[重開][多圖][一年長途遊記] 中南美到南極-西伯利亞至東歐

我都覺呀 同埋去旅行身邊果個人真係好緊要，一個岩既人會令成個旅程更加圓滿，男朋友一定我係最好旅伴

costa rica真係好正 我又去翻睇一次先

多謝支持

係呀
呢一組相我都好鍾意，後生仔影既時候係黃昏，兩個人好親暱，而老人影既時候係半夜，兩個人之間有個距離感，呢啲對比我都好鍾意。

睇緊蘇黎世，有一年，差唔多三千

果陣我都搵過
最長只係條半年
之後一係你返一返香港
一係係外地買
最後我買左醫保only
可以無限期

可能老人家偷情緊

樓主同男朋友關係好好 好sweet
搵到個人互相扶持真係好重要
希望你地一直都咁錫對方

Btw而家歐洲篇啲氣氛同南美篇真係好唔同
南美篇好開心好adventurous
歐洲篇就日常啲平實啲

番工番到好眼訓

樓主廚藝有待進步

小冬瓜

之前提過，Tallinn舊城區係歐洲北部保存得最完好既中世紀古城，古城被城牆所包圍，城中散落著富有歷史感既尖塔同教堂。第二朝食完早餐，我地就出去散散步，腳踏著石春路遊走於古城之中



行到古城區高處，可以眺望到不遠處既波羅的海


好多煙囪仔

當時正值春天，周圍開滿鮮花，睇見都寧舍開心。最常見係呢種西洋水仙，佢個樣同我地過年既水仙好唔一樣，呢啲大朵好多，黃黚黚咁樣

呢日男朋友企圖練習人像攝影，但因為我嚴重不配合而感到氣餒，話我啲動作成個傻仔咁喎




行到黎由屋企望出黎見到既果間教堂，佢叫做亞歷山大·涅夫斯基主教座堂，係一間典型俄羅斯風格既東正教教堂

呢度連公廁都好符合周圍既格調

高牆底又會有啲好似童話故事入面既小木門

城牆外有幾棵櫻花樹，樹底既指示牌話呢幾棵樹係日本送比愛沙尼亞既禮物


古城面積唔係太大，但真係一個好靚既地方。不知不覺就散步左一晝，晏晝係遊客區搵左間幾有格調既餐廳食，見好耐無食過鴨，屎忽痕叫左碟黎食

之前我地都唔知道原來外國人煮鴨鍾意煮到三成熟 乜家禽唔係要徹底煮熟架咩，我地真係大鄉里 呢舊好似鴨肉刺身咁既肉真係食唔慣，好腥，好彩份量細細地，勉強都啪得哂落肚。

行左一晝，都開始攰喇，又係時候去今日既重頭戲，芬蘭浴
無錯呀，又係芬蘭浴 芬蘭浴唔係只得芬蘭先有，其實Baltics既人都好鍾意焗桑拿，上次去完摩登著泳衣版既，今次就要滿足我要求，去個裸體版本架喇

呢間Kalma saun係Tallinn歷史最悠久既桑拿之一，由1928年開始已經存在，係一間傳統愛沙尼亞桑拿。呢度入場費男仔11歐，女仔就10歐

桑拿房係男女分開既，男仔係地下，女仔係上層，我地約好個半鐘之後出返黎門口等，就分頭行事喇

女賓個場好少人，一入去先係換衫區，呢度一個人都無，空盪盪到我影左張相，都幾雅致架

見我柒下柒下，清潔嬸嬸就教我要點做，原來呢度無獨立更衣室既，晌度除哂衫塞入locker就係，搞掂就可以入隔離度門
(google示意圖)

入到去係一個類似浴場既地方，有啲膠盆同石櫈比人沖身，旁邊有堆花灑同一個比人過冷河既凍水池，行到盡頭就係桑拿房。

呢度人少少，長期都係得5個人左右，有人坐係石櫈批腳皮，有人訓係桑拿房托起個屎忽踩無影單車，最多人就係帶埋mask黎敷，睇黎愛沙尼亞人真係好識嘆。

比較特別既係呢度地下有好多樹葉，原來當地人鍾意邊焗桑拿邊用一束束樹枝拍打身體，加速血液循環。我研究過呢啲樹葉有兩款，一款塊葉大啲，另一款就好似松葉咁尖尖地，呢啲樹枝係reception位置有得賣，4歐一束。可惜呢度啲女人都掛住扮靚批腳皮，無人表演比我睇，但即使係咁，前人用完既樹葉碎片都足以令成間房都瀰漫住一陣芳香既氣味，成個環境香噴噴，好舒服。

