《是咁的，我一炮過有咗三個女朋友（假）》

早咗入

Push

子瑜好可愛

推

「首先，我哋唔係扮俾任何人睇，我哋扮俾自己睇！我要你當我係真嘅女朋友咁對待，因為我要明白拍拖嘅感受同埋點氹男仔，明唔明？」

「Ok，Next。」

「根本上約會嘅行程我會搞掂，當然你有idea都可以提出！」

「係嘅～」

「遇到朋友嘅時候，如果你唔想俾人知道我哋嘅關係，你可以話我哋只係表兄妹。」子瑜講。

「咁我可唔可以扮其他人有男朋友？」

「梗係唔得啦！你一扮呢，張相就會係網上流出！」子瑜拎部手機出嚟講。

「⋯⋯係嘅。」已經扮緊啦！恆樂喺心入面怒吼。

總之而家佢唔可以將同時扮緊三個人男朋友嘅事講出嚟。

「最後，」子瑜又攬實恆頭，將頭陷入佢心口後講：「你可唔可以扮我男朋友？」

其實就算無俾人威脅，有個咁可愛嘅女仔拜托恆樂去扮佢男朋友，恆樂都唔會拒絕。

加上子瑜真係真係好可愛，完全係恆樂鐘意嘅類型，所謂日久生情，話唔埋扮扮下情侶就會弄假成真，恆樂就可以正式出pool。

就係呢一刻，恆樂決定會好好扮演男朋友嘅角色。

恆樂展露有啲猥瑣嘅笑容：「係嘅女朋友。」

子瑜放開攬住恆樂嘅雙手，再摸摸恆樂個頭：「咁就乖啦男朋友。」

「嗯。」即使有啲唔好意思，恆樂都由得子瑜摸佢。

子瑜除返眼鏡再講：「我哋由頭嚟過啦！你要好好地咁扮呀！配合我呀！」

「嚟啦！」恆樂自信地講。

「你以後就叫我子瑜啦，我都會叫你樂仔。唔好再男朋友、女朋友咁叫，知，唔，知？」子瑜調皮地篤恆樂鼻頭。

「OK⋯⋯」恆樂停頓一下，再講：「子瑜。」

子瑜高興咁攬實恆樂，今次恆樂心花怒放起嚟，個心有種佢真係自己女朋友嘅感覺，所以佢就忍唔住攬返住子瑜。

跟住子瑜就會一腳踩落呀樂度

「⋯⋯好似有嘢頂到我咁嘅？」子瑜感覺到下半身有啲郁動就問。

「唔好意思呀，扯扯地。」恆樂唔好意思咁講。

「咩料啊你！咸濕仔！」雖然塊面已經泛紅起嚟，但子瑜都保持佢嘅調皮不停用手指篤恆樂塊面。

「男女朋友係咁㗎啦，咸濕下好正常。我知你認真咁扮男朋友先扯旗，你唔好怪我呀。」恆嫲理所當然地講。

「係咩，唔好意思⋯⋯等陣！始終我哋都係扮情侶，咸濕嘢或者身體接觸一定要我主動先可以！你唔可以做主動啊！」差啲俾恆樂說服嘅子瑜冷靜過嚟後即刻反駁。

「即係我唔可以主動再摸你對波仔？」恆樂問。

「唔得呀！」子瑜谷氣到紅都臉晒。

「咁樣點似扮緊情侶呀？」恆樂諗盡辦法想去再摸子瑜對波。

「我唔理啊！總之我話唔得就唔得！」子瑜落閘拒絕俾人摸波仔。

「你話你主動就得⋯⋯咁係咪即係我有機會可以⋯⋯」恆樂你講完呢句說話真係淫笑到講唔到落去。

「我糾正！身體接觸就得！但係咸濕嘢你唔使諗！」俾恆樂撚返轉頭嘅子瑜耳根都紅晒。

「半桶水咁扮情侶你學唔學到嘢㗎？有冇身體接觸其實我冇乜所謂，我係擔心你學唔到嘢咋？我犧牲少少摸吓都冇乜所謂。」恆樂正氣凜然地講。

「你唔使擔心呀！我淨係學講嘢得啦！身體接觸係我主導，明唔明？」子瑜雙手叉腰問。

「明嘅。即係我可以同你講甜嘢啦。你諗吓，你講少少甜嘢，啲毒撚就會課金㗎啦。呢方面我有信心保證可以教到你。」恆樂為咗未來嘅性慾，而家絞盡腦汁去為自己爭取福利。

「你真係⋯⋯明明上一次見仲係都唔似咸濕佬嘅！」子瑜已經無奈到爆。

