[重開][多圖][一年長途遊記] 中南美到南極-西伯利亞至東歐

陣蝦醬味

巴打真識食就算係派既酒都咁闊綽，真係好呀

我地都有諗過western union，但又成日妄想下一度可能就㩒到錢呢 拖拖下就搞成咁。

係呀 係Etsy買左啲來佬布同喱士邊自己慢慢縫

我無呀不過男朋友有
佢都話覺得哥倫比亞果啲最正，果時背囊勁重，佢都要係哥倫比亞買兩包咖啡粉咩住

本身想去羅馬尼亞同保加利亞，不過果時凍左好耐，想去啲暖既地方曬下太陽，就飛左去塞浦路斯。
巴打是咪去過保加利亞有無咩地方建議去架？

雖然好早就訓左，但都唔係訓得好冧，全晚都係度頭尾兩邊sir，一時頭頂撞到床頭，一時對腳板踩到床尾。之前睇d台灣人既南極遊記話南極船會45度角咁搖，原來真係無誇張。

船上面每日7:30都有廣播叫大家起身食早餐。醒左之後我地又唔覺得暈，淨係覺得訓得唔多好，好眼訓。係好似海盜船咁搖搖下既船入面周圍走，其實我覺得好好玩反正周圍都係扶手可以扶，又不至於會跌倒。好不容易平衡到去餐廳食早餐，發現得返三分一人係度

走廊既嘔吐袋好多都比人拎哂，應該好多人都已經在巨浪中陣亡了。強國團都全滅咁滯，佢地唔係度我地都樂得清靜。

早餐同晏晝都係自助形式，頭一日經過drake passage大家都唔習慣，行出去拎野食都好艱難，食飯時啲碗碟碌落地既聲此起彼落，餐廳既櫈又無綁住，唔少人都連人帶櫈碌低，食個早餐都很刺激好玩
我兜cereal

下一秒

影啲相都開始好迷幻，咩咩斜斜咁

太大浪甲板唔開，只可以坐係窗邊睇風景


頭幾日無得落船，但船上面都有好充實既活動，工作人員安排左好多關於南極既課堂比大家上，有關於歷史、氣候、地理、動物、攝影等等唔同範疇，每日有兩三節堂，我地full attendance架，仲勤力過讀書。難得有人將啲知識餵埋比你食，緊係要去聽下啦，你都唔會想去南極只係到此一遊，對呢個地方一無所知，見到隻企鵝都唔知佢係咩品種家嘛係咪?
同我地一樣上足咁堂既仲有呢三個澳洲老友記，佢地好百厭，之後我地都做左好朋友

比較悶既地理堂就無乜人上

上堂有茶點食，好味道，我地唔會放棄任何免費進食既機會


唔知係咪太少人食飯，lunch heahea地，不過味道都唔差


走廊既壁佈貼滿好多資料，我地好鍾意係度慢慢睇


愈去得多地方真係會覺得自己愈渺少，世界上真係有太多我地唔認識既事喇。
船上有個小遊戲，大家可以估下幾時會見到第一塊浮冰，將時間寫係壁佈上面，估中有獎，不過我地估唔中。

天地堂中間我地會去圖書館睇書


我鐘意坐係呢啲轉轉櫈上面，浪黎浪去既時候會自動旋轉，好好玩

船上面既上網好似係USD 49/1GB，我地緊係無買。
所需既資料例如係每日行程安排、架船行到邊之類，都可以係免費既intranet睇到


我地見附近既同伴原來真係會食唔哂份晚餐，終於明白點解晚餐咁細份，應該係怕啲人頭暈食唔哂，同埋食左都嘔返哂出黎…
而我地就成日食極都唔夠飽，要狂食麵包同沙律
是晚頭盤

個煎魚脆卜卜很是美味

煙肉卷住豬肉，好味但唔夠攝牙罅

如果個主菜有得揀三倍份量就好了 到底可唔可以舉手加餸架呢，我地驚顯得好寒酸唔夠膽問，拎多兩個餐包食都夠飽既。經過呢幾日我地學精左，早餐同晏晝既自助餐時段都會食飽啲等個人襟餓啲，坐南極船坐到好似住緊hostel咁添，真係失禮哂

航行黎到第三日，聽日就可以落船玩啦!
呢日既下晝有一個全部人都要參加既講座，會講下坐橡皮艇上岸既安全守則

同埋衣著方面既注意事項

工作人員提大家記得要洋蔥式著衫，救生衣要著最外，褲腳要zip入靴防止入水，上落船都要仔細沖刷乾淨鞋底等等。鞋黎講一定要著船上面提供既防水靴，係買船飛既時候已經講低左自己對腳既size，上船果日工作人員就放左係房入面個防水袋架喇。有一項特別需要注意既，就係千祈唔可以帶外來既種子上去南極，所以講座之後有個特備節目，就係吸塵機吸衫環節

排前面係我地既老友記之一Jane嬸嬸，佢真係好精靈架。大家要將著外套呀褲呀手套冷帽之類既外層衣物拎落黎比人吸，確保無種子同泥之類既外來野。不過講真個過程都幾hea，吸完之後我仲係衫袖搵到前幾日行山玩既痴頭芒

玩左幾日全天侯海盜船，呢日晚飯之後架船開始平靜落黎。十點幾諗住沖涼訓覺既時侯望左望出窗，發現好多一舊舊舖滿冰雪既小島，即刻就摟返件外套上甲板。
我地離開大浪既drake passage，黎到南極啦

好凍，不過好開心

夜晚船底開始間中轟隆轟隆咁響，應該係架船破開浮冰既聲音喇。船員話，由而家開始可以留意住水面，因為呢片開域開始會有好多動物架啦。

早啲訓，聽日落船睇企鵝啦!

