[重開][多圖][一年長途遊記] 中南美到南極-西伯利亞至東歐

比返個西瓜你，過幾日再扔

機票門市買平d 定 得門市有得賣？

佢個官網一直都show error呀，所以行去門市買。
岩岩再上仲error緊

認同玻利維亞係南美飲食最難頂既國家
連啤酒都可以無咩特別，燒雞變左最安全選擇 

[玻利維亞-La Paz]

La Paz係玻利維亞首都，西班牙名有和平既意思，但係晌遊客心目中係出名既罪惡之城，扒手 搶劫 假警察，不同既騙案係度都好常見，我地之後甚至遇過一個女人話試過係度搭錯假的士被綁架 但因為La Paz係交通樞紐，我地需要係度轉車去下一個地方，所以只好係度短短留一晚。

呢度亦係世界上海拔最高既首都，平均有海拔3600米高。好在我地由之前既三天過境團開始已經係三千零米既地區活動，加上晌3700米既Uyuni住左幾日，所以已經適應左高原既氣候，唔會再喘氣啦。

搭的士去酒店途中，見到滿天纜車飛黎飛去

朝早10點幾就黎到酒店，職員都好好比我地早checkin，可以入房抖下先，每晚Bs200，很不錯




訓完個晏覺又到左振奮人心既城市探索時候。之前兩星期之內遇左2次搶劫+1次車禍，加上呢個城市個臭朵，令我地變得好小心，所有野都杯弓蛇影，彷彿每一個人都會搶我野，每部車都會撞埋黎咁。今日既任務係出去買聽日既車飛，亦都想搭下滿天飛既纜車，但係做任之前首先要醫飽個肚先。

我地搵左好耐有無啲安全啲既食肆，摷摷下地圖搵到間日本人商會，入面有一間餐廳，感覺很可靠。反正玻利維亞菜咁難食，我地都唔執著於食本地菜，就行去呢度食下日本野啦。
市內環境，一整個就是爛溶溶



行左半個鐘，黎到安全屋了

呢餐真係好好味，所有野都係真日本菜味道


日本人商會就係一個纜車站附近，咁就腳就去遊左纜車河先啦

La Paz係一個盆地，市中心同有錢人住宅位於中間既凹位，窮人反而住係山上面，為左方便市民係咁既地形之間穿梭，纜車就成為左大眾既交通工具。呢度既纜車就好似地鐵咁樣，有紅黃藍綠等等唔同顏色既線，線與線之間可以轉車，當時仲差一條紫線未落成，當佢都啟用埋既時候所有線就可以連成一個circuit，到時交通就好方便啦。成個城市都甩皮甩骨，唯獨是呢個纜車系統咁光鮮。我地首先搭藍線，再轉黃線

每程Bs3 (~3HKD)

有入閘機但係要人手搣飛

每個車箱可以坐8個人，係城市上面飛黎飛去真係好有趣



呢啲纜車會係天橋同馬路之間穿梭，唔同顏色既線又會一高一低咁穿插，感覺好科幻


之後我地就轉黃線

有幾條纜車線都可以去到山頂，我地揀左由藍線可以接駁到既黃線。由谷底去到最頂，景色真係好特別，亦都可以清楚見到La Paz既盆地地貌


係山頂睇左陣風景


好多人會上黎山頂睇呢個城市既夜景，上網睇過啲相係好靚，但我一啲都唔想夜晚晌La Paz既街道流連。黎到山頂已經去到海拔3800米，個頭有啲痛，行左個圈就返返落山。就快聖誕節，纜車站都有好多裝飾


又有小朋友既畫，睇黎大家都好鍾意呢個城市既纜車


唔記得點解上網買唔到第二日既巴士飛，要去市中心遊客區果邊買。遊客區附近有個巫婆市集，售賣各種奇奇怪怪既野，例如係草泥馬胚胎、掃把、青蛙乾、林林總總既山草藥等等，真係好似童話書入面巫婆會用到既野咁。咁獵奇既野比著係以前既我一定會衝入去周圍走，但呢一刻我地都有點心力交瘁，品流複雜既市集暫時就唔去住了，係街口裝兩裝就返去酒店。

第二朝一早就搭巴士離開呢個令人不安既城市，途中見到好多人晌度排隊。雖然呢個國家好多野都唔好，但啲人既服飾真係好得意，呢啲婆婆既帽到底係點固定係頭上面



下一站: 玻利維亞-Copacabana

係......其中草泥馬肉真係難食之最
我地要食藥所以無買到啤酒飲呀，有一餐絕望得滯仲去左間韓國餐廳食煎蛋辛辣麵，都要成Bs30
其餘時間烚薯仔塞飽個肚就算

有日本野食 應該即場濕晒

輕輕一推 留名

推

好好睇

留名等睇

沒有小冬瓜的第二天

見到樓豬被劫
令我諗起當年係雅典俾人偷野同追賊
加油阿寫得好好睇

[玻利維亞-Copacabana]