「 我真係唔係咸濕佬呀！我擔心你學唔到嘢咋，絕對冇一己私欲喺入邊！上次有啲突發所以我個腦一時轉唔嚟，但係琴晚返屋企諗清楚之後我已經決心努力幫你！」

恆樂諗到嘅就只係弄假成真，咁樣就有第一個女朋友，順勢可以破處。就算唔能夠發展成為真正嘅情侶，恆樂都期望拍拖嘅時候可以抽下水，當係回報。

「原來你都有為我諗⋯⋯多謝你。 明明我哋真係啱啱識你都幫我諗咁多。」被恆樂說服嘅子瑜乖巧落嚟，並誠懇咁致謝。

「好啦唔好講啦，我肚餓啦。我哋去邊到食嘢呀？」恆樂馬上轉移話題。

「呢啲嘢應該係男朋友諗㗎嘛！」子瑜見恆樂面有難色就講：「下次開始就輪流諗下拍拖嘅時候做乜嘢啦！今次就我諗先，OK？」

「係嘅。」

「傻B仔，嘻嘻。咪話咗我決定約會內容！頭先你都唔專心聽書嘅。」子瑜入戲之深，恆樂都忍唔住懷疑條女係咪已經愛上咗自己。

「咁你想去邊呀？」

「葵廣！」

呀樂諗住同黑雪戲假成真，但佢表姐同胡蝶又想同佢戲假成真

葵廣，香港後生仔必去嘅地方，情侶拍拖一定會經過之處。

平價小食店、淘寶散貨場嘅格仔舖、親民價嘅女裝、呃人錢嘅夾公仔舖， 呢個平民市集因為洗費唔高，所以非常吸引年輕人嚟拍拖。

轉眼間，恆樂同子瑜就嚟到葵廣。

雖然唔係第一次嚟，但係恆樂都俾佢嘅人山人海嚇咗一跳。另外真係好多情侶，個個囡囡都着住熱褲咁滯，真係目不暇給。

「喂！你望咩呀！唔准望其他女仔呀！」子瑜嬲嬲地咁從後遮住恆樂雙眼。

「無呀，我望吓啲舖頭咋嘛。」

「你以為呃到女朋友喎！哼！」子瑜翹埋雙手嗰一副嬲爆爆嘅樣。

唔知道子瑜係唔係真嬲嘅恆樂拗晒頭：「做咩啊？」

「我發脾氣呀！你快啲氹女朋友啦！」

「唔好嬲啦。」恆樂使出氹女朋友嘅大忌。

「⋯⋯哼！」子瑜嬲爆爆咁擰歪面。

「我唔識氹呀。」恆樂坦言。

「激死我呀！帶我去食嘢啦！」子瑜對住冇拍拖經驗嘅恆樂都唔想糾纏太耐，於是佢都無謂再發脾氣落去。

「我哋去食壽司囉？地下有間黃店壽司幾好食！」

恆樂靈機一觸後就拉住子瑜去食「問卷」，佢哋一人叫咗一個手卷食。

「污糟貓，嘻。」子瑜伸手佢抹走恆樂嘴角嘅沙律醬，再舐嗰隻手指。

「啊。」子瑜舔手指呢個有啲性感同挑逗嘅動作令到恆樂心動起嚟。

「你面都紅晒喎！頭先係咪心跳加速啊？嘻。」子瑜篤一篤恆樂個鼻再恥笑佢。

「邊有！」怕羞嘅恆樂擰歪面。

「係機會！」子瑜趁着恆樂擰歪面，一啖咬落去個手卷到，成舊食晒。

「喂頂你！咁我食乜⋯⋯」

恆樂未講完就俾子瑜打斷，子瑜將自己食剩嘅手卷遞到恆樂面前：「啊！」

俾呢個可愛嘅女仔餵食，恆樂即刻嬲唔落，乖乖地咁擘大口食手卷。

「嘻，開心？」

「少少啦。」

「好嘢！餵男仔食嘢會心動，等我記低先！」子瑜講完仲喺褲袋拎出一本筆記簿抄低呢一句。

子瑜咁識溝仔嘅

推

感覺唔錯加油

Live 左

「好，下一步！我有個任務想交俾你！」子瑜將雙手放到身後再抬頭講：

「又想搞咩？」

「今日係我哋第一日約會，我想你送一份禮物俾我，做定情信物！」子瑜雙眼樂似星星咁閃下閃下。

「咁樣關你要氹啲觀眾課金咩事？你唔係要學點樣氹男人咩？我買禮物係我氹你喎。」恆樂佢到而家都仲未能夠好好調整心態去扮演男朋友嘅角色。

「我係咁諗嘅，有時啲人課完金我淨係識講多謝，我想試吓收完禮物之後講啲唔同嘅嘢，去令到送禮物個個都開心。」原來子瑜唔係純粹想呃錢，佢都有諗過點樣回報觀眾，令到佢哋俾嘅錢係值回票價

