,拜拜啦男朋友!」子瑜輕輕錫咗恆樂面頰一啖之後就轉身走入工廈離開。
當時嘅恆樂仲未知道,好快佢又會再嚟到呢一個工廈。
鐵拳無敵鍾培生
2022-06-02 00:38:11
唔通吳純又係嗰度收埋個單位
走音天后江海迦
2022-06-02 08:48:43
好文必須推
綠嶺
2022-06-02 23:50:11
五、連續約會!?
「唔係咁啱呀⋯⋯」
喺床上準備瞓教嘅恆樂呆咗。
胡蝶:今個星期日12點完Sem Party,地址:葵芳XX工廈10樓A室。「男朋友」麻煩你。
吳純:今個星期日5點我莊聚呀!你同我著好啲再醒醒定定咁嚟呀!地址係葵芳XX工廈10樓A室,你同唔同我一齊出門口?
「唔係咁啱呀⋯⋯」見到兩間party room係同一個地址嘅恆樂嚇到自言自語。
恆樂用google map睇下個工廈嘅街景圖後講:「真係咁啱!?」
圖中嘅工廈就係子瑜studio嗰一棟,而子瑜之前講過佢係呢棟嘢都有兩間party room。
咁咪有機會喺子瑜嗰間!?
「含晒⋯⋯今鋪玩完⋯⋯」
同一日,兩個女朋友先後喺同一間party room有聚會,而間party room有機會係由第三個女朋友所擁有。
恆樂頭都大埋,但係只能夠見步行步。
—----------------
綠嶺
2022-06-03 00:05:46
呢間party room無人鎮守,老細只係send咗個密碼俾佢哋㩒制入去玩,因為有未知嘅恐懼,所以由入房開始恆樂就左顧右盼,怕會撞到子瑜。恆樂驚到要戴起hoodies頂帽,盡量去遮住自己個樣,唔想閉路電視影到自己個樣。
「你做乜係到望嚟望去呀?做賊呀?」吳純問。
「無呀,第一次嚟,覺得啲嘢新奇咪望下。」恆樂求奇搵個藉口。
「奇奇怪怪咁。」吳純指責。
「你理鬼我。」恆樂唔滿意咁反駁。
「記得扮好啲呀。」吳純喺恆樂耳邊講。
「呀⋯⋯ok。」因為太擔心會俾子瑜發現,所以恆樂幾乎唔記得今日係嚟扮男朋友。
為咗安全起見,恆樂今日出門口之前已經send咗個WhatsApp問子瑜喺邊,佢話喺屋企,所以佢哋兩個應該唔會撞到正。
「你唔好掉我架呀!」吳純用力抆恆樂耳仔。
「痛呀!得㗎啦!聽晒你話!」
「醒水呀!」
「我係男朋友⋯⋯我係男朋友⋯⋯」恆樂細細聲咁自我催眠。
「你搞咩呀?」
「自我催眠咁,唔好煩我。我係男朋友⋯⋯我係男朋友⋯⋯」
「你快啲入戲呀,唉。」見到恆樂咁嘅款,吳純不免有啲憂心。
「嗰邊嘅情侶,唔好係到打情罵俏啦,快啲過嚟玩啦!」已經坐咗喺大檯嘅May向喺門口吳純哋呼喊。
「行啦!」吳純興奮咁拉住恆樂走過去大隊到玩。
「我係男朋友⋯⋯」恆樂仲自我暗示緊。
「春風滿面喎純純!」May姐揶揄。
「喂也!」
「男朋友,點呀?我哋純純好唔好玩呀?」May古古惑惑咁問。
「係!好玩!佢係我女朋友呀!哈!好玩!」恆仔唔能夠及時喺自我催眠中切換過嚟,於是九唔搭八咁回應。
鐵拳無敵鍾培生
2022-06-03 00:57:28
留名第三個女朋友嚟埋
綠嶺
2022-06-03 16:46:15
「咁快趕住宣示主權!哎也也!」May笑到安尼亞咁款。
「好sweet喎!」
「好骨痹呀!」
吳純其他女莊員都起哄,睇嚟恆樂呢個鳩答大家都好滿意。
「傻寶!」吳純高興咁攬實恆樂隻手臂,成對波貼晒上去。
「扑嘢要返屋企呀。」某個女莊員用手掩住面偷笑。
「係呀,返去扑嘢呀,哈哈哈。最鐘意扑嘢。」仲未由自我催眠嘅恆樂照樣直接覆述他人嘅說話。
「我哋吳純副計又真係唔錯嘅!」一位女莊員講。
「唔好再玩呢對小情人啦,我哋就開始玩啦!」May姐一聲令下,大家就開始乖乖地坐低玩game。
