[拉脫維亞-Riga]
黎到拉脫維亞首都,明明本來藍天白雲,無啦啦就落起雪黎。呢幾日既天氣都好奇怪,係晴天>雪>雨>狂風暴雨>晴天不斷循環,真係好難捉摸
今次住既地方係呢個新穎既屋苑,價錢每晚300hkd
呢度所有野都好好,缺點就係離市中心就遠左啲,超越左步行可以去到既距離,不過唔緊要,係度可以用Yandex或者Taxify call車,call完好快就有車,收費都好合理。
Riga呢度有個景點好岩我地去,就係里加中央市場喇
Riga central market既外形好特別,係由五個半圓形既倉組成,睇落同歐洲其他地方既街市好唔同。其實佢既前身係第一次世界大戰時期既齊柏林飛船機庫,當時隨著城市發展需要覓地建造一個衛生而合乎成本效益既街市,建築師就諗到將舊飛船機庫結構保留,內部改建成街市既想法,呢個晌當時黎講係一個非常之盛大既項目,令里加中央市場連同里加古城一齊被納入世界文化遺產。
呢個街市面積好大,係露天既位置已經擺左好多攤檔,淨係蔬果檔應該都有百零檔
係出面既主要係生果、蔬菜、種子、盆栽,全部都好新鮮,即刻忍唔住要揀返袋蕃茄,0.8歐1kg,勁抵
大部份生果舖都係賣緊士多啤梨同藍莓,應該係當造季節,啲士多啤梨fresh到仲有蝸牛仔係上面爬緊
街市既內部根據每一個倉分區,有蔬果、肉類、海產、雜貨等等
搭的士既時候司機同我地講,黎到呢度一定要試下Riga名產Black Balsam
Black Balsam係一種藥草酒,相傅13世紀既時候由馬可孛羅由中國帶返歐洲,之後再由當地既藥劑師加以改良流傳直今,有啲人會當藥咁飲,據講可以醫傷風同埋對腸胃有益,我諗就等於係拉脫維亞養命酒之類。就咁聽以上呢段文字都唔敢對佢既味道有啲咩期望,不過話哂係名產,我地就買左支細過益力多既迷你版本返去試試。男朋友仲話原味唔夠刺激,要試就要試櫻桃味既草藥酒,話有親櫻桃味既野通常都好伏,咁樣先夠衝激咁話。
行到盡頭係一個food court,啲野食味道都唔錯,係度仲見到啲台灣旅行團自由活動緊添
返到屋企,拎今日啲戰利品出黎欣賞下先。首先係嬌豔欲滴既蕃茄,好好味,直接啪左兩個入口做下午茶
然後係1.4歐500g既士多啤梨,甜到好似不緊砂糖入口咁
不得不再次讚揚呢度既豬肉真係好優秀,我上網查過原來拉脫維亞出產既豬都幾出名,呢日買左條五花腩煮南瓜
男朋友話係佢食過最好味既五花腩
食完飯,係時候摸下酒杯底,試下支Black Balsam喇。呢支野聞落真係好臭,就咁隊好重口味,完全就係好似飲緊藥水咁。的士哥哥教過我地,呢隻酒一定要溝野飲,佢就建議我地溝熱咖啡。我地硬係覺得溝咖啡好似怪怪地咁,自己試下溝啲其他野飲先
以為溝kvass既味道會唔錯,點知飲落麻麻地,無乜特別,比起就咁飲kvass仲難飲左。之後我地又試左溝熱紅茶,原來呢隻酒熱飲會香好多,呢次感覺好啲。最後我地都係乖乖地聽當地人話,煲左壺咖啡黎溝佢飲
好出色!! 真係好好飲!! Black Balsam中和左咖啡既酸味,同時保留左酒香,熱飲既溫度令草藥酒道氣充斥住整個鼻腔同喉嚨,感覺好舒服,加上少少櫻桃味,呢隻櫻桃味好怡人,完全唔係果啲工業香精味,飲落真係好香甜,係從來未試過既味道,好沖擊味蕾既體驗呀。Black Balsam真係一定要溝熱咖啡先有呢個神奇既效果,重點係我平時係完全唔飲咖啡的,都覺得咁好味,好後悔買得咁細支,如果再比我見到一定會買支1L裝塞入背囊帶上路呀。