[重開][多圖][一年長途遊記] 中南美到南極-西伯利亞至東歐

可能個朋友第一次去啲比較多賊既地方
所以.......

係啊，我見你話啲人突然好奇怪咁接近你地
就諗緊係咪賊仔
佢地一行動，就會用人潮戰術引開注意力
跟手好快咁偷野
最後佢都拎左份無人想要既紀念品返香港

繼續睇先
歐洲個part都好期待

可能因為果時係12月尾既假期，熱水鎮周圍都迫滿哂人，馬丘比丘上晝既參觀時段已經full哂，我地買左下晝1200-1730時段既門票。門票係上山前預先買好既，每人47USD，火車公司甚至係要我地出示門票既預訂收據先肯比我地買車飛。馬丘比丘既入口係山上面，11點鐘我地就到達搭shuttle上山既車站，睇下條人龍長到，去到街口仲轉左個彎

仲多人過年宵行花市，唔講仲以為去馬丘比丘係免費架添。呢程小巴經過彎彎曲曲既陡峭山路上山，車程大約20分鐘，來回車費24USD，好過去搶。因為一路都無諗住要黎，之前無乜點做功課，所以都唔爭在係門口用60USD請個導遊，了解多啲呢度既歷史同故事。(聽講2019年開始好似加多左條規定，為左保護古蹟遊客必須聘請導遊進行導賞。)

印加語既Machu係古老，Picchu係山，Machu Picchu既意思係古老的山。馬丘比丘以前係貴族住既地方，最高峰時期住左6-700人，距離而家大概500年歷史。印加帝國、瑪雅文明、亞茲特克文明合稱美洲三大文明，印加帝國於15至16世紀存在，雖然佢係三個入面差不多最近期既文明，但佢地無文字，係用繩結黎做紀錄，最叻就係揼石仔，可以將石頭切割得天衣無縫咁工整，石與石之間甚至完美到唔需要用任何黏合物，真係鬼斧神工。

簡介完就開始行啦，一入黎就係呢個postcard景，磅礡山景中既古蹟的確係令人感動既風景

周圍有幾隻對遊客見怪不怪既llama

阿導遊不斷迫我地擺好多羞恥pose，話黎馬丘比丘一定要咁樣影相 之前係湖邊買落既冷衫同被肩係咪幾靚

佢地既梯田


居住區，完美無縫交接既石仔


佢地會利用地勢興建引水道，將山水引到城內各處，雖然係滴滴仔但到而家都仲運作緊

左邊工整又經過打磨既係神殿，右邊隨便湊合既就係民居

四個角分別準確指向東南西北既石，唔知點解人人都放隻手係度吸靈氣，係高地住左幾星期對手曬到又黑又巢皮

揼石鬼才另一力作，我地會用山水畫紀錄風景，佢地竟然會用石鑿座山出黎。呢塊石係照住後面座山鑿既，不過今日多雲睇唔到座山

Machu Picchu係古老的山，對面岸尖尖果座就叫做Wayna Picchu後生的山，導遊話呢座山睇落好似一個仰望天空既印加人，你又睇唔睇到?

加幾筆就清楚哂，又真係幾似喎

附近幾個山頭都有啲遺跡，可以沿住印加古道四通八達咁周圍去，如果想行埋對面個山亦可以買Machu Picchu+Wayna Picchu的門票，價錢會貴少少咁。

一個半鐘既tour都幾走馬看花，我都麻麻地呢度既氣氛，好多人都係迫哂係啲打卡景度排長龍影相，好似都係為左到此一遊打卡咁，呢度太多遊客但開放既路唔多，要趕鴨仔咁一直行，都唔夠時間去睇呢個地方。完左之後我地想再返轉頭睇下，點知導遊話呢度係單程路黎，行過左就行過左，唔準返轉頭，真係好反智既規定。我見佢地都好嚴格執行呢個規定，每個導遊都會警告企圖逆流而上既旅客。