鐵拳無敵鍾培生
2022-06-03 22:08:36
恆仔壓力大到傻咗
新狂野大笨象
2022-06-04 08:18:56
唔係胡蝶先咩
綠嶺
2022-06-04 15:57:16
正襟危坐嘅恆樂不知不覺間就玩咗幾個遊戲,心情都平復咗一啲。
「點解我又輸㗎!!!」眼眶充滿淚水嘅吳純不滿地叫出嚟。
「你太易俾人睇穿啦,哈哈哈!」May姐開懷大笑起。
「傻鳩。」坐喺吳純對面、佢嘅前男友Anothy定係唔知Alton細細聲咁恥笑吳純。
「咁你又真係廢嘅。」連喺到扮吳純男朋友嘅恆樂都笑埋一份。
吳純今日嘅莊聚係攜眷出席,佢哋吹下水食完嘢之後就開始玩game,而打頭陣嘅遊戲就係潛烏龜。
無辦法控制表情嘅吳純每次抽到鬼牌之後,臉容都會誇張咁扭曲起嚟。淨低兩隻牌時,人哋想抽走佢隻鬼牌嘅話佢就會忍唔住偷笑,但人哋抽普通牌嘅話就會整個囧樣出嚟。
簡單而言就係每個人都係由吳純嘅表情中估到佢嘅牌而輕鬆致勝。
至於玩拍七嘅時候,吳純可以話係輸到一敗塗地。
「十四呀!」吳純毫不猶豫地叫出嚟。
「你輸!」
「十四點會係七嘅倍數!」吳純反駁。
「乖啦,你靜啲啦。」恆樂一面尷尬咁叫吳純靜一靜,唔想再柒落去。始終係呢個場合下佢係自己女朋友,佢柒起上嚟佢自己都會遭殃。
「咩呀!點解你唔撐我呀!十四點會除唔盡七呀!」吳純繼續反駁,而且佢嘅表情上講明,佢覺得自己係100%正確。
「癲女人,你數學點樣夠分考入大學㗎。」Alton恥笑道。
「等我證明你睇,即刻㩒計數機!⋯⋯呀!對唔住⋯⋯我輸咗啦⋯⋯」知道自己錯咗嘅吳純一副就快喊出嚟嘅樣。
恆樂忍唔住懷疑吳純智力係咪有問題。
玩七級豬嘅時候,同一招吳純可以連續中幾次,學習能力可以話係零。
不過佢唔係聖鬥士,同一招仲幾次都冇辦法。
「二!」吳純反出一隻二出嚟,當其他人已經摸晒鼻之後,吳純仲呆咗咁周圍問:「點解下一個唔出牌呀?」
恆樂用手肘撞到吳純去提醒之後吳純先知自己慢咗。
「點解你唔早啲提我呀!」吳純怪責身為男友嘅恆樂。
「⋯⋯」唔想成為一級豬嘅恆樂擰歪面唔應吳純。
「車,仲以為呢招work。」吳純嘖舌,以為佢嘅低級技能會令有正常智力嘅恆樂中招。
玩咗幾輪之後,May姐已經去到四級,而喺恆樂嘅肘擊提水下,吳純勉強維持喺一級。
天大地大有容乃大
2022-06-04 22:13:12
前後都10年,今年2月14先出小說結局
鐵拳無敵鍾培生
2022-06-04 23:34:35
吳純咁可愛嘅
綠嶺
2022-06-05 16:36:43
「純純,上次食飯幾錢?」 4級豬May姐問。
「上次我請啦!」1級豬吳純大方地講。
「中呀!上四級!」May姐高興咁叫出嚟。
「呀!你陰我呀!」心知中伏嘅吳純不滿地叫出聲。
「智障女人。」Alton恥笑。
「喂也!你憑咩恥笑我!」不滿嘅吳純想引佢前男朋友中伏升級。
「⋯⋯」有正常智商嘅Alton當然無應佢。
「切!」吳純見計劃失敗就咬牙切齒。
去到下一輪,反應速度慢嘅May姐又上咗五級,而吳純就仲係零級。
但係無學習能力嘅吳純會中同一招twice,始終佢唔係聖鬥士。
「純純,上次睇戲幾錢?」May又問。
「我請啦!唔使俾返錢我。」吳純又大方地講。
「中呀!上五級!」May姐高興咁叫出嚟。
「呀!你又陰我呀!」中伏twice。
「你真係好蠢呀!」May恥笑。
「輕度白卡⋯⋯」Alton都恥笑。
「喂也!個個都恥笑我!」滿眶淚水嘅吳純講。
玩完一輪熱身game之後就到咗唱K時間之後,吳純同恆樂就坐埋一齊等唱歌。
「我懷疑我啲莊員有超能力,佢哋好似睇穿咗我諗乜咁。」吳純苦思。
