[重開][多圖][一年長途遊記] 中南美到南極-西伯利亞至東歐

是呀火山果度

繼續留名支持 
回憶返晒來

tour d景好靚，有冇摸下d小動物

黎到三天團既最後一日，我地凌晨3點幾起身，4點鐘就出發，目的地係為人熟悉既天空之鏡Salar de Uyuni烏尤尼鹽湖。佢係世界上最大既鹽沼，鏡面只有每年12~3月有足夠降雨量形成積水既時候先有機會可以見到，我地黎既時候係12月中，所以都可以碰碰運氣睇下會唔會見到天空之鏡。

由酒店去鹽湖要差不多兩個鐘車程，其實我地都遲左啲出發，希望可以趕及係天光前去到鹽湖睇日出啦。鹽湖係無路既，司機都係憑經驗係一望無際既地面奔馳，始終時間太早，上車無耐大家都繼續訓覺，迷迷糊糊間突然感覺到架車失控急轉彎，我地個位無任何安全帶或者扶手，下意識即刻捉住前面既椅背，車身左搖右擺直趷左兩下，就成部車打橫片起碌左幾個關斗，仲係半夢半醒唔知發生緊咩事既時候我個人就已經上下倒轉係破爛既車箱入面。

呢個時候我淨係聽到男朋友叫我快啲由窗口爬出去先，我仲問佢係後排點走呀，先發現原來我個窗玻璃已經爆哂，爬到出黎，就見到咁既畫面

而係呢個時候，亦咁岩日出了

我係第一個爬出黎既，男朋友係最後一個，一見到對方就恍如隔世咁擁抱見到朋友們都仲行得走得都放心啲，真係不幸中之大幸，大家都互相擁抱，呢個時候我地團既另一部車都黎到，佢地都即係衝落車攬住我地，話頭先係後面目擊成個意外，真心以為我地會死。

鑑於呢度真係middle of nowhere，我地又尚算行得走得，所以爬完出黎就自己收拾返呢個殘局，推返正部車，執返啲行李呀電話之類既野出黎，仲搵得返我眼鏡甩左出黎塊鏡片添


神奇既係玻璃窗都碎哂，但係晌Mendoza買果支酒竟然無爛到，我地個袋都幾堅

導遊弟弟因為佢既疏忽駕駛好內疚，佢自己都傷得唔輕，隻腳行得唔太好，我地都無怪責佢。佢向大家了解傷勢，坐前排既德國妹妹係唯一一個個位有安全帶既，所以唔太傷，但就係因為坐前面視覺太全面所以嚇到不停喊同嘔。坐中間既希臘情侶就主要係手同腰痛，我地坐後排，男朋友鄧親條尾龍骨，我就副眼鏡淆哂，chok親條頸，隱隱作痛，一郁頸入面就好似有好多碎石咁卡啦卡啦響，啲聲都幾恐怖。

望住個日出，當刻感受好深，我地差啲就無命見到今日既日出。原來可以平安地同心愛既人一齊渡過每一日，真係好難得既一回事

當時我地都覺得自己無咩大礙，心諗反正橫掂都黎到啦，不如開開心心繼續玩啦，大難不死其實都係一件值得慶祝既事丫，所以我地都暫時忘記痛楚，影相影得好開心




唔理條頸既哀鳴，學人係咁跳

我地部蓋左棺既車，左邊兩個車胎同我個窗都爆哂


等左幾個鐘，我地部救援車輛終於黎到，可以離開呢個地方啦。大家睇落無乜大礙，最近既城市係我地既目的地Uyuni，所以我地都決定繼續行程


一開車我就發現自己好唔對路，就算架車轉少少彎都會極其恐懼，心跳手震兼捉實扶手驚到流眼淚，好不容易捱到去下一個check point，德國妹已經奪門而出邊喊邊跑開我地都比佢自己冷靜一下。呢度係鹽湖上一個長滿仙人掌既島Isla de Pescado，上面長滿幾個人甚至幾層樓咁高既仙人掌，聽講呢啲仙人掌一年只會長高1cm，唔知佢地已經幾多歲呢



