[重開][多圖][一年長途遊記] 中南美到南極-西伯利亞至東歐

多謝你呀! 我都諗緊好唔好寫得濃縮啲 每日唔好咁仔細，但又有好多趣事想分享，因為我覺得景點個個都識去，但途中遇到既人同事先係令一個地方變得吸引既原因

上個post追追下爛咗尾 仲以為冇得再睇了

前一日行山雖然景色好靚，但無乜見到動物硬係覺得唔多夠喉，所以我地又join左個night walk睇夜行動物。呢種團短短兩個鐘好受遊客歡迎，導遊會拎住電筒同動物簡介既咭仔帶路，見到動物就會照住幾秒比我地望一望，參加者既電筒就只係可以照地下睇路，希望可以將對動物既騷擾減低

二趾樹懶，明顯比之前見到既三趾樹懶淺色好多

係動物之森好鍾意捉既狼蛛

訓緊覺既大嘴鳥，收埋左個青BB既嘴

蜂鳥個巢，綠色既雀媽媽坐左係上面

仲有其他唔記得名既野

兩粒鐘既短tour可以睇到咁多野，真係超值

之前初試過zipline覺得好正，係呢度我地又搵左條黎玩。呢個號稱全中南美最長既zipline全長四千幾米，總共有9條，係最後兩段會用趴係度既姿勢飛過成個山谷，所以又叫superman canopy

掛住玩無影到風景相，呢個姿勢可以好似雀仔咁係天空飛，好舒服好好玩架。

哥斯達黎加既活動不外乎係睇動物，行山同埋玩水，我地好鐘意大自然所以好享受係度既每一日。之但係因為雨季既關係，係度既留大部份時間都落住大雨，除左個人濕氣重好眼訓，啲衫仲晾極都唔乾，唯一一套仲乾爽既衫已經開始發臭了，真係令人頭痛

同Pablo家姐表示左我地既困擾之後，佢話雖然十月大部份地區都係雨季，但晌東面既加勒比海岸天氣就完全相反，而家竟然係旱季! 佢建議我地去一個叫Cahuita既地方，果度會有陽光與海灘，聽落好正，咁又諗好下一個要去既目的地啦。

係度住左五日，今晚係我地最後一晚係度過夜喇。嬸嬸話我地係度住左咁多日，已經係佢既朋友了，所以今晚想煮餐晚飯歡送我地。呢日晚餐好豐富，有好大盆沙律，豆蓉同白飯，仲有一大塊煎豬肉，好好味呀，真係好好客既一家人


第二朝執野走既時候，男朋友係啲衫度見到隻蠍子，即刻搵個杯捉起左，我地都係第一次見到野生蠍子

見佢自己一個好悶，又捉左隻甲由陪佢

佢地好受小朋友歡迎，我地間房變左個動物園，細路們仲捉左條蚯蚓叫我地放埋入去bug battle

最後甲由戰死反肚，蚯蚓逃走左


嬸嬸一家真係好親切，係度既每一日都過得好熱鬧好溫暖。臨走我地都想送啲小禮物比佢地，但身上乜都無，摷摷下搵到幾個吉既利是封，男朋友話見輕輕地出發果時諗住帶黎同人文化交流既，就係咁我地寫左張心意卡，係背後寫左西文翻譯，小小心意希望佢地鍾意啦


下一站: Cahuita

嚇親你真係唔好意思我今次會生性架喇

[哥斯達黎加-Cahuita]

為左追隨陽光，我地由Monteverde搭5個鐘車去中心點San Jose過左晚，再由San Jose搭4個鐘巴士去Pabla姐姐所講位於加勒比海岸既既Cahuita。車上面無冷氣，而且唔知係咪太潮濕up到啲座位好臭，程車焗到好頭暈。

