[南極-Drake Passage]
係時候出發去南極喇!
我地下晝3點先開始登船,係hostel check-out之後搵間cafe坐左陣,興奮得滯點零鐘就走左去碼頭坐等上船。Ushuaia碼頭有一間類似immigration既屋仔,行李要係度過機,但因為南極並唔屬於住何一個國家,所以呢度既職員唔會係passport上面cup印,只係好hea咁望一眼就會比返你,搞掂就自己行去碼頭上船,成個過程都好hea。
我地搭呢架船仔Ocean Nova
同搭郵輪一樣,都係上船既時候放低行李,之後職員幫手送去你間房
房咭
我地間房,每人附送一個巨型藍色防水袋,入面放左黎緊會用到既救生衣同埋防水boot,床邊仲有一堆日曆呀、簿仔、筆咁既紀念品。房入面既櫈都有繩綁住,驚航行既時候太大浪撞親人。
廁所細細
趁未到簡介會既時候,我地周圍行下。呢度比我地活動既範圍有四層,底層係禮品店、船醫室同門口,一樓係客房同餐廳,二樓係另一堆客房、圖書館同gym room,頂層係演講廳同甲板
去南極既船有大有細,我地搭呢部算係細既,總共有78個乘客。當初特登揀細船,因為南極對於上岸觀光有一個規定,就係每次泊岸登陸既人唔可以超過100人,如果坐一二百人果種大船就要輪流或者唔可以次次上岸,細船就無呢個煩惱,可以確保每次埋岸都可以落地玩
但代價就係路上會超級搖晃。
全員集合之後就係簡介會既時間
呢78個人入面,目測有2/3係外國人,其中大部份係澳洲黎既老人家,另外1/3就係之前係老船長餐廳見過既強國公司團。會上面大致上都係講下我地既路線,呢個雖然係10日團,但其實頭尾3日我地都會用黎穿過通往南極既Drake Passage,所以實際逗留係南極既時間只係4日。唔想用咁多時間黎航行或者怕暈浪既巴打可以考慮搭飛機去南極,聽講要十零萬港紙
工作人員話黎緊呢個海域無比大浪,叫大家要做好心理準備。
然後就係safety briefing喇,大家黎演習一次逃生路線
介紹下架逃生船
棄船逃生要著既全身救生衣,聽講可以係零度既水保溫6個鐘
搞掂哂所有野,船長同船員又自介完敬埋酒,船醫伯伯就開始派暈浪丸,每人派左10粒
雖然我從來未暈過浪,但講到今晚就會開始通過既Drake Passage咁恐怖,我地都啪返一粒定定驚先。
然後船就開始郁,大家都上哂甲板睇開船
無耐就夠鐘開飯,呢度既伙食餐餐都好豐盛,晚飯黎講有前菜、沙律吧、主菜同甜品,主菜有齋 肉 海鮮 三款可以揀
男朋友食肉
我食魚
甜品都好好味
返到去間房已經執好左,有粒朱古力係枕頭
唔知係咪因為食左暈浪丸,食完飯就極眼訓,返到房好快就迷迷糊糊咁訓著左……