是但啦，頭先同咁多人迫都迫到好頭痛，我地就搵左個角落頭坐埋一二邊睇風景。一層層既山，好神秘好靚，明明係咁靚既景色點解無乜人停下腳步欣賞


山谷岩岩落完雨，出現左雙彩虹，呢個時候我先第一次清楚見到原來雙彩虹兩條既彩色次序係相反既


去完馬丘比丘，夜晚飲返支有佢個logo既啤酒先，好味

下一個朝早又坐豪華列車返Cusco了

會嗎都叫左男朋友打格打大啲架啦

會呀好得意

詳情請參閱14-18頁

經一事蔡一智，朋友第時一定會小心好多
西歐有啲快閃，東歐會詳細返

你條頸可以點醫？
仲有咩後遺症

Take care

d 相好靚, 你可以出本書

啱啱儲埋幾篇一次過睇晒
你條頸而家冇乜事呀嗎？

lm

[下一站: 哥倫比亞- San Andrés]
出發去下一個地點之前，我地先返黎Cusco抖一晚，順便食下美味既秘魯菜。係度我地食左兩餐，第一餐係去之前經過左幾次既up dup舖仔，食睇見都流口水既炸豬腩肉

香口野緊係要配啤酒

皮脆肉香，唔嚡，優質!!

配菜之一有呢啲超大粒既粟米，煙煙韌韌無乜味，食幾粒就好飽肚

再叫多左個薯仔雞湯，都好濃厚好好味，可能因為係原產地既關係，佢地既薯仔寧舍香口

食完周圍行下就返去訓覺


Cusco真係好多遊客，櫃員機都有好多國語言，連殘體字都有


第二日傍晚要去機場，臨去機場前係度食多餐晏先。呢日我地左間四正少少既餐廳，試下之前無食到既秘魯名菜燒葵鼠Cuy

呢度既服務幾驚喜，等上菜既期間居然有農作物既簡介。秘魯係薯仔既原產地，呢度亦都盛產粟米，所以侍應棒左由秘魯出產唔同品種既薯仔同栗米黎，逐樣向我地介紹


仲請我地飲左一杯秘魯傳統啤酒，望落好濁，嗒落酸酸地幾好味，傳統既造法係搵啲妙齡少女𡁻爛啲粟米，再吐出黎裝起發醇

上菜啦! 燒葵鼠配Alpaca餡餅

Alpaca餡餅就係一貫唔識欣賞既草泥馬騷味，而隻Cuy呢，啲腸呀內臟呀仲係隻鼠入面，肚入面塞左好多香草，亦有好濃酒味，睇落同食落都好似迷你乳豬，層皮好薄好香脆，味道係唔錯既

隻鼠無乜肉食，嗌多左一碟Tiradito，係受日本文化影響既Ceviche，一樣係醃生魚不過醬汁就黏稠啲

食完有碗水比你洗手

成餐都無乜肉落肚，唔係好夠飽，食完就搭車去機場，轉兩程機，出發去一個以前聽都未聽過既小島啦

[下一站: 哥倫比亞- San Andrés]

秘魯菜應該幾啱香港人口味 夜媽媽睇到好想食

新人lm
樓主影啲相好靚

睇完啲野食覺得好餓

去左睇脊醫復位，覆診左幾次就好好多了。
不過間唔時都會卡啦卡啦響，條頸唔多實淨既感覺，間中去覆診下就ok。

真的嗎等我試下掟佢啲相上網賣，睇下賺唔賺到兩餐晏仔

Ok呀，行得走得

[哥倫比亞- San Andrés]

係秘魯既時候我地就係度咁諗下一個國家去邊好，想去Galapagos但覺得太貴，果段時間又驚左搭長途車，咁不如就搵個小島好好休養下再出發啦!! 每次離開海邊太耐，我地就會好掛住陽光與海灘，炒車團識既希臘情侶話我地知，晌尼加拉瓜附近有一個叫Providencia既地方，係一個充滿珊瑚礁同美麗海灘既小島。要去Providencia首先要去佢附近既姊妹島San Andrés，佢地兩個都係珊瑚島，雖然屬於哥倫比亞，但地理上其實更接近尼加拉瓜或者哥斯達黎加多啲