我玩左一個鐘左右就出返黎喇，估唔到男朋友竟然都咁快出左黎，而且佢睇落好崩潰 原來佢係男賓部睇到既野同我睇到既好唔同，佢話果邊超多人，而每個男人雖然個身光脫脫，但頭頂都戴住一頂好似史力奇頭上既絨帽，仲見識到佢地用樹枝好似神打咁大力拍打自己添
(google示意圖)

上網睇到當地人戴呢種帽既原因係為左保護頭部，防止溫度過熱。男朋友話佢地除左會自己拍打對腳之外，仲會互相幫對方拍打背脊，劇烈程度係可以令個地下好似打完風既路面咁佈滿樹葉 而且佢話成個男賓部都好撚臭，啲男人係更衣室食咸魚送啤酒，入面空氣唔流通，搞到成個桑拿房都係腥臭味，啲阿叔仲瘋狂倒水落桑拿房個石春爐，間房熱到不得了，總之就好難受咁話。

佢影返黎既男子更衣室

就咁睇都覺得比女更衣堂霉好多，好似隔住mon都聞到陣除咁 總結黎講我覺得呢個桑拿超正，佢就唔太歡喜，真係難服侍呀

[下一站: 愛沙尼亞-Pärnu]

有畫面

係咪一年無限次但一定要每個trip都係由香港出發果隻?

係呀，我地果時搵到既都係咁，香港買既旅遊保每程既出發地點一定要係香港。男朋友都同你一樣，買左醫保。

咁就唔知

我都希望係咁呀
我諗寫既野都係反映左自己既喜好 我都係鍾意南美多啲，始終之前少接觸果邊文化，所以日日都過得好新奇刺激有趣。歐洲既日子就比較舒服，無咁提心吊膽，可以比較放鬆咁遊覽。

碟矮瓜貴相係差咁啲既

好好笑 寫得好有畫面

推
睇到去南極lu
呢排resign左扮工靠曬你個遊記

係南極d相影得好靚
我都好想去一次南極
呢張真係好正 save底左
好似拍緊戲 企鵝特工隊

幫樓主宣布 爛尾

[愛沙尼亞-Pärnu]

Pärnu係位於愛沙尼亞西南面既沿海城市，夏天既時候係當地人既渡假聖地，之不過而家天氣咁凍，唔知點解男朋友會想黎呢度呢? 佢話佢晌Pärnu報左一個tour，想帶我去睇一樣我好鍾意既動物，我就懷住期待既心情坐巴士南下喇

車上面有angry bird玩，唔怕悶

巴士兩個鐘後就黎到Pärnu

呢度好似個小鎮咁，可能因為唔係旺季，或者呢度不嬲都無乜人，呢度人影都唔多隻，好舒服。啲街坊見到我地都會微微笑，周圍又開滿花，個個都好似好開心無乜憂愁咁。經過一堆鄉村小屋之後，就黎到我地今次住既屋

點解好似危樓咁款既，同我想像中的不一樣喎 係信箱拎鑰匙果陣大力啲都驚會扯冧幅牆，睇黎佢地業主立案法團做唔到野，走廊天花lum哂，電線亂糟糟

上網睇到啲相唔係咁架喎，我地懷住一絲盼望開門



好彩入面都好靚好四正，每晚二百零蚊港紙黎講好好啦。呢邊既床就算係雙人床都好，都會比兩張單人被，而唔係一張雙人被，我好鍾意咁樣呀，夜晚唔使爭被丫嘛。

呢度門口成日都有隻污糟貓，啲毛好厚好好摸



講返點解我地會黎呢度，原來男朋友記得我好鐘意河狸，即係條尾好大呢種可愛既生物呢

咁岩佢見到Pärnu附近有個叫Soomaa National Park既國家公園，啲人會專程去呢度睇河狸，而且我地都好耐無郊遊喇，所以就報左個kayaking tour去呢個國家公園玩喇。

