[重開][多圖][一年長途遊記] 中南美到南極-西伯利亞至東歐

返生

打左一半啦我覺得keep住黎睇既你地都好有毅力

朋友幾百歐一次過放哂係同一個地方咁危險
原來啲賊仔清晨都開工咁勤力，我發現佢地都好鍾意一窩蜂湧埋黎然後極速四散比著我都唔敢追上去，佢一刀捅埋黎就係咁先。
好彩你地人無事，當係破財擋災

最緊要唔爛尾 gchi

$1100晚都唔算平，不過幾靚幾有趣

繼續推 
係蘆葦島過夜，重要係平安夜，好難忘既體驗 

佢地啲手工藝品好靚

聖誕日諗住賴床訓晏少少，點知一擘大眼就見到兩個小朋友係床邊眼仔碌碌望住我地 嚇到成個人彈起，真係好特別既morning call

梳洗下就黎食早餐，早餐有大量生果、蛋、芝士同埋有啲似牛脷酥既煎餅，味道唔錯

墨西哥母女走左，新住客未黎，呢一晝得返我地係島上面，靜靜咁望住個湖，打算訓係度曬下太陽睇下書就一日



時不時都見到呢啲藍色嘴既鴨仔

又同下細路玩


邀請Ale BB係我既日記留下墨寶

呢條友見到細路就會開心到痴左線



媽媽同老婆見我地無無聊聊，就拎左套佢地傳統既衣著出黎，開始興致勃勃咁幫我裝身

呢度既婦女都會札兩條長長既鬢辮，髮尾吊住一串毛毛波咁。我啲頭毛咁短，佢地都好比心機咁幫我駁髮


變裝成功

Juan話印加人相信萬物有靈，所有野都有屬於佢地既神，呢邊比較主要既神有Pachamama同Quchamama。Pachamama係大地之神，主管作物同收成，所以陸地上既居民大多信奉呢個大地之神，佢地既衣著顏色會比較沈色啲，earth tone啲。而住係水上既居民就會信奉大海之神Quchamama，佢就好似我地既媽祖咁會保佑漁民同水手，信奉佢既人都會著得好鮮艷，呢個就係佢地傳統衣著咁色彩繽紛既原因。
男朋友都得到男子服裝一件


唔怪之啲人咁鐘意比錢租和服呀韓服之類既當地服裝著，原來又真係幾過癮 而家唔使錢感覺更佳 完成變身之後Juan就帶我地泛舟湖上



我地先撑到去一大堆好健壯既totoro旁邊，試下收割呢啲草

順便留下倩影


佢都成功收割到幾條草

Juan就開始講解呢種草對佢地既重要性，烏魯族人既生活離不開totoro，佢地既島、屋、船都係用佢札成(雖然佢話為左令架船浮啲，船入面其實塞滿左膠樽)，呢種草生長速度好快，簡直係一樣取之不盡既素材。除左用黎做建築材料，原來仲可以拎黎食

搣左外面層綠色皮，露出既白色芯就可以食，咬落好脆好多汁，好似無味既西芹咁。除此之外，摔開佢仲可以變成一塊好似退熱貼咁既野，涼浸浸咁，佢地會比發燒既小朋友貼額頭

然後佢帶我地去收返琴日落既漁網，不過今日無收獲

又示範點樣整捉鴨仔既陷阱


呢個短短既即興船河tour好有趣，遊左兩個鐘左右就返黎我地既小島了。好多小島都有個咁樣既金拱門，有歡迎客人既意思


自從以前係電視上見過浮島既介紹之後，我一直都好想黎呢個地方，呢度所有野都係由草札成，啲人又著到花碌碌，就好似童話世界入面既地方咁。可以係湖中央一個軟綿綿既小島過一個咁特別既聖誕，活著真好


下一站: Machu Picchu

收到

係呀好貴果時覺得要對自己好啲，又係聖誕節，所以住一晚半晚賀下佢

係呀個地下軟綿綿，周圍都舖哂草，好香草味，係地下碌黎碌去都好舒服

聖誕樹上面啲裝飾全部都係自己整，好有心思好靚

絲打之前係咪有出過遊記
睇睇下去到浮島果度有種似層相識既感覺
好似好有記憶之前睇過

好warm

Live 左 好好睇
絲打條仔好正
好想去南極

頂帽同件衫好靚
好鐘意呢類style嘅野

佢地啲島浮係水上面
會唔會訓醒就移咗位唔知飄咗去邊
同埋係咪要每日去打水去托日用品返屋企

[秘魯-Machu Picchu]
到左離開浮島既時候啦，朝早起身就見到好靚既雙彩虹

見到咁靚既景色個人都寧舍開心，希望之後既旅程會一直平安啦。我地坐返船仔出去買車飛去Cusco，揀左價錢比較貴但係睇落啲車硬淨啲、感覺可靠啲既Cruz Del Sur