「係你個腦有啲問題姐⋯⋯」恆樂答。
「喂也!你都咁話我!」吳純一拳打落恆樂大脾。
「咁你真係好似無學習能力咁。」
「邊係呀衰人!」
吳純連還踩向恆樂以示不滿。
「喂喂,你哋兩個返到屋企先慢慢玩腳啦!」May姐插嘴。
「邊有呀!」
「辛苦你啦恆仔,要掂佢隻臭腳。」May姐講。
「我恆仔先唔介意呀!佢好專一㗎~」吳純特登大聲吹講專一兩個字。
「係咩係咩?佢有乜好呀?」May姐問。
「癡住佢我就有飯開!佢又識行路!er⋯⋯仲識同我睇戲!」吳純絞盡腦汁都講唔到幾樣好嘢。
「你諗唔到點讚我其實可以唔洗講落去!」覺得被間接羞辱嘅恆樂講。
「之前又講到你個恆仔點好點好,點知小小嘢讚佢都諗唔到。」Alton嘲諷。
「收皮啦賤男人!我恆仔好你多多聲呀!」吳純唔忿氣咁講。
「係呀係呀。」
「哎喲!激死我啦!May呀,條友咁嘅態度!」吳純向May求救。
鐵拳無敵鍾培生
2022-06-06 04:12:10
alton真係好賤格
綠嶺
2022-06-06 17:16:47
「咁你又真係傻嘅,一句好嘢都講唔出。」May㩒住太陽穴怪責讚唔到恆樂嘅哭純。
「呀!你唔幫我!總之我恆仔就好過佢!」吳純無理取鬧。
「哈。」Alton冷笑一聲。
「呀!!!激氣!」智力有缺陷嘅吳純嬲到耳根都紅晒。
「呀!」May靈機一觸,然後一副要睇好戲嘅樣講:「咁不如兩條仔鬥下咪知邊個好啲囉!」
「鬥!上呀恆仔!」吳純無猶豫過就話好。
「喂!點解你幫我做決定!」恆樂不滿地「被參加」。
「女朋友話一就一啦!Alton呢?唔係唔敢挑戰呀?」May姐唔準許恆樂後對。
「就睇吳純成日提起嘅恆仔有幾叻。」作為出軌嘅人,Alton未免太理直氣壯。
Alton今日已經唔止一次對恆樂展示敵意,明明佢係出軌嗰個,但係佢完全無歉意,仲當恆樂喺搶咗佢條女嘅人咁睇,而且吳純之莊又當無事咁俾佢繼續嚟莊聚,成件事十分之奇怪。
恆樂心諗條友係咪睇自己唔順眼?定係出軌嘅人對舊菜仲有啲feel?
總之恆樂唔想搞大件事,大家開開心心玩咪算,要扮男朋友已經好煩,恆樂唔想再惹事。
「唔好啦,大家開開心心洗乜搞到要鬥?」
「唔得呀!上呀恆仔!」
「無問題喎!睇兩條仔鬥下可以炒熱個氣氛!」嚟啦!」May完成係想食花生睇戲嘅樣,全力扇風點火。
「玩下姐,唔係咁掃興?」Alton趾高氣揚,睇唔起唔敢接受挑戰嘅恆仔。
恆樂當堂焫焫焫焫著:「玩下囉!大家開心下!」
「咁就好啦!兩位當時人都ok!咁就嚟一場三盤兩勝、我哋莊嘅傳統決鬥活動——羅馬競技生死鬥!」
根據發明遊戲的YouTuber《反正我很閒》曾在影片中解說的規則,遊戲進行方式為雙方以寶特瓶(膠樽)為武器,一手持武器,另一手則用來防禦。當手中的武器也就是寶特瓶,擊中對方持武器的手可得1分;擊中正面可得2分;擊中背面則可得3分,打到對方頭部犯規不計分,打到防禦的手的前臂無分,先拿到10分者獲勝;若是直接將對方手中的寶特瓶擊落,也判直接獲得勝利。
兩三個水桶
2022-06-06 19:40:44
鐵拳無敵鍾培生
2022-06-06 21:31:36
留名恆仔變豬頭
綠嶺
2022-06-07 21:15:17
「遊戲方法就係咁,有冇唔明白呀?」May問。
「無。」Alton講完就唔知邊到拎出一樽吉嘅津路腸樽出嚟:「上場啦,拍檔。」
「喂!有私家武器嘅!」恆樂抗議。
「好出奇咩?我哋成支莊都有專用膠水樽。」May講完後,吳純成支莊都唔知係邊到一人拎一支膠樽出嚟。
到底佢哋收埋個樽係邊?支莊係咪長時間收埋個吉樽,隨時準備開拖?