下一站: 南極-Half Moon Island

天氣好似一般般咁

企鵝呀

[南極-Half Moon Island]

今日係我地第一次上岸，好興奮呀! 朝早起身望出窗，就見到對出個島仔佈滿黑色點點，我地好快就出黎睇你地啦企鵝仔。

呢日會上兩次岸，上下晝各一次，每次歷時3個鐘，好盡興。朝早既橡皮艇九點出發，食完早餐，我地就返房著好裝備準備上橡皮艇喇

上晝黎既呢度叫Half Moon Island，一上岸就聞到強烈既腥味，一地都係粉紅色既企鵝屎

又唔係超臭既，但係好腥，好似好多好多曬緊既蝦醬咁。

呢個島住既係Chinstrap Penguin，下巴有條黑色線，好趣緻


啲企鵝個樣真係好蠢 但又好似好忙咁，不斷係啲比佢地行到變哂色既penguin highway度走黎走去

佢地鐘意住係高啲既地方，山頭上面無雪既石地佈滿企鵝



我地唔可以主動接觸啲動物，企鵝行埋黎就要等佢地經過先可以過馬路，距離任何動物要保持至少5米距離，除非佢地主動行埋黎

上一篇文好似打錯左，褲腳應該係要包住對靴先岩，如果唔係晌岸邊上落橡皮艇既時候對鞋入水就好麻煩。

啲企鵝真係好忙，而家係佢地築巢既季節，所以見佢地不斷騰黎騰去係度叼石仔，叼到返去就會好小心咁放低，然後伏係巢入面既伴侶就會將石仔砌好，埸面好溫馨

搵到既石仔愈大舊就愈威，睇下呢隻

好擔心佢下巴甩骹

佢地個樣永遠都係唔知自己做緊咩咁，what 7 am I doing 既氣場好強





海邊有隻肥美既Weddell Seal

仲有一對海豹母子，BB食奶食得好滋味

根據前幾日教我地動物既老師話，呢個情景原來好罕見架。因為BB只會係兩個月大前留係媽媽身邊，而且平時都係浮冰上面，好少機會可以見到。海豹奶營養好豐富，BB剩係飲奶就可以每日長大2KG!

我經常性都係度呆等佢影相，所以好得閒周圍望



每次落船都係自由活動既，工作人員朝早黎探路時會預先插好啲紅色旗仔，只要跟住條路線行就安全架喇。
紅色旗仔係建議路線，交叉代表前面危險唔可以超越

你都可以加二三百蚊美金join啲trekking/kayaking/ camping tour，但我地主要都係想黎睇動物，所以無參加。而且三個鐘既時間原來過得好快，話咁快就夠鐘返上船食晏啦



用完既橡皮艇會吊返上船頂，跟我地一齊去下一個地點

上船同落船一樣都要好好沖刷鞋底，再登記低你已經上返船


好肚餓，食野先

今日既午餐唔知點解好中式

食完晏抖一抖，好快又可以再落船啦!

下一站: 南極-Yankee Harbour

好睇好睇

樓主no offense但你好大波

推

見到絲打同你男朋友一齊咁多年都仲係咁sweet覺得好感動
之後終於睇到你地去到南極啦! 再一次感動

[南極-Yankee Harbour]

食完晏晝，話咁快下晝兩點半又可以再出發了。下晝上岸既地方係Half Moon Island 對面既Yankee Harbour，成個下晝都落住大雪


好多一舊舊藍色既冰

呢度住既係呢一種Gentoo Penguin


睇黎呢種企鵝比較鍾意連群結隊，會一隻隻排住隊，或者四五隻一齊咁行



行到最入就係佢地既聚居地

佢地都係不斷係度搬石仔築巢，唔同既係我地發現當巢入面伏係度果隻企起身果時，大脾中間原來夾左隻蛋架

其實而家算係南極既旅遊淡季，因為大家都想遲少少先黎，到時就可以睇到孵化左毛茸茸既企鵝BB喇。不過我覺得而家咁樣睇佢地搬石仔都好過癮呀，船飛仲平啲添!




R鼻哥


太大雪，頂唔順，提早左返上船




返到船上面會有每日review環節，介紹返今日見過既野，順便食下午茶



餐廳係4-6人一張枱既，所以每餐飯都要同大家搭枱吹水。呢日大家終於都暈完船浪出返哂黎食飯，我地通常都係同澳洲老友記坐，佢地好鍾意男朋友影啲相，成日一上岸就黎搵佢睇下佢今日影左啲咩相，揀幾張send比佢地威比啲孫睇
唔知係咪因為架船唔再搖，今日晚餐個主菜終於大份返啲


下一站: 南極-Horn Harbour

係呀頭一日天氣麻麻

未爛尾再感多次動

下次會想再去邊？

想繼續去高加索地區，睇靚景人民飲紅酒食燒肉
不過唔知幾時既事lu

我都想去，不過打仗冇機會啦應該

Live
樓主返黎啦喂

推吓先