Titicaca湖係世界上最高既高山湖泊，一半位於玻利維亞，另一半位於秘魯。Copacabana係玻利維亞境內Titicaca湖邊既一個城鎮，由Uyuni搭3個半鐘巴士就黎到，車費Bs50左右。就算舞住咁大部巴士，玻利維亞人依然係瘋狂駕駛，好在中間一段路要轉船，可以落車抖抖氣。黎到中間所有人都要落車，巴士自己搭舢舨過對面岸


乘客就一齊迫艇仔

湖水好清

上返車坐多一個鐘就黎到位處3800米高Copacabana


為慶祝活著多好，今次我地住湖邊既酒店


湖景帶有露台仔既雙床房，包早餐每晚Bs620

望出去既景


搞掂哂就出去食晏晝啦，沿住湖邊有好多大排檔，呢度最出名食湖入面既Trucha鱒魚，檔口呀姐都會不斷叫trucha trucha拉客。我啲西文唔好，果時仲以為呀姐嫌我地個身臭，叫我去沖涼(ducha)
鱒魚開邊原條煎，係晌玻利維亞食過最好味既野，好好味


湖邊啲大排檔間間價錢都差不多，每份碟頭飯Bs30左右。食完係門口買左杯迷之飲料，由後面個白色桶倒出黎既，飲落有啲似之前係智利飲過既桃水，Bs3一杯，好味，覺得由呢度開始好似有啖好食了


第二日我地報左個快閃半天團，遊覽湖上既太陽島Isla de Sol同月亮島Isla de Sol

黎到Copacabana既遊客都會黎太陽月亮島，呢啲團行程好商業化，我地參加完之後覺得唔係好鍾意。呢兩個島似乎有一啲印加帝國既神話故事，太陽神月亮神之類，對印加人好重要咁樣，導遊一輪嘴咁講西文我地完全聽唔明 只係勉強聽到集合時間
呢度既湖水好清，其實都幾靚

呢兩個島仔好細，其實無咩行，有啲零碎既遺跡，民居，紀念品檔咁。太陽島上面有間酒店，有啲人會鐘意搭船黎住一兩晚咁樣。
造工有點嚇人的雕像

之後去埋隔離既月亮島，呢度有啲遺跡，但無解說或者指示牌，完全唔知咩來

離集合時間仲有成粒鐘，有啲悶，去撩下細路玩，氹左佢地好耐先肯比我一齊玩


好鍾意呢張相

呢兩個婆婆摘左啲草係古跡前焚香作法


呢個咁悶既團好快就完左，返到碼頭聞到好香既炸豬肉味，原來有個呀嬸擺檔賣緊炸五花腩

睇佢笑得幾開心，事關呢個奸商每兜肉賣成Bs20，而我地又唔爭氣忍唔住買左兜黎食

豬油炸豬腩肉真係正到不得了，我地邊行邊食，有兩個韓國大叔雙眼發哂光咁望住我地 好心的我就指左佢地去奸商大嬸度買黎食，我諗佢地一定係好掛住家鄉既燒肉啦。

晚飯再食美味煎魚

食完去遊客街濕平下，呢度有好多用alpaca毛整既冷衫同斗蓬，軟綿綿好舒服，而且好保暖，每件都係六十零蚊港紙。同男朋友一人買左件冷衫，呢度啲斗蓬都好靚，男朋友好鍾意但係完全唔襯佢，所以佢就買左件叫我著


Copacabana無乜特別，我地係度留左兩晚就走了。條腰唔好想幫個大背囊減減磅，呢兩張係墨西哥露營既睡蓆就係度卸下，唔帶上路喇

離開Copacabana，我地就出發去Titicaca既另一邊，進入秘魯，去一個好似童話世界咁既浮島過聖誕啦。

下一站: 秘魯-Las Islas flotantes de los Uros

有啖好食開心到對眼濕哂

偷懶期間食錯野嘔左兩日
岩岩係廁所返出黎啦，出返篇短短的比你地送飯

巴打好堅
咁你有無追得返啲野返黎??

樓主好好休息下先
好返先再寫啦
我冇嘢做入嚟推下post嫁咋

一年行程既遊記 睇怕你要打兩年

事發係咁：
當時清晨同朋友搭地鐵
突然一班當地既靚仔湧入車廂係咁迫
迫到我同啲朋友分開曬
突然我朋友大叫WALLET!先知道出左事
成班賊立即衝出車廂四散
我地就去追
(上面個過程都係一分鐘左右，車門未閂)
之後同朋友包抄截到其中一個賊仔
但佢身上乜都無
應該早就交左俾同黨啦
朋友既幾百歐羅就咁無曬
宜家諗返都好癲
如果班賊有刀仔我地應該會瀨野
所以一啲都唔堅

[秘魯-Las Islas flotantes de los Uros]

Las Islas flotantes de los Uros 呢個名有點長，拆開黎睇既話Islas flotantes 意思係浮島，los Uros 係晌Titicaca湖上生活既烏魯族人，所以呢個名既意思係”烏魯族人的浮島”。呢啲小島係由莎草札成，一個個浮係湖面，明明存在係世界上但因為唔係土地，所以地圖上唔會有屬於佢地既點點。