Cahuita係一個屬於Limon區既小鄉鎮，而Limon係中美重要既香蕉港，沿路都有好多蕉田，仲見到有地捫牌既香蕉田添

係久違了既陽光與海灘呀

我地搭最早班車，黎到先岩岩天光


呢間hostel好舒服，間間房門口都有自己既吊床，可以係門口fing fing下同鄰居打牙骹，價錢有少少貴，獨立廁所既雙人房每晚HKD230

Cahuita好細，係一個散步就行得勻既地方，市內風景都係咁樣樣


晌最盡頭既海岸係Cahuita National Park，呢個國家公園唔收入場費既，只要隨心放啲捐款入門口個箱就可以喇，係度可以行森林又可以去海灘浮潛

呢度全程都係平地，好好行，啲動物都好生猛周圍走



切葉蟻真係好可愛，最鍾意睇住佢地將啲野搬黎搬去


係度遇到個帶住幾個學生既叔叔，佢都好歡迎我地亂入聽佢講解。佢見我地咁鍾意啲蟻，教左我地關於切葉蟻既知識，原來一個切葉蟻群落會分成3個部門，第一種小蟻負責朝早探路搵新鮮既靚樹葉，沿路會留低氣味; 第二種中型size既工人蟻就會跟住呢啲氣味去切樹葉搬返屋企; 第三種超大隻既戰士蟻就係用黎保護努力工作中既大家。佢地咁辛苦將啲花草樹葉搬返屋，但其實呢啲都唔係佢地既食糧，只係佢地搬返黎吽菇既材料，用樹葉種出黎既真菌先係佢地既食物，食得好奄尖。叔叔仲示範如果撥斷左佢地條蟻路，小蟻會再行一次黎散播味道，咁大家就唔會蘯失啦，真係好有趣!

行完食個靚晏，哥斯達黎加野食唔算平，呢種係最常見而又大件夾抵食既當地菜，叫做casado，類似我地既碟頭飯咁，通常HKD30左右一碟，揀個餸然後配啲飯、豆、大蕉、沙律比你，睇落亂糟糟但通常都唔會伏，仲幾好味添


國家公園既水底風景都唔錯，可惜呢日既水唔太清。

我地去左離岸遠少少既地方浮潛，都見到唔少野架，最常見就係伏係沙地訓覺既鯊魚

龍蝦

好多魚

海毛蟲


令人感動既好天氣，係度終於可以洗衫曬衫啦


浮潛睇完龍蝦好想食，夜晚叫左隻黎吃下，呢度既龍蝦都唔平，呢個餐要成舊水港紙，加勒比海食龍蝦黎講Belize抵啲


夜晚返去fing吊床既時候同隔離房伯伯傾計，佢原本係美國人，之後定居係哥倫比亞，至今已經去左五十幾個國家，無間斷旅行左9年了佢係我地見過旅行左最長時間既人，我諗佢對其他人驚訝既反應都已經見怪不怪，佢說話唔多，我地都無細問落去，只係望住星星有的沒的咁講東講西。唔知佢既人生有啲咩故事令佢會踏上一場無止境既旅行呢，呢次旅行又會令我地有啲咩改變呢。希望返到香港之後，都唔好忘記間中要咁樣靜靜地望住星空，同自己既內心傾下計。

G持

寫得好好呀！！

絲打家人有無反芍你去咁耐又去啲咁危險嘅地方? btw好好睇!

lm

每日睇動物都離不開行入個樹林頭岳岳自己搵，我地都想試下用其他方式認識呢度既動物，所以就搵左附近一個動物收容中心黎參觀，間野位於離Cahuita半個鐘車程既Puerto Viejo，搭巴士過去好方便

呢間Jaguar Rescue Center入場費20USD，義工會帶我地行2個鐘既tour。呢度既動物都係由附近既村民或者義工發現受左傷帶返黎照顧，等佢地好返之後就放返野外。係度有好多唔同既動物，馬騮、野豬、鱷魚，豹貓，仲有好多樹懶BB



呢啲BB好多都係孤兒，樹懶經常會將電線當係樹枝爬而被電死，佢地既媽媽大部份都係咁樣不幸被電死既。倖存落黎既樹懶仔就會送黎被養大，義工會教佢地適應返野外生活，健康長大之後就會放返大自然。係度見到既BB都係二趾樹懶，原來因為三趾樹懶係好細膽架，面對太多人佢地會覺得好大壓力，分分鐘會嚇死，所以會收埋黎養。
佢地會係個木架度學爬樹

呢隻爬爬下就訓著左，訓覺既時候個鼻哥嗡嗡下好得意

呢一隻比較特別，佢天生有缺憾，所以佢唔係二趾又唔係三趾，只有一隻趾

黎呢啲非牟利機構參觀最怕就係成件事太商業化，當動物係商品咁欺詐遊客，但呢度比我地既感覺好唔錯，睇到啲義工都係真心愛錫動物又唔會太說教，難怪好多家長都帶埋小朋友黎，真係一個幾值得黎既地方呀。