呢度景色確係好獨特，仲見到有新人係度影婚紗相添

雖然炒車壓爛左好多野食，但我地依然可以係度豐富地野餐

食早餐既時候德國妹妹終於返黎，佢話頭先跑左上山頂放聲大哭，而家感覺好左好多了。綜合大家意見，我地得出既結論係當時導遊弟弟見到見到右手邊開始日出，同德國妹講帶大家去右邊睇靚景，係無收油既情況之下急轉彎，當時時速80左右，車頂又放滿大家既行李，平衡唔到部車就失控向左翻騰兩周半，無穿無爛真係上天保佑。

離仙人掌島不遠處有一個萬國旗景點

唔知點解世界各地既遊客都會將自己國家既國旗帶黎插，日積月累就成為左呢堆萬國旗。係度我地搵到塊小小既香港旗，希望下次有機會再黎既話，插住既會係真正屬於大家既香港旗


臨返到Uyuni市區時仲經過一個叫火車墳場既景點，不過呢個時候我地都無人有心情觀光了，相都無影到。繼續坐係部車入面簡直係極度既心理煎熬，返到市區之後導遊車左我地返旅行社，有個似乎係老細既伯伯不停同我地講對唔住，話會負責我地所有醫療費用，問我地要唔要去醫院body check。我地又覺得好似未有需要去醫院，果時大家都無乜要求，只係希望佢地唔好太重罰導遊弟弟。我地都記得佢既夢想，反正大家都無重傷，如果因為一次過失就無辦法實現夢想就真係太可憐啦，希望佢唔會被罰得太重啦。(我都覺得自己最大既缺點就係太善良，唔怪得出到黎做野一直都係比人蝦)

傾完之後，大家都各散東西，佢地嫌Uyuni太落後，都即刻去其他城市過夜。我地覺得身上既傷愈黎愈痛，唔敢即刻揹住大背囊移動太遠，就係Uyuni book左幾晚hostel，睇下情況再決定之後點做。旅行社留左個contact比我地，叫我地如果情況惡化要去醫院就隨時搵佢地，造就左之後幾日有專車接送大爺一樣既生活

快d更新 想 睇

文呀

[玻利維亞-Uyuni]

想去烏尤尼鹽湖既巴絲，睇完我既經歷都好希望你睇埋呢篇野
https://www.tripadvisor.com/ShowTopic-g317033-i9974-k2164609-Serious_safety_risks_on_Salar_De_Uyuni_trips-Uyuni_Potosi_Department.html
呢次意外同我地一樣都係成架車晌鹽湖上打關斗，唔同既係同我地一樣坐後排既遊客即場死亡，司機被救出車外後幾分鐘亦死左，另外仲有一個遊客送院途中不治。可能你會覺得去邊度玩都有風險，篇文都係成12年前寫落，但我可以話你知文中所講既車上面無安全帶，所用既車殘舊不堪，意外發生後無一部經過既車肯停低拖以援手，呢啲情況到而家都係一樣。而且Uyuni市內醫院診所都係好簡陋，所以無可能係短時間內得到有水準既治療。好多人可能都只係見到天空之鏡好靚呀，想影打卡相呀，呢啲夢幻既一面，但我都好希望大家知道個風險，了解完覺得承受到ok既先至出發。

返到香港之後我都有醫過條頸，但直至寫緊文既而家間中仲會有碎石聲，而坐車轉大啲既彎例如係迴旋處咁都仲係會心跳加速同冒汗。出發前我唔明白，而家我知道點解呢個trip會有人覺得係waking nightmare，因為我就係其中一個覺得呢個係惡夢既人，雖然景色真係靚到可以用超現實黎形容，但我諗我既餘生應該都唔想再去呢個地方。

