[重開][多圖][一年長途遊記] 中南美到南極-西伯利亞至東歐

多謝你欣賞呀，我啲朋友都有問我拎南極相原圖做wallpaper
你要唔要原圖呀? 我可以比你呀，但唔知可以點樣比

消失左幾日之嘛

個湖倒影好靚

d 波鞋做乜9

好想去旅行啊屌

睇到throat singing 個段，咁岩有份assignment 研究非物遺產，即刻拎左黎做原來2009年入左list

好靚呀
我都想要
日日扮工 都入黎F5

又暈咗

[拉脫維亞-Sigulda]

Sigulda位於拉脫維亞中部，鄰近高亞河谷，係中世紀既時候有一定既地位，因此呢度一帶都有唔少果個時期起落既城堡。我地由愛沙尼亞既Pärnu可以搭呢種色彩繽紛既小火車過去


又一係個人少少好舒服既鄉下小鎮


呢間木屋仔就係今次既hostel


明明已經係春天，仲一時出太陽一時落雪，好奇怪既天氣


附近既貓都係長毛貓


黎到既第一晚都係去超級市場買下野食，睇下聽日行程咁。俄羅斯東歐波羅的海一帶都好興呢隻叫Kvass既飲品

Kvass係一種用黑麥麵包發酵而成既飲品，有少少汽但又無汽水咁澎湃，飲落酸酸甜甜得黎有陣好香既麥味，真係好正，我每次見到都會買黎飲

呢晚我地係common kitchen邊煮飯邊同鄰居傾計，識左兩個荷蘭黎既朋友仔。佢地係一對荷蘭情侶，年紀同我地差唔多，都係進行一長途旅行，所以大家好岩傾。佢地由荷蘭出發，而家係旅行既第三個月，打算沿陸路一直去到亞洲，遲啲都打算會去香港，我地約好左如果到時返左去，一定會帶佢地認識香港。我地相處既時間只有短短呢一晚，估唔到佢地又真係等到我地返去先黎香港，旅行時既緣份真係好奇妙，係度亂入一下佢地既香港遊
----------------------------------------------------------------------------------------------------------
呢兩條友係電車迷，黎香港最大既心願就係坐電車

原來全世界唔係好多地方有雙層電車，我地睇慣睇熟既野，遊客見到原來真係會雙眼發光。

帶左佢地去飲茶、食煎釀三寶、深水埗大排檔，一齊棟係地產舖門口睇下世界第一既樓價


男仔話想睇幻彩詠香江，我都唔明點解咁多外國人都鍾意睇呢個光害show，但都帶左佢地上山頂睇夜景


原本仲有好多野想同佢地做，想帶佢地去去沙灘、行山、打邊爐，可惜佢地只係晌香港留三日兩夜，我地唯有揀啲重點黎去。佢地黎既時候係2019年7月，我地相信要最好咁認識香港，有啲地方一定要帶佢地去

佢地好比心機睇每一篇文宣，問我地啲塗鴉既意思，我地都好落力解釋。佢地話自由對佢地黎講係與生俱來既，對於香港呢個國際城市竟然同想像中既咁唔一樣表示驚訝，睇住呢啲情境，真切感受到人民既難過同渴望。我記得，係太古廣場拜祭既時候，佢地同我地一齊流眼淚。係煲底，男仔望住爛左既大門沈默左好耐，最後佢問 ”呢度寫住public entrance，但市民竟然要藉著敲碎玻璃先可以入到去，咁public entrance既意思係啲咩?”

不斷思考，我諗呢個就係旅行既意義。好多謝佢地揀左呢個最壞同時最好既時候黎遊覽香港，比起歌舞昇平既假象，希望呢個真實既香港可以令佢地從旅程當中得到更多。

佢地條問題，我唔識答。我同佢地講 "遲啲去到中國旅行，可能你就會明白到多啲架喇。"
----------------------------------------------------------------------------------------------------------

旅行最正係識新朋友，然後又係旅途中再聚

但有時幾唏噓

亂入完畢，我地又返返黎2019年4月既Sigulda。

Sigulda最出名係一個叫Turaida castle既城堡，今日我地就會去呢度。城堡係山谷既另一邊，所以我地要搭纜車跨越河谷，再行一陣山先去到。由hostel行去纜車站，途中會經過一個士的公園