參觀完去食左個好好味既casado

之後就買車飛返歸


可能前幾日搭巴士既時候焗親，我開始沾寒沾凍頭好痛係咁咳，男朋友(唔識煮飯) 叫我即刻停止再進食casado，好緊張咁走左出去買餸話要煲粥比我食

我都係第一次見佢煮飯，呢烹就係佢用盡吃奶之力煲既紅蘿蔔咸排骨粥

係幾好味架，食完元氣滿滿，希望會快啲好返啦。

下一站: 巴拿馬-Bocas del Toro

謝謝你我會比心機寫落去架

無呀，淨係叫我地自己注意安全，同埋成日催我地係FB post相比佢地睇，但我地梗係報喜不報憂啦，廢事佢地老人家心掛掛，比人搶野仆到成身傷 炒車炒到行唔郁果啲，就同佢地講係行樓梯果時唔小心仆親
阿媽果時追post追到好似睇旅遊節目咁都不知幾開心

[巴拿馬-Bocas del Toro]

我地之前一直都無諗過要去巴拿馬，對呢個國家既認識只有運河同埋失蹤女遊客。突然之間有呢個念頭都係因為我地係Cahuita對德國父子鄰居，佢地岩岩係巴拿馬過黎，話果度有一個叫Bocas del Toro既地方，呢個地方好似仙境咁靚，海天一色，啲水好似玻璃咁清，日日經過房門口都show啲相比我地睇叫我地一定要去，所以我地決定去渡一渡假!

就係咁，我地無啦啦就出發去巴拿馬啦。

Bocas del Toro係加勒比海上由多個小島組成既一個省，位於巴拿馬東北與哥斯達黎加接壤，同Cahuita其實只係隔左條邊界，但想過去都唔係咁易架。
首先要搭程巴士去邊境

我地既寶貝背囊

黎到邊境車站

陸路離開哥斯達黎加要交7USD離境稅，係車站附近一間好似士多咁既地方交錢，交完會比返張收據你一陣出境用

兩國邊境由條河分隔開，係橋頭呢個拱門度有間屋仔，求其cap個印就出左境

行過呢條橋就進入巴拿馬既國境，周圍都無指示牌，有啲迷失，唯有不停問人

影影下相呢個黑人後生仔埋黎攝鏡

佢知道左我地目的地之後就話可以帶我地去，零戒備心既我地就跟住左佢行喇。係佢帶路之下好快就搵到巴拿馬關口，沿路既人都好熱心咁為我地指路

當時有美簽就可以免簽証入巴拿馬，岩岩check返原來上年開始連美簽都唔使，特衰護照可以免簽入境30日。呢次入境好順利，搞掂就搵返後生仔，佢帶我地去搭colectivo，臨開車仲送左一人一罐啤酒比我地




小巴只係送到我地去碼頭，黎到呢度仲要搭多兩程船，一程去Bocas市中心，第二程去我地住既小島。去市中心既路上兩邊都係棚屋，有啲似大澳

然後突然過左某一點啲水就會變到好清，好似以前搭船去澳門中間突然有條黃泥水既邊界咁。Bocas市中心公眾碼頭既水清到咁樣樣，見到啲珊瑚魚游黎游去


經過一輪舟車勞頓終於黎到今次住既小島喇。男朋友話我唔舒服要好好養病，所以今次我地豪擲每晚HKD600黎住五日villa



呢度仲養左隻巨犬辛加，生到牛龜咁大隻但其實只係九個月大

呢度係個小島，所以晚飯只可以留係度食，但我地都好樂意咁做，因為老闆娘既手勢真係不得了。老闆兩公婆係法國人，所以大部份時間都係煮法國菜，晚餐每位25USD，餐單由老闆娘拍板，包頭盤餐湯主菜同甜品，樣樣都煮得好出色。
就好似呢日既松露多士、甘荀湯，煎牛柳同焦糖燉蛋咁



每晚都飽到上心口，係度期待每日既晚餐簡直係一大樂事
其實用二百蚊港紙就食到咁既大餐我直頭覺得係超值，就算係backpack間唔中都可以對自己好啲架嘛!

