[阿根廷-Buenos Aires]
早幾日得閒望過下地圖,我地想之後由南面既智利搭車去北面既玻利維亞。當時岩岩開放左特區護入玻利維亞既落地簽,但見識過當地人工作效率之後,覺得去到邊境先搞落地簽應該會好麻煩,所以都係決定預先整左呢個簽證先。
大部份人都會係秘魯Puno整玻利維亞簽證,但如果先去秘魯再兜返落智利再上玻利維亞就好唔順路。我地搵到原來Buenos Aires都有間玻利維亞大使館,就決定返去留兩晚順便整簽證喇。
搭左20個鐘巴士,又返到黎Buenos Aires,而家搭十零廿個鐘既巴士簡直係濕濕碎
今次住間service apartment, hkd350左右一晚
抖一晚第二日就出去整簽證,佢地既地鐵網頁幾好用,會教你點搭車
領事館位於既區域好雜亂,好似充滿罪罪氣息咁,係街上面行有啲不安。
申請簽證之前要上網填form同埋印啲文件出黎,我地搵左間上個世紀既網吧黎輪流上網
搞掂就去大使館遞表
遞完表就要去銀行入錢,間銀行九丈遠,中途仲要經過好多令人不安既橫街。簽證每人盛惠1260peso,但係銀行原來唔收美金,我地身上又唔夠阿根廷peso,櫃員機繼續撳唔到錢,徬徨之際我地去左附近間華人超市求助,講廣東話既老板娘二話不說就幫我地唱左錢
返到銀行,職員又話唔可以兩個人夾埋比錢,一定要每人exact7ly 1260peso,咁佢先出到一人一張單我地整簽證
點解個腦咁萌塞,爭論左一輪我地又死死地氣返去老闆娘度請佢幫我地打散啲錢。
好不容易終於俾好錢返到領事館,批簽證既過程好快,係事前既功夫好撚煩。拎到簽證之後我同男朋友快樂地selfie了一張相,就離開大使館了。
出左門口經過一個轉角位既時侯,突然之間有幾個呀嬋用奇怪既步法湧過黎,我最憎人迫住哂,燥燥地就撞開左佢地。淋善既男朋友就比佢地圍住左,突然地下發出好似有人跌野好清脆既叮一聲,所有人一齊望向地下,呢個時候班呀嬋就好似陣風咁散開了。
成件事只係發生係幾秒之間,男朋友回過神來摸下褲袋既時候發現部IphoneX已經不見了
我諗晌行黎行去唱錢既時候已經被人盯上左,再加埋拎到簽證之後一朝得志selfie呢個愚蠢舉動,唔偷我地野偷邊個呢
不幸中之大幸係銀包證件passport都仲係度,而且唔係拎住把刀搶,大家都無穿無爛就好啦。
受驚之後我地又返左華人超市買餸,買左啲好耐無食過既牛丸魚蛋,埋單時同老闆講岩岩比人偷完野,佢都覺得哦係咩好平常,仲話呢度無野好玩,叫我地下次唔好再黎BA
返屋企放低啲餸,傍晚既時候我地行左去附近間狗屋報案,諗住話會唔會可以claim得返保險咁。我地去左附近間tourist police center,有得間咁既野係度應該都係成日有遊客比人搶野啦
但間野好似就閂門,阿根廷差佬就帶左我地去另一間分行報案
佢帶左我地入一間房仔,入面有好大個熒幕,坐左陣竟然有個人係熒幕度出現左
好耐無見過高科技產物既我地嚇左驚,好似睇緊科幻片咁。熒幕入面個人曉講英文,我地同佢交代發生左既事,佢就腥左張野比我地print出黎,報案紀錄get。
回家路上見到有人跳Tango
聽講Tango係一種偷情既舞蹈,舞步挑逗又欲拒還迎,就算我地完全唔識跳舞都覺得好好睇,呢啲係咪就係傳說中既張力,身無分文既我地都打賞左啲智利peso過佢地。原本我地打算朝早整好簽證,下晝就去Tango發源地貧民窟La Boca睇跳舞,估唔到去唔成都可以係街頭睇到咁精彩既表演,都幾好丫。
獨一無二但係無人想要既手信,報案紀錄乙份
以為已經好黑仔啦,又有邊個會諗到呢挺獨一無二既手信之後會陸續有來
而返到房慢慢研究先發現,我地份旅遊保原來唔包電話被偷…… 都係果句啦,最緊要人無事姐。
久違了的菜心
臨搭車走前既朝早再周圍行下
跟手搓定飯團,烚定啲墨魚丸,入落保溫壺帶上路去搭通宵巴士
今程巴士搭12個鐘
無左部出發前先新買既電話,男朋友表示有啲唔開心,下一站要去酒莊買醉。
下一站: 阿根廷-Mendoza