[重開][多圖][一年長途遊記] 中南美到南極-西伯利亞至東歐

多謝夏里絲，祝我快啲轉份好工

之前提過，黎北京就係為左搭火車去駁西鐵，呢一日我地就去買定火車飛先，因為車飛唔係晌車站買，而係晌北京國際飯店既中國國旅買既我地打算離開北京之後係蒙古逗留一排，所以會先由北京搭去蒙古既烏蘭巴托，呢個路段屬於國際例車，K3或者K23班次都會經呢段路，佢地分別由中國同俄羅斯營運，而且佢地係交替運行既，我地想出發果日咁岩就係行K3車

Counter度有唔少關於呢條路線既資料，呢張”乘坐K3國際列車小貼士’’幾有用，有興趣想搭既巴打不妨望望

我地買既係硬卧，車票每人盛惠1310RMB，雖然有啲貴，但真係好期待呀，希望去到蒙古有好天氣啦

搞掂跟住落黎既交通，成個人都安心哂。袋好車飛之後我地去左景山公園，呢度可以由高處望到整個紫禁城

我地趕得切係日落時分黎到，金光灑落黃瓦頂，係一個唔錯既景色

係北京既最後一日，我地去左長城。去景點最怕就係有太多嘈吵既大劣人，我地揀左去慕田峪，呢一段既長城比較少中國人，老外多啲，人少少，可以安靜咁慢慢行。前一晚上網訂左巴士飛+門票，晨早就由市中心坐2個鐘巴士去懷柔，到達之後係山腳坐呢啲吊車上山

望落去見到人sir滑梯落山，我地一陣都會sir


上到去，先睇到原來周圍既山頭都係城牆，全部都建係陡峭既山脊之上，到底當時既人係點樣做到


我地係6號塔樓著陸，向1號塔樓方向行




原來長城係好斜架，雖然地下舖好哂級級，但好多地方都要用手傍住爬上去

黎到盡頭既1號塔樓



影影下相，窗外面無啦啦有兩個鬼佬爬入黎，嚇左我地一跳。原來呢度根本唔係盡頭，由窗口爬出去可以去到一段未經修復既長城，睇落好吸引，我地就跟機爬左出去


呢段路長滿雜草，一片頹垣敗瓦，加上牆邊粉白既梅花，呢個景色真係好靚，難怪咁多人會被滄桑既野長城迷住。我地一直行，去到一個位被樹完全擋住去路，就返返轉頭了


差唔多係時候落山搭巴士走，我地又行返去6號塔樓，排隊sir滑梯落山喇。呢間滑梯公司叫做思必達，speed 坐上個兜仔度，向前推控制杆加速，向後拉煞製，4分鐘就落到山腳啦，好玩



去到蒙古就要進入羊肉既世界，但我同男朋友都係唔食羊既，真係有啲擔心 所以臨離開北京前再去食多次大餐，食我最鍾意既片皮鴨。今次食間好少少既餐廳，有人係你面前批鴨皮，好好食



熱身完畢，黎緊就要再次投入言語不通既國度喇，真係好興奮
蒙古，我地黎喇

[下一站: 蒙古]

巴打好用心睇，多謝你

波羅的海三小國我地逗留左唔係太耐時間，每個國家一星期左右，覺得幾個國都好似，歷史背景相似、啲人好友善、都係咁鍾意焗桑拿、街市買啲餸好新鮮、物價唔高、城市簡潔先進、小鎮清幽、有好多自然風光咁。

如果要講佢地既分別，我會覺得Estonia感覺先進啲，Lithuania相對舊啲，香港人應該會比較慣Estonia。但我諗移民同旅行唔同，可能要比較埋佢地既制度、就業、教育之類既野，希望巴打都好快可以去親身考察下

我見網上好多遊記同評論都係話Lithuania比較靜 Estonia比較現代化 如果咁睇應該會想Lithuania多D(同埋移民門檻好似低D)
Btw 期待樓主蒙古遊記

[北京 > 烏蘭巴托]

出發去蒙古啦!!
蒙古係其中一個我好想去既地方，好想去感受佢地既大漠風情，係一望無際既郊外體會咩叫天蒼蒼野茫茫，只係礙於我真係好怕羊蘇味，所以一直都無成行 今次我會努力克服對羊肉既恐懼既!!