如是者，我地就由Cusco出發，經Lima同Bogota轉機去San Andrés。
Bogota個機場好大好靚

地下都好好訓

通左晚頂終於黎到啦，係久違了的加勒比海呀


因為只係中途站，我地係度只係留左兩晚，今次住既係一間兩層小屋，host住樓上我地住樓下，有廚房同花園，每晚HKD280。成晚無食野，眠一眠前先去街口士多買餸煮個晏食，隆重介紹我既聖誕禮物，係玻利維亞個街市買既圍裙一條，覆蓋面高又有好多袋，我好鍾意架

頹麵

洗碗部既同事仲可以著住黎洗碗，簡直係年度最佳禮物


黎到當日係除夕，host兩公婆邀請左我地上樓上同佢地一齊食晚飯開新年party，上到去就見到姨姨已經準備左好多節日裝飾，好有氣氛咁熄剩一盞燈


佢一個好風韻猶存既女人，keep得好好，我係佢隔離著住件穿窿衫一頭亂髮成個癲婆咁


佢準備左豐富大餐，有菠蘿焗煙肉、提子乾飯、沙律之類，全部都係又甜又咸，味道衝擊得黎都幾好味

之後有兩個佢地當地既朋友加入，係一對父子，個仔係潛水教練，阿爸係捉獅子魚既，獅子魚太多會危害本土生態，所以佢地會捉黎食，仲話好好食叫我一定要試下。言談間host大叔問我知唔知San Andrés最出名係咩，我話靚沙灘囉，佢話唔係，係運毒佢話因為地理位置優勢，呢個小島係哥倫比亞毒品外輸既主要中轉站，島上大部份居民都係以運毒為生。大叔愈講愈興起，好似好熟呢一行咁，佢本身個樣都兇兇地，仲要話自己係Cali出身，呢個人真係非常有嫌疑，係Netflix睇開Narcos既我地自然淆左淆，dead air左。
呢個時候已經就快凌晨12點喇，姨姨叫我地快啲開始摘定12粒提子


原來呢度新年有doce uvas(十二粒提子)既傳統，呢個西班牙傳統應該係殖民時期引入黎既。當除夕夜凌晨12點踏入新一年既時候，會響起12下鐘聲，每響一下大家就會食一粒提子同時許一個願望，我地都係第一次知道有呢個有趣既習俗，所以差唔多夠鐘就摘定提子諗定要許咩願

大家枱面都準備好提子喇

踏正12點，鐘聲就開始響起!! 即刻跟住其他人開始塞提子入口，我地無諗過個鐘原來3秒就敲一下，塞到差啲哽死 啲願望都係hang哂機咁不斷重覆身體健康出入平安 本身比大叔隊左都唔知幾多支酒都wing wing地，完左呢個咁fail既慶祝活動我地就返房訓了，新一年一定好健康同平安架姐。

男朋友唔飲奶，但又好鍾意食cereal，我發現中南美人雖然好鍾意食豆，但豆漿就好難搵，係度難得搵到盒杏仁奶比佢送服啲麥片 (8400cop~18hkd)

男仔既頭髮真係長得好快，男朋友留長髮又柒，每隔個零月就要幫佢剪一次側邊啲頭髮

雖然係度留得一個full day，但都好想出去游下水，下晝行左去路口一個海灣玩水


身心滿足後就返去煮晚飯了，途中見到呢隻顏色鮮艷既小可愛

夜晚用之前係華人超市買落既五香粉醃雞脾黎蒸，好好味，我發現只要有豉油同五香粉，就算長途既旅行都可以煮出千變萬化既家鄉滋味


下一站: 哥倫比亞-Providencia

係呀有湯又有飯，唔怪之好多人都話秘魯菜係南美國家之中最好味既，係餐牌隨便嗌一個都好好味。

多謝你係啲景本身靚姐