食Juan幫我地pack好既水果大餐

搭六個半鐘就黎到Cusco了


放低野之後就即刻去市中心買去馬丘比丘既車飛同門票，然後就去食晚飯啦。Cusco呢度好出名食烤葵鼠同草泥馬，唔……呢日無食晏，唔想太獵奇住，過兩日返黎再試啦。今日食住燉肉同ceviche先，秘魯菜真係好好味，好岩胃口

返hostel既時候見到個婆婆拖住隻小alpaca散步，呀呀呀太得意啦

就算明知係要比錢既tourist trap都忍唔住走去摸下佢

佢啲毛好厚軟綿綿勁舒服 醒左2sol(4hkd)比呀婆佢就拖住隻alpaca上的士返屋企了，隻野乖到我有一刻懷疑係人扮的


要去馬丘比丘，首先由Cusco過去馬丘比丘山腳既熱水鎮Aguasclientes，我地揀左巴士+火車呢個最平既方法。其實我地對馬丘比丘無乜興趣，不過一場黎到附近就順便去埋啦。如果要用一個字形容呢個地方就係”貴”，可能之前係其他地方睇過既古跡入場費都好平，又或者我真係好窮，我覺得呢度所有收費都不合常理地貴。就算我地揀左呢個最平既交通方法，呢總共3個半鐘既車程都每人要差不多150USD，媽呀我個心好痛呀唔搭車既話都可以選擇由Cusco出發行4日3夜既印加古道Inca Trail上山，聽講沿途會經過好多小村落，景色好靚，不過行路既價錢並不會更平，求其上網搵左下Inca Trail既價格由600-1500USD不等。

總之呢，第二朝我地就出現左係呢個豪華既侯車室度喇

我地只係晌Aguaclientes過兩晚，所以將大背囊留左係Cusco既hostel，只係執套衫塞落小背囊出發。我地首先搭2個鐘既小巴，去一個叫Ollantaytambo既火車站


呢種就係我地搭黎既小巴

係呢度會轉IncaRail火車，再搭多1個半鐘左右

收得咁貴，好彩服務同環境都對得住價錢既，我地屎忽撞棍咁買到個天花都係玻璃既車廂

沿路風景好靚，好多拔地而起既壯觀高山，車廂既天花都係玻璃就令乘客可以好好咁觀賞到整個山嶺既景色

有咖啡茶派，有火車餐食，都幾好味


亦有一卡開放式既車廂可以行去吹吹風


好快就黎到熱水鎮啦

之前睇過啲介紹話呢度無咩特別，但我覺得呢度都幾靚丫，有條河流貫穿整個小鎮，因為係雨季既關係，山谷中經常都有一陣陣雲霧飄過，如果無視海量既遊客的話呢個其實係個幾靚既地方。雖然車費咁貴，但好在住宿價錢都正正常常，係度租左每晚二百零蚊既hostel，周圍行下

印加帝國的國王Manco Capac，手上面拎住支好似咕嚕咕嚕魔法陣入面會出現既杖


佢地啲太陽裝飾真係好盞鬼

叫得熱水鎮，呢度其實都係有溫泉浸既，晌山腰有個40sol入場費既Baños Termales，只不過要行好遠同埋我地無乜興趣所以無去。行到天氣就去食飯啦，呢度求其嗌個頹飯都好好味

肥仔既炸豬腩肉塔

好好休息，準備聽日落足眼力去睇下昂貴既馬丘比丘啦。

之前淨係出過老撾同墨西哥遊記咋，唔通巴打識我真人

你個look咁好認，如果真人識你 應該一眼都睇得出

謝謝
我地就黎去到熱帶地方架喇，小心打得丁多傷身呀施主

我平時淨係鍾意黑白灰，去到都覺得佢地啲衣著好得意呀
佢地既島會好似船咁落撈固定位置架，唔會飄走但大風既時候都會feel到好似船咁郁郁下。有啲島係士多黎，所以佢地買野唔使次次去到Puno咁遠，沖涼洗手既話用湖水，不過可能驚我地水土不服所以飲既係樽裝水。

你地會唔會有暈船浪feel
以前試過係船到過左一日返到陸地都覺得自己飄飄下

想聽打劫同車禍