朝早六點半我地就黎到火車站，因為班車七點半由北京站開出，我地要係開車前一個鐘到達車站，順便買啲早餐上車食

呢架K3火車終點係莫斯科，由頭搭到尾既話全程要搭五日，所以我地會係中途站烏蘭巴托落車，係蒙古玩個零禮拜先，然後再繼續鐵路之旅


我地買既係硬卧飛，一個包廂有四張床。適逢旅遊淡季，兩日都無roommate，我地兩個可以獨霸間房，好正

我同男朋友係上下舖，我訓上格床，上車無耐就會有職員拎啲床單比你自己舖，呢款硬卧張卧都真係幾硬，舖張毛毯係底墊住訓會舒服啲

舖好床單就係車入面周圍行下

個廁所比想像中幾乾淨

車廂靠燒煤提供暖氣，好夠暖，夜晚仲會熱到出汗添

呢程車要搭31個鐘，7:27由北京開出，第二日既15:22就去到烏蘭巴托


車飛包左中國境內既兩餐，所以第一日午餐同晚餐都係免費既，午餐有獅子頭配黃芽白

搭車旅行既好處就係可以慢慢欣賞沿途既風景

五點鐘天未黑，又係時候食晚飯

晚餐係芹菜炒雞肉，都好唔錯，肥仔仲用6蚊人仔買左罐青島

食完飯，太陽開始落山了


係車上面無無聊聊，我又開始探索附近既房搵人吹水。隔離房一間住左個蒙古大叔，另一間就住左個日本妹同鬼仔，我地揀左同大叔吹水，問下佢關於蒙古既野，順便叫佢教下我地蒙文


呢晚要早啲訓，因為凌晨去到二連巴托既時候就要起身，辦理過境手續同埋睇換轆啦。

好SAD

Lm

凌晨一點鐘，列車去到中蒙邊境既二連巴托。車上既乘務員大叔咁上下時間就會摷醒大家，派啲出境表過你填，停車後中國既邊境人員會係度上車，乘客坐係自己張床度等佢地埋黎就得，辦理出境既程序車係入面搞掂，全程都唔使落車


跟住落黎列車會進行換轆工序，所以我地會係二連巴托停留差不多五個鐘。如果好想舒展筋骨既話，你都可以落車行下，不過咁就要等換完轆先可以返返上車了。出面天寒地凍，我地無落車，跟住架火車黎到換輪庫


我原本都唔知道換轆係咩一回事，以為要落車先睇到，但原來要唔落車一直坐到黎換輪庫先睇到架。入到換輪庫之後，列車會靜止唔郁一陣，跟著會不斷前前後後移動，然後就係一下爆炸性既衝擊，我諗可能係一卡卡列車甩開既過程掛。
車卡斷開之後，由尾窗望出去既情況

隔左一陣，我地見隔離房日本妹同鬼仔係走廊行黎行去，叫我地一齊望出窗，原來前面既車卡飛起左

無幾耐之後我地既車廂都飛起埋，原來換轆就係將整個車卡托起，換左車底既轆佢。因為中國同蒙古&俄羅斯既軌距唔同，所以要係進入蒙古前先換過適合軌距既轆，過境後列車先可以繼續運行。

換完轆，列車正式駛離二連巴托，進入蒙古，係車上面搞掂埋蒙古既入境手續，我地都係時候訓覺了。朝早六點幾，黎到一個叫賽音山達既中途站，係度會停半個鐘，我地同日本妹落車呼吸下新鮮空氣，比起北京呢度明顯更加凍喇



離開中國之後列車就唔再免費包膳食，好在車上面有無限熱水供應，我地可以食之前買落既杯麵做lunch。呢段路景色比之前既荒涼，幾乎見唔到任何民居，間中會見到放牧中既群牛羊


乘務員大叔好熱情，好鍾意聊乘客傾計，佢話夏天既時候呢片草原會開滿紫色既小花，無論睇幾多次都唔會厭，叫我地記得夏天再黎過。雖然而家無花睇，但佢話列車轉彎都好好睇既畫面，仲怕我留意唔到，轉大彎既時候佢就會埋黎提我望出去，最衰隔住玻璃影得唔清。
轉完左

轉埋右


睇緊風景既時候，男朋友同我講佢琴晚原來發生左啲事。我地隔壁房咪有個蒙古大叔既，琴晚換完轆既時候原來蒙叔叫左男朋友入佢房，入到去之後澎一聲閂埋門，開始壓低聲線講野。蒙叔牛高馬大，閂埋門熔左肥仔都得，旅行左咁耐佢話果一刻係第一次覺得驚。原來蒙叔係逃票撚，但過境既檢查好嚴，佢想我地幫手收埋啲行李，將佢袋野放係我地房，自己就去逃票，去到蒙古佢就會上返車咁樣。傻的嗎，唔通我地個樣真係咁on9咩，萬一佢個袋入面有違禁品或者毒品咁點算。男朋友堅決拒絕左之後，天光就無人再見過蒙叔了，佢張床都無有人訓過既痕跡，真係個神秘既男子呢。

[蒙古-烏蘭巴托]

36個鐘之後我地就黎到烏蘭巴托啦!!
落車後首先去櫃員機撳左啲蒙紙，蒙紙叫做圖格里克MNT，簡稱蒙圖，當時1HKD對300MNT左右

烏蘭巴托火車站

今次住既地方離車站唔遠，HKD160一晚，就係一張雙人床同埋一個廁所

全日剩係食左餅乾同杯麵，好肚餓，放低野之後即刻出去搵野食。出面好凍，坑渠啲水仲結緊冰

我地行左去附近一個叫MaxMall既大商場，都幾現代化架，入面仲有個food court，睇下食咩好先

唔......完全睇唔明 啲蒙文好似外星文咁，唔知點解google translate又翻譯唔到，唯有雞同鴨講咁問下收銀員邊隻最正，雖然蒙古人生得神高神大，但感覺佢地幾nice，係佢推介之下嗌左呢碗野