投資有價值嘅嘢好過扔錢俾賣垃圾jpg嘅試當X。

對子瑜有啲另眼相看嘅恆樂就答：「咁我哋而家分開行？轉頭再見面？」

「我哋識咗唔係太耐，突然叫你揀份禮物俾我，你都好難做嘅！我同你一齊行個圈，俾你了解係我之後再決定啦！」

恆樂已經搞唔清楚子瑜到底算唔算善解人意。

「你唔好太大期望呀。一嚟我唔識揀，二嚟我無錢買貴嘢。」

「你買垃圾都得嘅。就當係練習下收到啲乞衣課金十蚊嘅時候我要點樣抑壓憤怒嘅同時氹到條仔。」子瑜莫名奇妙地具攻擊性。

「係咪真係有觀眾課金俾你㗎？」恆樂唔信呢個咁口臭嘅女仔有人課金。

「毒撚錢係easy money！嘻。」

見到子到自豪嘅眼神，恆樂都係話可說。

「行囉！等咩呀！」露出可掬笑容嘅子瑜就拉住恆樂走。

被女仔牽住走呢種感覺好新奇，而且葵廣嘅一切喺有女仔嘅陪伴下顯得新奇，亦因為拖住女行，所以心中嘅某種自豪感令恆樂飄飄然起嚟。

情況就好似毒撚群中作為唯一一個成功出pool嘅毒撚，嗰種出眾嘅成功感令恆樂忍唔住挺起胸膛，有如傲視群雄森林之王。

恆樂作為男朋友嘅心已點燃起嚟，佢決定一定要買到樣子瑜鐘意嘅定情信物，同埋乖乖咁拍拖令葵廣內嘅毒撚妒忌，雖則葵廣無乜毒撚行。

恆仔真係易氹

「去夾公仔囉，好無？」子瑜提議。

「好嘅女朋友！！」恆樂振臂高呼。

「傻仔，無啦啦咁興奮。」子瑜篤一篤恆樂條腰。

入到夾公仔鋪，子瑜同恆樂就不約而同地指住一部有卡比獸嘅機：「好得意呀！」

「你都鐘意卡比獸？」佢哋兩個又同步起嚟。

「你鐘意佢啲咩呀？我鐘意佢肥嘟嘟好可愛，一定好好攬！」子瑜跳下跳下咁講。

「佢肥肥地咁當然可愛！佢嗰種遲鈍又懶洋洋嘅感覺好正！」

「估唔到我哋會鐘意一樣嘅嘢，真不愧係情侶！」興奮起嚟嘅子瑜抱實恆樂。

「唔好攬啦，快啲夾啦！」開始習慣俾子瑜攬嘅恆樂已經無咗當初興奮嘅感覺，呢一刻嘅佢只係想快啲夾隻卡比獸出嚟。

子瑜見恆樂嘅反應咁冷淡，佢嘅表情就有啲複雜，但係好快就保持翻笑容：「我嚟幫手！我嘅眼界好準㗎！」

子瑜貼埋恆樂到揮舞枝棍去郁動個夾，但係每次夾之後隻卡比獸就好快跌翻落去。

「個爪根本唔夠力！」失敗咗十幾次之後，決定放棄嘅子瑜嘟起個嘴再講：「男朋友呀！我唔忿氣呀！」

「睇我表演！」

「加油！」

恆樂氣定神閒咁入錢再開始夾，點知搞咗十幾轉都會夾唔到。

「再嚟！」唔信邪嘅恆樂想再入錢去夾，但係子瑜就伸手阻止佢。

「我哋洗咗成五百蚊啦，咁樣仲貴過買啦。我哋放棄啦，慳返啲錢。」

「唔得！一定夾到㗎！」

「喂呀！你都唔聽女朋友講嘢嘅！我嬲㗎！」子瑜拉住恆樂走。

「就一次！呢一次係最後一次！」

「真係？」

「真！」

「好啦，你快啲去啦。」

恆樂入錢，再度挑戰。

「走啦，你話咗係最後一次。」子瑜一見到恆樂fail就拉住佢離開。