河狸係夜行性動物，所以呢個tour都係傍晚開始既活動，下晝6點導遊就黎危樓接我地出發喇，佢係個後生既時當兵既大叔，英文好流利。去國家公園既車程需時35分鐘，好快我地就準備落船喇



我地三個人坐埋同一隻船，基本上我都唔使點撐 呢條河無乜水流，水面好平靜，湖面既倒影好清晰好靚




出發既時間係黃昏，我地最鐘意黃昏既光，好溫柔，所以去到邊我地都好鍾意一齊睇日落。呢段路一開始係晌兩片大草原中間既河流，草地上開滿小黃花，有啲牛牛係度食緊草

呢隻蘇格蘭牛牛仲有隻角撞歪左，兩隻角一上一下，我都係第一次見 穿過大草原之後，我地就開始進入樹林


大叔話入到樹林開始就係河狸活躍既棲息地，我地要降低聲量同可以開始留意周圍。雖然未見到佢地本尊，但其實樹林四周都係河狸生活過既痕跡，好似呢啲比佢地刨過既樹

咬斷左既樹幹好似一支支鉛筆咁，好趣緻。佢地除左用樹枝黎起屋，樹皮同嫩芽都係佢地既食物。佢地真係好得意，我連睇到呢啲佢地咬過既樹枝都覺得好開心，好似同佢地有少少接觸咁 晌岸邊我地見到一大堆柴，原來呢個就係河狸巢

佢用樹枝同泥搭成，差唔多有成個人咁高，導遊仲話佢聽到有幾隻BB係入面添

巢入面有秘密通道可以落水，防止佢地比其他動物襲擊，係附近一個荒廢左既巢我地就可以見到呢條通道

岸邊都不時可以見到佢地落水既通道


睇完佢地既巢，我地又繼續上路

天色開始愈黎愈暗，周圍既動物叫聲愈來愈多，晌傍晚昏暗既天色之下浸淫係大自然之中，感覺有啲神秘




仲未見到河狸，都有少少失望架，但睇野生動物就係咁，換個想法當黎撐下艇仔欣賞風景都唔錯丫。就係轉換緊想法之際，竟然見到一隻河狸岸鳩鳩咁企左係草地上面望住我地，而且仲有第二隻係附近遊緊，興奮到我氣都唔敢抖 愈游愈埋既時候佢終於發現左我地，即刻用佢果條好似飯勺咁既大尾巴大力拍水游走。導遊話個係佢地警告同伴有危險既方式，雖然嚇親佢地好唔好意思，但睇到呢一幕真係好開心呀。

我細細個就好鍾意睇河狸既紀錄片，覺得佢地又得意又聰明，個樣又蠢蠢地咁，咁近距離見到佢真係好興奮。呀，唔記得放相添

盡左力喇呢張係我地唯一一張影到佢地個頭突出水面游水既相 遲啲係波蘭會再見到佢地，到時就有多圖架喇

返到屋企已經夜間11點，求其淥左個麵食就訓

訓醒又係時候煮早餐，今日早餐食前兩日係超級市場買落既肉丸，配呢樽似乎應該係同肉丸一齊煮既醬，再自己加啲蕃茄


好好味


前一日活動到有啲攰，所以呢日我地決定分頭自由活動，我留係屋企洗衫休息，男朋友就自己行出城happy

我地都住得幾近市中心，行15分鐘就可以去到個shopping mall


果排咁岩有英雄主義上畫，佢歡天喜地咁走左去睇戲，佢話個院好大，啲櫈好好坐，觀眾十隻手指數得哂，而且3D眼鏡係免費派既，戲飛都只係6歐，好正咁話



睇完佢又周圍行左陣

行到盡頭就係沙灘，差啲唔記得左呢度係個海邊渡假城市添



短短既三日兩夜Pärnu之旅就完結啦，黎緊我地會進入三小國既下一個國家，拉脫維亞。

[下一站: 拉脫維亞-Sigulda]

佢千叮萬囑話要寫埋男子桑拿既情況，話驚有巴打睇完文比我fake左去