樓主返到香港有冇唔捨得旅行嘅生活？

係度每朝可以訓係床度睇日出

辛加無時無刻都係度捕我地陪佢玩

隻野日日都叼走我啲泳衣同底橫 好彩每次都搵得返，我地鄰居就慘啲，兩對拖鞋都比佢支解左

600蚊既房價包埋早餐，都係好豐盛，所以食完可以飽到唔食lunch慳返餐


島上面既碼頭放左幾隻獨木舟，住客可以隨便拎去玩。


呢度既島仔大部份都係由紅樹林形成，水道好似迷宮咁都幾易蘯失路。呢片紅樹林同我地平時認知既好唔同，唔係混濁既泥灘，而係清澈見底既海水

成片海域都好淺水，水深唔到兩米，其實坐係船上面已經可以將水底景色一覽無遺，但見到咁靚既海水邊個可以忍得住唔跳落去喎。
我無諗過紅樹林既水底原來係可以咁色彩繽紛架






每次都要兜好耐先搵得返我地個島


另一日我地搭船去左附近一個小島玩，因為前一日落完大雨，經過一個島仔果時見到十幾隻樹懶吊哂係樹上面曬大陽晾乾自己，好好笑

或者因為每間hostel都係開門就可以跳落海，大家都唔使特登出海玩，所以呢個無人島既遊客一隻手數得哂，可以靜靜地享受咁靚既風景。



呢度真係好靚，我第一次分唔清海同天既邊界

閒置play左一晝，臨走時船家隨手執左兩個椰子劈比我地飲


呢度既晚餐真係一日比一日痴線，有炆鴨脾啦，烤原條唔知咩海魚，貼堂作係一人一隻烤龍蝦，驚你唔夠飽仲配埋個咖喱飯

食完再加個心太軟

我隻狗


豪華團渡假就黎到呢度，聽日我地又熬幾程船同巴士返Costa Rica喇。

下一站: 哥斯達黎加-Drake Bay

臨瞓前睇到好肚餓

lm

話無就呃人既，間唔中都會好似而家咁回味下

老土啲講句，旅行唔只係吃喝玩樂，途中既文化交流、人與人之間互動、異地遇上種種突發既事都會改變你既思想，擴闊到眼界。與其沈醉係旅行既回憶之中，我更加希望帶著佢為我帶黎既改變，好好咁過每一日

我都係下次都係食飽飯先寫

留名支持記得舊年已經睇過加油繼續寫落去

留名
原來巴拿馬咁靚，睇完好想去

lm

[哥斯達黎加-Drake Bay]
去下一站既路程都係好轉折，總共要搭三程船四程車。咁艱難都要去既原因係我地係lonely plant見到句簡介，話呢度係哥斯達黎加最與世隔絕既地方，入面既國家公園亦係中美洲最原始既熱帶雨林，見到”原始”同”與世隔絕”呢啲字眼我地就忍唔住執行背囊出發了
中途交通已經複雜到唔記得



巴拿馬同哥斯達黎加個邊境好求其，周圍都無人看管，亦無拎住行李過關既人，我地搵路果時都自出自入左好多次 我諗佢地既居民平時都係咁行過對面買餸

返到去到哥斯達黎加已經好夜，唯有係車站附近求其搵間旅館訓一晚，聽朝搭最早果班車走。

說時遲那時快我地已經去到最後一程入Drake Bay既大飛了

去Drake Bay (Bahía Drake) 既大飛boat taxi一日有兩班，架艇坐得12個人左右，一開頭會先經過好長彎彎曲曲既河流，之後先進入大海。雖然只係公眾交通，但船長一見到岸邊有動物或者海面有鯨魚都會好開心咁駛近比大家睇

叫得做Drake Bay，固名思意呢度是非常大浪的，尤其是原來呢度上星期先岩岩打完風。呢程船亦都出名驚險，係河流同大海連接既河口位開始勁大浪，每過一個浪我個屎忽都拋到離開張櫈幾秒，搭程船都要札行馬，覺得架船仔已經唔係拋咁簡單，而係不停晌反艇邊緣徘徊... 呢個時候仲要見到有個好似海嘯咁高既巨浪湧緊過黎，船員即刻好緊張咁叫所有人著返救生衣再逐個check。去過中南美既人都知道當地人係幾咁痴線同膽生毛，連佢地都咁緊張，果一刻我真心覺得自己會死

好彩船長技術了得，唔知用咩方法令架船過到個浪，呢個時候又刮起大風大雨，係風雨中仲見到鯨魚上水面轉身，短短一個鐘既船程已經係一個好難忘既adventure。
淋雨+嚇到底褲都濕埋 好不容易終於黎到我地既目的地

Drake bay既規模其實只係海邊既一條小村莊，呢度無碼頭，每次出入都係要卷起褲腳搶灘。我地個host黎左岸邊接我地，佢地一家都好好人，今次住既山林小屋亦好舒服，每晚HKD180，有兩間房，我地都住唔哂


仲有我地最鍾意既吊床添

謝謝!! 我都追緊絲打你個po，好好睇呀