「唔⋯⋯」恆樂唔甘心咁望實嗰部夾公仔機，一臉想再挑戰嘅樣。

「唔好再望啦！你再夾我真係會嬲㗎！你唔好激嬲女朋友呀！」子瑜使出一招情緒勒索。

「但係你好想要㗎！」

「傻仔，夠啦。見到你為我努力已經好足夠㗎啦！」子瑜隨即錫落恆樂臉頰到：「多謝你。」

呢一刻嘅恆樂心諗，為咗扮女朋友子瑜可以去到幾盡？

可能要求上床都得？

毒撚錢係easy money

恆仔真係好標準毒撚心理

子瑜唔知係咪睇穿咗恆樂色心起，佢就補充：「最多淨係錫臉咋！走啦，呆咗企係到！」

「哦哦。」

之後恆樂就俾子瑜拖住去食咗章魚燒，子瑜「呼呼」咁吹下啲小丸子後就餵俾恆樂。兩人再去咗行下格仔鋪，每樣嘢都拎嚟玩下，再陪子瑜睇下衫。

行咗兩個鐘後，子瑜就話：「我哋就咁分開，半個鐘後見啦！你好好期待下我嘅禮物啦！男。朋。友！」

子瑜講完就跑跑跳跳咁走開，子瑜走咗之後恆樂就留咗喺原地思考緊買啲乜嘢好。

無諗到嘅恆樂決定行下先，睇下會唔會有頭緒。

恆樂行到去夾公仔鋪附近，突然有把熟悉嘅聲音叫佢：「恆仔！」

回頭一望，原來係青梅竹馬吳純：「你呀。」

「洗唔洗咁失望呀個樣！」吳純一掌拍落恆樂到。

「喂喂，呢個男仔乜水呀？」吳純隔離嘅女仔問。

「呢個就係我之前提過嘅新男朋友恆仔！」

「吓！？」恆樂嚇到叫咗出聲。

「吓咩呀，又係你應承話會做我男朋友！」吳純唔滿意咁講。

「係係，唔好意思頭先失禮晒。我係佢男朋友恆仔呀，你好。」諗起琴日應承咗扮吳純喺佢莊員面前扮男朋友，睇嚟呢條女係吳純莊員之一。

「你好呀恆仔，我係佢莊員。」知道要開始扮男朋友嘅恆樂講。

「話說點解你會係到嘅？」吳純問。

「我同⋯⋯」

講到一半恆樂就收口，因為依家佢係吳純男朋友，佢差啲就講出同另一個女朋友拍緊拖嘅事出嚟。

如果依家見到子瑜，咁咪有機會俾人發現一腳踏兩船！？話說因為今日全程俾子瑜拉住走，所以都唔記得解釋要假扮胡蝶同吳純嘅事。

呢一刻，恆樂絕對唔可以俾子瑜同吳純係到相遇，如果唔係件事就會好麻煩。

兩個女朋友相遇嘅話，吳純個朋友就有機會睇穿吳純搵人扮男朋友，又或者發現吳純新嘅男朋友都會出軌。兩樣都對吳純嘅聲譽同現況有壞嘅影響。

恆樂開始手心冒汗，心跳加速，成頭冷汗。

恆樂要做嘅係令吳純同子瑜無法相遇。

好修羅場feel

留名

一不離二

子瑜現時嘅位置係unknown，亦都冇辦法輕易拎出手機同佢對話。

恆樂決定要盡快令到吳純離開葵廣，將兩個人相遇機率下降到最低。

突發任務：阻止兩個女朋友相遇！

「我自己行吓街姐哈哈。」恆樂生硬地講。

「做咩呀你？流晒冷汗咁嘅？」吳純突然伸手摸恆樂額頭。

「無⋯⋯無嘢，呢到好熱姐。」恆樂隨手搵個藉口。

「係呢！我都覺得熱啊！May姐，開大啲個冷氣，唔好慳呢啲錢啦！」原來吳純莊員叫May。

「得啦得啦！」May唔知係邊度拎出個冷氣遙控去教凍個冷氣。