一放上餐盤已經心知不妙，係羊肉餃in羊肉湯，聞落真係好恐怖。但黎緊幾日我地打算去住local既蒙古包，食佢地煮既餸，到時都無得避羊肉，早啲入鄉隨俗適應陣羊味都好既。呢碗餃食落又唔錯，仲愈食愈好味，係有少少蘇但不至於完全接受唔到，羊肉熬既蔬菜湯仲勁清甜，連跟餐杯甜甜酸酸既熱飲都好好飲，到最後我一滴不漏咁食哂成碗湯餃，突然覺得自己適應能力很強

盛惠4100MNT，14蚊港紙有呢個set真係好抵


而男朋友呢，仲係唔夠膽食羊，淨係敢食Burger King，weak

香港有直航去烏蘭巴托呀，可以skip左中國佢，我諗住第時有機會再去蒙古既話都會咁樣直接飛過去

原來真係有人食牛/鴨 但唔食羊
見襯一係唔怕羶全部都食 一係就唔食

樓主不如你唔好翻工住啦 打哂先好冇

射波打文

支持

最多樓主將遊記出書果陣
我去買返本
當經濟上支持下

早幾年撘過硬臥去西藏 撘三日兩夜
日日食飽就訓 好爽

每日去旅遊台搵呢個post已經變左例行公事
每次都好期待樓主有新文出
希望快d有時間可以出下文 解下我地既癮

我好多年前去四川，食唔到辣腸胃炎要吊鹽水，最後食咗七日kfc薯蓉

Hostel既早餐，幾飽肚


食完早餐，我地就報埋黎緊幾日既tour，原本我地想上網報間叫ger to ger既公司，但唔知係咪時間太炆水，inbox左佢地無人回應。不過唔緊要，我地住既呢間hostel都有自己搞tour既，長度由三至八日不等，我地報左個遊覽蒙古中部既五天團，會去一啲National park，夜晚住蒙古包，雖然五日都無得沖涼，但都無減少我地對呢個行程既期待 呢間hostel叫Danista Nomads Tour Hostel，參加完之後覺得質素都好唔錯，而且hostel位置好方便，有興趣既巴絲可以望望。

報完團，就出去附近行下

蒙古男人真係好高大，個樣好成吉思汗，好多後生仔都著著件長絨褸咁，都幾型架。男朋友就話啲女仔睇落皮膚白滑，都唔錯，不過骨架都係高高大大，唔岩佢口味咁話。我地行左去超級市場，買定啲口立濕黎緊搭車食，呢度賣既野對我地黎講都好新奇，呢啲羊頭骨唔知可以點煮呢

雪糕店

買完又係時間食lunch，因為完全搞唔掂啲蒙文，前一晚我地捉住hostel個reception後生仔玩左好耐，合力寫左呢本蒙文天書

今次終於知道呢啲野係餃子咁解

就算依舊睇唔明個餐牌，但同蒙嬸們講聲唔該哂佢地都寧舍開心，我覺得就算去到邊個國家，都至少要學識講當地語言既"你好"同埋"唔該"，咁先可以更投入咁享受同當地人既接觸。接下來仲會去好多唔係講英文既國家，隨住當地人教我地既字愈黎愈多，呢本簿仔都漸漸寫滿左不同語言既"你好" "唔該" 同埋 "再見"，成為我地其中一份珍貴既手信

我繼續食羊肉湯餃，今次呢碗入面有啲一條條好似麵皮既野

仲有兩塊羊肥膏，蒙嬸豎起手指公話係正野黎

硬住頭皮試左啖，咬落羊味好澎湃，好似將成隻羊既蘇味濃縮哂係度咁，到底係咩部位黎，好恐怖。男朋友就食牛肉飯

唔知蒙古人食既牛係咩品種黎架呢，食落寧舍蘇，蒙古牛vs蒙古羊我寧願食羊。行行下見到間miniso，黎緊幾日無得沖涼，係度買左包濕紙巾到時抹屎忽用。而男朋友見天氣乾燥我咳得嚴重左，又買左個放濕器比我用，為住蒙古包做足準備


烏蘭巴托呢度唔知點解有好多韓國食肆，之後問返導遊呢度係咪有好多韓國移民呢，佢話唔係，純粹係佢地好鍾意睇韓劇臨出發前既呢晚我地就去左食泡菜野，中和一下啲羊蘇味


沖完涼，拎返朝早係超級市場買既乳酪出黎食，好濃厚好好味 臨訓前食返杯濃厚既乳酪，有一刻覺得自己好似去左日本旅行咁添

返黎香港之後我就無再食過羊
男朋友話我係蒙古果時好似撞左邪咁，開口埋口話要入鄉隨俗試下食羊

勁

咁快打完我驚你地唔捨得我

好啦lastday完我會比心機出返密啲

我係度同你地傾計已經好開心，無諗過出書，但都多謝巴打先