Sorry for呢兩篇長氣左，但我見無乜中文網站會提醒大家Uyuni tour既危險，而家又愈黎愈多人對天空之鏡趨之若騖，所以都想大家出發前都可以了解清楚，有個心理準備。

返到Hostel條頸愈黎愈痛，除左去廁所之外就係攤係床上面。到左夜晚頸開始完全郁唔到，頭入面好痛，右手間中麻痺，覺得應該要去睇下醫生了男朋友都話佢運功屙屎既時候尾龍舊骨都好痛，我地就叫左旅行社聽朝一早黎車我地去醫院檢查。

夜晚訓唔著，我同男朋友兩個訓係床上面手拖手傾計，呢次經歷令我地更加珍惜對方。發生意外既時候我腦海一片空白，淨係知要捉實啲野唔可以飛出去，我問男朋友，炒車既時候諗緊乜，有無人生走馬燈? 佢竟然話當時以為係花式漂移表演黎 估唔到係真炒車，架車停低一擘大眼就見到我半個人fing左出窗，對腳係窗出面吊吊揈，如果部車反多半個圈我應該就係咁先，嚇到佢傻左，好驚我會死。我真係完全無印象，自問平時記性都幾好，但其實果兩日既事我都唔係好記得，都係靠男朋友講返比我知。

第二日旅行社就黎接我地去醫院，仲帶左一個識講英文既女仔黎翻譯。Uyuni市內景色

以為係去醫院，原來係去間私家診所，我地見呢度有住院部又有得照x光，規模都唔細，應該ok既。當時就快聖誕節，好有節日氣氛

黎到就度高磅重先

跟住就去照x光，負責用部機條友好似唔知自己做緊乜咁，感覺好唔可靠。呢度既醫生都係也也烏，總之最後醫生話我地啲骨無斷無裂，所以無事，食下止痛藥聽日再返黎覆診就ok啦 (返到黎香港再照，醫生話我頸骨有兩節扭歪左，話我點解果時仲要繼續去玩)

簡單黎講並無得到啲咩治療，條頸依然郁唔到。撞車既時候副眼鏡撞到歪哂，旅行社就話幫我地配過副眼鏡。但間眼鏡舖同市內環境一樣咁殘，呢度既款都好娘，望住好似賣菜呀姐既視光師幫我用綠色既洗潔精洗副眼鏡，我心諗都係唔使係度配過副新了。呢間舖唯一好處就係有細細隻螺絲批，男朋友可以用黎幫我拗返好副眼鏡，然後再用AA膠痴返個鼻托。等佢既期間我就同賣菜呀姐個仔玩

整好眼鏡我地去左附近搵間餐廳食飯。草泥馬肉係度好普遍，佢地既毛可以用黎整衫，肉可以食，個樣又得意，真係好超卓既一種動物

我嗌左煎草泥馬扒

好難食……有一種說不出既騷味，我都唔算好揀飲擇食，平時狗屎垃圾都食得好開心，但呢碟野我真係一半都食唔到……對唔住呀草泥馬。

食飽飽，call旅行社送我地返hostel

再次得到送都唔想要既手信

差少少我就見唔返屋企人，唔能夠用自己雙腳周圍走，唔可以同男朋友結婚、生仔、一齊老去，原來我好怕會死，原來死亡係可以咁接近。所以有咩想做既，真係要坐言起行去做，放低無謂既執著同枷鎖，因為你只會活一次，而你永遠都唔知道自己幾時就會突然離開呢個世界。