「唔通間鋪係你開嘅？」恆樂轉移話題。

「係呀，May姐近排想搞生意，就頂手咗呢間舖來做！」吳純搶答。

「我頭先都有幫襯啊！但係乜都夾唔到，洗咗成五舊水呀！」因為夾唔到公仔嘅恆樂心有不甘咁講。

「你一個男人自己由將軍澳嚟葵廣夾公仔？」吳純用疑惑嘅眼神盯住恆樂。

仆街！陰咗自己！

的確，一個大學男仔特登走出嚟葵廣夾公仔，成件事真係非常可疑。

恆樂絞盡腦汁，思考全力加速：「我⋯⋯我就係你睇吓夾公仔舖嘅生意點！我都有興趣搞番間呀，咁咪想試吓玩！點知夾極都夾唔到喎！」

「原來你都想賺下錢呀，早啲講吖嘛！」吳純又高高興興咁拍恆樂背脊。

「咁啦，你想夾邊隻呀？我直接幫你拎出嚟啦？定係你想我調教個夾嘅力度等你易啲夾出嚟？」May姐提議。

「咁我真係唔客氣嫁啦！我想要隻卡比獸啊麻煩你！」恆樂講。

之後May姐就用鎖匙打開機門，伸手入去拎隻卡比獸出嚟：「請。」

「多謝晒！」

恆仔究竟前世做咗咩好事
咁都搵到「女朋友」啲朋友嚟幫手溝女

「唔使客氣喎，你都送咗成五舊水俾我用。」May姐笑容滿面。

「恆仔由細到大都好鐘意卡比獸！」吳純自豪咁講，一副自己好理解恆樂嘅樣。

「偷偷地放閃！」May姐打趣咁講。

「邊有呀！」吳純笑到見牙唔見眼。

「恆仔，May姐我俾返條女你嚟，你哋去拍拖拖啦。」May姐將吳純推向恆樂。

「吓！」恆樂忍唔住叫咗出聲。

「我哋買咗戲飛啦May，唔洗理佢啦！」吳純慌張咁講。

「戲飛呢戰多小事啦，難得你有新仔咪去拍下拖！」May懶係識做咁講。

「等等！」恆樂突然大聲喝止。佢絕對唔可以同吳純係到「拍拖」，太大機會令子瑜同吳純相遇！

到時恆樂好大機會俾人擊殺。

「去睇戲啦！我陣間都要莊聚拍唔到拖！」因為唔同U同恆樂無用開ig，就算陣間俾吳純撞到自己同子瑜行街，都可以話子瑜係莊員去兜。

「莊員？男定女先！唔係一食到我哋純純就出軌呀？」May姐又懶好笑咁問，但係被問嘅恆樂就一額冷汗。

恆樂只能夠口窒窒咁講：「有男有女咁啦。」

我男佢女囉！

「咪玩我條仔啦！」唔想阻到恆樂嘅吳純咁講。

「哈哈！莊員梗係有男有女。」

「哈哈哈哈。」恆樂無感情咁笑幾聲，但佢心入面驚到仆街。

「我哋去睇戲啦！得返15分鐘就開場啦！」吳純喺May後面推佢行。

「行啦行啦，再見啦男朋友！下個禮拜見！」

恆樂留係原地目送二人離開，心頭大石即刻放一放落嚟。

點知行咗幾步，May又調頭行返嚟，恆樂當堂嚇一跳。

「真係唔洗俾條女你？」May姐擺出古惑嘅笑容問。

「唔洗呀！你哋去玩啦！真係唔洗顧慮我！」慌張起嚟嘅恆樂講。

「我哋走啦！恆仔我之後再搵你啦，bye。」吳純就係咁拉住May走去新都會。

「今次真係走啦嘛。」恆樂望住佢哋嘅背影消失喺行入新都會嘅人群入面後終於鬆一口氣。