「你哋傻㗎!呢支莊傻傻哋㗎。」覺得自己俾人撚嘅恆樂㩒住太陽穴講。
「恆仔就用女朋友個樽啦!」May姐講。
「交我拍檔俾你啦!」吳純將手上嘅430ml屈臣氏膠樽遞俾恆樂。
呢個樽一嚟好跣手,兩嚟細細支,三嚟完全唔夠津路樽硬,一睇就知毫無攻擊力。
最重要係,呢個樽係全場最細。
「你玩鳩我?你玩羅馬競技生死鬥贏過幾多次?」恆樂問。
「em⋯⋯無贏過!」吳純笑住咁講。
「⋯⋯今次輸硬⋯⋯」恆樂喺呢一刻就打定輸數,但係話咗玩佢嘅佢已經無得退縮。
「選手上前!」May興奮咁講。
Alton同恆樂面對面咁企。
同穿著hoodlie笠住帽、身材高䠷但瘦弱嘅恆樂唔同,Alton只係著一件白色短袖T恤,手臂粗到就快撐爆衫袖,一睇就知有腹肌,喺典型嘅gym撚身型。
恆樂開始怯起上嚟,轉頭俾隻死gym撚打落嚟咪痛死?
不過又唔係咁講,打交唔關腹肌事嘅,再講恆樂都瘦到有腹肌,話唔定可以打到佢仆街呢。
要殺佢一個措手不及。
穩定好自己情緒嘅恆樂,堅定地望實Alton。
「三聲後開打!三、二、一!」May姐語音一落,恆樂就蹬腿跳前,向前伸盡手臂、將屈臣氏樽嘅三角位拍向外,使出一招正面突刺。
「哼。」Alton冷笑一聲,正面硬食呢一招:「用生命值硬接。」
2:0,恆樂首先得分。
但係呢兩分喺Alton特登讓俾恆樂。
條友真係好中二病,聽到Alton咁講,恆樂忍唔住尷尬到打冷震。
綠嶺
2022-06-07 21:44:01
恆樂打算承勝追擊,喺Alton近身將膠樽由下而上向上斬,但係今次Alton用防御嘅手將攻擊格檔,然後向恆樂下腹橫掃一下,命中。
2:2。
被擊中後,恆樂即刻向後一躍同敵人拉開距離。
呢個對手唔簡單,恆樂嘅中二之魂點燃起嚟。
「人稱埋土羅馬競技場生死鬥帝王,現任埋土BBA莊EVP,aka BBA肌肉擔當,Alton參上。」Alton超中二病地講。
恆樂嘅中二之魂同好勝心被Alton嘅中二發言點燃:「浸中死老鬼、吳純男朋友,今日將會擊倒埋土帝王嘅恆仔參上。」
「嘩,你兩個中二病到我打冷震。」喺場外做裁判嘅May講。
「恆仔!你平時喺屋企拎住動漫節買返嚟嘅刀係到大叫『審判』、『審判』咁斬嚟斬去嘅!快啲出嗰一招啦!」吳純突然係眾人面前公開恆樂羞恥嘅秘密。·
「喂!收聲呀八婆!」面紅耳赤嘅恆樂向胡蝶破口大罵。
Alton向恆樂勾勾手指挑釁,示意恆樂主動進攻。
恆樂今次用小跳步慢慢向前,Alton則沉著應地,慢慢接近恆樂。
恆樂再度先攻,橫劈向Alton則腹,但係Alton輕鬆地將攻擊格檔,再打落恆樂揸水樽嘅手。好彩恆樂握力夠(1分),無俾佢打甩水樽。
「審判!審判!」
場外吳純嘅打氣聲令恆樂嬲到仆街,並係心中決定返到屋企之後要打到吳純仆街。
被打中手後恆樂即刻收起拎樽嘅右手,Alton捉緊呢個空檔作勢由上下向劈,恆樂舉起左手到額前格擋,點知呢個只係Alton嘅佯攻,Alton踏出一個箭步喺恆樂嘅左邊跨過,然後高速咁打落恆樂背到(3分)。恆樂馬上轉身,點知又被打中胸膛(2分)。