前往浮島要由秘魯Puno出發，我地先從Copacabana去Puno，呢程車好麻煩，要巴士轉小巴，再上車落車走黎走去過關轉車。去到Puno之後轉的士去一個小碼頭，我地既host就係度等我地啦


遊覽浮島其實可以參加一啲快閃半天團，但我一直好晌往可以住係咁特別既浮島上面 所以我地就決定係島上面住兩晚過聖誕 坐船仔出發去我地住既小島，沿途見到既呢啲莎草科植物叫Totoro，同蘆葦有啲似，佢地就係整浮島既素材喇

漸漸黎到烏魯族既區域，呢度幾十個大大小小既島有民居、學校，亦有啲係好似我地即將要住既民宿



呢個就係我地入住既島


浮島係由厚厚既Totoro札成，踩上去軟綿綿，彈彈下咁，好得意 黎到果日係平安夜，島上都好有聖誕氣氛，起左棵由totoro搭成既聖誕樹

呢個係同我地同齡既host Juan一家住既小島，除左佢地一家住既屋之外，仲有兩間比較豪華既房間比客人住，兩年前岩岩新開張，每晚HKD1100包三餐。
我地間房，景觀好無敵，安躺床上就可以睇到日出

屋邊有個小露台

為左唔污染湖水，廁所係旱廁，馬桶入面笠住個垃圾膠袋，屙完屎就倒啲木糠落去冚住啲異味，每日成個膠袋清走

房既環境固之然係優秀，但都唔及host兩個成日走入房既小朋友咁得人鍾意 我地間房又再次成為兒童樂園




安頓好之後我地就去飯廳食lunch，好好餸架，有魚有菜，佢地真係好鍾意食藜麥，餐餐都有

食完飯，Juan就拎左幾條草出黎教我地織掛係聖誕樹上既裝飾。佢地係用天然既顏色黎將Totoro染色，編織前首先要用水浸軟，先可以將佢屈成唔同既形狀


我地邊學織草，Juan邊同我地講關於Titicaca湖同浮島既簡介。原來烏魯族人起島既機制有啲似丁權，每個烏魯族男仔大個都有權可以起一坐島，我地身處呢座小浮島島齡7年，就係Juan當初打算成家立室既時候起既。佢地既島會好似船咁落撈黎防止隨水流飄走，而浮島因為自身重量會不斷下沈，每15日就要補一次島上既草加厚返個島，因此佢地自己住既屋都係細細間好輕身，方便一撩就撩得起可以補屋底下既草。

傾傾下就織左幾舊野出黎，唔係咁易呀，織得有啲醜

島上面既靚靚咕𠱸套都係嬸嬸一針一線自己整既

織完小手工，繼續同細路玩


4歲哥哥Andre同3歲妹妹Ale，我地既西文只係僅僅夠同到Ale BB溝通

佢地爸爸搭既韆鞦，個地下軟綿綿，撻落地都唔會痛



話咁快就玩到日落，呢一日既日落同呢個島一樣咁夢幻


因為係平安夜，Juan約埋啲親戚一齊黎食聖誕大餐，我地都拎埋係Mendoza賣落，車禍中奇蹟生還既紅酒出黎同大家一齊分享

Juan佢好厲害架，之前係Puno既大學讀Tourism既，難怪可以將呢度打理得咁好。而佢太太就係村入面既幼稚園義教，希望從小開始教小朋友傳統既烏魯語，令佢地既語言可以傳承下去。佢地一家感覺都好善良敦厚，同佢地相處好舒服。開party點少得汽水，黎返支印加可樂，好似忌廉咁既味

席上仲有我地既鄰居，一對墨西哥母女。旅途上遇到陌生人不外乎都係問下你係邊度黎，how’s your city咁，呢個23歲既墨西哥妹妹話佢並唔鍾意佢既家鄉，正打算離開去一個新既城市闖一闖。兩年前既我地話，其實我地都唔係太鍾意香港，覺得香港人好自私、勢利，係一個只係講錢既地方。我好記得佢問左一條當時我地無諗過，但而家每個香港人都諗緊既問題:「既然唔鍾意你既城市，點解唔去一個比到你更好生活既地方重新開始?」當刻我答唔到。

旅行左咁多地方，其實我最羨慕其他地方既唔係風景靚、物價低、樓價平，而人民既民族性。點解人地提起自己既城市總係會雙眼發光，到底愛一個地方係咩感受，我真係好想知道。兩年後既今日我清楚明白了，原來歸屬感，係與你既城市一齊同哭同怒，同笑同樂，係尋遍世界卻只能夠係香港搵到既野。如果再有機會遇上呢個女仔，我好想話比佢知原來即使係咁勢利既香港，都依然有好多善良既人，有好多可愛既地方，而我地唔離開既原因，或者就係因為無辦法捨棄對呢個地方既歸屬感。

差不多到晚上12點既時候，我地同大家一齊出去望向對岸既Puno，欣賞踏正零時零分放既煙花，迎接2018年既聖誕日