(男朋友係San Pedro買左部一千蚊港紙既電話,所以日常既相會開始間歇性低質
)
第二日朝早九點滑沙大叔就揸住部紅色校巴黎接我地出發
滑沙地點離市中心十分鐘車程,叫Valle de Murte死亡谷,好中二病的名字,因為距離市區咁近,有啲人會自己租單車踩過黎
同團仲有兩個來自Santiago既後生女,係只有四人既小班教學
我地一路都以為滑沙係坐係塊板度sir落黎既零技巧活動,報名既時候先知原來係好似snowboard咁企係度玩既。大叔有兩種板提供,因為男朋友曉滑浪,所以大叔建議佢用速度比較快既snowboard,安全起見佢要戴頭盔同著鞋,我係初學者就用入門級既sandboard,著襪玩就得
揀好板我地就拎住佢上去沙丘頂準備喇,雖然呢度海拔2500米唔係太高,但不斷係沙丘滑路黎再爬上去都有啲索氣。滑之前要係板底磨一層蠟減低阻力,學識基本技巧之後就可以開始滑
沙丘比想像中斜好多,開頭唔識平衡成日都跌到一仆一碌,但啲沙好柔軟,跌落地都唔會痛。努力左個零鐘之後終於可以直立式滑行了
大叔見我地學有所成就開始拎部相機出黎幫我地捕捉精彩moment,呢間野好似叫Sandboard Atacama,價錢會比其他tour agency貴少少,但我覺得服務好好,我見附近其他團好多都係借左塊板比你就唔理你,放牧式放養啲客
我地大叔就會好細心指導,就算我咁笨手笨腳都可以成功玩到,覺得好有滿足感呀。
我地由9點玩到12點半,由啲沙涼浸浸玩到開始辣腳到企唔到就走了,走既時候見到有啲團而家先黎,真係擔心佢地中暑,大家黎玩記得報早啲出發既團呀。
返到市區食個晏晝
然後返房沖返個涼先,雖然跌到好攰,耳仔窿鼻窿全部都係沙,但真係一個好好玩活動呀。
夜晚既觀星團9點先開始,觀星係Atacama其中一個最熱門既活動,大家都話係度會睇到最清楚既星空。我啲睇韓劇既朋友同我講,原來之前套來自星星的你個男主角講過呢度擁有全世界最美麗既星空…….唔怪之呢度咁多韓國遊客啦,啲阿豬媽多到我以為自己去左韓國
我地9點去到旅行社,點知佢話個天太多雲,唔出發住,叫我地10點半再返黎睇下咩情況。我地就周圍閒逛下,咁岩係教堂附近又遇到佢地既慶祝活動
遊行隊伍邊跳舞邊奏樂,圍繞大街小巷遊走,睇個勢應該又係宗教慶祝活動黎
大家都好開心氣氛好熱鬧,我地都跟住隊伍玩左陣
咁上下時間啲雲開始散,我地都再度出發去睇星啦。部車又係駛左去附近十幾分鐘路程既一個地方,係果度我地首先聽一個有關天文既講座先
然後就出去用佢地既大望遠鏡睇下星雲同月亮
今日個月亮好光,所以銀河都唔係太明顯,但天上依然係滿佈星星,就好似鼻上面既黑頭咁密。好好彩呢日撞岩係流星雨,不斷有流星飛過,我都係第日次見到咁多流星!! 最難忘既係見到粒四分一個月亮咁大既星(?)拖住長長既尾巴劃過天際,整個過程維持左5-6秒,真係好震撼,佢個形狀好似個掃把,唔知係咪就係掃巴星呢。
另一個環節大家會圍圈圈坐,邊飲住智利國酒Pisco sour,邊睇tour guide用laser pointer教我地觀星。以前淨係識獵戶座腰帶,而家先知原來佢仲有佩刀同手腳
而且係南半球同北半球睇佢既方向會唔同(好似係),又學到野了。
最後會幫大家同星空background影張大合照
佢地放係facebook叫我地自己download,好濛,好似key上去咁
星空黎講我都係鐘意男朋友平時影既相多啲