[哥斯達黎加– San Jose]
哥斯達黎加被認為係中美洲最安全既國家,呢度有茂密既森林、分別面向加勒比海同太平洋既海岸,豐富既自然環境令佢成為野生動植物既天堂。不過我地原本都唔知咁多,當初想黎既最大原因純粹係因為我好鍾意樹懶,好想係度見下野生樹懶,黎左先發現呢個地方比想像中更得人鍾意。
一到埗我地就去左唱錢,雖然櫃員機用唔到我地張卡,但好在找換店可以用credit card拎錢。哥斯達黎加貨幣叫Colon (₡),係一種好平既錢,港紙1蚊等於大約₡76000,因為幣值太大所以當地一般都會省略左後面果3個零,譬如₡2000000佢地既價錢牌就會寫₡2000k咁樣,Colon係長呢個樣子既
呢度連啲錢都印滿哂動植物,係我見過覺得最靚既貨幣,唔捨得拎去用呀
睇真啲,每一隻野隔離仲有細細隻字寫左佢個西文名同學名
我地不嬲都唔係太偏愛留係首都呢類大城市,所以只係晌San Jose留左兩晚。不過當你對一個地方愈無期望,佢就愈會比到驚喜你,係度閒逛左兩日我地都覺得佢係比想像中有趣既城市。
第二日食完早餐洗緊碗果時個host好開心咁話兜埋我地出街,因為果日係星期日,市中心有一星期開一次既既farmer’s market,佢想我地可以去睇下。果度規模有兩三個足球場咁大,有菜有肉,啲野賣得好平,真係無介紹錯,師奶表示雙眼發哂光
啲居民都自備手推車or剷泥車黎買餸
最側邊果行係賣小食既,睇落好正,叫份黎試下先
呢味野係用煎到焦香既芝士包住蛋、飯同埋豆,我地嗌多左條腸黎送。啲芝士煎到好似薯片咁脆卜卜,好好味呀,不過好漏,兩個人分先食得哂。
係哥斯達黎加周圍都見到呢隻用熱水烚住既奇怪食物,開頭以為係柿黎,望真又唔似
我問檔口呀姐可唔可以比我試下,佢就比左兩粒我了,仲提我要搣皮食。粒野硬硬地咁,食落有啲似蕃薯或者栗子,但唔甜既,咸咸地仲有少少苦,不甚可口但應該幾飽肚既
行行下係生果檔見到佢既本尊
呢樣野原來叫Pejiballe,中文叫桃椰子,係啲棕櫚科樹木既果實黎。當地人會就咁烚熟當小食,點沙律醬食,或者用黎煮餸,我就麻麻地呢隻味喇。
行完farmer’s market我地經過左啲商場,呢度既商場都好摩登,首都真係唔同啲。我地係度行左陣嘆下冷氣,係久違了既感覺呀
我地都買左啲生果返黎打汁飲,咁大堆士多啤梨都只係港紙$2.5咋
hostel附近都無餐廳,好在對面就係超級市場,呢度既農產品又平又靚,我地煮既晚飯都愈黎愈招積
呢晚煮大啡菇牛油果意粉配蜜糖煎雞扒