2:8,恆樂一口氣跌到敗陣邊緣。
「恆仔⋯⋯」吳純擔心地講。
「喂恆仔!你搞咩呀!我哋純純擔心你輸啦!」唔中立嘅裁判May向恆樂抱怨。
「吳純⋯⋯放心,我會贏佢。」恆樂向「女朋友」講。
「加油呀恆仔!我相你呀!」吳純高聲向「男朋友」打氣。
「唔好衰俾女朋友睇呀!」某個女莊員都為恆樂打氣。
「係大家嘅打氣聲⋯⋯」恆樂中二病發講出動畫主角得到群眾集氣時會講嘅對白。
「雖然大家都幫恆仔打氣,但係我想提提大家,佢而家係輸到仆街嘅!」五月姐向大家潑冷水。
「埋土帝王蝦新!」
「可恥!」
「Shame!」
Alton啲莊員突然起哄鬧佢。
Alton大聲喝斥觀眾:「你哋撐邊邊㗎!我先係你哋莊員!」
佢啲莊員即刻移開視線收聲。
綠嶺
2022-06-07 21:45:21
Alton望返住恆樂:「見你喺新手,我咁樣贏你會俾人話勝之不武。俾你係呢個房求其拎個樽拎用,再輸俾我啦。」
「任何一個樽都得?」
「隨你。」
在場嘅人即刻好合作咁拎出自己嘅樽,恆樂環視間房一周,現場所有人嘅樽都唔合乎佢心水,佢比喺角落頭嘅一個水樽吸引住。
「我再問多次,係咪咩膠樽都可以換?」
「係。一言既出,匹馬難追。」
「好。」恆樂講完就即刻走去角落頭,拎起佢睇中嗰個水樽。
「喂!我係話個咩樽都得⋯⋯」
Alton未講完就俾恆樂打斷:「一言既出,匹馬難追。」
恆樂一副邪惡嘅眼神望實Alton,手握喺水機換落嚟嘅8公升大水樽。
「喂!裁判!咁都得咩?」Alton抗議。
「裁判聽副你你話用乜都得。」五月姐不以為然地答。
「肌肉擔當,你唔好咁無賴喎!」
「Anthony,點可以講過唔算數!」
「呢個特登叫錯我個名!」Alton指罵觀眾。
「受死!」恆樂襯機揮動空樽,揮出一招下斬。
戰鬥再開。
綠嶺
2022-06-07 21:57:22
前埋土BBA莊員May姐喺接受校報訪問中,炮轟Alton,稱佢就係埋土BBA嘅毒瘤。
May姐:「『瘋了,瘋了,都已經瘋了』。恆樂就快打輸嘅時候,自稱埋土帝王嘅Alton話任意俾恆樂換樽,自此只後,無法阻止一幕發生了。拎埋8公升巨樽嘅恆樂返到比賽場時手握巨樽,係Alton毫無防備嘅情況一棍打下,Alton挨打個一下並唔輕,趴喺地上痛苦咁抬頭先睇到打佢嘅人正正係佢睇唔起嘅恆仔。唔等Alton起身,恆仔又一輪亂棍爆打,埋土帝王喺地上翻滾不停求饒,喺場外嘅吳純唔會放過呢個機會,不斷講:『恆仔,打狗,用力打,往死裡我打,打狗怎可能少咗我。 』當時我身邊嘅莊醫嘴裡不停地講:『瘋了,瘋了,都已經瘋了。』」
「喂你收聲呀!」Alton指住May嚟鬧。
「你哋又唔打,好悶呀!我都要搵嘢講㗎!」May不滿咁反駁。
我都靚仔過
2022-06-07 22:19:49
點解會有畫面出嚟
鐵拳無敵鍾培生
2022-06-07 22:49:05
純純做咩爆恆仔啲柒嘢出嚟