呢次意外對我地都影響幾大，令隨後繼續行程既心態都有所改變，唔再成日虧待自己，行返個easy mode

承蒙錯愛
我文筆邊見得人，係度同大家吹下水已經好開心了

有啲pt返下真係好喇
放假又可以出文

果度既景應該十年如一日係咪架

有摸啲有人放養既草泥馬
軟綿綿的

趕工趕起左

幾個鐘前先出完一篇咋喎好chur呀

真係好危險，睇埋tripadvisor個度，有時生命真係好脆弱，諗住開開心心去旅行但好多野都唔到你控制

所以你嗰程車撞到你地後面兩條友死咗？

好驚險

又要屌

小冬瓜呢

好驚險

第二日又返去覆診，醫生見我地無乜好轉，就係我地屎忽拮左支好痛既針。打完之後無耐，就可以短暫性活動自如啦 咁珍貴既時刻，我地緊係好好把握黎觀光一下。

我地行左去一個local街市，呢度好似我地既天光墟咁，全部都係地攤黎

玻利維亞女人既衣著好特別，好多仲係係著住佢地傳統既服裝，闊闊既百摺及膝裙，札住兩條長長既辮，頭上面戴住頂草/絨帽

街市既女人仲會纜住大大塊圍裙，有塊布綁係背脊，好似個包袱咁，買左啲餸就塞落去

除左賣餸同日用品既地攤，仲有啲熟食攤檔

呢一檔係食羊頭湯既，個個人碗入面都浸住一個羊頭，個頭仲痴住啲啲毛呀眼珠同埋牙。人地食緊我就費事咁無禮貌隊埋去影，我地亦都無勇氣叫一碗黎試，見啲食客就吮得津津有味既，喜歡吃羊既巴打不妨去試下。
我with醒目水樽袋


我地都係無意中發現呢個街市，大約係市中心間教堂附近，實際位置都唔記得了，我諗可以參考返後面黃色果座塔(好無參考價值既遊記)。好鍾意行呢種地道既街市，無其他遊客，感覺好有血有肉充滿生命力，係間唔時啲當地人會覺得你係咁影相好煩屌鳩你。

買完餸，我地就返去煮飯。男朋友話要照顧我煮大餐過我食

係佢最鍾意既午餐肉配大量我最鍾意既蔬菜


之後我地又出左去，反正無咩做，散步過黎航空公司門市買機票

黎緊我想去Titicaca湖，要去果度首先要去玻利維亞首都La Paz。由Uyuni 去La Paz其實可以搭8個鐘巴士，或者搭巴士再轉火車，但呢個時候我已經再承受唔到搭車既恐懼，更加唔好講係長途既巴士，所以我地決定揀最快既方法，搭只需要50分鐘既飛機極速逃離呢個地方。

佢地既sir滑梯會否太刺激，呢塊野夏天點玩


玻利維亞既野食都算係我地旅行以黎最難食既，好彩我地係街口搵到間味道還好既燒肉


我成日係度諗到底佢地個petpet真係咁大，定係入面著左底裙所以撐到個下盤咁大架呢

頂硬上揹返個大背囊出發去機場，每一步都好似難行左好多咁。Uyuni同San Pedro都係一樣咁多韓國人，睇下幾多整容阿珠媽等上機

晌Uyuni留左四日，終於可以離開呢個鬼地方

咁短既機程竟然都有野食有野飲

由天空上望返落鹽湖

飛機轉彎果時先發現，原來我唔只係驚左搭車，連飛機轉彎我都好驚恐。對於以前每日都係飛機上返工，遇氣流當食生菜既我黎講真係好打擊，亦都好懊惱如果再係咁落去，點樣可以繼續旅程呢。精神折磨左50分鐘之後，我地又黎到下一個出名唔安全既城市喇。

下一站:玻利維亞-La Paz

係，果篇野真係嚇到我標冷汗
所以活在當下、珍貴眼前人呢啲老生常談真係講得好岩。

呢次意外對我地都影響幾大，令隨後繼續行程既心態都有所改變，唔再成日虧待自己，行返個easy mode

所以你嗰程車撞到你地後面兩條友死咗？

太長了唔quote哂

唔是呀係咪我表達得唔好，我地車無人死，係網上見到有其他人係同一個地方遇到相同既意外，果次意外入面坐我地個位果兩個死左。