Walking stick係Sigulda既一個標誌，周圍都可以見得到，連車站附近座搭都生左隻手出黎拎住支士的

原來因為呢度山谷既地形唔容易行走，19世紀既時候當地居民就開始整拐杖賣比遊客拎去行山，久而久之拐杖就成為左呢度既標誌，仲有唔少工作坊比你可以整一條屬於自己既walking stick添。

經過完士的公園，盪失路去左個有個土法摩天輪既遊樂場。我成日都好想玩下呢啲人手轉既摩天輪，但男朋友話而家時候已經唔早，再唔快啲走就去唔到城堡，希望以後再有機會玩啦


行左十五分鐘左右我地就黎到纜車站，呢度最佳既觀光季節係秋天，到時整個山谷都會變成金黃色，秋高氣爽既時候行山都舒服啲

纜車入面無座位，因為車程只有七八分鐘，咁就盛惠8歐

離遠可以見到今日既目的地


落纜車之後係條村觀光左陣，我地就開始行山喇

呢段路唔係太長，地圖話45分鐘就到。沿途都係舖得好靚既路，行起黎好舒服，我諗而家既遊客已經唔再需要買拐杖黎行山喇。只不過始終係山谷，啲樓梯級都係不斷上上落落

路上間唔時有啲遺跡

仲見到隻孵緊蛋既雀媽媽


途中會經過一個Gutmanis山窿，呢個山窿似乎都係個名勝黎，傳說發生過啲愛情故事，所以啲遊客刻哂名係度希望愛情長長久久，睇啲年份好多都係18xx年刻落架啦

但呢個時候無啦啦落左陣大驟雨，我地望左兩眼就跑左去遊客中心避雨，順便食lunch


行下坐下避下雨，兩個鐘之後就黎到Turaida城堡。Turaida係當地語言既意思係Thor’s Garden，城堡由1214年開始興建既紅融城堡，隨著逐漸失去戰略地位，晌1776年一場大火後就被荒廢，後來先重新修復比大眾參觀




趁博物館仲未閂門，入去參觀一下


到底呢啲畫係叫做乜野風格，好似咕嚕咕嚕魔法陣入面啲人咁，真係好得意

城堡既圓塔係可以行上去既，經過三四層空盪盪既樓層就可以去到塔頂






塔頂既景色好靚，可以俯瞰整個河谷既風景

古時啲人好奇怪，參觀既時候硬係鐘意係牆上面刻字。窗邊既紅磚刻滿哂佢地到此一遊既紀念，最多就係五六十年代既時候刻既字

咁樣雖然有啲破壞呢棟成千年既建築，但呢啲幾十年前既刻字都算係城堡既其中一段歷史，我覺得咁樣保留住都幾好丫。

參觀完，我地就返遊客中心搭小巴返小鎮sigulda喇。
坐小巴5分鐘都唔使就返到去，係間café食左餐美味既晚餐，呢碟煮到酸酸甜甜既豬好好食

男朋友話我好耐無食過蛋糕喇，買左舊請我食

呢度啲野全部都好好味呀，唔知三小國既野係咪都係咁好食架呢，如果係咁既話要考慮多啲出街食飯先得喇

[下一站: 拉脫維亞-Riga]

好開心，俾到靈感你真係好喇
絲打比心機

今晚返去執幾張出黎，聽日放條link係度share 比你地

都係萍水相逢既過路人，有機會再聚都已經好慶幸

樓主出文咁大件事有人講

終於追到有update

望返轉頭
19年雖然痛苦但已經係有自由有希望嘅一年
而家更加黑暗 一日比一日痴撚線
大家都要頂撚住

緣份好重要

我都試過係旅途上遇到一大班都係毒毒去旅行既人
然後一齊玩左成個月 每日都會見面
到走果下真係幾落莫 但又要知道每個人都只係對方生命中既過客 以家唯有等疫情完左後再聚

咩國家既人

企鵝仔張相真係好可愛
樓主快UPDATE

[拉脫維亞-Riga]

黎到拉脫維亞首都，明明本來藍天白雲，無啦啦就落起雪黎。呢幾日既天氣都好奇怪，係晴天>雪>雨>狂風暴雨>晴天不斷循環，真係好難捉摸

今次住既地方係呢個新穎既屋苑，價錢每晚300hkd


呢度所有野都好好，缺點就係離市中心就遠左啲，超越左步行可以去到既距離，不過唔緊要，係度可以用Yandex或者Taxify call車，call完好快就有車，收費都好合理。

Riga呢度有個景點好岩我地去，就係里加中央市場喇


Riga central market既外形好特別，係由五個半圓形既倉組成，睇落同歐洲其他地方既街市好唔同。其實佢既前身係第一次世界大戰時期既齊柏林飛船機庫，當時隨著城市發展需要覓地建造一個衛生而合乎成本效益既街市，建築師就諗到將舊飛船機庫結構保留，內部改建成街市既想法，呢個晌當時黎講係一個非常之盛大既項目，令里加中央市場連同里加古城一齊被納入世界文化遺產。

呢個街市面積好大，係露天既位置已經擺左好多攤檔，淨係蔬果檔應該都有百零檔

係出面既主要係生果、蔬菜、種子、盆栽，全部都好新鮮，即刻忍唔住要揀返袋蕃茄，0.8歐1kg，勁抵

大部份生果舖都係賣緊士多啤梨同藍莓，應該係當造季節，啲士多啤梨fresh到仲有蝸牛仔係上面爬緊



街市既內部根據每一個倉分區，有蔬果、肉類、海產、雜貨等等




搭的士既時候司機同我地講，黎到呢度一定要試下Riga名產Black Balsam

Black Balsam係一種藥草酒，相傅13世紀既時候由馬可孛羅由中國帶返歐洲，之後再由當地既藥劑師加以改良流傳直今，有啲人會當藥咁飲，據講可以醫傷風同埋對腸胃有益，我諗就等於係拉脫維亞養命酒之類。就咁聽以上呢段文字都唔敢對佢既味道有啲咩期望，不過話哂係名產，我地就買左支細過益力多既迷你版本返去試試。男朋友仲話原味唔夠刺激，要試就要試櫻桃味既草藥酒，話有親櫻桃味既野通常都好伏，咁樣先夠衝激咁話。

行到盡頭係一個food court，啲野食味道都唔錯，係度仲見到啲台灣旅行團自由活動緊添


返到屋企，拎今日啲戰利品出黎欣賞下先。首先係嬌豔欲滴既蕃茄，好好味，直接啪左兩個入口做下午茶


然後係1.4歐500g既士多啤梨，甜到好似不緊砂糖入口咁


不得不再次讚揚呢度既豬肉真係好優秀，我上網查過原來拉脫維亞出產既豬都幾出名，呢日買左條五花腩煮南瓜

男朋友話係佢食過最好味既五花腩


食完飯，係時候摸下酒杯底，試下支Black Balsam喇。呢支野聞落真係好臭，就咁隊好重口味，完全就係好似飲緊藥水咁。的士哥哥教過我地，呢隻酒一定要溝野飲，佢就建議我地溝熱咖啡。我地硬係覺得溝咖啡好似怪怪地咁，自己試下溝啲其他野飲先

以為溝kvass既味道會唔錯，點知飲落麻麻地，無乜特別，比起就咁飲kvass仲難飲左。之後我地又試左溝熱紅茶，原來呢隻酒熱飲會香好多，呢次感覺好啲。最後我地都係乖乖地聽當地人話，煲左壺咖啡黎溝佢飲

好出色!! 真係好好飲!! Black Balsam中和左咖啡既酸味，同時保留左酒香，熱飲既溫度令草藥酒道氣充斥住整個鼻腔同喉嚨，感覺好舒服，加上少少櫻桃味，呢隻櫻桃味好怡人，完全唔係果啲工業香精味，飲落真係好香甜，係從來未試過既味道，好沖擊味蕾既體驗呀。Black Balsam真係一定要溝熱咖啡先有呢個神奇既效果，重點係我平時係完全唔飲咖啡的，都覺得咁好味，好後悔買得咁細支，如果再比我見到一定會買支1L裝塞入背囊帶上路呀。